1 Ne biakalua ne pakajika tshidimu tshia makumi asambombo ne tshibîdi tshia dikôkesha dia balumbuluishi, bintu bionsu ebi bikavua bienzeka ne Bena Lamana bakavua balua, tshitupa tshinena, bantu bakana, mu mushindu ne buakana buabu buvua bupita bua Bena Nefi, bua dikamakana diabu ne disuminyina diabu mu ditabuja.

2 Bualu monayi, kuvua Bena Nefi ba bungi bakavua balua bapapishibua ne kabayi bitaba tshilema tshiabu to ne bena bubi bupita, mu mushindu ne bavua babenga dîyi dia Nzambi ne mayisha onsu ne diamba mêyi a buprofete divua dilua munkatshi muabu.

3 Nansha nanku, bantu ba mu ekelezia bavua bapeta disanka dinena bua dikudimuna moyo dia Bena Lamana, eyowa, bua ekelezia wa Nzambi, uvua mushikikibua munkatshi muabu. Ne bakalejangana buwetu, ne bakasankidilangana, ne bavua ne disanka dinena.

4 Ne biakalua ne Bena Lamana ba bungi bakapueka ku bulaba bua Zalahemela, ne bakamanyisha Bena Nefi mushindu wa dikudimuna moyo diabu, ne bakabakankamija bua kuikala ne ditabuja ne dikudimuna mutshima.

5 Eyowa, ne ba bungi ba kudibu bakayisha ne bukola ne bukôkeshi binena menamena, ne bakafikisha ba bungi babu mu ndondu ya didipuekesha, bua kuikala bena balondi badipuekeshi ba Nzambi ne Muana wa Mukoku.

6 Ne biakalua ne Bena Lamana ba bungi bakaya ku bulaba bua ku node; ne Nefi ne Lehi kabidi bakaya ku bulaba bua ku node, bua kuyisha bantu. Ne ki mua kajika tshidimu tshia makumi asambombo ne tshisâtu nanku.

7 Ne monayi, kuvua ditalala mu bulaba bonsu, bua ne Bena Nefi bakaya ku tshitupa tshionsu tshia bulaba kuvuabu basua, bikalabi munkatshi mua Bena Nefi anyi Bena Lamana.

8 Ne biakalua ne Bena Lamana bakaya kabidi konsu kuvuabu basua, bikalabi munkatshi mua Bena Lamana anyi munkatshi mua Bena Nefi; ne nanku bavua ne kuendelangana kudikadila, bua kusumbangana ne kupanyishangana bintu, ne bua kupeta makasa, bilondeshila ku dijinga diabu.

9 Ne biakalua ne bakanema menamena, Bena Lamana ne Bena Nefi; ne bakapeta ngolo wa bungi menamena, ne mpalata, ne mishindu yonsu ya biamua bia mushinga, mu bulaba bua ku sude ne mu bulaba bua ku node.

10 Mpindiewu bulaba bua ku sude buvua bubikidibua ne Lehi, ne bulaba bua ku node buvua bubikidibua ne Muleke, bivua bilondeshila mu dîna dia muana wa baluma wa Sedekiya; bualu Mukalenga wakatuala Muleke ku bulaba bua ku node, ne Lehi ku bulaba bua ku sude.

11 Ne monayi, kuvua mishindu yonsu ya ngolo mu malaba abidi â, ne wa mpalata, ne biamua bia mushindu yonsu; ne kuvua ba nsenda bapiluka, bavua benza mudimu wa biamua bia mishindu yonsu ne bavua babipeluja; ne ki muvuabu banema nanku.

12 Bakakuna nteta ya bungi, ku node ne ku sude; ne yakatoloka menamena, ku node ne ku sude. Ne yakavulangana ne yakakola bikola menamena mu bulaba. Ne bakamuna bisumbu bia bimuna bikesa ne binena, eyowa, nyama ya manyi ya bungi.

13 Monayi bakaji babu bakakuata mudimu ne bakasala buanda, ne bakenza mishindu yonsu ya bilulu, bia lin muluka bimpa ne bilulu bia mishindu yonsu, bua kuvuadika butaka buabu. Ne ki muakapita tshidimu tshia makumi asambombo ne tshinâyi mu ditalala nanku.

14 Ne mu tshidimu tshia makumi asambombo ne tshitânu bakapeta kabidi disanka dinena ne ditalala, eyowa, kuyisha kua bungi ne kuamba mêyi a buprofete a bungi bitangila tshivua ne bua kulua. Ne ki muakapita tshidimu tshia makumi asambombo ne tshitânu nanku.

15 Ne biakalua ne mu tshidimu tshia makumi asambombo ne tshisambombo tshia dikôkesha dia balumbuluishi, monayi, muntu uvua kayi mumanyika wakashibeya Sezolama pavuaye musomba mu nkuasa wa tshilumbuluilu. Ne biakalua ne mu tshidimu tshia momumua atshi, muanenda wa baluma, uvua bantu basungula pa muaba wenda, uvua kabidi mushibeyibua. Ne ki muakajika tshidimu tshia makumi asambombo ne tshisambombo nanku.

16 Ne ku ntuadijilu wa tshidimu tshia makumi asambombo ne tshia muanda muteketa bantu bakabanga kukola menamena mu bubi kabidi.

