Scriptures
Moroni 7


Kapitulo 7

Sarong pag-agda na lumaog sa kapahingaloan kan Kagurangnan—Magpamibi na igwang udok na katuyohan—An Espiritu ni Cristo an nagtatao sa manga tawo na maaraman an matanos asin maraot—Sinolsolan ni Satanas an manga tawo na indahan si Cristo asin maggibo nin maraot—Ipinahayag kan manga propeta an pag-abot ni Cristo—Sa paagi nin pagtubod, an manga milagro nangyari asin an manga anghel naglingkod—An manga tawo kaipuhan maglaom nin buhay na daing-kasagkuran asin mangapot sa dalisay na pagkamoot. Manga A.D. 401–421.

1 Asin ngonian ako, si Moroni, nagsurat nin kadikit na manga tataramon kan sakuyang ama na si Mormon, na saiyang sinabi manunungod sa pagtubod, sa paglaom, asin dalisay na pagkamoot; huli ta sa siring na paagi siya nagtaram sa saiyang manga tawo, sa saiyang pagtukdo sa sainda sa sinagoga na saindang pinatindog na pagsasambahan.

2 Asin ngonian ako, si Mormon, nagtataram sa saindo, sakuyang padangat na manga katugangan; asin ta ini sa paagi kan ugay kan Dios Ama, asin kan satuyang Kagurangnan na Jesu-Cristo, asin kan saiyang banal na kabotan, huli kan balaog kan saiyang pag-apod sakuya, na ako tinutugotan na magtaram sa saindo sa panahon na ini.

3 Huli kaini, ako magtataram sa saindo na manga nasa simbahan, na manga matuninong na parasunod ki Cristo, asin manga nagkaigwa nin tamang paglaom na sa paagi kaini kamo makakalaog sa kapahingaloan kan Kagurangnan, magpoon sa panahon na ini sagkod na kamo makapahingalo na kaibahan niya sa kalangitan.

4 Asin ngonian sakuyang manga katugangan, sakuyang inisip an manga bagay na ini manunungod sa saindo huli sa saindong matuninong na paglakaw na kaiba an manga aki nin tawo.

5 Huli ta sakuyang narumdoman an tataramon kan Dios na nagsasabi na sa paagi kan saindang manga gibo saimong mamimidbidan sinda; huli ta kun an saindang manga gibo matanos, sinda matanos man.

6 Huli totoo, an Dios nagsabi na an tawo na maraot dai magibo kaidtong marahay; huli ta kun siya magdudulot, o magpapamibi sa Dios, sagkod na saiyang gibohon ini nin igwang udok na katuyohan siya dai magkikinabang kaini.

7 Huli totoo, dai ini mabibilang sa saiya na karahayan.

8 Huli totoo, kun an sarong tawo na maraot, magtao nin dulot, ginigibo niya ini na magabat an boot; kaya ini ibibilang sa saiya na siring na garo dai man sana siya nagtao kan dulot; kaya siya ibibilang na maraot sa atubangan kan Dios.

9 Asin siring man ibibilang na maraot sa sarong tawo, kun siya magpapamibi na bakong udok an katuyohan kan puso; iyo, asin idto daing pakinabang sa saiya, huli ta an Dios dai nag-aako nin siring.

10 Kaya, an tawo na maraot dai makakagibo nin marahay; ni makakatao siya nin marahay na dulot.

11 Huli totoo, an mapait na burabod dai maluwas nin marahay na tubig; ni an marahay na burabod magluwas nin mapait na tubig; kaya an tawo na surogoon kan demonio dai makakasunod ki Cristo; asin ta kun siya magsunod ki Cristo siya dai magiging surogoon kan demonio.

12 Kaya an gabos na mararahay hali sa Dios; asin idtong mararaot hali sa demonio; huli ta an demonio kaiwal kan Dios, asin padagos na nakikilaban saiya, asin nag-aagda asin nagpapadagka sa kasalan, asin sa padagos na paggibo nin mararaot.

13 Alagad totoo, idtong nasa Dios nag-aagda asin nagpapadagka sa padagos na paggibo nin mararahay; kaya, an lambang bagay na nag-aagda asin nagpapadagka na maggibo nin marahay, asin mamoot sa Dios, asin maglingkod sa saiya, nasa pag-antabay kan Dios.

