¶ 1 BEA nae tauhi kia Jihova e he tamajii ko Samuela i he ao o Ilai. Bea nae maugataa ae folofola a Jihova i he gaahi aho koia; nae ikai fakaha ha mea ha mai.

2 Bea nae hoko o behe i he gaahi aho koia, nae tokoto a Ilai i hono botu, bea nae fakaaau ke bouli hono mata, o ikai kei mamata:

3 Bea i he heeki ai mate ae māma i he fale tabu o Jihova, aia nae i ai ae buha tabu oe Otua, bea kuo tokoto a Samuela ke mohe:

4 Nae ui e Jihova kia Samuela; bea tali eia, Ko au eni.

5 Bea nae lele ia kia Ilai, o ne behe, Ko au eni; he naa ke ui au. Bea behe eia, Nae ikai teu ui; ke ke toe tokoto. Bea nae alu ia o tokoto.

6 Bea nae toe ui e Jihova, Samuela. Bea tuu a Samuela o alu kia Ilai, o ne behe, Ko au eni; he naa ke ui au. Bea behe eia, E hoku foha nae ikai teu ui; ke ke toe tokoto.

7 Bea nae ikai ilo e Samuela a Jihova, bea nae teeki ai fakaha ae folofola a Jihova kiate ia.

8 Bea nae toe ui e Jihova a Samuela ko hono liuga tolu. Bea tuu ia o alu kia Ilai, o ne behe, Ko au eni he naa ke ui au. Bea nae toki ilo e Ilai kuo ui a Jihova ki he tamajii.

9 Koia nae behe ai e Ilai kia Samuela, Alu o tokoto hifo: bea e behe, kabau te ne ui koe, te ke behe, E Jihova ke ke folofola mai; he oku ogo‘i e hoo tamaioeiki. Koia nae alu a Samuela o tokoto i hono botu.

10 Bea nae haele mai a Jihova, o tuu, o ui o hage koia nae fai, Samuela, Samuela. Bea nae toki tali e Samuela, o behe, Ke ke folofola mai; he oku ogo‘i e hoo tamaioeiki.

¶ 11 Bea nae behe e Jihova kia Samuela, Vakai, teu fai ha mea i Isileli, e vavana ai ae teliga o kinautolu kotoabe e fanogo ki ai.

12 I he aho koia teu fai kia Ilai ae gaahi mea kotoabe aia kuo oji eku lea ai ki hono fale: o kau ka kamata, teu fai ke oji foki.

13 He kuou tala kiate ia teu takamāu‘i hono fale ke taegata koeuhi koe hia oku ne ilo‘i; koe mea i he fai agahala lahi hono ogo foha, bea nae ikai te ne taofi akinaua.

14 Bea koia kuou fuakava ai ki he fale o Ilai, e ikai fakamaa ae hia ae fale o Ilai, aki ae feilaulau be koe mea atu o taegata.

¶ 15 Bea nae tokoto a Samuela o a‘u ki he bogibogi, bea naa ne too ae gaahi mataba oe fale o Jihova. Bea nae manavahe a Samuela ke fakaha aia kuo ha mai kia Ilai.

16 Bea nae ui e Ilai kia Samuela, o ne behe, E Samuela ko hoku foha. Bea behe eia, Ko au eni.

17 Bea nae behe eia, Koeha ae mea kuo folofola aki e Jihova kiate koe? Oku ou kole kiate koe oua naa ke fakafufu ia iate au: Ke fai behe e he Otua kiate koe, mo lahi hake foki, o kabau te ke ufiufi iate au ha mea e taha i he gaahi mea kotoabe kuo ne folofola kiate koe.

18 Bea nae fakaha e Samuela ae mea kotoabe kiate ia o ikai fufu ha taha. Bea nae behe eia, Ko Jihova ia: tuku ke fai eia aia oku lelei ki hono finagalo.

¶ 19 Bea nae tubu be a Samuela, bea nae iate ia a Jihova, bea nae ikai te ne tuku ke to kelekele haane lea e taha.

20 Bea nae ilo e Isileli kotoabe mei Tani o a‘u atu ki Beasiba, kuo hoko a Samuela koe balofita a Jihova.

21 Bea nae toe fakahāhā a Jihova i Sailo: he nae fakaha e Jihova a ene afio kia Samuela i Sailo i he folofola a Jihova.