1 Ma o lenei ina ua mavae atu ni tausaga, sa oo ina sau se tagata i totonu o le nuu o Nifae, o lona igoa o Serema.

2 Ma sa oo ina amata ona ia tala’i atu i totonu o le nuu, ma fai atu ia te i latou, e lē tatau ona i ai o se Keriso. Ma sa tala’i atu e ia mea e tele sa taufaasee i tagata; ma sa faia e ia lenei mea ina ia mafai ona ia faatoilalo ai le aoaoga faavae a Keriso.

3 Ma sa galue o ia ma le filigā ina ia mafai ona ia ta’ita’i ese loto o tagata, sa oo ina ta’ita’i ese e ia loto o tagata e toatele; ma sa iloa e ia, o a’u, o Iakopo, sa ou faatuatua ia Keriso o lē o le a afio mai, o lea na saili ai e ia se avanoa tele e mafai ona sau ai o ia ia te a’u.

4 Ma sa aoaoina o ia, o lea sa ia te ia se malamalama atoatoa o le gagana a le nuu; o le mea lea, sa ia te ia le tomai e faaaoga ai le taufaaviivii tele, ma le mana tele o le gagana tautala, e tusa ma le mana o le tiapolo.

5 Ma sa faamoemoe o ia e lūlū ese a’u mai le faatuatuaga, e ui i le tele o faaaliga ma le tele o mea na ou vaai i ai e uiga i nei mea; ona sa ou vaai moni lava i agelu, ma sa latou auauna mai ia te a’u. O lenei foi, sa ou faalogo i le siufofoga o le Alii o fetalai mai ia te a’u i le upumoni lava, mai lea taimi i lea taimi; o le mea lea, sa lē mafai ai ona lūlūina o a’u.

6 Ma sa oo ina sau o ia ia te a’u, ma o le auala na fai mai ai o ia ia te a’u, e faapea: Le uso e Iakopo, sa ou saili lava se avanoa tele e mafai ona ou tautala atu ai ia te oe; ona ua ou faalogo ma ua ou iloa foi ua tele ona e femaliua’i solo, e tala’i atu le mea ua e ta’ua o le talalelei, po o le aoaoga faavae a Keriso.

7 Ma ua e ta’ita’i ese le toatele o lenei nuu ua latou faapi’opi’o ai le ala sa’o o le Atua, ma lē tausia ai le tulafono a Mose o le ala sa’o lea; ma liliu le tulafono a Mose i le tapua’i atu i se tagata ua e fai mai o le a afio mai i le tele o selau o tausaga mai le taimi nei. Ma o lenei faauta, o a’u, o Serema, ou te ta’u atu ia te oe o le faifai i le Atua lena mea; ona e leai se tagata na te iloaina ni mea faapena; ona e lē mafai ona iloa e ia e uiga i mea o le a oo mai. Ma sa faapea le uiga sa finau mai ai Serema e faasaga mai ia te a’u.

8 Ae faauta, sa sasaa mai e le Alii le Atua lona Agaga i totonu o lo’u agaga, sa oo ina ou faamaasiasiina ai o ia i ana upu uma.

9 Ma sa ou fai atu ia te ia: E te faafitia ea le Keriso o lē o le a afio mai? Ma sa fai mai o ia: A na fai e i ai se Keriso, ou te lē faafitia o ia; ae ua ou mautinoa e leai se Keriso, pe sa i ai, pe o le a i ai.

10 Ma sa ou fai atu ia te ia: E te talitonu i tusitusiga paia? Ma sa fai mai o ia: Ioe.

11 Ma sa ou fai atu ia te ia: O lona uiga la ua e lē malamalama i ai; ona ua latou molimau moni mai e uiga ia Keriso. Faauta, ou te fai atu ia te oe e leai se tasi o perofeta na tusitusia, pe na valoia, vaganā ai sa latou fetalai mai e uiga i lenei Keriso.

12 Ma ua lē ona pau lea—sa faaali mai ia te a’u, ona sa ou faalogoina ma vaaia; ma sa faaali mai foi ia te a’u e le mana o le Agaga Paia; o le mea lea, ua ou iloa ai afai e lē faia se togiola o le a leiloloa tagata uma.

13 Ma sa oo ina fai mai o ia ia te a’u: Faaali mai ia te a’u se faailoga e ala mai i lenei mana o le Agaga Paia, lea ua e iloa ai nei mea e tele.

14 Ma sa ou fai atu ia te ia: O ai a’u ou te tofotofo ai i le Atua ia faailoa mai ia te oe se faailoga i mea ua e iloa ua moni? Peitai o le a e faafitia, ona o oe o se o le tiapolo. Ae ui i lea, e lē faia lo’u loto; ae afai e taia oe e le Atua, ia avea lena ma faailoga ia te oe e te iloa ai ua ia te ia le mana, i le lagi atoa ma le lalolagi; o lenei foi, o le a afio mai Keriso. Ma le Alii e, ia faia lou finagalo, ae lē o lo’u loto.

