1 Monayi, mpindiewu biakalua ne pakamba Nefi mêyi â, bamua bantu bavua munkatshi muabu bakanyema lubilu ku nkuasa wa tshilumbuluilu; eyowa, bakaya bavua mena batanu, ne bakambilangana, bu muvuabu ne:

2 Monayi, mpindiewu netumanya bushuwa bikala muntu ewu udi muprofete, ne bikala Nzambi mumupa mukenji bua kuamba mêyi a buprofete pa malu a dikema nanku kutudi. Monayi, katuena tuitabuja ne udi mumupa mukenji to; eyowa, katuena tuitabuja ne udi muprofete to; nansha nanku, bikala bualu ebu buvuaye muamba bitangila mulumbuluishi munena ebu bulelela, ne mmufua, apu netuitabuja ne mêyi makuabu adiye muakula adi malelela.

3 Ne biakalua ne bakanyema lubilu ne makanda abu, ne bakabuela mu muaba wa nkuasa wa tshilumbuluilu; ne monayi, mulumbuluishi munena uvua mupona panshi, ne uvua mulala mu mashi enda.

4 Ne mpindiewu monayi, pakamonabu nanku bakakema menamena, mua ne bakakuluka panshi; bualu kabavua bitabuja mêyi avua Nefi muamba bitangila mulumbuluishi munena to.

5 Kadi mpindiewu, pakamonabu bakitabuja, ne bôwa buakabakuata bua bitungu bionsu bivua Nefi muamba kabilu pa mutu pa bantu; bua nanku bakakanka, ne bakapona panshi.

6 Mpindiewu, katataka pakashibeyibua mulumbuluishi—yeya muikala mutuibua kela kudi muanabu wa baluma uvua mudivuadika bua kabamumanyi to, ne wakanyema, ne basadidi bakaya lubilu bua kuambila bantu, bela lubila lua dishibeya munkatshi muabu;

7 Ne monayi bantu bakadisangisha pamua ku muaba wa nkuasa wa tshilumbuluilu—ne monayi, bakakema pakamonabu bantu batanu bavua bapona panshi.

8 Ne mpindiewu monayi, bantu kabavua bamanya tshintu to bitangila musumba wa bantu uvua mudisangisha pamua ku budimi bua Nefi; bua nanku bakambilangana munkatshi muabu ne: Bantu aba ki badi bashibeya mulumbuluishi, ne Nzambi mmubatûta bua kabatunyemi to.

9 Ne biakalua ne bakabakuata, ne bakabasuika ne bakabela mu buloko. Ne kuvua dimanyisha diakatumibua konsu diamba ne: mulumbuluishi uvua mushibeyibua, ne bamushibeyi bavua bakuatshibua ne bedibua mu buloko.

10 Ne biakalua ne pakatshiabu bantu bakadisangisha pamua bua kudila ne kujila biakudia, ku dijîka dia mulumbuluishi munena uvuabu bashipa.

11 Ne nanku kabidi balumbuluishi abu bavua ku budimi bua Nefi, ne bavua bumvua mêyi enda, bavua pabu basangishibua pamua ku dijîka.

12 Ne biakalua ne bakebeja munkatshi mua bantu, bamba ne: Bantu batanu bavua batumibua bua kuebeja bitangila mulumbuluishi munena bua kumanya ne uvua mufua badi penyi? Ne bakabandamuna ne bamba ne: Katuena bamanya bitangila bantu batanu banudi nuamba ne nuvua batuma to; kadi kudi bantu batanu badi bamushibeyi, batudi bela mu buloko.

13 Ne biakalua ne balumbuluishi bakajinga ne balua nabu; ne bakalua nabu, ne monayi bavua bantu batanu bavuabu batuma; ne monayi balumbuluishi bakabebeja bua kumanya bitangila bualu ebu, ne bakabambila bionsu bivua bienzeka, bamba ne:

14 Tuakanyema lubilu ne tuakalua ku muaba wa nkuasa wa tshilumbuluishi, ne patuakamona bintu bionsu bu muvua Nefi mujadika mena, tuakakema mua ne tuakapona panshi; ne patuakajuka dikema dietu, monayi bakatuela mu buloko.

15 Mpindiewu, bua dishibeya dia muntu ewu, katuena bamanya udi muenza nanku to; ne tudi amu bamanya ne, tuakanyema lubilu bilondeshila munuakajinga, ne monayi uvua mufua, bilondeshila ku mêyi a Nefi.

16 Ne mpindiewu biakalua ne balumbuluishi bakumvuija bantu bualu, ne bakabila, bafunda Nefi, bamba ne: Monayi, tudi bamanya ne Nefi ewu udi ne tshia bua kuikala mumvuangana ne muntu bua kushipa mulumbuluishi, ne pashisha bua atumanyishabi, bua akudimuna moyo wetu ku ditabuja dienda, bua adibandisha bua kuikala muntu munena, musungula kudi Nzambi, ne muprofete.

17 Ne mpindiewu monayi, netujandula muntu ewu, ne neatonda tshilema tshienda ne neatuambila bashibeyi balelela ba mulumbuluishi ewu.

