1 Kunanqa rimarillanitaqmi, Cristopi mana kreyiqkunamanta.

2 kreyinkichischu hamunasuykichis p’unchawpi? Wiraqocha hamuqtin, ari, chay hatun p’unchaw, papel hina hallp’a mayt’ukuqtin, hallp’a imamanta ruwasqa kasqantaq wapu ruphawan chulluqtin; ari, chay hatun p’unchawpi Yayaq Chitanpa ñawpaqenpi sayanaykichispaq apamusqa kaqtiykichis, manan Yaya kanchu ninkichischu?

3 Astawanraqchu Cristota mananchankichis, ichari qhawayta atiwaqchischu Yayaq Chitanta? Yuyankichischu Paywan tiyanaykichista huchayoq kasqaykichista yachaspaykichis? Yuyankichischu kusiy-kusi chay qollanan Kaqwan tiyanaykichista, wiñaypuni kamachisqa-siminkunata p’akisqaykichismanta yachasqaykichiswan nunaykichis muchuchisqa kashaqtin?

4 Qankunata nisaykichis—aswan usurin kawaqchis qollanan chanin Yayawan tiyaspaykichis, Paypa ñawpaqenpi qhelli kayniykichismanta yachashaspaykichis, kondenasqa nunakunawan supay wasiq tiyanaykichismantaqa.

5 Yayaq ñawpaqenpi q’alalla kasqaykichista, Yayaq kusiqellpunta, Jesucristoq qollanan kaynintawan rikunaykichispaq apamusqa kaqtiykichisqa, mana qolluchiy atina ninatan qankunapi rawrarichinqa.

6 Chhaynaqa mana-kreyiqkuna, Wiraqochaman kutiriychis; llapa kallpaykichiswan Taytaman waqyakuychis Jesuspa sutinpi; ichapas mana ima qhelliyoq, ch’uya, sumaq, yuraq tarisqa kawaqchis; chay qhepa p’unchawpi Chitaq yawarninwan maqchisqa kaspa.

7 Yayaq rikuchiyninkunata mananchaqkunaman—manañan kanñachu, manan rikuchiy kanchu, nitaq unanchaykunapas, ni qoykunapas, ni alliyachiypas, ni huk simikunapi rimaypas, ni huk simikuna sut’inchaypas—nispa niqkunaman yapamanta rimarini.

8 Qankunata niykichis, kay imaymanakunata mananchaqqa manan Cristoq yachachiyninta reqsinchu; ari, manan qelqakunata ñawincharqanchu; ñawincharqan chayqa manan chayta hamut’ankuchu.

9 Manachu ñawinchanchis, Yaya kaqlla qayna p’unchawpas kunan p’unchawpas, wiñaypaqpas kasqanta; manataq Paypi ima t’ikrakuypas, ni t’ikrakuypa llanthunpas kasqanta.

10 T’ikarakuq yayata qankuna kikiykichispaq yuyarqankichis, t’ikrakuq llanthutaq paypi kan chayqa, mana milagrokunayoq Yayatan qankuna kikiykichispaq yuyarqankichis.

11 Ichaqa, milagrokunayoq Yayatan qankunaman qhawachisaykichis, ari, Abrahampa, Isaakpa, Jakobpa ima Yayanta. Chay kikin Yayallataqmi hanaqpachata kay pachatawan, kaykunapi kaq imaymanakunatawan kamarqan.

12 Paymi Adanta kamarqan, Adanwantaq runaq urmaynin hamurqan. Runaq urmasqanraykutaq Jesucristo hamurqan, Taytapas Churipas; Jesucristoraykutaq runaq qespiynin hamurqan.