15 Ma sa oo ina ua uma ona fai atu e a’u, o Iakopo, nei upu, sa oo ifo i ona luga le mana o le Alii, ma sa oo ina pa’ū ifo ai o ia i le eleele. Ma sa oo ina tausia o ia mo le va o aso e tele.

16 Ma sa oo ina fai atu o ia i le nuu: Ia faapotopoto mai i le aso a taeao, ona o le a ou oti; o le mea lea, ou te fia tautala atu ai i tagata ae ou te le’i oti.

17 Ma sa oo ina faapotopoto faatasi le motu o tagata i le aso na sosoo ai; ma sa tautala manino atu o ia ia te i latou ma faafitia mea sa ia a’oa’o atu ia te i latou, ma ta’utino moni mai le Keriso, ma le mana o le Agaga Paia, ma auaunaga a agelu.

18 Ma sa ta’u manino atu e ia ia te i latou, sa faasesēina o ia e le mana o le tiapolo. Ma sa tautala atu o ia e uiga ia seoli, ma e uiga i le faavavau, ma e uiga i le faasalaga e faavavau.

19 Ma sa fai mai o ia: Ua ou fefe ne’i o’u faia le agasala e lē mafaamagaloina, ona ua ou pepelo i le Atua; ona na ou faafitia le Keriso, ma ou fai atu ua ou talitonu i tusitusiga paia; ma ua latou molimau moni mai lava e uiga ia te ia. Ma ona sa faapea ona ou pepelo i le Atua ua ou mata’u tele lava ne’i mata’utia le leaga o lo’u tulaga; ae ou te ta’utino atu i le Atua.

20 Ma sa oo ina ua uma ona fai mai e ia o nei upu sa lē mafai ona toe tautala mai o ia, ma ua oti o ia.

21 Ma ina ua molimauina e le motu o tagata sa tautala atu o ia i nei mea ina o le a to lana manava, sa latou ofo tele; sa oo ina oo ifo le mana o le Atua i luga o i latou, ma sa lofituina i latou sa oo ina latou pa’u’ū ifo ai i le eleele.

22 O lenei, sa lelei lenei mea ia te a’u, o Iakopo, ona sa ou talosagaina mai lo’u Tamā o lē o i le lagi; ona sa faafofoga mai o ia i la’u tagi ma tali mai i la’u tatalo.

23 Ma sa oo ina toefuatai mai le filemu ma le alofa o le Atua i totonu o le nuu; ma sa latou su’esu’e i tusitusiga paia, ma lē toe faalogo i upu a lenei tagata amioleaga.

24 Ma sa oo ina faia ni ala e tele e toe faalelei ma toefuatai mai ai sa Lamanā i le malamalama o le upumoni; peitai sa lē aoga uma lava, ona sa latou fiafia i taua ma le faamaligitoto, ma sa ia te i latou se inoino e faavavau ia te i matou, o o latou uso. Ma sa latou saili i le malosi o a latou auupega o taua e faaumatia ai pea i matou.

25 O le mea lea, na tu’i’olo malosi ai le nuu o Nifae e faasaga ia te i latou faatasi ma a latou auupega o taua, ma lo latou malosi atoa, ma le faalagolago i le Atua ma le papa o lo latou olataga; o le mea lea, na manumalo ai pea i latou i o latou fili e oo mai i le taimi nei.

26 Ma sa oo ina faapea o a’u, o Iakopo, ua amata ona toeaina; ma ona o le talafaamaumau o lenei nuu ua tausia i isi papatusi a Nifae, o le mea lea, ou te faaiu ai lenei talafaamaumau, ma ta’u atu ua ’ou tusia e tusa ma le mea e sili ona ou iloa, i le faapea atu, ua mavae atu le taimi mai ia te i matou, ma ua mavae atu foi o matou olaga e pei o se miti, o i matou o ni tagata faaaunuua ma faamamalu, o ni tagata maumausolo, na tutuli ese mai Ierusalema, na fananau i puapuaga, i se vao, ma ua itagia e o matou uso, na mafua ai taua ma finauga; o le mea lea, na matou ola ai ma le faanoanoa i o matou aso.

27 Ma o a’u, o Iakopo, sa ou iloa ua lata ona ou alu ifo i lalo i lo’u tuugamau; o le mea lea, sa ou fai atu ai i lo’u atalii o Enosa: Ia e ave nei papatusi. Ma sa ou ta’u atu ia te ia mea na poloaiina ai a’u e lo’u uso o Nifae, ma sa folafola mai e ia le usiusitai i poloaiga. Ma ou te faaiuina a’u tusitusiga i luga o nei papatusi, o ni tusitusiga ua itiiti lava; ma i lē e faitau i ai, ou te faasoifua atu, ma le faamoemoe ia mafai e le toatele o o’u uso ona faitau i a’u upu. Uso e, tofa.