1 Oqo koi au ko Moronai; au sa vola na veika e vinaka vei au; ka’u sa volavola kina vei ira na wekaqu na Leimanaiti; ka’u gadreva me ra kila ni sa oti yani e va na drau ruasagavulu na yabaki mai na gauna a vakaraitaki kina na ivakatakilakila ni nona lako mai na Karisito.

2 Ka’u sa na tukuna mada vei kemudou na noqu vosa itatau ka’u na qai dregata na ivolatukutuku oqo.

3 Raica, au sa vakamasuti kemudou ni ena gauna dou sa wilika kina na veika oqo, kevaka sa lewa yalomatua ni Kalou mo dou wilika, dou na wilika ka kila kina na nona loloma na Turaga vei ira na luve ni tamata, mai na buli nei Atama ka yacova sara mai na gauna dou sa na taura kina na itukutuku oqo, ka vakananuma sara e lomamudou.

4 Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.

5 Ia ena kaukauwa ni Yalo Tabu dou na kila kina na dina ni veika kecega.

6 Ia na ka kecega sa vinaka, sa dodonu ka dina; o koya sa sega kina ni dua na ka e vinaka me cakitaki Karisito, ia era sa vakadinadinataki koya ga.

7 Ka dou na kila ni sai koya, ena kaukauwa ni Yalo Tabu; o koya au gadreva kina me’u vakamasuti kemudou mo dou kakua ni cakitaka na kaukauwa ni Kalou; ni sa cakacaka ena kaukauwa me vaka na nodra vakabauta, na luve ni tamata ka sa tautauvata tu ga edaidai, ni mataka, ka sega ni mudu.

8 Au sa vakamasuti kemudou tale na wekaqu, mo dou kakua ni cakitaka na isolisoli ni Kalou, ni sa vuqa sara; ka ra sa lako kecega mai vua na Kalou. Sa duidui na sala era soli kina na isolisoli oqo; ia sa duabauga na Kalou sa cakacakataka tiko na ka kece ena ka kecega; ka ra sa soli vei ira na tamata mai na veivakatakilai ni Yalo ni Kalou, me yaga vei ira.

9 Raica sa soli vua e dua mai vua na Yalo ni Kalou, me vakatavuvulitaka na vosa ni yalomatua;

10 Ki vua e dua tale me vakatavuvulitaka na vosa ni kila ka, mai vua tale ga na Yalo;

11 Ki vua tale e dua na vakabauta levu sara; vua tale e dua na isolisoli me veivakabulai, mai vua tale ga na Yalo;

12 Ki vua tale e dua, me cakava na caka mana lelevu;

13 Ki vua tale e dua, me parofisai me baleta na ka kecega;

14 Ki vua tale e dua, me raici ira na agilosi kei ira na yalo dauveiqaravi;

15 Ki vua tale e dua, na veimataqali vosa kecega;

16 Ki vua tale e dua, me vakadewataka na vosa kei na veivosa tani e so.

17 Ia na veisolisoli kecega oqo sa mai vua na Yalo i Karisito; ka sa soli vei ira na tamata e vuqa me vaka sa lewa ko koya.

18 Ka’u gadreva me’u vakamasuti kemudou na wekaqu lomani, mo dou nanuma ni ka kecega sa vinaka sa mai vei Karisito.

19 Ka’u sa gadreva me’u vakamasuti kemudou na wekaqu lomani, mo dou nanuma ni sai koyakoya tiko ga na Kalou e nanoa, ena siga edaidai, ka sega ni mudu, ia na isolisoli kecega ka’u sa tukuna oqo, ka sa isolisoli vakayalo, era na tudei tu ka sega ni kau tani me vaka sa tudei ko vuravura, ia kevaka era sa mudu, sa vu ga mai na nodra tawa-vakabauta na luve ni tamata.

20 O koya sa dodonu kina me tu na vakabauta; ia kevaka sa tu na vakabauta, sa kilikili tale ga me tu na inuinui; ia ni sa tu na inuinui, sa kilikili tale ga me tu na loloma uasivi.

21 Ia kevaka sa sega vei kemudou na loloma uasivi, dou na sega ni rawa ni vakabulai ena matanitu ni Kalou; dou na sega tale ga ni rawa ni vakabulai ena matanitu ni Kalou kevaka sa sega vei kemudou na vakabauta; ena sega tale ga ni rawa kevaka sa sega vei kemudou na inuinui.

