¶ 1 MANATU eni ki ho Tubuaga i he gaahi aho o hoo kei jii, i he heeki ke hoko ae gaahi aho oe kovi, be unuunu mai ae gaahi ta‘u, aia te ke behe ai, oku ikai teu ma‘u i ai ha fiemalie;

2 I he heeki ai ke fakabouli ae laa, be koe māma. be koe mahina, be koe gaahi fetuu, bea uha mau be ae gaahi ao:

3 I he aho e tetetete ae kau tauhi fale, bea e fakatomabee ae kau tagata malohi, bea kuo tuku ae momoji ae kau momoji koeuhi kuo jii, bea e fakabouli akinautolu oku jio atu i he mataba jioata,

4 Bea e tabuni ae gaahi mataba i he hala, oka jii ae logoaa oe mea momoji, bea e tuu hake ia i he le‘o oe manu buna, bea e vaivai hifo ae gaahi ofefine oku faji hiva;

5 Oka nau ka manavahe foki ki he mea maoluga, bea oku i he hala ae gaahi fakailifia, bea e matamatalelei ae akau koe alimoni, bea e mamafa ae hee, bea e oji ae tokaga: koeuhi oku alu ae tagata ki hono nofoaga tologa, bea oku alu fano i he gaahi hala ae kau tagilaulau:

6 I he teeki vete ae afo siliva, be laiki ae ibu koula, be maumau‘i ibu ohu i he vee mata vai, be maumau‘i ae mea takai i he gutu oe vai keli.

7 Ka e toki liliu ae efu ki he kelekele o hage ko ene i ai: bea e foki atu ae laumalie ki he Otua aia naa ne foaki ia.

¶ 8 Vaiga oe vaiga, oku behe e he Malaga; oku vaiga ae mea kotoabe.

9 Bea koeni, koeuhi nae boto lahi ae Malaga, koia naa ne akonaki‘i ai ae kakai ki he boto; io, naa ne tokaga lahi o ne kumi atu mo ne fokotuu ae gaahi lea fakatātā lahi.

10 Nae kumi e he Malaga ke ne ma‘u ae lea lelei: bea koia kuo tohi oku totonu ia, bea koe gaahi lea ia oe mooni.

11 Koe gaahi lea ae boto oku tatau ia moe mea majila, moe fao oku tuki ke ma‘u e he Eiki oe gaahi fakataha, aia oku foaki mei he tauhi be taha.

12 Bea koeni, E hoku foha, ke valoki‘i koe e he gaahi mea ni: oku ikai hano gataaga oe gaohi oe tohi; bea koe lau lahi i he tohi koe mea fakamāfajia ia ki he kakano.

¶ 13 Ke tau fanogo ki he fakaoji oe gaahi mea ni kotoabe: Ke ke manavahe ki he Otua, bea ke fai ki he ene gaahi fekau: he oku katoa i he mea ni ae gaue totonu ae tagata.

14 Koeuhi e omi e he Otua ae gaue kotoabe ki he fakamāu, moe mea fufu kotoabe, be ko ha mea lelei ia be kovi.