¶ 1 NAE kamata bule a Jihoasa i hono fitu oe ta‘u o Jehu; bea nae bule ia i Jelusalema i he ta‘u e fagofulu. Bea koe higoa o ene fa‘e ko Sibia mei Beasiba.

2 Bea nae fai totonu a Jihoasa i he ao o Jihova i he gaahi aho kotoabe nae akonaki‘i ai ia e Jihoiata koe taulaeiki.

3 Ka nae ikai ave ae gaahi botu maoluga: nae kei fai feilaulau moe tutu ae mea namu kakala e he kakai i he gaahi botu maoluga.

¶ 4 Bea nae behe e Jihoasa ki he kau taulaeiki, Koe baaga kotoabe oe gaahi mea tabu kotoabe oku omi ki he fale o Jihova, ae baaga oe kakai kotoabe oku lau, ae baaga oku fakatatau ki ai ae tagata taki taha, bea moe baaga oku loto lelei ki ai ae tagata ke ne omi ki he fale o Jihova,

5 Tuku ke ma‘u ia e he kau taulaeiki, koe taki taha mei hono kaiga: bea tuku ke nau toe laga ae gaahi botu maumau oe fale, i he botu kotoabe oku ilo ai ha maumau.

6 Ka koeni, i hono uofulu ma tolu oe ta‘u oe tu‘i ko Jihoasa nae heeki ke toe laga e he kau taulaeiki ae gaahi botu maumau oe fale.

7 Bea nae toki ui e Jihoasa koe tu‘i kia Jihoiata koe taulaeiki, bea moe kau taulaeiki kehe, o ne behe kiate kinautolu, Koeha oku ikai ai te mou toe laga ae gaahi botu maumau oe fale? koia foki ke oua naa mou kei ma‘u ha baaga mei ho mou kaiga, ka mou tuku ia ke toe laga ae gaahi botu maumau oe fale.

8 Bea nae loto ki ai ae kau taulaeiki ke oua naa nau kei ma‘u ha baaga mei he kakai, bea nae ikai te nau loto ke toe laga ae gaahi botu maumau oe fale.

9 Ka nae ave ha geeji buha e Jihoiata koe taulaeiki mo ne vili ha ava i hono tabuni, bea naa ne fokotuu ia i he vee feilaulauaga, ki he botu fakatoomatau i he ene huage ha toko taha ki he fale o Jihova: bea nae ai ki ai e he kau taulaeiki nae tauhi ae mataba, ae baaga kotoabe nae omi ki he fale o Jihova.

10 Bea nae behe, i he e nau mamata kuo lahi ae baaga i he buha, nae ha‘u ae tagata tohi ae tu‘i moe taulaeiki lahi, bea naa na ai ia ki he gaahi kato, mo lau hake ae baaga aia nae ilo i he fale o Jihova.

11 Bea naa nau foaki ae baaga, ka kuo oji hono lau, ki he nima okinautolu nae fai ae gaue, akinautolu nae bule ki he fale o Jihova: bea naa nau totogi aki ia ki he kau tufuga moe kau laga fale aia nae gaue ki he fale o Jihova,

12 Bea ki he kau helehele maka moe kau ta maka, bea ke fakatau aki ae akau moe gaahi maka kuo ta ke toe laga aki ae gaahi botu maumau oe fale o Jihova, bea ki he mea kotoabe nae gaue aki i he fakafoou oe fale.

13 Ka nae ikai gaohi ma ae fale o Jihova ae gaahi ibu siliva, moe helekoji māma, moe gaahi ibu luoluo, moe gaahi mealea, be ha gaahi teuga koula, be ha gaahi teuga siliva, mei he baaga nae omi ki he fale o Jihova:

14 Ka naa nau foaki ia ki he kau gaue, mo nau toe laga aki ia ae fale o Jihova.

15 Bea nae ikai foki ke nau eke‘i ae kau tagata akinautolu nae tuku ki ho nau nima ae baaga ke totogi aki ae kau gaue, he naa nau fai agatonu be.

16 Nae ikai omi ki he fale o Jihova ae baaga i he fai hala, moe baaga oe agahala: he nae oe kau taulaeiki ia.

¶ 17 Bea nae alu hake a Hasaeli koe tu‘i o Silia, ke fai ae tau ki Kati, bea naa ne lava‘i ia: bea nae fakahaga hono mata e Hasaeli ke alu hake ki Jelusalema.

18 Bea nae too mai e Jihoasa koe tu‘i o Juta ae gaahi mea tabu kotoabe aia nae fakatabu‘i e Jihosafate, mo Jiholami, bea mo Ahasia, ko ene gaahi tamai, koe gaahi tu‘i o Juta, bea mo ene gaahi mea tabu aana, bea moe koula kotoabe nae ilo i he gaahi tukuga koloa i he fale o Jihova, bea i he fale oe tu‘i, mo ne ave ia kia Hasaeli koe tu‘i o Silia: bea naa ne foki atu mei Jelusalema.

¶ 19 Bea ko hono toe oe gaahi gaue a Joasi, bea moia kotoabe naa ne fai, ikai kuo tohi ia i he tohi fakamatala ki he gaahi tu‘i o Juta?

20 Bea nae tuu hake a ene kau tamaioeiki, mo nau teuteu ae laba, bea nae tamate‘i a Joasi i he fale o Milo, aia oku i he hala oku hifo ki Silia.

21 He nae ta‘i ia e Josaka koe foha o Simiati, mo Jihosabati koe foha a Someli, ko ene ogo tamaioeiki, bea naa ne mate; bea naa nau tanu ia fakataha mo ene gaahi tamai i he kolo o Tevita: bea nae fetogi ia i he bule e Amasia ko hono foha.