1 Nana, ka whakaoti au, a Moronai, i te tuhinga a tōku matua, a Moromona. Nana, He ruarua noa ngā mea kei ahau hei tuhituhi, ko ngā mea i whakahaua au e tōku matua.

2 Ināianei ā, i pahawa ake, nā, whai muri iho i te pakanga nui whakaharahara i Kamora, nana, ka arumia ngā Nīwhai i mawhiti atu ai ki roto i te whenua whakatetonga e ngā Rāmana, kia whakangaromia rawatia rātou.

3 Ā, i whakamatea anō hoki tōku matua e rātou, ā, ko ahau anake i mahue iho nei ki te tuhituhi i te kōrero pōuri mō te whakangaromanga o tōku iwi. Engari nana, kua riro rātou, ā, māku e whakatutuki i te whakahau a tōku matua. Ā, mehemea rānei ka whakamate rātou i ahau, kāore au i te mōhio.

4 Nō reira ka tuhituhi au, ā, ka huna anō i ngā tuhinga ki roto i te whenua; ā, kāore he tikanga ki hea haere ai au.

5 Nana, nā tōku matua tēnei tuhinga i hanga, ā, kua tuhia anōtia e ia tō reira tikanga. Ā nana, kua tuhi au me i whai wāhi au i runga i ngā papa, engari kāore ōku wāhi; ā, kāore ōku oa, nā te mea ko tōku kotahi tēnei. Kua whakamatea tōku matua i te pakanga, me ōku huānga katoa, ā, kāore ōku hoa, he wāhi rānei hei haerenga mōku; ā, kāore au e mōhio ana ki te roa e tuku ai te Ariki kia ora ahau.

6 Nana, kua pahemo atu ngā tau whā rau mai i te haerenga mai a tō tātou Ariki, tō tātou Kaiwhakaora.

7 Ā nana, kua arumia tōku iwi e ngā Rāmana, ngā Nīwhai, heke iho ana i tēnā pā ki tēnā pā, ā, mai i tēnā wāhi ki tēnā wāhi, tae atu pū anō ki te wā kua kore noa iho rātou; ā, he nui tō rātou hinganga; āe rā, he nui whakamīharo te whakangaromanga o tōku iwi, ngā Nīwhai.

8 Ā nana, nā te ringa o te Ariki i mea. Ā nana anō hoki, kei te whawhai ngā Rāmana ki a rātou anō; ā, kei tētahi huringa tonu o te kōhuru me te whakahekenga toto te mata katoa o tēnei whenua; ā, kāore tētahi e mōhio ana ki te mutunga o te pakanga.

9 Ināianei ā, nana, kāore au e kōrero atu anō e pā ana ki a rātou, nā te mea kāore he tangata i kō atu i ngā Rāmana me ngā kaipāhua e noho ana i runga i te mata o tēnei whenua.

10 Ā, kāore he tangata i reira e mōhio ana ki te Atua pono hāunga ko ngā apataki a Ihu, ko rātou nei i noho mai nei i te whenua tae atu ana ki te wā i nui rawa atu te kino o te iwi nā konā kāore te Ariki i tuku kia noho tonu rātou i roto i te iwi; ā, kāore tētahi tangata e mōhio ana kei hea rātou e noho ana i runga i te mata o te whenua.

11 Engari nana, kua kite māua ko tōku matua i a rātou, ā, kua minita mai rātou ki a māua.

12 Ā, ko te tangata e whiwhi nei i tēnei tuhinga, ā, e kore nei e whakahē nō ngā hapa kei roto rā, ko ia te mea e mōhio ai ki ngā mea nui ake i ēnei. Nana, ko Moronai ahau; ā, mehemea i taea, kua whakamōhio atu au ki a koutou i ngā mea katoa.

13 Nana, ka whakakapi au i taku kōrero e pā ana ki tēnei iwi. Ko au te tama a Moromona, ā, he uri tōku matua nō Nīwhai.

14 Ā, ko au anō tēnā e huna ake ai i tēnei tuhinga ki te Ariki; kāore he painga o aua papa, nā te whakahau a te Ariki. Nā te mea he pono tana kōrero e kore tētahi e mau ki ēnei kia rapu taonga ai ia; engari he utu nui tō reira tuhinga; ā, ko te tangata e whakaputaina mai ki te māramatanga, ko ia te mea e manaakitia ai e te Ariki.

15 Nā te mea kāore tētahi e whiwhi i te kaha kia whakaputaina mai ki te māramatanga, ki te kore e hoatu ki a ia e te Atua; nā te mea e hiahia ana te Atua kia meatia tērā i runga i te karu hāngai ki tōna korōria, ki te oranga rānei o te iwi kawenata onamata o te Ariki kua whakamararatia atu nei.

