Diyin bizaad
Enos 1
Ahit’áád Hóyahdi Na’asdzoh

Hide Footnotes

Saad Bik’ehgo Nda’anishí

Enos Binaaltsoos

Wóltaʼii 1

Enos yéigo sodoolzin dóó bibąąhági ádaatʼéii bee baa ndeetʼą́—Bóhólníihii binééʼ biniʼ biiʼ hazlį́į́ʼ, náás yiską́ądi Laman bidineʼé yisdáhidookah níigo—Nephi bidineʼé Laman bidineʼé tʼáá aaníí nahagháhígíí chʼééh yee yił dahalneʼ ńtʼę́ę́ʼ—Enos biNináʼnídláhígíí yaa bił hózhǫ́—Díí éí tʼah doo Jesus biʼdichíhę́ędą́ą́ʼ 420 yihahą́ądą́ą́ʼ nahalzhiishgo ádahóótʼįįd.

1 Jó, áádóó shí, Enos, shizhéʼé bééhonisingo éí diné yáʼátʼéehii nilį́įgo—háálá bizaad yee nashineeztą́ą́ʼ, dóó Bóhólníihii binaʼnitinígíí dóó átʼéhígíí ałdóʼ yee nashineeztą́ą́ʼ—dóó éí bąą shiDiyin God bízhiʼ tʼáá íiyisíí bikʼihojídlí—

2 Dóó Diyin God éí shibąąhági átʼéii tʼah doo yee shaa ndeetʼaahgóó, bidááhdóó tʼáá íiyisíí shichʼįʼ nahwiisnáʼígíí bee nihił hodeeshnih.

3 Jó, naaldlooshii hádéshzheeʼgo tsintahgóó níyá; dóó shizhéʼé hoolʼáágóó iiná, dóó Diyin God yá naazíinii tʼáá íiyisíí ił hózhǫ́ bee dahólónígíí tʼáá ahą́ą́h yee shichʼįʼ yaa yáłtiʼę́ę, tʼáá íiyisíí yéigo shijéí yidiisnááʼ.

4 Dóó shitsʼíís dóó shiyiʼsizíinii Diyin God bitsʼą́ą́dę́ʼígíí tʼáá íiyisíí yídin silį́į́ʼ; dóó Áshiilaaígíí bidááhdóó ntsidinísgoʼ, dóó tʼáá íiyisíí shitsʼíís dóó shiyiʼsizíinii bá náʼooshkąąh dóó sodiszingo haasdzííʼ; dóó bichʼįʼ sodiszingo ałtso yiską́; aooʼ,dóó tłʼééʼ hazlį́į́ʼ ndi tʼahdii yáʼąąsh gódei sodiszin ńtʼę́ę́ʼ.

5 Dóó łaʼ iinééʼ shichʼįʼ haʼoodzííʼ, kóníigo: Enos, nibąąhági ádaatʼéii bee naa ndeetʼą́, dóó nikʼihojidoodliił.

6 Dóó shí, Enos, Diyin God doo biyoochʼíídgóó shił bééhózingo; ákohgo, baa yínííł nisinę́ę nahjįʼ kólyaa.

7 Dóó kódííniid: Bóhólníihii, dííshąʼ éí haitʼáo álʼį́?

8 Dóó éí kóshidííniid: Háálá Christ tsʼídá tʼah doo diitsʼį́hígíí dóó yiiłtséhígíí, yínídlánígíí biniinaa. Dóó tsʼídá tʼóó ahayóí nááhaigo índa bitsʼíís ííshjání íidoolííł; ákohgo, náás yínááł, háálá neʼoodląʼ haanándiidlaa.

9 Kʼad, áádóó, díí saad disétsʼą́ą́dóó shikʼisóó danilíinii, Nephi bidineʼé bąąh tsídékééz; ákohgo, shitsʼíís dóó shiyiʼsizíinii bee tʼáá íiyisíí Diyin God bee bá bichʼįʼ sodeeszin.

10 Dóó iiʼsizíiniikʼeh shichʼįʼ nahwiiʼnáago, jó, Bóhólníihii binééʼ shíniʼ biiʼ náhásdlį́į́ʼ, kóníigo: Nikʼisóó danilíinii shibeehazʼáanii haitʼáo yéigo yikʼeh dahółʼínígíí bikʼehgo baa deeshááł. Díí kéyah baa diníʼą́, dóó kéyah diyinii átʼéii. Doo éí haitʼáo da bikʼijįʼ hadeesdzih da tʼáá hazhóʼó bąąhági átʼéii tʼéiyá biniinaa; ákohgo, bee haasdzíʼę́ę bikʼehgo nikʼisóó danilínígíí baa deeshááł; dóó ndaʼiisíʼígíí yínííł bikʼijįʼ kódeeshłííł.

