Say Paneknek nen Profeta Joseph Smith

Saray dili a salita nen Profeta Joseph Smith nipaakar ed say insabi na Libro nen Mormon so:

“Sanen labi … na komaduamplo tan sakey ed Septiembre (1823) … Nen siak la so akaparaan ya ongapo a mampikasi tan onkerew ed Sankamakapanyarian a Dios ….

“Legan ya ontatawag ak ed Dios, naimanok so sakey a liwawa ya onleletaw ed silir ko, a saya so nampatuloy anga ed say silir ko so maliwliwawa nen say kaaguan, sanen bigla a pinmayawar so sakey a too ed kaabay na dukolan ko, a manalalagey ed dagem, tan saray sali to so ag onsasagar ed datal.

“Wala so kawes to a maawang a nidumadoma ed inkaputi. Saya so inkaputi angapo ni so angan dinan a pañgipareñgan dia ed tapew na dalin ya anengneng ko; ni say panisiaan ko a wala so beñgatla a makaraldalin a nayari a gawaen a mapalalo ed puti tan kirlap a siñga nengneng to. Saray lima to angapo so sakbong da, ontan met ed saray taklay to, ya atagtagey na daiset ed saray ñgaloñgaluan to; tan ontan met, saray sali to angapo so sapin da, ya angan saray bikking to, ya atagtagey na daiset ed saray kalit-kalit. Say ulo tan beklew to angapo so sakbong met. Naimanok ya angapo la so arum a sulong to no ag saya labat so maawang a kawes, lapu ed saya so akalokas, kanian sankanengneng ko so pagew to.

“Aliwa labat a say kawes to so mapalalo ed puti, no ag iñgen say tibukel na inkatoo to so magloria ya ag naipaliwawa, tan say indeñgan to so peteg a siñga kirmat. Say silir mapalalo so liwawa to, balet aliwa a siñga inkaliwawa na kaliber-liber na saya a too. Sanen unaan ko ya anengneng, siak so ataktakot; balet saman a takot ag abayag naandi ed siak.

“Tinawag to ak ed ñgaran ko, tan inkuan to ed siak a sikato so sakey ya igagangan a nanlapu ed kawalaan na Dios a nibaki ed siak, tan say ñgaran to Moroni; tan say Dios wala so sakey a kimey ya iter to a pagawa ed siak; tan say ñgaran ko nikana ed maong tan mauges ed limog na amin a bansa, sankakanayon, tan saray salita, odino nampara a maong tan mauges a pantotungtoñgan ed limog na amin a totoo.

“Say inkuan to wala so sakey a libro ya insinop, ya insulat ed balitok a piligo, a mañgibabaga nipaakar ed inmuona a totoo a nanayam ed saya a maawang a dalin, tan no iner so nanlapuan da. Tan inkuan to met a say inkagnap na andi-angaan ya Evangelio so nilugan ed saya, ya iniawat na Manañgilaban ed saray kadaanan a nanaayam dia;

“Ontan met, wala so duara a bato a wala ed pilak a basikaw—tan saraya a bato, so akapeket ed sakey a salimbeng na pagew, so manotugyop ed tatawagen a Urim tan Tumim—ya impisinop kaiba na saraman so piligo; tan say pankayarian tan pañgikana ed saraya a bato sikara so nikuan a Makapikabat ed Linawa na Dios ed saray kadaanan odino inmuona a panaon; tan say Dios imparaan to so saraya ed getma a pañgipatalus ed saya a libro.

“Lamet, inkuan to ed siak, a no naalak so saraman a piligo ya asalita to—lapu ed ag ni asabi so panaon a pakaala ed saraya—ag ko nepeg ya ipanengneng so saraya ed angan siopaman a too; ni say salimbeng na pagew a kaiba na Urim tan Tumim; likud ed saraman labat a totoo a nigangan a pañgipanengneñgan ko; no saya so gawaen ko siak so naderal. Legan to a mitotungtong ed siak nipaakar ed saraman so piligo, say payawar so alokasan ed kanunotan ko a sankanengneng ko so pasen ya añgisinopan ed saray piligo, tan malinlinew tan nidumaduma kanian amtak so pasen lamet sanen dinalaw ko so saya.

“Kayari na saya a tungtoñgan, anengneng ko so liwawa ed dalem na silir ko a ginmapo a nantipon ed kaliber-liber na saya a too ya akitungtong ed siak, tan nampatuloy ya onia, anga ed say silir ko so binmiluñget lamet, likud labat ed kaliber-liber to a tuloy, sanen, bigla ya anengneng ko, a siñga, sakey a tubo a linmukas anga ed tawen, tan sikato so sinmegep ed tagey anga ed sikato so nagnap a naandipat, tan say silir ko so pinmawil ed gendat a nengneng to sakbay a pinmarungtal so saya a mañgatatawen a liwawa.

