9 A’b’an ani natz’eqtaanank we chiruheb’ li winq, tz’eqtaananb’ilaq chiruheb’ lix anjel li Dios.

10 Anajwan eb’ lix tzolom ke’xnaw naq kixye a’in, xb’aan naq eb’ a’an ke’xmaa’usila chaq chiruheb’ li tenamit; xb’aan naq ke’xxuwa xch’olob’ankil xyaalal a’an chiruheb’ li winq.

11 Ut ke’na’leb’an chirib’ileb’ rib’, ke’xye, A’an naxnaw li qach’ool, ut na’aatinak re qajitb’al, ut ink’a’ taakuymanq li qamaak. A’b’an a’an kixsumeheb’ ut kixye reheb’,

12 Yalaq ani nayehok junaq aatin re xmaa’usilankil li Ralal li winq, ut naxjal xk’a’uxl, taakuymanq xmaak chirix; a’b’an li ani namajewank re li Santil Musiq’ej, ink’a’ taakuymanq xmaak chirix.

41 Xb’aan naq k’ehomaq reetal, a’an k’ulunk re sa’ li xb’een yo’lek re q’ojyin, ut taak’ulunq ajwi’ sa’ li xkab’ yo’lek, ut jo’kan wi’chik taak’ulunq sa’ li rox yo’lek.

42 Ut chi yaal ninye eere, Ak k’ulujenaq, jo’ tz’iib’anb’il chirix; ut jo’kan wi’chik naq taak’ulunq sa’ li xkab’ yo’lek, malaj taak’ulunq sa’ li rox yo’lek, osob’tesinb’ilaqeb’ li moos a’an naq taak’ulunq, li toj tixtaw chixb’aanunkil chi jo’kan;

43 Xb’aan naq laj Eechal reheb’ li moos a’an tixtiqib’ rib’, ut tixk’eheb’ chi k’ojlaak chi wa’ak, ut taachalq ut taak’anjelaq chiruheb’.

44 Ut anajwan, chi yaal ninye li k’a’aq re ru a’in eere, re teenaw a’in, naq lix k’ulunik li Qaawa’ chanchan junaq aj elq’ chi q’eq.

45 Ut chanchan jun li winq aj eechal junkab’al, wi ut ink’a’ naxk’aak’ale li k’a’ru re, nachal laj elq’ sa’ jun hoonal li maak’a’ sa’ xch’ool, ut naxk’am li k’a’ru re, ut naxjachi sa’ xyanqeb’ lix komon.

46 Ut ke’xye chirib’ileb’ rib’, Wi ta laj eechal re li kab’l kixnaw k’a’ru hoonal taachalq wi’ laj elq’, kiyo’lek raj, ut ink’a’ raj kixkanab’ chi weqe’k li rochoch, ut chi sachk li k’a’ru re.

47 Ut a’an kixye reheb’, Chi yaal ninye eere, chexwanq ajwi’ laa’ex chi kawresinb’il; xb’aan naq li Ralal li winq taak’ulunq sa’ jun hoonal li moko k’oxlanb’il ta eeb’aan.

48 Toja’ naq laj Pedro kixye re, Qaawa’, ma nakaye li jaljookil ru aatin choq’ qe laa’o, malaj choq’ reheb’ chixjunil?

49 Ut li Qaawa’ kixye, nin’aatinak reheb’ li tixk’e wi’ li Qaawa’ choq’ aj taqlanel sa’ xb’een li rochochnal, re te’xk’e reheb’ li ralal xk’ajol a’an lix jachaleb’ chi tzakemq sa’ tz’aqal xq’ehil.

50 Ut ke’xye, Ani li moos a’an li tiik chi paab’ank ut chaab’il xna’leb’?

51 Ut li Qaawa’ kixye reheb’, A’an li moos a’an li nayo’lek, re xjek’inkil lix jun jachal chi tzakemq sa’ tz’aqal xq’ehil.

52 Osob’tesinb’ilaq taxaq li moos a’an li taatawe’q xb’aan laj Eechal re, naq taak’ulunq, chixb’aanunkil chi jo’kan.

53 Relik chi yaal ninye eere, naq tixk’e a’an choq’ aj taqlanel sa’ xb’een chixjunil li k’a’ru re.

54 A’b’an li maa’us aj moos, a’an li ink’a’ natawe’ chi yo’lek. Wi ut li moos a’an ink’a’ natawe’ chi yo’lek, tixye sa’ xch’ool, Laj Eechal we naxb’ay xk’ulunik; ut taa’ok chixsak’b’aleb’ li moos winq, ut eb’ li tuq’ixq, ut chi wa’ak, ut chi uk’ak, ut chi kalaak.

55 Laj Eechal re li moos a’an taachalq sa’ jun kutan li ink’a’ naroyb’eni, ut sa’ jun hoonal li mak’a’ sa’ xch’ool, ut tixt’an chaq, ut tixk’e lix jun jachal sa’ xyanqeb’ li ink’a’ neke’paab’an.

56 Ut li moos a’an li kinawok re li rajom xch’ool laj Eechal re, ut ink’a’ kixkawresi rib’ choq’ re lix k’ulunik laj eechal re, chi moko kixb’aanu jo’ chanru li rajom xch’ool, naab’al lix loob’ taarape’q wi’.

57 A’b’an li ani moko kinawok ta re li rajom xch’ool laj Eechal re, ut kixb’aanu li xk’ulub’ wi’ xk’eeb’al xloob’, moko k’i ta taarape’q wi’. Xb’aan naq ani naab’al nak’eeman re, naab’al nateneb’aman; ut ani sa’ aj b’een li Qaawa’ xk’e naab’al, rik’in a’an naab’al chik te’xpatz’ li winq.