11 Shí, Enos, díí saad disétsʼą́ąʼgo dóó bikʼijįʼ, Bóhólníihii yinishdlánígíí tsʼídá doo nahjįʼ kódooníił da silį́į́ʼ; dóó ląʼída nízaadgóó tiʼhooshníihgo Laman bidineʼé dashikʼisóó bá sodeeszin.

12 Áádóó ałtso sodeeszingo dóó yéigo tʼáá ałtsojįʼ bíká áátʼįįdgo, Bóhólníihii kóshidííniid: Háálá iinídlánígíí biniinaa, nínízinígíí nichʼįʼ kódeeshłííł.

13 Dóó kʼad jó, áko kʼad bitsʼą́ą́dę́ę́ʼ nisinę́ę éi díí—ákó shidineʼé, Nephi bidineʼé haitʼáo da ndaʼiisíihgo, dóó éí biniinaa da ndabiʼdistseedgo, dóó Laman bidineʼé éí doo ndabidiʼdootsił da, Bóhólníihii Diyin God shidineʼé, Nephi bidineʼé bahaneʼ hashtʼeneidooʼááł; bigaan diyingo bibee adziilii da bee, áko háadi da náás yiską́ądi Laman bidineʼé baa dootʼááł, áko yee daatsʼí yisdáńdookah biniiyé—

14 Háálá kʼad éí nihitiʼdahooʼnííh chʼééh bee ádeiitʼįįd tʼáá aaníí oodląʼígíí yikʼeh ninádookahgo. Dóó bá dahachįʼgo saad yee ndahazʼą́, áko, bíighahgo, nihaa haneʼ dóó nihí, dóó ałdóʼ danihizhéʼé yę́ę bibee oʼoolʼįįł tʼáá ałtso nahjįʼ kódadiilnííł dadííniid.

15 Ákohgo, Bóhólníihii Diyin God nihaa haneʼ nihá yaa áhályánígíí shił bééhózingo, tʼáá áłahjįʼ bichʼįʼ yícha, háálá kóshidííniid: Haʼátʼííshį́į́ nínízinshį́į́ neʼoodląʼígíí bee nashídííníłkidgo, Christ bízhiʼ binahjįʼ shíká adoolwoł nínízingo, tʼáá aaníí níká adoolwoł.

16 Dóó sheʼoodląʼ hólǫ́ǫgo, Diyin God bikááʼ ndaʼasdzooígíí baa áhólyą́ą dooleeł bidishníigo bichʼįʼ yícha; áko náasdi Diyin God kʼad áajįʼ ahoolzhiizh niizį́įʼgo Laman bidineʼé bikááʼ ndaʼasdzooígíí baa ndooniłgo yee shił ahaʼdeetʼą́.

17 Dóó shí, Enos, ahaʼdeetʼánę́ę bikʼehgo áhodooníłígíí shił bééhoozin; ákohgo shitsʼíís dóó shiyiʼsizíinii hanáályį́į́ʼ.

18 Dóó Bóhólníihii kóshidííniid: Danihizhéʼé yę́ę ałdóʼ díí yíndaʼídééłkid; áko bedaʼoodląʼ bee bá biʼdoolnííł; háálá bedaʼoodląʼ éí tʼáá nigi ádaatʼéé ńtʼę́ę́ʼ.

19 Dóó kʼad áádóó shí, Enos, Nephi bidineʼé bitahgóó, náásgóó ádahodooníłígíí, dóó tʼáadoo leʼé disetsʼą́ą́ʼ dóó yiiłtsánígíí bee yáshtiʼ.

