1 Na nau taim king harim ol dispela toktok, em i tokim ol pris bilong em: Kisim dispela man i go na kilim em, long wanem, mipela bai mekim wanem wantaim em, man em i longlong.

2 Na ol go het na traim long kisim em, tasol em i pasim ol, na tokim ol:

3 Noken holim mi, nogut God bai paitim yupela sapos yupela putim ol han bilong yupela long mi, long wanem, mi no givim toktok Bikpela i bin salim mi long givim, na tu mi no tokim yupela long samting yupela i bin askim mi long tok klia, olsem na God bai i no inap larim mi long kisim bagarap long dispela taim.

4 Tasol mi mas mekim kamap tru ol lo God i bin givim mi, na bikos mi bin autim tok tru yupela i belhat long mi. Na gen, bikos mi bin autim toktok bilong God yupela i jasim mi olsem mi em longlong man.

5 Nau em i kamap we bihain Abinadai autim ol dispela toktok, ol pipol bilong king Noa i no putim han bilong ol long em, long wanem, Spirit bilong Bikpela i bin i stap wantaim em, na pes bilong em i kamap lait tru wankain olsem long Moses taim em i toktok wantaim Bikpela long maunten Sainai.

6 Na em i bin toktok wantaim pawa na atoroti bilong God, na em i go het long toktok olsem:

7 Yupela lukim olsem yupela i nogat pawa long kilim mi, olsem na mi pinisim toktok bilong mi. Ye, na mi lukim olsem bikos mi bin autim tok tru long yupela long ol pasin nogut bilong yupela, em i katim yupela long bel bilong yupela.

8 Ye, na long ol toktok mi bin mekim yupela i kirap nogut na kalap nogut wantaim belhat.

9 Tasol mi pinisim toktok bilong mi pastaim, na bihain wanem samting bai kamap long mi, em mi no save, tasol em i orait sapos mi kisim selvesen.

10 Tasol mi tokim yupela olsem, wanem yupela bai wokim long mi bihain long mi givim toktok, em bai kamap mak na seid bilong ol samting long kam long bihain taim.

11 Na nau mi ritim long yupela sampela hap lo bilong God, long wanem, mi lukim olsem ol i no bin raitim long bel bilong yupela, mi lukim olsem bikpela taim long laip bilong yupela, yupela i bin yusim long kisim save na lainim ol pasin nogut.

12 Na nau, yupela tingim olsem mi bin tokim yupela olsem: Yupela bai i no inap mekim kavin long lotu long em, o mekim wankain samting olsem long heven antap, o long graun aninit o long wara aninit long graun.

13 Na gen: Yupela bai i no inap nil daun long ol o lotu long ol, long wanem, mi Bikpela God bilong yupela i God bilong koros na, visitim pasin nogut bilong ol papa long ol pikinini, i go long namba tri na namba foa jeneresen long ol lain ol i les long mi,

14 Na soim marimari long ol tausen bilong ol lain ol i lavim mi na bihainim ol lo bilong mi.

15 Yu bai i no inap bagarapim nem bilong Bikpela God bilong yu, nating long wanem, Bikpela bai kotim man husat i bagarapim nem bilong em nating.

16 Tingim sabat de na kipim holi.

17 Sikispela de yu bai wok, na wokim olgeta wok bilong yu,

18 Tasol namba seven de, sabat bilong Bikpela God bilong yu, yu wantaim pikinini man bilong yu o pikinini meri bilong yu, wokman bilong yu o wok meri bilong yu, o kau bilong yu, o narapela man husat i stap insait long dua long hap bilong yu bai ol i no inap wok.

19 Long wanem, Bikpela i bin wokim heven na graun na sol wara, na olgeta samting i stap insait long ol long sikispela de olsem na Bikpela i bin blesim sabat de na mekim kamap holi.

20 Onaim papa bilong yu na mama bilong yu, olsem yu bai i stap longpela taim long graun Bikpela God bilong yu i givim yu.

21 Yupela bai i no inap kilim narapela man.

22 Yupela bai i no inap wokim pasin pamuk. Yupela bai i no inap stil.

23 Yupela bai i no inap giaman long bagarapim narapela man.

24 Yupela bai i no inap laikim haus bilong narapela man, yupela bai i no inap laikim meri bilong narapela man, o wok boi bilong em, o wok meri bilong em, o kau bilong em o donki bilong em o samting bilong narapela man.

25 Na em i kamap we bihain Abinadai pinisim ol dispela toktok, em askim ol: Yupela i bin lainim ol dispela pipol olsem ol bai bihainim stret olgeta long dispela samting na long bihainim ol dispela lo?

26 Mi tokim yupela, Nogat, long wanem, sapos yupela i bin lainim ol, Bikpela i no inap salim mi kam long profesai long ol pasin nogut bilong ol dispela pipol.

27 Na nau yupela tok olsem selvesen bai kam long lo bilong Moses. Mi tokim yupela olsem i gat nid olsem yupela mas bihainim lo bilong Moses long dispela taim, tasol mi tokim yupela, olsem taim bai kam we lo bilong Moses em bai yupela i no inap bihainim moa.

28 Na tu, mi tokim yupela, olsem selvesen i no inap kam long lo tasol, long wanem, sapos atonmen i no i stap, we God em yet bai wokim atonmen bikos long ol sin na pasin nogut bilong ol pipol bilong em, ol bai idai olgeta sapos ol i bihainim ol lo bilong Moses tasol.

29 Na nau mi tokim yupela olsem i gat nid olsem God mas givim lo long ol lain pikinini bilong Israel ye, tru tumas wanpela hatpela lo, long wanem, ol lain bilong kamapim bikhet pasin, hariap long wokim pasin nogut, na isi isi long tingim Bikpela God bilong ol.

30 Olsem na wanpela lo em i bin givim long ol, ye, wanpela lo long wokim wok bilong lotu na bilong odinens, wanpela lo ol i mas strong long bihainim olgeta de, long mekim ol long tingim God na long tingim wok ol i gat long em.

31 Tasol lukim, mi tokim yupela, olsem olgeta ol dispela samting em i mak bilong ol samting long kam long bihain taim.

32 Na nau, ol lain pikinini bilong Israel ol i bin save gut tru long lo? Mi tokim yupela, Nogat, i no olgeta long ol i bin save long lo, na dispela bikos ol i bin kamapim belhat bilong ol, long wanem, ol i no bin save olsem ol manmeri bai kisim selvesen insait long kisim bek bilong God.

33 Long wanem, lukim, Moses i no bin profesai long ol olsem Mesaia bai kam, na olsem God mas kisim bek ol pipol bilong em? Ye, na tru tumas olgeta profet ol i bin profesai long i stat tru long dispela graun ol i bin toktok moa o liklik long ol dispela samting?

34 Ol i no bin tok olsem God em yet mas kam daun namel long ol lain pikinini bilong ol man, na kamap olsem man, na go het wantaim strongpela pawa long pes bilong graun?

35 Ye, na tu ol i no bin tok olsem em mas kamapim tru kirap gen bilong ol idai manmeri, na olsem ol man mas givim hevi na pen long em?