¶ 1 BEA nae fekau e he tu‘i bea naa nau tanaki fakataha kiate ia ae kau mātua kotoabe o Juta mo Jelusalema.

2 Bea nae alu hake ae tu‘i ki he fale o Jihova fakataha moe kau tagata kotoabe o Juta moe kakai kotoabe o Jelusalema, moe kau taulaeiki, moe kau balofita, moe kakai kotoabe, ae jii moe lahi: bea nae lau eia i ho nau teliga ae gaahi lea kotoabe ae tohi oe fuakava aia kuo ilo i he fale o Jihova.

3 Bea nae tuu ae tu‘i o ofi ki he bou e taha, bea fai eia ae fuakava i he ao o Jihova, ke muimui ia Jihova, bea ke tauhi ene gaahi fekau mo ene gaahi fakamooni, mo ene gaahi tuutuuni aki hono loto kotoa, mo hono laumalie kotoa, ke fai ae gaahi lea ae fuakava ni aia kuo tohi i he tohi ni. Bea nae fakamooni ae kakai kotoabe ki he fuakava.

4 Bea nae fekau e he tu‘i kia Hilikia koe taulaeiki lahi, moe kau taulaeiki o hono ua oe lakaga, moe kau leo mataba, ke omi kitua mei he fale tabu o Jihova ae gaahi ibu kotoabe nae gaohi ma a Beali, bea ma ae vaoakau, bea ma ae gaahi nāunāu oe lagi: bea naa ne tutu ia i tuaa i Jelusalema i he gaahi goue o Kitiloni, bea naa ne fetuku a hono efuefu oia ki Beteli.

5 Bea naa ne fakagata ae kau taulatevolo, aia nae fakanofo e he gaahi tu‘i o Juta ke tutu ae mea namu kakala i he gaahi botu maoluga i he gaahi kolo o Juta, bea i he gaahi botu nae takatakai ki Jelusalema; akinautolu foki nae tutu ae mea namu kakala kia Beali, moe laa, bea ki he mahina, bea ki he gaahi fetuu, bea ki he nāunāu kotoabe oe lagi.

6 Bea naa ne omi ae tamabua oe vao tabu mei he fale o Jihova, kituaa i Jelusalema, ki he vaitafe ko Kitiloni, bea nae tutu ia i he vaitafe ko Kitiloni, bea momoji ia ke efu, o ne li ae efu oia ki he gaahi tanuaga oe fānau ae kakai.

7 Bea naa ne holoki hifo ae gaahi fale oe kakai agafakasotoma, aia nae ofi ki ke fale o Jihova, aia nae fai ai e he kau fefine e nau lalaga ae gaahi buibui ki he vaotabu.

8 Bea naa ne fetuku ae kau taulaeiki kotoabe mei he gaahi kolo o Juta, bea ne ui‘i ae gaahi botu maoluga aia nae tutu ai e he kau taulaeiki ae mea namu kakala, mei a Keba o a‘u ki Beasiba, bea nae holoki hifo ae gaahi botu maoluga oe gaahi mataba aia nae i he huaga oe mataba o Josiua koe bule oe kolo, aia nae i he nima toohema o ha taha i he mataba oe kolo.

9 Ka nae ikai alu hake ae kau taulaeiki ae gaahi botu maoluga ki he feilaulauaga o Jihova i Jelusalema, ka naa nau kai ma tae fakalevani fakataha mo ho nau gaahi kaiga.

10 Bea naa ne fakauli‘i a Tofeti, aia oku i he telea ae fānau o Henomi, ke oua naa fakalaka atu e ha tagata a hono foha be ko hono ofefine, i he lotolotoga oe afi kia Moleki.

11 Bea naa ne ave faga hose aia nae foaki e he gaahi tu‘i o Juta ki he laa, i he huaga ki he fale o Jihova, o ofi ki he botu fale o Natani‐meleki koe tauhi fale, aia nae i he vee kolo, bea naa ne tutu ae gaahi jaliote oe laa aki ae afi.