16 Ā, kua manaakitia te tangata e whakaputa ai i tēnei mea ki te māramatanga; nā te mea ka whakaputaina mai i te pōuritanga ki te māramatanga, e rite ana ki te kupu a te Atua; āe rā, ka whakaputaina mai i te whenua, ā, ka pīataata atu i roto i te pōuritanga, ā, ka tau mai ki te mātauranga o te iwi; ā, ka meatia tēnei i runga i te mana o te Atua.

17 Ā, mehemea he hapa i reira he hapa ērā nō te tangata. Engari nana, kāore mātou e mōhio ana ki tētahi hapa; hei aha koa kei te mōhio te Atua ki ngā mea katoa; nō reira, tukuna te tangata e whakahē ana kia mōhio, kei tika mōna te kāpura o te ao rēwera.

18 Ā, ko te tangata e kī ai: Whakakitea mai ki ahau, ki te kore ka patua koe—tukuna ia kia mōhio kei whakahau ia i ērā mea e whakakāhoretia ana e te Ariki.

19 Nana rā, ko te tangata e whakawā taikaha nei ka whakawākia taikahatia anō hoki ia; nā te mea ka rite tana utu ki āna mahinga; nō reira, ko te tangata e patu ana, ka patua anō hoki ia, e te Ariki.

20 Tirohia tā te karaipiture e mea nei—e kore te tangata e patu, e kore rānei e whakawā; nā te mea māku te whakawākanga, e ai tā te Ariki, ā, māku anō hoki te rapunga utu, ā, māku e whakautu.

21 Ā, ko te tangata e whakangā atu i te riri me te ngangaretanga ki te mahi a te Ariki, ā, ki te iwi kawenata a te Ariki ko rātou nei te whare o Iharaira, ā, ka mea: Ka whakangaro atu mātou i te mahi a te Ariki, ā, kāore te Ariki e maumahara ki tana kawenata i kawenata ai ia ki te whare o Iharaira—ka tika mōna kia tuakina iho, ā, kia makaia atu ki roto i te ahi;

22 Nā te mea ka huri tonu atu ngā tikanga mau tonu a te Ariki, kia tutuki āna whakaari katoa.

23 Tirohia ngā poropititanga a Ihāia. Nana, kāore e taea ana e au ērā mea te tuhi. Āe rā, nana ko taku kupu tēnei ki a koutou, nā, ka karanga ake aua hunga tapu kua haere nei i mua i ahau, ko rātou nei te hunga kua nōhia nei te whenua, āe rā, mai i te puehu pū anō tā rātou karanga ake ki te Ariki; ā, e ora ana te Ariki ka mahara ia i te kawenata i kawenata ai ia ki a rātou.

24 Ā, e mōhio ana ia ki ā rātou inoi, nā, he mea wawao mō ō rātou huānga. Ā, e mōhio ana ia ki tō rātou whakapono, nā te mea i taea e rātou ngā maunga te nuku i runga i tōna ingoa; ā, i taea e rātou te whenua te tūoioi i runga i tōna ingoa; ā, nā te mana o tana kupu rātou i mea kia ngahoro iho ngā whareherehere ki te whenua; āe rā, kāore noa iho i taea rātou e te oumu ahi, kāore rānei i taea e ngā kararehe mohoao, e ngā nākahi paitini rānei, he mea nā te kaha o tana kupu.

25 Ā nana, i wawao ake anō ā rātou inoi mō te tangata māna ēnei mea e whakaputa.

26 Ā, kāore he aha e kī ai tētahi e kore ērā mea e puta mai, nā te mea kāore e kore ka puta mai ērā mea, nā te mea kua kōrerotia nei e te Ariki, nā te mea ka puta ērā mea i te whenua, mā te ringa o te Ariki, kāore e taea ana e tētahi te whakakore; ā, ka puta mai i tētahi rā e kīa ai kua mutu ngā merekara; ā, ka puta mai me te mea nei e kōrero ana tētahi i te hunga mate.

27 Ā, ka pahawa ake i tētahi rā e karanga ake ai te toto o te hunga tapu ki te Ariki, nā ngā whakakotahitanga huna me ngā mahinga o te pōuritanga.

28 Āe rā, ka puta mai i tētahi rā e whakakāhoretia ai te mana o te Atua, ā, ka pokea ngā hāhi, ā, ka nuku ake i runga i te whakapehapeha o ō rātou ngākau; āe rā, i roto i tētahi rā anō e rewa ake ngā kaiārahi o ngā hāhi me ngā kaiako i runga i te whakapehapeha o ō rātou ngākau, tae atu ana ki tā rātou hae ki te hunga nō ō rātou hāhi.

