1 Asin ngonian ako magtataram manunungod sa pagbunyag. Magdarangog, binunyagan an manga elder, manga padi, asin manga paratukdo; asin sinda dai binunyagan sagkod na sinda nagdara nin tamang bunga na sinda maninigo kaini.

2 Asin ta sinda dai nag-ako nin siisay man na bunyagan sagkod na sinda dumulok na igwang nararagrag na puso asin nagmumundo na espiritu, asin nagpatotoo sa simbahan na sinda tunay na nagsorolsol kan saindang manga kasalan.

3 Asin ta daing inaako na bunyagan sagkod na dai sinda mag-ako sa sainda kan pangaran ni Cristo, na igwa nin tunay na pagmawot na maglingkod sa saiya sagkod sa katapusan.

4 Asin pagkatapos na sinda maako sa pagbunyag asin ta binago na sinda asin lininigan sa kapangyarihan kan Espiritu Santo, sinda ibinilang sa manga tawo kan simbahan ni Cristo; asin an saindang manga pangaran isinurat, tanganing sinda marumdoman asin mapangatamanan kan marahay na tataramon kan Dios, tanganing sinda magdanay sa tamang dalan, tanganing sinda magpadagos sa maimbod na pagpamibi, minasarig nanggad sana sa manga balaog ni Cristo na kaggibo asin parahaman kan saindang pagtubod.

5 Asin an simbahan nagtitiripon nin danay, tanganing mag-ayuno asin magpamibi, asin paghururon-huronan an manunungod sa karahayan kan saindang manga kalag.

6 Asin sinda danay na nagtitiripon tanganing mag-ako kan tinapay asin arak, sa pagrumdom kan Kagurangnan na Jesus.

7 Asin ta sinda maigot na nagmamasid na dai magkaigwa nin karaotan sa saindang katiripunan; asin ta an siisay man na makua na nagkasala, asin tulong tagapagpatotoo kan simbahan an naghatol sa sainda sa atubangan kan manga elder, asin ta kun dai sinda nagsorolsol, asin dai nagkurumpisal, an saindang manga pangaran binura, asin ta sinda dai na binilang sa manga tawo ni Cristo.

8 Alagad kun gurano kadayaday an saindang pagsorolsol asin paghagad nin kapatawaran, na igwang udok na katuyohan, sinda pinapatawad.

9 Asin an saindang pagtiripon pinamamayohan kan simbahan sunod sa paagi kan pag-antabay kan Espiritu, asin sa kapangyarihan kan Espiritu Santo; huli ta kun ano an ipinapasunod sainda kan kapangyarihan kan Espiritu Santo kun maghulit, o magpaliwanag, o magpamibi, o mag-agrangay, o magkanta, siring man ginibo ini.