18 Ne biakalua ne bakalekesha bantu batanu aba dituku dia dijîka. Nansha nanku, bakatandisha balumbuluishi bua mêyi avuabu bakanyina Nefi, ne bakakokangana nabu umua ku umua, mu mushindu ne bakabapuwisha.

19 Nansha nanku, bakakuatshisha Nefi ne bakamusuikisha mionji ne bakamuvuija kumpala kua musumba wa bantu, ne bakabanga kumuela nkonku mu mishindu mishilangana bua kumubuejakajabu, bua bamona mua kumufundabu bua kumushipabu—

20 Bamukonka ne: Udi muena tshipangu; muntu kayi udi mumushibeya? Tuambila mpindiewu, ne itabuja tshilema tshieba; bamba ne, Mona makuta; ne netukuanyishila ne wikala ne moyo kabidi biwatuambila, ne witaba diumvuangana diwudi muenza nenda.

21 Kadi Nefi wakabambila ne: Ô nuenu badi bapota, nuenu badi kabayi batengula ku mitshima, nuenu mpofu, ne nuenu bena nshingu miumisha, nudi bamanya mutantshi bula kayi Mukalenga Nzambi neanulekela ne nutungunuka mu njila wenu wa mibi anyi?

22 Ô nudi tshia kubanga kuela mikunda ne kudila, bua dibutuka dinena didi dinuindila diba edi, pa kumbusha nuenu bakakudimuna mutshima.

23 Monayi nudi nuamba ne ndi mumvuangana ne muntu bua ashibeya Sêzolama, mulumbuluishi munena wetu. Kadi monayi, ndi nnuambila ne, mbualu ndi munujadikila bua nuenu kumanya bitangila bualu ebu; eyowa, mena bua njadikilu kunudi, ne mvua mumanya bubi ne malu mapita bubi bidi munkatshi muenu.

24 Ne bualu ndi muenza nanku, nudi nuamba ne ndi mumvuangana ne muntu bua enza bualu ebu; eyowa, bualu mvua munuleja tshimanyinu nudi numfîkila tshiji, ne nudi nukeba bua nuangata moyo wanyi.

25 Ne mpindiewu monayi, ndi nuleja tshimanyinu tshikuabu, ne nemmona ne nuakeba bua nunshipa mu bualu ebu.

26 Monayi ndi nnuambila ne: Ndayi ku nzubu wa Seyantuma, udi muanabu wa baluma wa Sêzolama, ne mukonkayi ne:

27 Nefi, udi udipitshisha bu muprofete, wamba mêyi a buprofete pa bibi bivula bitangila bantu aba, ngudi mumvuangana neba, muwudi mushibeya Sêzolama, udi muikala muanenu wa baluma anyi?

28 Ne monayi, neanuambila ne, To.

29 Ne nenumukonka ne: Udi mushibeya muanenu wa baluma anyi?

30 Ne neimana ne bôwa, ne kakumanya tshia kuamba to. Ne monayi, neavila kunudi; ne neenza bu uvua ukema; nansha nanku, neanumanyisha ne kena mumanya bualu to.

31 Kadi monayi, nenumukenketa, ne nenusangana mashi kuinshi kua tshinkutu tshienda.

32 Ne panuamona nanku, nenukonka ne: Mashi â adi mafumina penyi? Tudi bamanya ne adi mashi a muanenu wa baluma?

33 Ne pashisha neazakala, ne nealua mutoketoka, mena bu lufu luvua lumukuata.

34 Ne pashisha nenuamba ne: Bua bôwa ebu ne butoketoka ebu budi bumueneka pa mpala weba, mona, tudi bamanya ne udi mupîla.

35 Ne pashisha bôwa bukola ne bumukuata; ne pashisha neatonda kunudi, ne kakuvila kabidi ne kena mumushibeya to.

36 Ne pashisha neanuambila ne, mema, Nefi, ntshiena mumanya bualu bitangila bualu ebu amu ne buvua mbundeja ku bukola bua Nzambi. Ne pashisha nenumanya ne ndi muntu muena bulelela, ne Nzambi udi muntuma kunudi.

37 Ne biakalua ne bakaya ne bakenza, mena bilondeshila bu muvua Nefi mubambila. Ne monayi, mêyi avuaye muamba avua malelela; bualu bilondeshila ku mêyi enda wakavila; ne bilondeshila ku mêyi enda wakatonda kabidi.

38 Ne wakasakibua bua kujadika ne yeya nkayenda ki uvua mushibeyi mulelela, mua ne bakalekela bantu batanu abu, ne bakalekela Nefi kabidi.

39 Ne kuvua bamua ba ku Bena Nefi bakitabuja mêyi a Nefi; ne kuvua bamua kabidi, bakitabuja bua bujadiki bua bantu batanu abu, bualu bavua bakudimuna moyo pavuabu mu buloko.

40 Ne mpindiewu kuvua banga munkatshi mua bantu, bavua bamba ne Nefi uvua muprofete.

41 Ne kuvua bakuabu bakamba ne: Monayi, udi Nzambi, bualu pa kumbusha yeya muikala Nzambi kavua mua kumanya malu onsu â to. Bualu monayi, mmutuambila meji a mitshima yetu ne mmutuambila kabidi malu; ne mena watuadi ku dimanya dietu mushibeyi mulelela wa mulumbuluishi wetu munena.