14 Kaya magdarangog, sakuyang padangat na manga katugangan, na kamo dai maghatol na an mararaot sa Dios, o na an mararahay asin an sa Dios sa demonio.

15 Huli ta totoo, sakuyang manga katugangan itinatao sa saindo na magpili tanganing maaraman nindo an marahay sa maraot; asin an dalan sa pagpili maliwanag, tanganing saindong maaraman sa bilog na pakaaram, siring sa liwanag kan aldaw sa kadikloman kan banggi.

16 Huli ta totoo, an Espiritu ni Cristo itinao sa lambang tawo, tanganing saiyang maaraman an marahay ki sa maraot; kaya sakuyang ipinapahiling sa saindo an paagi sa pagpili; huli ta an lambang bagay na nag-aagda na maggibo nin marahay, asin nakakadara na magtubod ki Cristo, iyan sinugo sa paagi kan kapangyarihan asin balaog ni Cristo; kaya saindong maaraman sa bilog nindong pakaaram na ini sa Dios.

17 Alagad an ano man na bagay na nakakadara sa tawo na maggibo nin maraot, asin dai magtubod ki Cristo, asin indahan siya, asin dai maglingkod sa Dios, saindong maaaraman sa bilog na pagkaaram na idto sa demonio; huli ta sa siring na paagi an demonio minagibo, huli ta siya dai nagdadara sa siisay man na tawo na maggibo nin marahay, dai, ni saro; ni an saiyang manga anghel; ni sinda na nagpapasakop kan saindang sadiri sa saiya.

18 Asin ngonian, sakuyang manga katugangan, nahihiling ko na saindong aram na an liwanag na kamo makakapaghukom, na kun arin na liwanag iyo an liwanag ni Cristo, mag-ingat na kamo dai maghukom na sala; huli ta sa siring na paghukom na saindong hinukom kamo huhukoman man.

19 Kaya, ako nakikihuron saindo, manga katugangan, na maigot kamong mag-adal sa liwanag ni Cristo tanganing kamo makaaram kan marahay ki sa maraot; asin ta kun saindong pangangapotan an lambang marahay na bagay, asin dai idto ipagsumpa, kamo totoong magiging aki ni Cristo.

20 Asin ngonian, sakuyang manga katugangan paano ini mangyari na saindong mapapangapotan an lambang marahay na bagay?

21 Asin ngonian ako uminabot sa pagtubod na idto, na sakuyang sinabi na sakuyang itataram; asin ta sakuyang sasabihon sa saindo an paagi kun paano nindo mapapangapotan an lambang marahay na bagay.

22 Huli totoo, an Dios nakakaaram kan gabos na manga bagay, bilang hali sa daing-kasagkuran sagkod sa daing-kasagkuran, kaya siya nagpadara nin manga anghel na maglingkod sa manga aki nin tawo, tanganing ipabatid an manunungod sa pag-abot ni Cristo; asin ki Cristo maabot an lambang marahay na bagay.

23 Asin ta an Dios man nagsabi sa manga propeta, sa paagi kan saiyang sadiring nguso, na si Cristo maabot.

24 Asin ta totoo, igwang manlaen-laen na manga paagi na siya nagpahiling nin manga bagay sa manga aki nin tawo, na manga mararahay; asin an gabos na manga bagay na mararahay hali ki Cristo; kun bako an manga tawo nahulog na sa pagkakasala, asin ta daing marahay na bagay na maabot sa sainda.

25 Kaya sa paagi kan paglingkod nin manga anghel, asin sa paagi kan lambang tataramon na nagluwas sa nguso kan Dios, an tawo nagpoon na magtubod ki Cristo; asin sa siring na paagi nin pagtubod, sinda nangapot sa lambang marahay na bagay; asin ta siring ini sagkod sa pag-abot ni Cristo.

