1 Sakuyang padangat na aki, nagsurat ako giraray sa saimo tanganing saimong maaraman na ako buhay pa; alagad ako nagsurat kaidtong manunungod sa manga bagay na nakakahandal.

2 Huli ta totoo, nagkaigwa ako nin makuring pakilaban sa manga Lamanite, na kun sain dai kami nakasakop; asin si Archeantus nagadan sa paagi nin espada, asin man si Luram asin si Emron; iyo, asin ta nawara sa samuya an dakulang bilang kan samuyang pili na manga tawo.

3 Asin ngonian totoo sakuyang aki, ako natatakot na tibaad mapara kan manga Lamanite an manga tawong ini; huli ta sinda dai man nagsosorolsol, asin sinda binubukag ni Satanas sa padagos na kaanggotan sa lambang saro.

4 Totoo, ako padagos na nagpapakasakit sa sainda; asin ta kun ako nagtataram na matarom kan tataramon kan Dios sinda nagtatarakig asin naaanggot sa sakuya; asin ta kun ako dai magtaram nin matarom pinapatagas ninda an saindang manga puso laban kaidto; kaya ako natatakot na an Espiritu kan Kagurangnan nag-ontok na sa pagtabang sa sainda.

5 Huli ta makuri an saindang kaanggotan na sa paghuna ko sinda dai nang pagkatakot sa kagadanan; asin nawara na an saindang pagkamoot, saro sa saro; asin ta napapaha sinda sa dugo asin padagos na nagbabaralosan.

6 Asin ngonian sakuyang padangat na aki, maski pa sa saindang pagmamatagas, maghinguha kita sa pagtrabaho huli ta kun mag-ontok kita sa pagtrabaho, kita madadara sa irarom nin sumpa; huli ta igwa kita nin trabaho na gigibohon mantang nasa tabernakulong daga, na satuyang madaog an kaiwal kan gabos na katanusan, asin pahingaloan an satuyang manga kalag sa kahadean kan Dios.

7 Asin ngonian ako masurat manunungod kan manga pagtios kan manga tawong ini. Huli ta sunod sa kaaraman na sakuyang nakua hali ki Amoron, totoo, na an manga Lamanite igwang kadakol na manga bihag, na saindang dinara hali sa tore kan Sherrizah; asin ta igwang manga lalaki, manga babae, asin manga aki.

8 Asin ta an manga agom asin manga ama kan manga babae asin manga aki saindang ginaradan; asin ta pinapakakan an manga babae kan laman kan saindang manga agom, asin an manga aki an manga laman kan saindang manga ama; asin ta daing tubig, kundi kadikit, an itinatao sa sainda.

9 Asin maski pa an dakulang karumpotan na ini kan manga Lamanite, ini dai pa maorog kaidtong sa satuyang manga tawo sa Moriantum. Huli ta totoo, dakol kan manga aking babae kan manga Lamanite an dinara nindang bihag; asin pagkatapos na halion sa sainda an pinakaiingatan asin mahal sa gabos na bagay, na iyo an kabinian asin kabansayan—

10 Asin pagkatapos na gibohon an bagay na ini, ginaradan sinda sa pinakamakuring paagi, pinapasakitan an saindang manga hawak sagkod sa kagadanan; asin pagkatapos na gibohon ini, saindang kinakan an manga laman siring sa manga lumalaw na manga hayop, huli sa katagasan kan saindang manga puso; asin ta ginigibo ninda ini bilang tanda nin kaisogan.

11 O sakuyang padangat na aki, paano an manga tawo na siring kaini, na manga mariringis—

12 (Asin diit pa sanang taon an nakaagi na sinda manga mabuboot asin magaya-gaya na manga tawo)

13 Alagad O sakuyang aki, paano an manga tawo na siring kaini, na an kaogmahan nasa labi-labing karumpotan—

14 Paano niato malaoman na pupugolon kan Dios an saiyang kamot sa paghukom laban sa satuya?

15 Totoo, an sakuyang puso nagtatangis: Herak man sa manga tawong ini. Lumuwas sa paghukom, O Dios, asin itago mo an saindang manga kasalan, asin kasumbikalan, asin an manga karumpotan sa atubangan kan saimong lalawgon.