29 Āe rā, ka puta mai i tētahi rā e rangona ai ngā ahi, ngā tūpuhi, me ngā kohu paoa i ngā whenua kē;

30 Ā, ka rangona hoki ngā pakanga, me ngā rongo pakanga, me ngā rū whenua i ngā wāhi maha.

31 Āe rā, ka puta mai i tētahi rā e nui ai ngā pokenga i runga i te mata o te whenua; ngā kōhurutanga, me ngā pāhuatanga, ngā rūkahu, ngā tinihanga, ngā mahi pūremu, me ngā tūmomo mōrikarika katoa o ia āhua, o ia āhua; e kī ai ngā mea tokomaha, Me mahi pēnei, me mahi pēnā rānei, kāore ōna tikanga, nā te mea mā te Ariki ngā mea pērā e tautoko hei te rā whakamutunga. Engari auē te mate mō te hunga pērā, nā te mea kei roto rātou i te au o te kawa, ā, kei roto i ngā herenga o te hē.

32 Āe rā, ka puta mai i tētahi rā e hangaia ake ai ngā hāhi e kī ai: Haere mai ki ahau, ā, ka murua koutou i ō koutou hara mō te moni.

33 E koutou te hunga kino me te hunga parori kē me te hunga kakī mārō, he aha koutou i hangaia ake ai ngā hāhi kia whaitaonga ai koutou? He aha koutou i whakapeau ai i te kupu tapu a te Atua, kia tōia mai te whakawākanga whakahē ki runga i ō koutou wairua? Nana, titiro atu koutou ki ngā whakakitenga a te Atua; nana rā, e whakatata mai ana te wā e tutuki katoa ai ēnei mea katoa.

34 Nana, kua whakakitea mai nei ki ahau e te Ariki ngā mea nui whakamīharo e pā ana ki ērā mea e puta mai ai, hei te rā e puta mai ēnei mea ki waenganui i a koutou.

35 Nana, e kōrero atu nei au ki a koutou me te mea nei kei konei koutou, heoi, kāore koutou i konei. Engari nana, kua whakakitea mai e Ihu Karaiti ki ahau, ā, e mōhio ana au ki tā koutou mahi.

36 Ā, e mōhio ana au kei te hīkoi koutou i runga i te whakapehapeha o ō koutou ngākau; ā, he ruarua noa iho ngā mea kāore e neke ake i a rātou anō i runga i te whakapehapeha o ō rātou ngākau, ki te whakamau i ngā kākahu pai whakaharahara, ki te hae, ki te totohenga, ki te mauāhara, ki te whakatoi, ki ngā tūmomo kino katoa; ā, ko ō koutou hāhi, āe rā, ia mea, ia mea, kua pokea haeretia nā te whakapehapeha o ō koutou ngākau.

37 Nana rā, he nui ake tō koutou aroha ki te putea, me ā koutou rawa, me ō koutou kahu papai, me ngā whakanikoniko o ō koutou wharekarakia, i tō koutou aroha ki te hunga rawakore me te hunga hapa, ki te hunga tūroro me te hunga e mamae ana.

38 E koutou e ngā pokenga, e koutou e ngā arero rua, e koutou e ngā kaiako, e hokona atu koutou e koutou anō mō ērā mea e waikura ai, he aha i poke ai i a koutou te hāhi tapu o te Atua? He aha koutou e whakamā ai kia tangohia ake ki runga i a koutou te ingoa o te Karaiti? He aha koutou e kore ai e whakaaro ake he nui ake te pai o tētahi haringa mutunga kore i tō taua pōuri e kore nei e mate—he mea nā te whakamoemiti o te ao?

39 He aha koutou e whakapaipai ai i a koutou anō ki aua mea kāore nei ōna oranga, heoi, ka tuku i te hunga matekai, me te hunga e hapa ana, me te hunga tū tahanga, ā, kia hipa atu i a koutou te hunga māuiui me te hunga e mamae ana, ā, kāore koutou e aro atu ki a rātou?

40 Āe rā, he aha koutou e hanga ake ai i ō koutou mōrikarikatanga huna kia whai taonga ai koutou, ā, ka mea kia tangi ngā pouaru i te aroaro o te Ariki, me ngā pani anō hoki kia tangi i te aroaro o te Ariki, me te toto o ō rātou matua me ā rātou hoatāne kia karanga ake ki te Ariki i te whenua, kia rapu utu i runga i ō koutou māhunga?

41 Nana, kei te werewere iho te hoari o te ngakinga mate i runga i a koutou; ā, e whakatata mai ana te wā e ngaki ai ia i te toto o te hunga tapu ki runga i a koutou, nā te mea e kore ia e tuku kia roa atu ai ā rātou karanga.