¶ 1 BEA koeni, o hage ko hono lau hake ae fānau a Isileli, ko kinautolu nae tuu ki mua i he kau mātua, mo kinautolu nae eiki bule ki he gaahi toko afe moe gaahi teau, moe nau kau matābule aia nae fai ae gaue ki he tu‘i i hono aga oe gaahi lakaga, akinautolu nae hu mai mo alu atu taki taha i hono mahina i he gaahi mahina kotoabe oe ta‘u, ko hono lau fakakatoa oe lakaga taki taha, koe toko ua mano moe fa afe.

2 Nae bule ki he uluaki lakaga i he uluaki mahina a Jasobeami koe foha o Sabitieli: bea i hono lakaga oona nae ai ae toko ua mano moe fa afe.

3 Nae oe fānau a Belesi ia bea koe eiki lahi ia ki he gaahi eiki bule kotoabe oe kau tau i he uluaki mahina.

4 Bea nae bule ki he lakaga i hono ua oe mahina a Totei koe tagata Ahoia, bea nae bule foki ki hono lakaga oona a Mikiloti: bea nae i hono lakaga oona foki ae toko ua mano moe fa afe.

5 Ko hono toko tolu oe eiki bule oe kau tau ki hono tolu oe mahina, ko Benaia koe foha o Jihoiata, koe tagata nae eiki: bea nae i hono lakaga oona ae toko ua mano moe fa afe.

6 Koeni ia ae Benaia aia nae to‘a lahi i he toko tolugofulu, bea eiki hake i he toko tolugofulu: bea nae i hono lakaga oona a hono foha ko Amisabati.

7 Ko hono toko fa ki hono fa oe mahina, ko Asaeli koe tokoua o Joabe, mo Sebatia ko hono foha nae hoko moia: bea nae i hono lakaga oona ae toko ua mano moe fa afe.

8 Bea ko hono toko nima oe eiki ki hono nima oe mahina, ko Samuti koe tagata Isila: bea nae i hono lakaga oona ae toko ua mano moe fa afe.

9 Bea ko hono toko ono ki hono ono oe mahina, ko Ila koe foha o Ikesi koe tagata Tikoa: bea nae i hono lakaga oona ae toko ua mano moe fa afe.

10 Bea ko hono toko fitu ki hono fitu oe mahina, ko Helesi koe tagata Biloni mei he fānau a Ifalemi: bea nae i hono lakaga oona ae toko ua mano moe fa afe.

11 Ko hono toko valu ki hono valu oe mahina, ko Sibikei koe tagata Husa, mei he kakai Sela: bea nae i hono lakaga oona ae toko ua mano moe fa afe.

12 Ko hono toko hiva ki hono hiva oe mahina, ko Abiesa koe tagata Anitoti, oe kakai Benijimani: bea nae i hono lakaga oona ae toko ua mano moe fa afe.

13 Ko hono toko hogofulu ki hono hogofulu oe mahina, ko Mehelei koe tagata Nitofa, oe kakai Sela: bea nae i hono lakaga oona ae toko ua mano moe fa afe.

14 Ko hono toko hogofulu ma taha ki hono hogofulu ma taha oe mahina, ko Benaia koe tagata Bilatoni, oe fānau a Ifalemi: bea nae i hono lakaga oona ae toko ua mano moe fa afe.

15 Ko hono toko hogofulu ma ua ki hono hogofulu ma ua oe mahina ko Elitai koe tagata Nitofa, oe kakai Otinili: bea nae i hono lakaga oona ae toko ua mano moe fa afe.

¶ 16 Bea koe gaahi eiki foki ki he gaahi faahiga o Isileli: koe eiki i he faahiga o Lubeni, ko Eliesa koe foha o Sikili: bea ki he faahiga o Simione a Sifatia koe foha o Meaka:

17 Ki he faahiga o Livai, a Hasabea koe foha o Kimueli: oe faahiga o Elone, a Satoki:

18 Oe faahiga o Juta, a Elihu koe kaiga o Tevita: oe faahiga o Isaka, a Omili koe foha o Mikaeli:

19 Oe faahiga o Sebuloni, a Isimaia koe foha o Obataia: oe faahiga o Nafitali, a Jelimoti koe foha o Asilieli:

20 Oe fānau a Ifalemi, ko Hosea koe foha o Asasia: oe vahe ua oe faahiga o Manase, a Joeli koe foha o Bitaiā:

21 Oe vahe ua oe faahiga o Manase aia nae nofo i Kiliati, ko Ito koe foha o Sakalia: oe faahiga o Benijimani, a Jeesieli koe foha o Abina:

22 Oe faahiga o Tani, a Esalili koe foha o Jilohami. Ko kinautolu eni nae eiki hake i he gaahi faahiga o Isileli.

¶ 23 Ka nae ikai ke lau e Tevita ae kakai mei hono uofulu ta‘u oe nau motua o fai hifo: he koeuhi nae behe e Jihova ke ne fakatokolahi a Isileli ke hage koe gaahi fetuu oe lagi.

24 Nae kamata lau  ae kakai e Joabe koe tama o Seluia, ka nae ikai te ne faa fakaoji ia, koeuhi nae to ai ae houhau ki Isileli i he mea koia; bea nae ikai tohi a hono lau ki he tohi fakamatala mea oe tu‘i ko Tevita.

¶ 25 Bea nae bule a Asimaveti koe foha o Atieli ki he gaahi koloa ae tu‘i: bea nae bule a Jihonatani koe foha o Usia ki he gaahi feleoko i he gaahi tokagagoue, bea i he gaahi kolo, bea i he gaahi botu kakai jii, bea i he gaahi fale tau:

26 Bea nae bule a Eseli koe foha o Kilubi kiate kinautolu nae gaue i he to goue i he gaahi tokagagoue:

27 Bea nae bule ki he gaahi goue vaine a Simi koe tagata Lama: bea nae bule ki he fua oe gaahi goue vaine aia nae tuku ki he gaohi oe uaine, a Sabiti koe tagata Safani:

28 Bea nae bule a Beali‐hanani koe tagata Kiteli, ki he gaahi akau koe olive moe gaahi akau koe Sukamino, aia nae tubu i he gaahi botu tokalelei: bea nae bule a Joasi ki he gaahi fale tukuga lolo.

29 Bea nae bule a Sitilei koe tagata Saloni, ki he faga manu nae fafaga‘i i Saloni: bea nae bule a Safati koe foha o Atilai ki he faga manu nae fafaga‘i i he gaahi botu talalo:

30 Nae bule foki a Obili koe tagata Isimeli ki he faga kameli: bea nae bule ki he faga asi a Jetia koe tagata Melonoti:

31 Bea nae bule ki he faga sibi a Jasisi koe tagata Hekaa. Ko kinautolu kotoabe eni nae bule ki he koloa kotoabe nae o Tevita koe tu‘i.

32 Bea ko Jonatane foki koe tuajina a Tevita, koe tagata fai fakakaukau, mo boto lahi ia, bea koe tagata tohi: bea nae nofo a Jehieli koe foha o Hakimoni fakataha moe gaahi foha oe tu‘i:

33 Bea ko Ahitofeli koia ia nae fai fakakaukau ma ae tu‘i: bea koe takaga oe tu‘i ko Husai koe tagata Aliki:

34 Bea nae hoko mo Ahitofeli a Jihoiata, koe foha o Benaia, mo Abiata: bea ko Joabe koe bule lahi ia ki he kau tau oe tu‘i.