Wóltaʼii 4
Elder dóó Priest danilínígíí bááh yikʼi sodadilzinígíí dóó ataadeikaʼígíí éí baa haneʼ. Díí éiyá Jesus náádiidzá dóó bikééʼdóó 401–421gi nahalzhiishgo yihahą́ądą́ą́ʼ ádahóótʼįįd.
1 Kótʼéego éí elder dóó priest danilíinii Christ bitsʼíís dóó bidił yikʼi sodadilzin dóó ataańdeikaah; Christ yee hoołʼaʼą́ą bikʼehgo yá sodadilzin dóó ńdeikááh; ákohgo díí éí tʼáá aaníigo nihił béédahózin; dóó elder éí doodago priest éí yikʼi sodadilzin—
2 Dóó tʼáá ájíłtso yah ańjíjahígíí éí bił ntsidazhdeesgoʼ, dóó aTaaʼ éí Christ bízhiʼ binahjįʼ, kódajiníigo sodaazhdilzin:
3 O Diyin God, Hoolʼáágóó aTaaʼ nílíinii, niYeʼ, Jesus Christ, bízhiʼ binahjįʼ, ádaʼndiiʼní, díí bááh bikʼijinídliih dóó diyingo ádíílííł diné tʼáá ałtso díí bááh yidooyį́łígíí bá; áko díí dayííyą́ąʼgo niYeʼ bitsʼíís yéédaalniih dooleeł, dóó nichʼįʼ ííshją́ą́ ádaʼdiilyaa doo, O Diyin God, Hoolʼáágóó aTaaʼ nílíinii, áko niYeʼ bízhiʼ ákʼideididootʼááł, dóó tʼáá áłahjįʼ yéédaalniih dooleeł, dóó bibeehazʼáanii baa yíníláhígíí yikʼehgo dahináa dooleeł, áko biiʼSizíinii tʼáá áłahjįʼ bił dahólǫ́ǫ dooleeł. Amen.