Koe Uluaki Tohi o Samuela

¶ 1 VAKAI nae ai ha tagata o Lama-teimisofimi oe mouga o Ifalemi, ko hono higoa ko Elikena, koe foha o Jeloami, koe foha o Elihu, koe foha o Tohu, koe foha o Sufi, koe tagata Efalata:

2 Bea nae toko ua hono unoho; koe higoa oe toko taha ko Ana, bea ko Benina ae higoa oe toko taha: bea nae ai ae fānau a Benina, ka nae ikai ha fānau a Ana.

3 Bea nae alu hake ae tagata ni mei he ene kolo ki Sailo i he ta‘u kotoabe ke lotu mo atu ae feilaulau kia Jihova oe gaahi kau tau. Bea nae i ai ae ogo foha o Ilai, ko Hofini mo Finiasi koe ogo taulaeiki o Jihova.

¶ 4 Bea i he hoko ae aho ke fai ae feilaulau e Elikena, naa ne vahe kia Benina ko hono unoho, mo ene gaahi tama kotoabe mo ene gaahi taahine a ho nau inaji.

5 Ka naa ne atu kia Ana ae vahe lahi; he nae ofa ia kia Ana: ka kuo tabuni hono manāva e Jihova.

6 Bea nae fakamamahi lahi ia e hono fili, ke ne lāuga, koe mea i he tabuni hono manāva e Jihova.

7 Bea i he ene fai behe be i he ta‘u kotoabe, naa ne alu hake ki he fale o Jihova, bea loto mamahi ai ia; koia nae tagi ai ia, bea nae ikai kai.

8 Bea behe ai e Elikena ko hono unoho kiate ia, Ana koeha oku ke tagi ai? bea koeha oku ikai te ke kai? bea koeha oku mamahi ai ho loto? ikai oku ou lelei hake kiate koe i he tama e hogofulu?

¶ 9 Bea nae tuu hake a Ana hili e nau kai mo inu i Sailo. Bea nae nofo ae taulaeiki ko Ilai i he nofoa ofi ki he bou i he fale o Jihova.

10 Bea nae mamahi lahi hono laumalie, o ne lotu kia Jihova, bea tagi lahi.

11 Bea nae fai eia ae fuakava, o ne behe, E Jihova oe toko lahi, kabau koe mooni te ke afio mai ki he mamahi a hoo kaunaga, o manatu‘i au, o ikai fakagalo‘i a hoo kaunaga, ka ke foaki ki hoo kaunaga ae tama, behe teu foaki ia kia Jihova i he aho kotoabe o ene moui, bea e ikai ai ha tele ki hono ulu.

12 Bea nae behe, i he ene lotu mau be i he ao o Jihova, nae vakai e Ilai a hono lougutu.

13 Ka nae lea a Ana i hono loto be; nae gau‘e hono lougutu ka nae ikai ogo‘i hono le‘o: koia nae mahalo ai e Ilai kuo kona ia.

14 Bea nae behe e Ilai kiate ia, E tuku afe a hoo kona? tukuage hoo uaine iate koe.

15 Bea nae leaage a Ana o behe, Oku ikai, E hoku eiki, ka koe fefine loto mamahi au: nae ikai teu inu uaine be ha inu malohi, ka kuou liligi hoku laumalie i he ao o Jihova.

16 Oua naa ke ui hoo kaunaga koe ofefine oe kovi: he kuou lea be i he lahi o eku feiga mo eku mamahi.

17 Bea nae lea ai a Ilai o behe, Alu fiemalie be: bea ofa ke tuku kiate koe e he Otua o Isileli, ae kole aia kuo ke kole kiate ia.

18 Bea behe eia, Tuku ke ma‘u e hoo kaunaga ae fiemalie i ho ao. Bea nae alu ae fefine i hono hala, bea kai, bea nae ikai kei matabeko ia.

¶ 19 Bea naa nau tuu hegihegi hake i he abogibogi, o lotu i he ao o Jihova, bea alu, o hoko atu ki ho nau fale i Lama: bea nae ilo e Elikena a hono unoho; bea nae manatu‘i ia e Jihova.

20 Bea hili ae gaahi mahina oe feitama a Ana, bea behe, nae faele‘i eia ae tama, o ne ui hono higoa ko Samuela, o behe, Koe mea i he eku kole ia mei a Jihova.

21 Bea nae alu hake ae tagata ko Elikena mo hono fale kotoabe, ke atu kia Jihova ae feilaulau oe ta‘u, mo ene fuakava.

22 Ka nae ikai alu a Ana; he nae behe eia ki hono unoho, E ikai teu alu kae oua ke mavae ae tamajii, beau toki ave ia, koeuhi ke fakaha ia i he ao o Jihova, bea ke nofo mau ai ia o taegata.

23 Bea nae beheage e hono unoho ko Elikena kiate ia, Ke ke fai aia oku lelei kiate koe; tatali ke oua ke ke mavae ia; kae kehe ke fokotuu mau e Jihova ene folofola. Koia nae nofo ai ae fefine o fakahuhu ene tama, bea toki fakamavae ia.

¶ 24 Bea hili a hono fakamavae ia, naa ne ave ia, bea moe faga bulu e tolu, moe efa e taha oe mahoaa, moe hina uaine e taha, o omi ia ki he fale o Jihova i Sailo: bea nae kei jii ae tama.

25 Bea naa na tamate‘i ae bulu, bea omi ae tamajii kia Ilai.

26 Bea nae behe eia, E hoku eiki, hage oku mooni a hoo moui, e hoku eiki, ko au koe fefine nae tuu ofi kiate koe i heni, o lotu kia Jihova.

27 Naaka kole ae tamajii ni; bea kuo tuku mai e Jihova a eku kole aia neu fai kiate ia:

28 Koia foki oku ou toe atu ia kia Jihova; e tuku ia kia Jihova i he ene moui kotoabe. Bea nae lotu ia kia Jihova i ai.