12 Bea koe gaahi feilaulauaga nae i he tua fale o Ahasi i oluga, aia nae gaohi e he gaahi tu‘i o Juta, moe gaahi feilaulauaga nae gaohi e Manase i he lotoa e ua oe fale o Jihova, nae holoki hifo ia e he tu‘i, bea feji‘i hifo ia mei ai, bea nae liligi ae efuefu oia ki he vaitafe ko Kitiloni.

13 Moe gaahi botu maoluga nae i he ao o Jelusalema, aia nae i he nima toomatau oe mouga oe bobo, aia nae laga e Solomone koe tu‘i o Isileli kia Asiteloti koe mea fakalielia ae kakai Saitoni, bea kia Kimosi koe mea fakalielia ae kakai Moabe, bea kia Milikomi koe mea fakalielia ae fānau a Amoni, nae maumau‘i akinautolu e he tu‘i.

14 Bea nae fejifeji‘i eia ae gaahi tamabua, bea ne ta hifo ae gaahi vao tabu, bea nae fakabito ho nau gaahi botu i he hui oe kau tagata.

¶ 15 Bea koe feilaulauaga foki nae i Beteli moe botu maoluga nae gaohi e Jeloboami koe foha o Nibati, aia naa ne fakaagahala‘i a Isileli, koe feilaulauaga moe botu maoluga fakatouoji, naa ne holoki hifo, bea ne tutu ae botu maoluga, bea nae malakaki ia ke fakaikiiki mo efu be, bea nae tutu moe vao tabu.

16 Bea i he tafoki ia e Josaia, naa ne jio ki he gaahi tanuaga aia nae i he mouga, bea naa ne fekau atu o hikitaga ae gaahi hui mei he gaahi tanuaga, bea ne tutu ia ki he feilaulauaga, bea nae maumau ia, o fakatatau ki he folofola a Jihova aia nae kalagaekina e he tagata ae Otua, aia naa ne kalaga aki ae gaahi lea ni.

17 Bea nae toki behe eia, Koeha ae tohi fakailoga ko ena oku ou jio ki ai? Bea nae tala kiate ia e he kau tagata oe kolo, Koe tanuaga ia oe tagata ae Otua, aia nae ha‘u mei Juta, o ne kalagaekina ae gaahi mea ni aia kuo ke fai ki he feilaulauaga i Beteli.

18 Bea nae behe eia, Tuku ai be ia; ke oua naa hiki hono hui e ha toko taha. Koia naa nau tuku ai be hono gaahi hui, fakataha moe hui oe balofita nae ha‘u mei Samelia.

19 Bea koe gaahi fale foki oe gaahi botu maoluga i he gaahi kolo o Samelia, aia nae gaohi e he gaahi tu‘i o Isileli ke fakatubu ae houhau a Jihova, nae hiki o ave ia e Josaia, bea nae fai eia ki ai o hage koia kotoabe naa ne fai i Beteli.

20 Bea naa ne tamate‘i ae kau taula kotoabe nae nofo i he gaahi botu maoluga, i he fuga oe gaahi feilaulauaga, bea naa ne tutu ae hui oe kakai i ai, bea toe alu ia ki Jelusalema.

¶ 21 Bea nae fekau e he tu‘i ki he kakai kotoabe, o behe, Mou fai ae katoaga oe Lakaatu kia Jihova ko ho mou Otua, o hage koia kuo tohi i he tohi oe fuakava ni.

22 Koe mooni nae ikai fai ha katoaga oe Laka‐atu ke hage koia talu mei he gaahi aho oe kau fakamāu nae fakamāu‘i a Isileli, be i he gaahi aho oe gaahi tu‘i o Isileli, be koe gaahi tu‘i o Juta;

23 Ka i hono hogofulu ma valu ta‘u oe tu‘i ko Josaia, aia nae fai ai ae katoaga ni oe Laka‐atu kia Jihova i Jelusalema.

¶ 24 Bea nae ave foki e Josaia akinautolu nae kau moe kau laumalie kovi, moe kau kikite loi, moe gaahi tamabua, moe gaahi otua loi, moe gaahi mea kovi kotoabe nae ilo‘i i he fonua o Juta bea i Jelusalema, koeuhi ke ne fai ki he gaahi lea ae fono aia nae tohi i he tohi nae ilo e Hilikia koe taulaeiki i he fale o Jihova.

