Say Antikey a Paliwawa Nipaakar ed
Say Libro nen Mormon
Say Libro nen Mormon so sakey a masagrado a kasulatan na saray totoo ed kadaanan ya America, tan saraya so nitatak ed piligo a mital. Wala so apatira a kanengneñgan na mital a piligo so asalita ed saya a libro lamlamang.
-
Saray Piligo nen Nephi, so awalaan na duara a kanengneñgan: Saray Ankelag a Piligo tan Ankabaleg a Piligo. Saray inmuna so nigetar ed saray maespiritu ya agawgawa tan say impampulong tan saray bañgat na saray profeta balet saray saguinunor so malaglaem a sinakop na makaraldalin ya awaran na saray abitla a totoo (1 Nephi 9:2–4). Bangbalet, manlapu ed panaon nen Mosiah, saray ankelag a piligo so atekepan met na saray makana a beñgatla a maespiritu.
-
Saray Piligo nen Mormon, a kawalaan na pinatekey a kasulatan nen Mormon a nanlapu ed saray Ankabaleg a Piligo nen Nephi, ya awalaan na dakel a paliwawa. Saraya a piligo so nanlugan met na kasolduñgan na awaran ya insulat nen Mormon tan inaruman na anak to a laki a si Moroni.
-
Saray Piligo nen Ether, so mañgiparungtal ed awaran na saray Jaredite. Saya a kasulatan so pinatikey nen Moroni, ya añgisalet na saray salita to a dili tan impankasakey to so kasulatan ed amin-amin ya awaran dia ed silong na paulo ya “Libro nen Ether”.
-
Saray Piligo a Gansa ya awit na saray totoo nen Lehi a nanlapu ed Jerusalem nen 600 S.C. Saray lugan to nia so “limara a libro nen Moses, … Tan say kasulatan met na saray Judio nanlapu ed gapo, … a mampaleksab anga ed gapo na oley nen Sedekias, ari na Juda; Tan ontan met saray profesiya na saray masanto a profeta” (1 Nephi 5:11–13). Dakerakel ya inulit a salita so nanlapu ed saraya a piligo, a mañgipapatnag a si Isaias tan saray arum ni a profeta ed Biblia tan angapo ed Biblia, so niparungtal dia ed libro nen Mormon.
Say Libro nen Mormon titibukelen na labinlima a kabiañgan odino inkaapag, ya akabatan, a wala so sakey a nibiig, a libro, a balang sakey so niñgaran ed too a malaglaem a nansulat. Say unaan a kabiañgan (saray unaan ya anemira a libro, a mansampot ed Omni) so impatalus a nanlapu ed Ankelag a Piligo nen Nephi. Dia ed nanleetan na libro nen Omni tan Mosiah so sakey ya insalet a tinawag a Saray Salita nen Mormon. Saya ya insalet pansuldoñgan to so kasulatan a nitatak ed Ankelag a Piligo a pantekepen to so Ankabaleg a Piligo a pinatikey nen Mormon.
Say sankarukeyan a kabiañgan, sakopen to so manlapu ed Mosiah anga ed Mormon, tekap 7, so patalus na kasulatan pinatikey nen Mormon ed saray Ankabaleg a Piligo nen Nephi. Say kasampotan a kabiañgan, manlapu ed Mormon, tekap 8, ya anga ed sampot na libro, so intatak na laki ya anak nen Mormon a si Moroni, a sikato, nen asumpal to ya insulat so impambilay nen ama to, ginawa to so pinatikey a kasulatan na saray Jaredite (say Libro nen Ether) tan dia ed kasampotan iniarum to so kabiañgan ya akabatan a Libro nen Moroni.
Sanen odino ñgalñgali a say taon ed 421 K.C., si Moroni, say sampot ed saray Nephite a profeta a managsulat na awaran, inkapot to so sagrado a kasulatan tan saya so iniamot ed Katawan, ya ipaway ed saray saguinunor ya agew, unong ed nipasakbay a voces na Dios ed panamegley na saray kadaanan a profeta to. Sanen K.C. 1823, saya lamlamang a Moroni, dia ed saman sikato la so inmoli ed bilay ya inkatoo, dinalaw to si Profeta Joseph Smith tan dia ed saman iniawat so saray atatakan a piligo ed sikato.