ARIT, Mataio 7:1–2. Kabotaua Mataio 7:1–2
Tai motikitaeka n ae aki raoiroi.
1 Ngkai aikai ana taeka Iesu ake e reireinia ana taan reirei bwa a na riai n taekinna nakon te botanaomata.
2 Tai motikitaeka n ae aki raoiroi, bwa ko na aki motikaki taekam, ma motikitaeka n te moti ae raoiroi.
ARIT, Mataio 7:4–8. Kabotaua Mataio 7:3–5
Iesu e reireinia Ana reirei bwa ana kaekaia taan koroboki, Baritai, ibonga ao tibun Rewi ibukin aroia ni bwaritaio.
4 Ao ko na manga kangai nakoia, E aera ngkai kam taratara te aneke are i nanon matan tarim, ma kam aki moa noora te oka are i nanon matami?
5 Ke ko na iranna n taku nakon tarim, N na buuta te aneke mai nanon matam; ao ko aki noora te oka i nanon matam?
6 Ao e taku nakoia ana reirei, Kam nooria taan koroboki, ao Bwaritaio, ao ibonga, ao tibun Rewi? A anga reirei i nanon aia tinakaoke, ma aki kawakina te tua, ao taian tua; ao a bane n tia n kitana te kawai, ao a mena i an te bure.
7 Nako ngkami ao kangai nakoia, E aera ngkai kam reireinia aomata te tua ao taian kaetieti, ngkana ngkami bon natin te buakaka?
8 Kangai nakoia, Ngkami aika bwaritaio, kam na kanakoa moa te oka mai nanon matami; ao ngkanne kam na nooraba raoi ni kanakoa te aneke mai nanon matan tarimi.
ARIT, Mataio 7:9–11. Kabotaua Mataio 7:6
Iesu e reireinia Ana reirei bwa a na tataekina te rairannano ao a na aki tibwauai bwain te abanuea aika raba ma te aonaba.
9 Nako ngkami nakon te aonaba, ni kangai nakoia ni kabane, Rairi nanomi, bwa e a kaan roko uean karawa nakoimi.
10 Ao bwain te abanuea aika raba kam na kawakini inanomi; bwa e aki riai bwa kam na anga te bwai ae tabu nakoia kamea; ke tai teweanako am bwaeao nakoia beeki, bwa a kawa n toubekai i an waeia.
11 Bwa te aonaba e aki kona ni butimwaea te bwai are, ngkami, kam aki kona ni butimwaia, mangaia are kam na aki anga ami bwaeao nakoia, bwa mwina a na manga rairaki ao n raebiti ngkami.
ARIT, Mataio 7:12–17. Kabotaua Mataio 7:7–8
Iesu e reireinia Ana reirei bwa te Tama e anga te kaotioti nakoia ni kabane ake a bubuti.
12 Kangai nakoia, Bubutia te Atua: bubuti, ao ko na anganaki; ukeuke, ao e na reke iroum; karebwerebwe, ao e na kaukaki nakoim.
13 Bwa ni kabane ake a bubuti, a na anganaki; ao ane e ukeuke, e na reke irouna; ao nakon ane karebwerebwe, e na kaukaki.
14 Ao ngkanne a taku ana reirei nakoina, A na kangai nakoira, Ngaira ti bon raoiroi, ao ti aki kainnanoa te aomata temanna bwa e na reireinira. Te Atua, ti ataia, ti tia n ongo iroun Mote ao tabeman riki burabeti; ma e aki ongo iroura.
15 Ao a na kangai, Iai iroura te tua ibukin kamaiuara, ao e bon tau anne ibukira.
16 Ngkanne e kaeka Iesu, ao e taku nakoia ana reirei, Aio ae kam na taekinna nakoia,
17 Ai antai te aomata i buakomi, ae iai natina, ao e tei i tinaniku ao e na kangai, Tamau, kauka batam bwa I aonga ni kona n rin ao n amwarake ma ngkoe, ao e na aki kangai, Rin, natiu, bwa au bwai bon am bwai, ao am bwai bon au bwai?