25 Bea nae ikai ha tu‘i i mua ke hage ko ia, aia nae tafoki kia Jihova aki hono loto kotoa, bea mo hono laumalie katoa, bea mo ene malohi katoa, o hage koe fono kotoabe a Mosese; bea nae ikai tubu ha toko taha ki mui o hage ko ia.

¶ 26 Ka ne ogo ia nae ikai tafoki a Jihova mei he kakaha o hono houhau, aia nae tubu ai hono houhau ki Juta, koe mea i he gaahi ahiahi kovi a Manase aia naa ne fakahouhau aki ia.

27 Bea nae behe e Jihova, Teu hiki a Juta foki ke mamao mei hoku ao, o hage ko eku hiki a Isileli, bea teu liaki ae kolo ni ko Jelusalema aia kuou fili, bea moe fale aia naaku behe ki ai, E i ai a hoku huafa.

28 Bea ko hono toe oe gaahi gaue a Josaia, moia kotoabe nae fai eia, ikai kuo tohi ia i he tohi fakamatala ki he gaahi tu‘i o Juta?

¶ 29 I hono gaahi aho oona, nae alu hake ai a Felo‐niko koe tu‘i o Ijibite ki he vaitafe ko Iufaletesi ke tau‘i ae tu‘i o Asilia: bea nae alu atu a Josaia ke tau‘i ia: bea nae tamate‘i ia i Mekito, i he ene mamata kiate ia.

30 Bea nae ave ia, ka kuo bekia, e he ene kau tamaioeiki i he jaliote mei Mekito ki Jelusalema, bea nae tanu ia i he tanuaga oona. Bea nae ave e he kakai oe fonua a Jihoaasi koe foha o Josaia, o nau bani ia aki ae lolo mo fakanofo ia ke tu‘i koe fetogi o ene tamai.

¶ 31 Nae uofulu ma tolu ae ta‘u o Jihoaasi i he ene kamata bule; bea nae bule ia i he mahina e tolu i Jelusalema. Bea koe higoa o ene fa‘e ko Hamutali, koe ofefine o Jelemaia o Libina.

32 Bea nae fai kovi eia i he ao o Jihova, o fakatatau ki he mea kotoabe nae fai e he ene gaahi tamai.

33 Bea nae ha‘i bobula ia e Felo‐niko i Libila i he fonua ko Hemati koeuhi ke oua naa ne tu‘i i Jelusalema; o ne fakamoua ae fonua ki he tukuhau, koe taleniti siliva e teau, moe taleniti koula e taha.

34 Bea nae gaohi e Felo‐niko a Eliakimi koe foha o Josaia ke tu‘i ia koe fetogi o ene tamai ko Josaia, bea naa ne liliu hono higoa ke  ui ia ko Jihoiakimi, o ne ave a Jihoaasi: bea nae hoko ia ki Ijibite bea bekia ia i ai.

35 Bea nae foaki e Jihoiakimi ae siliva moe koula kia Felo; ka naa ne fai fono ki he fonua ke tuku mai ae gaahi baaga o fakatatau ki he fekau a Felo: naa ne bule ke omi ae siliva moe koula mei he kakai oe fonua koe omi taki taha o tatau moia nae lau kiate ia, ke atu ia kia Felo‐niko.

¶ 36 Nae uofulu ma nima ta‘u ae motua o Jihoiakimi i he ene kamata ene bule: bea nae bule ia i he ta‘u e hogofulu ma taha i Jelusalema. Bea koe higoa o ene fa‘e ko Sibiuta, koe ofefine o Bitaia mei Luma.

37 Bea nae fai eia ae kovi i he ao o Jihova, o hage koia nae fai e he ene gaahi tamai kotoabe.