13 Jesucristowan hamusqan chay runakunaq kutichikapuywantaq yapamanta Wiraqochaq ñawpaqenman apamusqa kanku; ari, kaypin llapan runakuna kutichikapusqa kanku, Cristoq wañuynin kawsarimuyta apamusqanrayku, kay kawsarimuytaq wakichin mana tukukuyniyoq puñuymanta kutichikapuyta; chay puñuymantataq llapan runakuna rikch’arichisqa kanqaku, Yayaq atiyninwan qeqeri waqaqtin. Paykunataq lloqsimunqaku, huch’uypas, hatunpas, taripananpa ñawpaqenpitaq sayanqaku; kay pachapi wañuypa wiñay-wiñaypaq watayninmantataq kutichiskapusqa, pashkarisqa ima kaspanku.

14 Hinamantaq Qollanan Kaqpa chaninchaynin paykunaman hamunqa, chay patamantaq pacha hamunqa, qhelli kaqtaq qhellilla qhepanqa; chanin kaqtaq chaninlla kanqa; kusiy-kusi kaqtaq kusiy-kusilla kanqa, mana kusiy-kusi kaqtaq llakikuypi kanqa.

15 Kunantaq qankuna kikiykichispaq mana milagro ruway atiq yayata yuyaqkunaman tapusaykichis: Pasarqanñachu kay rimasqay imaymanakuna? Hamunrqanñachu tukukuy? Manan nisaykichismi; manataqmi Yayaqa milagrokunayoq Yaya kayta tatirqanchu.

16 Manachu Yayaq ruwasqan imaymanakuna ñawiykichispi ancha sumaq? Ari, pitaqmi hamut’ayta atinman Yayaq ancha sumaq ruwasqankunata?

17 Pitaq ninqa, rimayninwan hanaqpacha kay pachapiwan kananta, rimayninpa atiyninwantaq ñut’u hallp’amanta runa kamasqa kasqanta, rimayninpa atiyninwantaq milagrokuna ruwasqa kasqantawan, manan milagrochu nispari?

18 Pitaq ninqa: Manan Jesucristoqa askha ancha hatun milagrokunataqa ruwarqanchu nispari? Apostolkunaq makinkunawantaq askha hatun milagrokuna ruwasqa karqan.

19 Chay p’unchawpi milagrokuna ruwasqa karqan chayri, imanaqtintaq Yayari tatinman milagrokunayoq Yaya kaytari, hinasparaqtaq mana t’ikrakuq Yayari kanman? Manan Payqa kambiyanchu nispan nisaykichis; chhayna kanman chayqa, Yaya kaytan Pay tatinman. Manan Payqa Yaya kayta saqenchu, milagrokunayoq Yayataqmi.

20 Runakunaq wawankunaq chawpinpi milagrokunata ruwaytaqa tatin, mana kreyiypi urmasqankurayku, chanin ñanmanta hitirisqankurayku, konfiyananku Yayata mana reqsisqankuraykupiwan.

21 Nisaykichismi, pipas Cristopi kreyispa, mana imatapas ishkayaspa Taytamanta Cristoq sutinpi imatapas mañakunqa chayqa, payman qosqan kanqa. Llapapaqmi kay rimay, hallp’aq tukukuyninkamapuni.

22 Khaynatan, Yayaq Churin Jesucristo nirqan, qhepakunanku kaq yachachisqakunaman, ari llapan yachachisqankunamanwan, runakuna uyarishaqtinku: Llapan hallp’antinman riychis, lliw runakunamantaq yachachiyniyta yachachimuychis;

23 Kreyispa unuchakuq runataq qespichisqan kanqa, mana kreyiqtaqmi ichaqa, kondenasqan kanqa;

24 Kay señalkunataq kreyiqkunaman qatinqa: sutiypin supaykunata qarqonqaku; mosoq simikunapin rimanqaku, mach’aqwaykunatan hoqarinqaku; ima wañuchiqtapas ukyanqaku chaytaq mana paykunata k’irinqachu; onqosqakunamanmi makinkuta churanqaku, unqosqakunataq alliyanqaku;

25 Pipas sutiypi kreyinqa mana imatapas ishkayaspa chayqa, paymanmi llapan rimayniykunata takyachisaq, hallp’aq tukukuyninkunakamapuniraq, nispa.