26 Asin pagkatapos na siya uminabot an manga tawo man nakaligtas sa paagi nin pagtubod sa saiyang pangaran; asin sa paagi nin pagtubod, sinda naging manga aki kan Dios. Asin siring katotoo na si Cristo nabubuhay siya nagtaram kan manga tataramon na ini sa samuyang manga kamagurangan, na an sabi: Ano man na bagay an saindong hagadon sa Ama sa sakuyang pangaran, na marahay, sa pagtubod, nagtutubod na matatawan kamo, totoo, iyan mauutob sa saindo.

27 Kaya, sakuyang padangat na manga katugangan, ano nahali na daw an manga milagro huli ta si Cristo nagsakat na sa langit, asin nagtukaw na sa toong kamot kan Dios, tanganing akoon sa Ama an pagkaherak na manunungod saiya na igwa siya sa manga aki nin tawo?

28 Huli ta saiyang nasimbagan na an manga kasagkuran kan susundon, asin saiyang sisadiri an gabos na igwang pagtubod sa saiya; asin sinda na igwang pagtubod sa saiya mangangapot sa lambang marahay na bagay; kaya saiyang ipinakikimaherak an manga aki nin tawo; asin siya nag-eerok na daing-kasagkuran sa kalangitan.

29 Asin huli ta saiyang nagibo ini, sakuyang padangat na manga katugangan, ano nag-ontok na daw an manga milagro? Totoo sakuyang sinasabi sa saindo, Dai; ni an manga anghel nag-ontok na sa paglingkod sa manga aki nin tawo.

30 Huli totoo, sinda manga sakop niya, na maglingkod sunod sa tataramon kan saiyang pagboot, saindang ipinapahiling an saindang sadiri sa sainda na igwang makusog na pagtubod asin maimbod na kaisipan sa lambang porma nin kabanalan.

31 Asin an katuyohan kan saindang paglingkod iyo an apodan an gabos na manga tawo na magsorolsol, asin utobon asin gibohon an gibo kan manga tipan kan Ama, na ginibo niya sa manga aki nin tawo, sa paagi kan pagpahayag kan tataramon ni Cristo sa piniling manga kasangkapan kan Kagurangnan, tanganing sinda makapagpatotoo sa saiya.

32 Asin sa paagi kan paggibo na idto, an Kagurangnan na Dios hinanda an paagi tanganing an natada kan manga tawo magkaigwa nin pagtubod ki Cristo, tanganing an Espiritu Santo magkaigwa nin lugar sa saindang manga puso, sunod sa kapangyarihan kaidto; asin sa siring na paagi inutob kan Ama, an manga tipan na saiyang ginibo sa manga aki nin tawo.

33 Asin si Cristo nagsabi: Kun kamo magkakaigwa nin pagtubod sa sakuya kamo magkakaigwa nin kapangyarihan na gibohon an ano man na bagay na tama sa sakuya.

34 Asin siya nagsabi: Magsorolsol kamo gabos sa manga kasagkuran kan kinaban, asin dumurulok sa sakuya, asin magpabunyag sa sakuyang pangaran, asin magkaigwa nin pagtubod sa sakuya, tanganing kamo makaligtas.

35 Asin ngonian, sakuyang padangat na manga katugangan, kun an manga bagay na ini totoo na sakuyang sinabi sa saindo, asin an Dios ipapahiling sa saindo, sa kapangyarihan asin dakulang kamurawayan sa huring aldaw, na an manga idto totoo, asin ta kun an manga idto totoo ano an aldaw nin manga milagro nag-ontok na daw?

36 O nag-ontok na daw an manga anghel na magpahiling sa manga aki nin tawo? O saiya na daw na pinugolan an kapangyarihan kan Espiritu Santo sa sainda? O saiya daw, na gigibohon ini, mantang an panahon nagtatagal, o an kinaban nagtitindog pa, o igwa pa nin sarong tawo sa ibabaw kaini na ililigtas?

37 Totoo sakuyang sinasabi sa saindo, Dai; huli ta idto sa paagi nin pagtubod na an manga milagro ginigibo; asin ta idto sa paagi nin pagtubod na an manga anghel nagpapahiling asin naglilingkod sa manga tawo; kaya kun an manga ini nag-ontok na herak man sa manga aki nin manga tawo, huli ta ini dahil sa kadaihan nin pagtubod, asin an gabos mababasang sana.