“Siak so akarukol a mannonunot ed nibiibiig ya agawa, tan ontan la so kabaleg na pankelaw ko ed saray imbaga ed siak na saya so nidumadoma ya ibabaki; sanen, dia ed kapegleyan na panmomotektek ko, bigla ya anengneng ko a say silir ko ongagapo lamet a naliliwawaan, tan dia ed kakirem, a siñga sanen inmuna, saman lamlamang a mañgatatawen ya ibabaki so wala lamet ed abay na dukolan ko.

“Sikato so ginmapo, tan lamet imbaga to ya amin so saraman lamlamang so binitla to ed saman so akaona ya indalaw to, ya angapo so nauman; a sanen asumpal la, impakabat to ed siak so saray ankabaleg a panañgokom ya onsabi ed dalin, kaiba so saray baleg a pakagonigon lapu ed gawat, espada, tan salot; tan saraya a makapaermen a panañgokom so onsabi ed dalin ed saya a kailalakan. Kayari to ya imbaga so saraya a beñgatla, sikato so sinmegep lamet a siñga ginawa to nen inmuna.

“Dia ed saya a bekta, agay la so kaaralem na saray bakat ya agawa ed nunot ko, kanian say pakakaugip so naandi la ed saray matak, tan akadukol ak a mapalalo so pankelkelaw ko ed mandapag ya anengneng tan nadñgel ko. Balet agay la so inkabiglaan ko sanen anengneng ko lamet so saman lamlamang ya ibabaki ed abay na dukolan ko, tan nadñgel ko ya inulit odino sinalita to lamet ed siak so saraman a beñgatla a siñga nen inmuna; tan iniarum to so sakey a pasakbay ed siak, ya inkuan to ed siak a si Satanas salien to ak a tuksoen (lapu ed kairapan na boleg nen amak), ya alaen ko so saraman a piligo ed gagala pian onyaman. Sinebelan to ak ed saya, inkuan to a kaukolan ya angapo so arum a gagalak ed pañgala na saray piligo no ag say pañgigloria ed Dios, tan kaukolan ag ak natanguyor na angan dinan ya arum a getma no ag say pañgipaalagey na panarian To; odino andi ag ko naala so saraya.

“Kayari na saya a komatlo a dalaw, sikato so sinmegep lamet ed tawen a siñga nen inmuna, tan siak so atilak lamet a mannonunot ed inkidoma na saman so nagunoyan ko labat apalabas; sanen kasipusipot to a sinmegep a pitlo iman so mañgatatawen ya ibabaki, say lalong so kinmokaok, tan naimanok a kabuasan la manaya, kanian say impantungtong mi nilaknaban to so katibukelan na saman a labi.

“Ag abayag siak so binmañgon ed dukolan ko, tan, siñga unong ed kaugalian, linma ak la ed saray nakaukolan ko a kimeyan ed saman ya agew; balet, dia ed panasalik a mankimey a siñga dia ed saray imbebeneg a panaon, alikas ko a naandian ak na kasil ya ag ko nayarian so mankimey. Si amak, a sikato so kaibak a mankikimey, so akaimano a wala so makulang ed siak, tan imbaga to ed siak ya onsempet ak la ed abong. Pinmikal ak ya onla ed abong; balet, nen sasalien ko a basilen so alar ya ompaway ed alog a kawalaan mi, naandian ak la na biskeg, kanian siak so niparukol ed dalin a pakaskasi, tan dia ed agano a bekta angapo so antokaman ya amtak.

“Say unaonaan a natandaan ko so sakey a voces a misasalita ed siak, a tatawagen to ak ed ñgaran ko. Tinmañgay ak, tan anengneng ko so saman lamlamang ya ibabaki a manalalagey ed tagey na uloan ko, ya aliber na liwawa a siñga nen inmuna. Tinungtong to lamet ya amin so saraman so imbaga to la ed siak ed saman ya imbeneg a labi tan imbaki to ak ya onla ed si amak tan ibagak ed sikato so saman so payawar tan saray gangan a naawat ko.

“Siak so tinmulok; pinmawil ak ed si amak ed alog, tan sinalitak ed sikato so amin ya agawa. Say inebat to ed siak a saman so nanlapu ed Dios, tan imbaga to ed siak ya onla ak tan gawaen ko so unong ed ingangan na saman ya ibabaki. Sinmipot ak ed alog, tan linma ak ed saman so pasen ya imbaga na ibabaki a kawalaan ya añgisinopan na saray piligo; tan lapu ed malinlinew so payawar ya niiter ed siak nipaakar ed saya, kabat ko so pasen dia ed bekta a sinmabi ak diman.