16 Asin sa giraray, sakuyang aki, igwang kadakol na manga balo asin an saindang manga aking babae na nawalat sa Sherrizah; asin idtong kabtang kan manga pagkabuhay na dai dinara kan manga Lamanite, totoo, an hukbo ni Zenephi dinarara an manga ini asin pinabarayaan na sinda na magralagaw-lagaw kun sain sinda makakua nin pagkakan; asin dakol na gurang na manga babae an pigruruluya sa dalan asin nagkakagaradan.

17 Asin an hukbo na sakuyang kaibahan maluya; asin an manga hukbo kan manga Lamanite nasa tahaw ko asin kan Sherrizah; asin kun gurano an nagdurulag pasiring sa hukbo ni Aaron iyo man an inabotan kan saindang makangurungirhat na kabangisan.

18 O an karaksotan kan sakuyang manga tawo! Sinda dai nin kahusayan asin dai nin pagkaherak. Totoo, ako saro sanang tawo, asin ta ako daing iba kundi an kusog nin sarong tawo, asin ta dai ko na maipapasunod pa an sakuyang manga katugonan.

19 Asin ta sinda naging makusog sa saindang pagkatampalasan; asin sinda pararehong mababangis, daing iliniligtas, ni gurang o aki; asin ta sinda nag-oogma sa gabos na bagay apuera sana sa mararahay; asin an kasakitan kan satuyang manga babae asin kan satuyang manga aki sa ibabaw kan gabos na daga na ini labi sa gabos na bagay; iyo, an dila dai makakataram, ni maisusurat ini.

20 Asin ngonian, sakuyang aki, dai na ako magtataram pa manunungod kaining makangurungirhat na hihilingon. Totoo, aram mo an kasumbikalan kan manga tawong ini; saimong aram na sinda manga tawong daing prinsipio asin manga daing pagmati; asin an saindang kasumbikalan orog pa sa manga Lamanite.

21 Totoo, sakuyang aki, dai ko sinda maipapakihuron sa Dios ta tibaad ako saiyang padusahan.

22 Alagad totoo, sakuyang, aki, ika sakuyang maipapakihuron sa Dios, asin ako nananarig ki Cristo na ika makakaligtas; asin sakuyang ipinapamibi sa Dios na saiyang iligtas an saimong buhay, tanganing magpatotoo kan pagbalik kan saiyang manga tawo sa saiya, o an saindang lubos na pagkarumpag; huli ta sakuyang aram na sinda mapapara sagkod na sinda magsorolsol asin magbaralik sa saiya.

23 Asin kun sinda mapara idto magiging siring sa manga Jaredite, huli sa kasutilan kan saindang manga puso, naghahanap nin dugo asin pagbalos.

24 Asin ta kun mangyari na sinda mapara, satuyang aram na dakol kan satuyang manga katugangan nagsanib na sa manga Lamanite, asin ta dakol pa an masanib sa sainda; kaya, magsurat ka nin diit na manga bagay, kun ika makaligtas asin ako mapara na asin dai ko na ika mahihiling; alagad nananarig ako na madali ko na ikang mahihiling; huli ta igwa ako nin banal na manga kasuratan na sakuyang itatao saimo.

25 Sakuyang aki, maging dayupot ki Cristo; asin dai man lugod makapamundo saimo an manga bagay na sakuyang isinurat, na makapagabat saimo pasiring sa kagadanan; alagad alsahon ka man lugod ni Cristo, asin an saiyang manga pagsakit asin pagkagadan, asin an pagpahiling kan saiyang hawak sa satuyang manga kamagurangan, asin an saiyang pagkaherak asin an halawig na pagtios, asin an paglaom kan saiyang kamurawayan asin buhay na daing-kasagkuran, magdanay man lugod sa saimong isip sagkod pa man.

26 Asin an ugay kan Dios Ama, na an trono nasa halangkaw na kalangitan, asin an satuyang Kagurangnan na Jesu-Cristo, na nagtutukaw sa toong kamot kan saiyang kapangyarihan, sagkod na an gabos na manga bagay maging sakop niya, mapasaimo na kaibahan mo sagkod pa man. Amen.