26 Kunanri, pin Wiraqochaq ruwayninkuna kontra sayanqa? Pin rimayninkunata mananchanqa? Pin Wiraqochaq llapa kallpayoq atiynin kontra ankallikunqa? Pin Wiraqochaq ruwayninkunata alqochanqa? Pin Cristoq wawankunata alqochanqa? Wiraqochaq ruwayninkuna alqochaqkuna, muyupakuspan qollunkichis.

27 Chhaynaqa ama alqochaychischu, amataq utirayaychischu; ichaqa, Wiraqochaq rimayninkunata uyariychis, Taytamantataq Cristoq sutinpi mañakuychis ima nesitasqaykichistapas. Ama ishkayaychischu, kreyiqkuna kaychis, ñawpa pachakunapi hinataq qallariychis, Wiraqochamantaq tukuy sonqoykichiswan hamuychis, kikin qespiyniykichistataq manchakuywan, khatatataypiwan Paypa ñawpaqenpi llank’ayta qallariychis.

28 Yachaysapa kaychis probasion p’unchawniykichispi; llapa qhelli kaymanta maqchikuychis. Munapakuyniykichispi tukukunanpaqqa ama mañakuychischu, ichaqa, mana kuyuchisqa kaywan mañakuychis mana ima wateqayman qokunaykichispaq, cheqaq kawsaq Yayata servinaykichispaq.

29 Qhawakuychis chaypaq hina mana kaspa mana unuchakuyta; qhawaychis Cristoq qollanan-yuyayninta chaskinaykichispaq hina mana kaspaykichis mana mallinaykichispaq; ichaqa, qhawaychis llapa imaymanakunata chaypaq hina kaspa ruwayta; kawsaq Yayaq Churin Jesucristoq sutinpitaq ruwaychis. Kayta ruwankichis, tukukuykamataq takyankichis chayqa, manan imaynatapas qarqosqa kankichischu.

30 Qankunamanqa rimarini, wañusqakunamantapas rimarimushayman hinan; yachanin rimayniykunata uyarinaykichista.

31 Ama kondenawaychischu mana hunt’asqa kasqayrayku, amataq taytaytapas mana hunt’asqa kasqanmanta, amataq paypa ñawpaqenta qelqaqkunatapas; aswanmá Yayata añaychakuychis, mana hunt’a kayniykuta qankunaman qhawachisqasuykichismanta, noqayku kasqaykumanta aswan yachaysapa kayta yachanaykichispaq.

32 Kay qelqakunataqa qelqarqayku yachayniykuman hinan, allchapasqa egipsio nispa noqayku purapi waqyasqayku seq’ekunapi, noqaykuq haywasqaykutaq allchapasqaykutaq karqan, rimayniyku imayna kasqanman hina.

33 Aswan hatun raphiyku kanman karqan chayqa, Hebreopin qelqaykuman karqan; ichaqa, Hebreotapas allchaparqaykun. Hebreopi qelqaykuman karqan chayqa, mana ima mana-hunt’asqayoqmi qelqakupi kawaqchis karqan.

34 Ichaqa, Wiraqochan yachan qelqasqayku imaymanakunata, manataqmi huk llaqtakunaqa simiykuta yachankuchu; chay hinaqa, Paymi ñanta allicharqan, kay simi t’ikrasqa kananpaq.

35 Kay imaymanakunataq qelqasqa kan, mana kreyiypi urmaq wawqeykuq yawarninmanta maqchisqa kanaykupaq.

36 Wawqeykumanta munasqaykuqa, ari, Cristo reqsiyman paykunata kutirichimuyqa, kay hallp’api tiyaq llapa qollanankunaq yayaman-rimarikuyninkuman hinan.

37 Wiraqocha Jesucristoñayá qochun, iñiyninkuman hina yayaman-rimarikuyninku kutichisqa kananpaq; Tayta Yayataqyá yuyariykuchun Israelpa wasinwan ruwasqan rimanakuyta; Paytaqyá wiñaypaq paykunata saminchaykuchun, Jesucristoq sutinpi iñiywan. Hinataq kachu.