1 Me fulweg e girdi’ ni lungurad,“I mini’ e ra mich u wan’ e ren’en ni gadad ra weliy murung’agen e chiney?Mini’ e rayag ni guy pa’ SOMOL ni be maruwel u fithik’ e ren’ey?

2 I SOMOL e turguy ni fare tapigpig roke nge ilal ni bod ba ke woldug ni tugul ko but’ nib mlik’.Ir e gathi bod be’ nib tolang ara bfel’ ya’anni ngad adaged ni ngad changargad ngak.Ra ni guy ma dabi unan’uy ngakdariy ban’en nib gamog rok nra fael owchedad ngak.

3 Kad darifan niged, ma kad dabuyed;i athamgil u fithik’ e gafgow nge amith.Ma dariy be’ ni adag ni nge changar ngak,da feked yathin ni gowa be’ nib m’ay fan.

4 “Machane me athamgiliy fare gafgow ni susun e gadad e nge aw ngodad,nge amith ni susun e gadad e ngad pired nga fithik’.Ma gadad be leamnag ni gafgow nike yib ngake ba gechig ni Got e ke pi’ ngak.

5 Machane ni maad’ad ngak ni bochan e denen rodad,mi ni pirdi’iy ni bochan e kireb ni kad ngongliyed.Gechig ni gafgow riy e ke palo’ nagdad,dumow ni aw ngak e ke gol nag dad.

6 Gadad gubin ni gadad bod e saf ni yan ngabang,ra bagadad me yan ko gin be leamnag.Me gagiyegnag SOMOL e gechig nge aw ngak,ni fare gechig ni gadad gubin ni bay tapgin ni nge aw ngodad.

7 “Rib gel e gafgow ntay ngak, machane me athamgiliy u fithik’ e sobut’an’;de yog ta’ab bugithin.Bod ba pifak e saf ni yibe n’en ni ngan li’ ngem’,bod ba saf ni yibe n’en ni ngan th’ab bunu’en nge m’ay,ma de yog ta’ab bugithin.

8 Nib ni kol min turguy ni ngan li’ ngem’ mu’un fek i yan ni ngan li’,ma dariy be’ ni rusnag ko n’en ni bay nrin’ ngak.Ni thang e fan rok ni bochan e denen rok e girdi’ rodad.

9 Nturguy ni ngan uneg ko girdi’ ni kireb ngan chibgiliyrad,min chibgiliy nga ba low ni tagil’ be’ ni bo’or ban’en rok,ni yugu aram rogon ndawori ngongliy ba pa’ i oloboch,ara keyog bbugithin nde riyul’.”

10 Be ga’ar SOMOL,“I gag e gu turguy ni nge gafgow;yam’ ni tay e ba maligach ni fan e nggu n’ag fan e denen ko girdi’.Ere bayi guy e pi’in owchen;bayi par nib n’uw nap’an,ma tin kem’ay i leamnag rog e bayi yan i aw nga rogon u daken.

11 U tomuren ba yafos ni gafgow ma bay ki felfelan’ bayay;bayi nang ni gafgow ni i tay e de yan i aw nib m’ay fan.I ir e tapigpig rog nib mat’aw; ni rigub felan’ ngak,gechig rok e girdi’ ni pire’ e bayi gafgow u tanggin,me ngongliyrad ngar manged girdi’eg ni yad ba mat’aw.

12 Mu gu pi’ ngak tagil’ ni ngu’un tay fan riy,ni bang u fithik’ e pi tagil’ ko girdi’ nib sorok ma ba gel gelngirad.Pi’ ir ngan li’ ngem’,min ta’reb rogonnag ngak e girdi’ nike th’ab e motochiyel.Me yan i fek luwan e pi tadenen ni pire’,me meybil ni nge n’ag Got fan e denen rorad.”