1 Na em i kamap we ami bilong king ol i bin go bek gen, bihain long painim ol pipol bilong Bikpela.

2 Na nau lukim, ol ami bilong king i kamap liklik, bikos namba bilong ol i go daun, na ol pipol ol i stap yet long graun bilong Nifai ol i stat long bruknabaut namel long ol yet.

3 Na wanpela liklik namba long ol pipol ol i stat long belhat long king, na wanpela bikpela tok pait tru i bin i stat namel long ol yet.

4 Na nau wanpela man namel long ol nem bilong em Gidion, na bikos em i wanpela strongpela man na wanpela birua bilong king, olsem na em i bin rausim naip bilong pait bilong em long pait, na tok tru antap long belhat bilong em olsem em bai kilim king.

5 Na em i kamap we em i bin pait wantaim king, na taim king lukim olsem Gidion klostu i kilim em, em i bin ronawe na ron i go antap long taua i stap klostu long tempel.

6 Na Gidion i bin ron bihain long em na klostu go antap long taua long kilim em, na king i lukluk raun nabaut long graun bilong Semlon, na lukim, ami long ol lain bilong Leman i kamap pinis insait long graun bilong Semlon.

7 Na nau king i singaut wantaim pen long sol bilong em na tok: Gidion, noken kilim mi, long wanem, ol lain bilong Leman i kamap long mipela, na ol bai bagarapim mipela, ye, ol bai bagarapim ol pipol bilong mi.

8 Na nau king i wari long laip bilong em yet na i no wari long laip bilong ol pipol bilong em, tasol Gidion i bin lusim em i go.

9 Na king tokim ol pipol long ronawe long ol lain bilong Leman, na em yet i bin lidim ol, na ol i bin ronawe i go long ples we nogat man i stap wantaim ol meri na pikinini bilong ol.

10 Na em i kamap we ol lain bilong Leman ol i bin go bihain long ol, na abrusim ol, na i stat long kilim ol.

11 Nau em i kamap we king i bin tokim ol pipol olsem olgeta man mas lusim bihain ol meri wantaim pikinini bilong ol, na ronawe long ol lain bilong Leman.

12 Nau planti man ol i no laik lusim bihain ol meri wantaim ol pikinini bilong ol, olsem na ol i bin i stap long idai wantaim ol. Na sampela man ol bin lusim bihain ol meri wantaim ol pikinini bilong ol na ronawe.

13 Na em i kamap we ol man ol i stap bihain wantaim ol meri na ol pikinini bilong ol bin askim ol naispela pikinini meri bilong ol long sanap na askim ol lain bilong Leman olsem ol i no ken kilim ol.

14 Na em i kamap we ol lain bilong Leman ol i bin sore long ol, long wanem, ol naispela naispela meri bilong ol i bin winim bel long ol lain bilong Leman.

15 Olsem na ol lain bilong Leman i no bin kilim ol, tasol kisim ol olsem kalabus na karim ol i go bek long graun bilong Nifai na tokim ol olsem mipela bai givim yupela graun tasol yupela mas givim king Noa long han bilong mipela, na givim long ol samting bilong ol, Wanpela hap long samting bilong ol, tru tumas, wanpela hap long gol bilong ol, na silva bilong ol, na olgeta ol dispela samting bilong ol, na olsem ol bai baim takis long king long ol lain bilong Leman long wan wan krismas.

16 Na nau wanpela pikinini man bilong king Noa, nem bilong em Limhai i bin i stap namel long ol lain ol i bin kisim ol kalabus.

17 Na nau Limhai i bin laikim olsem papa bilong em bai i no inap kisim bagarap, tasol Limhai i bin save gut tru long ol pasin nogut long papa bilong em, na em yet i wanpela stretpela man.

18 Na em i kamap we Gidion i bin hait long salim ol man i go long ples we nogat man i stap, long painim king na ol lain ol i bin go wantaim em. Na em i kamap we ol i bin bungim olgeta pipol long ples we nogat man i stap tasol ol i no painim king wantaim ol pris bilong em.

19 Nau ol pipol i bin tok tru antap long bel bilong ol olsem ol bai go bek long graun bilong Nifai na sapos ol painim ol meri na pikinini bilong ol wantaim ol man ol i bin lusim ol bihain na sapos ol i bin kilim ol idai, ol bai bekim bek na idai wantaim ol.

20 Na king i bin pasim ol olsem ol bai i no inap go bek, na ol i bin belhat long king, na kukim em long paia long givim pen i go inap long em idai.

21 Na tu ol i bin klostu kisim ol pris na kukim ol i dai, tasol ol i bin ronawe long ol.

22 Na em i kamap we ol i klostu go bek long graun bilong Nifai, na ol bungim ol man bilong Gidion. Na ol man bilong Gidion ol i bin tokim ol long olgeta samting i bin kamap long ol meri na pikinini bilong ol, na olsem ol lain bilong Leman ol i bin givim graun long ol long kisim na long baim takis long ol inap long wanpela hap long olgeta samting ol i gat.

23 Na ol pipol i bin tokim ol man bilong Gidion olsem ol i bin kilim king, na ol pris bilong em ol i bin ronawe na ol i go longwe long ples we nogat man i stap.

24 Na em i kamap we bihain ol pinisim wanem ol i bin wokim, ol i go bek long graun bilong Nifai wantaim amamas, bikos ol meri na pikinini bilong ol i no bin kilim, ol na ol i tokim Gidion wanem ol i bin wokim long king.

25 Na em i kamap we king long ol lain bilong Leman i bin tok tru antap long ol, olsem ol pipol bilong em bai ol i no inap kilim ol.

26 Na tu Limhai, bikos em i pikinini man bilong king, ol pipol i bin makim em long kamap king, na mekim tok tru antap long king long ol lain bilong Leman olsem ol pipol bilong em bai baim takis long em, inap long wanpela hap long olgeta samting ol i gat.

27 Na em i kamap we Limhai i stat long kirapim kingdom na long kamapim bel isi namel long ol pipol bilong em.

28 Na king long ol lain bilong Leman i bin putim ol wasman raun nabaut long graun bilong Nifai, olsem em bai lukautim ol pipol bilong Limhai insait long graun bilong Nifai, we ol bai i no inap go long ples we nogat man i stap, na em i bin lukautim ol wasman bilong em wantaim takis em bin kisim long ol lain bilong Nifai.

29 Na nau king Limhai i bin i stap long bel isi long kingdom bilong em long tupela krismas, na ol lain bilong Leman i no bikhet long ol o traim long bagarapim ol.