“Asinger ed bario na Manchester, luyag na Ontario, New York, wala diman so manalalagey a balbaleg a pukdol, tan sankaatageyan ed amin ed saman a pasen. Dia ed sagur a dapag na saya a pukdol, ag arawi ed tuktok, dia ed silong na sakey a bato a babaleg, wala diman so saray piligo, akalogan ed kahon a bato. Saya a bato so makapal tan malimpek ed pegley dia ed tagey, tan maimpis so mamaarap ed gilig, kanian say pegley to so nanengneng ed tapew na dalin, balet say amin a gilig to so atabonan na dalin.

“Sanen naekal ko la so dalin, añgala ak na sakey a pansukit, a saya so insurob ko ed gilig na bato, tan dia ed daiset labat a biskeg saya so abikual ko a niatagey. Tinakiling ko, tan tua anengneng ko so saray piligo, say Urim tan Tumim, tan say salimbeng na pagew, unong ed imbaga na saman so ibabaki. Saman so kahon a kawalaan to so agawa ed nanlalaktipan a bato ed siñga uri na semento. Dia ed dalem na kahon wala so duara a bato ya impambangkalañgan ed kahon tan dia ed saraya a bato akagaton so saray piligo tan saray arum a beñgatla a kaiba to.

“Sinalik ya agwaten, balet sinebelan ak na saman so ibabaki, tan lamet imbaga to ed siak a say panaon a pañgipaway ed saraya so ag ni sinmabi, ni say saya, anga ed apat taon manlapu ed saman a panaon; balet imbaga to ed siak a kaukolan ko so onla ed saman a pasen a duga-duga a sakey taon manlapu ed saman a panaon, tan diman sikato met so mibana ed siak, tan kaukolan ya ituloy ko a gawaen so onia anga ed isabi na panaon a pañgalak ed saray piligo.

“Unong ed saya, ya inkigangan ko, linma ak diman ed balang sampot na taon, tan balang sakey a panaon na iakar ko narumog ko diman so saman lamlamang ya ibabaki, tan inawat ko so bilin tan kakabatan manlapu ed sikato balang makapantungtong kami, nipaakar ed no anto so gawaen na Katawan, tan no panon tan no anto a pamaakaran so pañgikurang na panarian to ed saray kaunoran ya agew.

“Ag abayag sinmabi so panaon a pañgala ed saray piligo, say Urim tan Tumim, tan say salimbeng na pagew. Dia ed komaduamplo tan dua ya agew ed Septiembre, sanlibo walora a lasus tan duamplo tan pito, siak so linma unong na gendat ed sampot na sakey a taon diman ed pasen ya añgisinopan, saman lamlamang a mañgatatawen ya ibabaki initer to ed siak so saraya katekep na saray eebatan ko: A siak so oneebat ed saraya; a no napaulyan ko so saraya a naala makaseñgeg ed kakulañgan na asikaso, odino kakulañgan na alwar, siak so nataksing; balet no ikanak ya amin so peleng ko pian nasimpitan so saraya, anga ed, saraya so alaen na saman ya ibabaki, saraya so niagel.

“Ag abayag atalusan ko so rason no akin onman la so elet na bilin ya inawat ko ed pañgiagel ed saraya, tan no akin saman ya ibabaki imbaga to a no nasumpal ko la so nakaukolan ed limak, so alaen to la so saraya. Tan ag abayag ed impakapikabat da a saya so wala la ed siak, saray sankaksilan a biskeg so nikana pian naala ra so saraya ed siak. Amin a kasiliban a nayari a gawaen so nikana ed saya a gagala. Say pamasegsegang so nanmaliw ya ampait tan mapalalo nen say linmabas, tan saray karaklan maimano ra ya andi tonda pian saraya so naala ra ed siak no nayari. Balet dia ed kakabatan na Dios, saraya so nansiansia ed limak, anga ed impakasumpal ko na kaukolan ed limak. Sanen, unong ed talusan, say ibabaki inala to so saraya, iniawat ko so saraya ed sikato; tan saraya wala ra ed sikato anga ed saya ya agew, komadua ya agew na Mayo, sanlibo walora a lasus tan talomplo tan walo.”

Onkana ed naspot a listaan, nengneñgen so Joseph Smith—Awaran, dia ed Perlas ya Ankabli, tan History of the Church of Jesus Christ of Latter-day Saints, libro 1, tekap 1 anga ed 6.

Say kadaanan a kasulatan a saraya so pinmaway a nanlapu ed dalin a siñga voces na saray totoo a mansasalita a manlalapu ed sapok, tan nipatalus ed peles a salita ed panamegley na palabo tan pakayari na Dios unong na pamaneknek na Mañgatatawen a pamatua, so unaan ya impalapag ed mundo ed English ed taon 1830 a The Book of Mormon.