20 Dóó tʼáá aaníigo baa hashneʼ éí Nephi bidineʼé Laman bidineʼé Diyin God tʼáá aaníinii ńdeiidoodląąłgo tsʼídá yéigo yindaashnish. Ndi chʼééh ádeiitʼįįd; tʼáá íiyisíí daʼoołchʼį́į́d daazlį́į́ʼ, dóó tʼáá bí doo yáʼáshóonii yikééʼ deizįʼ léiʼ daʼałchin daazlį́į́ʼ lá, dóó bádahádzid, dóó diné ndaʼałtseedii, beʼelyaaii dóó tʼóó baaʼihii ałtso yiih yíkai lá; naaldloosh daʼałchinígíí deiyą́ągo; níbaal yiiʼ dabighan, dóó doo diné kééhatʼį́įdi bitsiiʼ daashzhééʼ dóó naaldlooshii bikágí boozhnííʼ gónaa tʼéiyá bikʼidaastiʼgo ndaakai; dóó ałtį́į́ʼ índa bééshhał dóó tsénił yéédahósingo chodayoołʼį́. Dóó ląʼída atsįʼ tʼáá daalchíiʼgo tʼéí deiyą́; dóó ndanihidoołtsiłgo áłahjįʼ yíká ádáátʼį́.

21 Áádóó Nephi bidineʼé éí kéyah yikááʼ kʼidaʼdiilá, dóó łą́ągo kʼéédilyéehii, tłʼoh naadą́ą́ʼ, dóó tsin bineestʼąʼ ádaatʼéii deineestʼą́, dóó dibé dóó łį́į́ʼ, béégashii ałʼąą ádaatʼéhígíí, dóó tłʼízí, dóó tłʼízí daʼałchinígíí dóó tʼáá ałtso łį́į́ʼ ałʼąą ádaatʼéhígíí deineesą́.

22 Dóó tʼóó ahayóí Diyin God yá dahalneʼii nihitah dahólǫ́ǫ́ ńtʼę́ę́ʼ. Dóó diné éí tsʼídá bikʼos daniłdzil, doo bikʼidaazhdootą́ átʼée da.

23 Dóó tʼáá hazhóʼó tsʼídá yéigo bikʼeʼeschʼíiʼgo bichʼįʼ yátiʼ, daʼahijigą́ baa haneʼ dóó áhodoonííł haʼnínígíí, dóó ałkʼijįʼ ídlį́, dóó dahodoochxǫǫł, dóó ndaʼdootsił haʼníigo áłahjįʼ bee béédabijíłníihgo, dóó hoolʼáágóó iiná haa nízahígíí, dóó Diyin God bibee ánihwiitʼaah dóó bibee adziilii, díí tʼáá ałtso bił hóóneʼ—áłahjįʼ Bóhólníihii béédaałdzid biʼdiʼníigo bił naʼanish. Tʼáá achʼįʼgoígíí éí ádaadingo bee yáshtiʼ tʼéiyá, dóó tsʼídá bééhózínígo bee haadzííʼ, doo tʼáadoo hodinaʼí ábiʼdisdįįd da. Dóó díí kótʼáo éí baa naʼasogo baa naashá.

24 Dóó Nephi bidineʼé dóó Laman bidineʼé daʼahigą́ągo yiiłtsą́ago shíiníłką́.

25 Áádóó hasistih, dóó neeznádiin dóó baʼaan tsostsʼidiin dóó baʼaan náhástʼéí nááhai éí nihizhéʼé Lehi Jerusalemdóó dah diiná dóó kojįʼ.

26 Dóó nááshidiʼdoolyééł bichʼįʼ hoolzhishgo baa ákoniizį́į́ʼ, Diyin God bibee adziilii shidiisnaʼígíí bee díí dineʼé ndínéeshtįįł dóó náás ádahodooníłígíí bee bił hodeeshnih, dóó saad Christ bikʼehgo tʼáá aanínígíí baa hodeeshnih. Dóó díí baa hashneʼgo ałtso iiná áshłaa, dóó nahasdzáán bikááʼ baa hózhóonii biláahdi átʼéego biiʼ shił hóózhǫǫd.

27 Dóó hodíinaʼgo hanáshyį́įhdi deeshááł, shiNinánídláii bił hazʼą́ądi; háálá éí bí biyiʼ háádeeshyįhgo shił bééhózin. Dóó shitsʼíís hoolʼáágóó hiná násdlį́įʼjįʼ háidoołkaałgo éí baa shił hózhǫ́, dóó áadi bidááhdę́ę́ʼ yideesįįł; índa shił hózhǫ́ǫgo biniiʼ yideestsééł, dóó kóshididooniił: Wóshdę́ę́ʼ shaa nínááh, nikʼihojídlíinii, shiTaaʼ bighandi ná hashtʼehoolyaa. Amen.