38 Huli ta daing tawo na maliligtas, sunod sa manga tataramon ni Cristo, sagkod na magkaigwa sinda nin pagtubod sa saiyang pangaran; kaya kun an manga bagay na ini nag-ontok na, siring man an pagtubod nag-ontok na man; asin makaherak an kamugtakan kan tawo, huli ta sinda garo siring man sana sa daing pagtubos na ginibo.

39 Alagad totoo, sakuyang padangat na manga katugangan, ako naglalaom nin mararahay na manga bagay sa saindo, huli ta sakuyang aram na kamo igwa nin pagtubod ki Cristo huli sa saindong kapakumbabaan; huli ta kun dai kamong pagtubod sa saiya kamo dai nababagay na maibilang sa katiripunan kan saiyang simbahan.

40 Asin sa giraray, sakuyang padangat na manga katugangan, ako boot na magtaram sa saindo manunungod sa paglaom. Paano kamo makapaghinguha na magkaigwa nin pagtubod kun dai kamo nin paglaom?

41 Asin ano ini na paglalaoman nindo? Magdangog sakuyang sinasabi sa saindo na kamo magkakaigwa nin paglaom sa paagi kan pagtubos ni Cristo asin kan kapangyarihan kan saiyang pagkabuhay-liwat, tanganing ibangon sa buhay na daing-kasagkuran, asin ta ini huli sa saindong pagtubod sa saiya sunod sa pangako.

42 Kaya, kun an tawo igwa nin pagtubod kaipuhan igwa siyang paglaom; huli ta kun dai nin pagtubod dai magkakaigwa nin ano man na paglaom.

43 Asin sa giraray, magdangog sakuyang sinasabi sa saindo siya dai magkakaigwa nin pagtubod asin paglaom, kun siya bako mauyo, asin mapakumbaba sa puso.

44 Kun iyo man, an saiyang pagtubod asin paglaom daing kamugtakan, huli ta dai nin aakoon sa atubangan kan Dios, kundi idtong mauyo asin mapakumbaba sa puso; asin kun an sarong tawo mauyo asin mapakumbaba sa puso, asin minaako sa paagi kan kapangyarihan kan Espiritu Santo na si Jesus iyo an Cristo, kaipuhan na igwa siya nin dalisay na pagkamoot; huli ta kun dai siya nin dalisay na pagkamoot siya daing halaga; kaya kaipuhan igwa siya nin dalisay na pagkamoot.

45 Asin an dalisay na pagkamoot matinios na halawig, asin mabuot, asin dai nang-uuri, asin bako paharo-halangkawon, dai nag-iisip kan saiyang sadiri, dai tulos naaanggot, dai nag-iisip nin maraot, asin dai nag-oogma sa karaotan kundi nag-oogma sa katotoohan, natitios an gabos na manga bagay, nagtutubod sa gabos na manga bagay, naglalaom sa gabos na manga bagay, natatagalan an gabos na manga bagay.

46 Kaya, sakuyang padangat na manga katugangan, kun dai kamo nin dalisay na pagkamoot, kamo daing halaga, huli ta an dalisay na pagkamoot sagkod pa man dai magkukulang. Kaya mangapot sa dalisay na pagkamoot, na iyo an pinakadakula sa gabos, huli ta an gabos na manga bagay magkukulang—

47 Alagad an dalisay na pagkamoot iyo an dalisay na pagkamoot ni Cristo, asin ini nagtatagal sagkod pa man; asin an siisay man na makua na igwa kaini sa huring aldaw, iyan magiging marahay sa saiya.

48 Kaya, sakuyang padangat na manga katugangan, magpamibi sa Ama kaibahan an gabos na kusog nin puso, tanganing kamo mapano kan saiyang pagkamoot, na itinatao sa gabos na tunay na parasunod kan saiyang Aki, na si Jesu-Cristo; tanganing magi kamong manga aki kan Dios; tanganing kun siya umabot kita makaarog saiya, huli ta satuyang mahihiling siya na siring sa saiya; tanganing kita magkaigwa kan paglaom na ini; tanganing magi man kitang dalisay siring sa saiya na dalisay. Amen.