22 Ka kevaka sa sega vei kemudou na inuinui sa dodonu mo dou sa qai vakaloloma sara; ni sa yaco na vakaloloma ena vuku ni caka cala.

23 Ni a kaya vakaidina ko Karisito vei ira na noda qase: Kevaka sa tu vei kemudou na vakabauta, dou sa rawa ni kitaka na ka kecega ena vukuqu.

24 Ia oqo me’u vosa mada ki na iyalayala kece kei vuravura—ni kevaka ena yaco mai na siga ka na kau tani kina na kaukauwa kei na veisolisoli ni Kalou ena kemudou maliwa, ena baleta ga na tawavakabauta.

25 Ka na ca vei ira na luve ni tamata kevaka sa yaco na ka oqo; ia ena sega e dua ena kemudou maliwa ena kitaka na ka vinaka, io sa sega sara e dua. Ni kevaka e dua vei kemudou sa kitaka na ka vinaka, sa rawata ga ena kaukauwa kei na isolisoli ni Kalou.

26 Ka na ca vei ira sa kauta tani na veika oqo ka qai mate, ni ra sa mate ena nodra ivalavala ca, ka ra na sega ni vakabulai ena matanitu ni Kalou; ka’u sa sega ni lasu; ni’u sa tukuna me vaka na vosa i Karisito.

27 Ka’u sa vakamasuti kemudou mo dou nanuma na veika oqo; ni na yaco kusarawa mai na gauna dou na qai kila kina ni’u sa sega ni lasu, edatou na veirai kina ena itikotiko ni veilewai ni Kalou; ia ena qai kaya vei kemudou na Turaga na Kalou: Au a sega beka ni tukuna vei kemudou na noqu vosa, ka a vola na tamata oqo, me vaka e dua sa vosa mai vei ira na sa mate, me vaka e dua sa vosa mai na kuvu-ni-soso?

28 Au sa tukuna na veika oqo me vaka sa parofisaitaki tu. Ka raica, era sa vosa kecega ni Kalou tawavakaiyalayala; ka na vakasiusiu yani na nona vosa mai na itabatamata ki na itabatamata.

29 Ka na vakaraitaka vei kemudou na Kalou ni sa dina na ka au sa vola.

30 Ka’u sa vakamasuti kemudou tale, mo dou lako mai vei Karisito, ka taura matua na isolisoli vinaka kecega, ka kakua sara ni tara na isolisoli ca, se na ka sa tawasavasava.

31 Mo yadra mai Jerusalemi, tucake mai na kuvu-ni-soso; io, mo tokara na nomu isulu vakaiukuuku ko iko na gone yalewa ni Saioni; ka mo vakaukauwataka na nomu iteki ka vakalevutaka na nomu iyalayala me sega ni mudu, mo kakua kina ni vakasesei tale, me vakayacori kina na veiyalayalati ka cakava na Tamada Tawamudu vei kemudou, na mataqali i Isireli.

32 Io, dou lako mai vei Karisito, ka mo dou vakataucokotaki vua, ka vakuwai kemudou mai na veika kecega sa sega ni vakalou, ka kevaka dou sa vakuwai kemudou mai na veika kecega sa sega ni vakalou ka lomana na Kalou ena nomudou igu, vakasama, kei na nomudou kaukauwa kecega, sa na qai rauti kemudou na nona loloma soli wale, ia na nona loloma soli wale dou sa vakataucokotaki kina ena vukui Karisito; ka kevaka dou sa vakataucokotaki ena loloma soli wale ni Kalou ena vuku i Karisito, dou na sega sara ni rawa ni cakitaka na kaukauwa ni Kalou.

33 Ka kevaka dou sa vakataucokotaki ena loloma soli wale ni Kalou ena vuku i Karisito, ka sega ni cakitaka na nona kaukauwa, dou sa qai vakatabui vei Karisito ena loloma soli wale ni Kalou ena kena a dave na dra i Karisito me vaka na veiyalayalati i Tamada, me bokoci kina na nomudou ivalavala ca ka me yaco kina mo dou tabu ka savasava sara.

34 Ia oqo au sa vakamoce vei kemudou taucoko. Sa voleka me’u lako ka vakacegu ena parataisi ni Kalou, me yacova ni rau sa cokoti vata tale na yaloqu kei na yagoqu, ka’u na qai kau cake ena lagilagi, ka veirai kei kemudou ena itikotiko talei ni veilewai cecere i Jiova, na nodra Turaganilewa Tawamudu na bula kei ira na mate. Emeni.