17 Bualu monayi, Mukalenga uvua mubabenesha mutantshi mula ne mabanji a pa buloba bua nanku kabavua basonsodibua ku tshiji, ku mvita, anyi ku dimatshisha dia mashi to; bua nanku bakabanga ku teka mitshima yabu ku mabanji; eyowa, bakabanga kukeba mua kupeta makasa bua kudibandisha umua kupita mukuabu; bua nanku bakabanga kushibeya bantu mu musokoku, ne kuiba ne kupawula, bua kupeta makasa.

18 Ne mpindiewu monayi, bashibeyi ba bantu ne bapawudi abu bavua bena tshisumbu tshivua tshienza kudi Kishikumena ne Gadiantona. Ne mpindiewu biakalua ne kuvua ba bungi, mena munkatshi mua Bena Nefi, bavua bena tshisumbu tshia Gadiantona. Kadi monayi, bavua bapita bungi munkatshi mua tshitupa tshibi kupita tshia Bena Lamana. Ne bavua babikidibua ne banyengi ne bashibeyanganyi ba Gadiantona.

19 Ne mbobu bakashibeya mulumbuluishi munena Sezolama, ne muanenda wa baluma, pavuaye mu nkuasa wa tshilumbuluilu; ne monayi, kabakabapeta to.

20 Ne monayi biakalua ne pakamanya Bena Lamana ne kuvua banyengi munkatshi muabu bakanyingalala menamena; ne bakenza mushindu yonsu uvua ku bukôkeshi buabu bua kubabutula pa mpala wa buloba.

21 Kadi monayi, Satana wakasonsola mitshima ya tshitupa tshinena tshia Bena Nefi, mu mushindu wa ne bakadisangisha ne bisumbu bia banyengi abu, ne bakabuela mu bipungidi biabu ne bakela mitshipu yabu, bua balamangana ne bakubangana ku malu makola onsu âpetanganabu nawu, bua kabakengi bua dishibeya dia bantu diabu, ne dipawula diabu, ne buivi buabu to.

22 Ne biakalua ne bavua ne bimanyinu biabu, eyowa, bimanyinu bia musokoku biabu, ne mêyi abu a musokoku; ne ebi bua bobu kumanya muanabu udi mupunga tshipungidi, bua ne bubi bonsu buenza muanabu, kenjibu bibi kudi muanabu to, anyi kudi abu bavua bena tshisumbu tshienda, bavua bapunga tshipungidi etshi.

23 Ne nanku bavua mua kushibeya bantu, kupawula, ne kuiba, ne kuenda masandi ne kuenza bubi bua mushindu yonsu, bishilangana ne mêyi a ditunga diabu ne mêyi a Nzambi wabu kabidi.

24 Ne ewu yonsu wa ku bavua bena tshisumbu tshiabu wamanyisha ba pa buloba bubi buabu ne malu mapita bubi abu, nealumbuluishibua, kabiyi bilondeshila ku mêyi a ditunga to, kadi bilondeshila ku mêyi a bubi buabu, avua Gadiantona ne Kishikumena bafila.

25 Mpindiewu monayi, bidi mitshipu ne bipungidi bia mu musokoku ebi bivua Alama mupesha muanenda wa baluma mukenji ne kabiyi kudi ba pa buloba to, bua kabilu njila wa kutuala bantu ku dibutuka to.

26 Mpindiewu monayi, mitshipu ne bipungidi bia mu musokoku abi kabiakalua kudi Gadiantona kupitshila ku miandiku ivua Shibulona mupesha Helamana to; kadi monayi, bivua biedibua mu mutshima wa Gadiantona kudi muntu umua awu wakalobesha baledi betu ba diambedi bua kudia tshimuma tshikandikibua.

27 Eyowa, muntu umua awu wakabuela mu tshipangu ne Kayina, ne biashibeyaye muanabu wa baluma Abele, kabiakumanyika kudi ba pa buloba to. Ne wakabuela mu tshipangu ne Kayina ne balondi benda katshia ku tshikondu atshi.

28 Ne bidi kabidi muntu umua awu wakateka meji mu mitshima ya bantu bua kuibaka tshibumba tshila tshikumbana bua bamona mua kufika mu diûlu. Ne bivua muntu umua awu wakalombola bantu bakafuma ku tshibumba atshi ku bulaba ebu; wakatangalaja midimu ya mîdima ne malu mapita bubi pa mpala yonsu wa bulaba, tô ne pakapulumunaye bantu panshi ku dibutuka dijima, ne ku ngena wa kashidi.

29 Eyowa, bidi muntu umua awu wakateka meji mu mutshima wa Gadiantona bua kuenza mudimu wa mîdima, ne wa dishibeya dia bantu dia mu musokoku; ne wakawutuala kumbukila ku mbangilu wa muntu mena tô ne ku diba edi.

30 Ne monayi, nyeya udi muena mibi yonsu. Ne monayi, udi mutuala midimu ya mîdima ne dishibeya dia bantu dia mu musokoku, ne udi ufila bipangu biabu, ne mitshipu yabu, ne bipungidi biabu, ne malongolodi abu a bubi butamba bubi, ku tshikondu ne tshikondu bilondeshila bu mudiye mua kukuata mitshima ya bana ba bantu.

31 Ne mpindiewu monayi, uvua mukuata mitshima ya Bena Nefi; eyowa, mua ne bavua balua bena bubi menamena; eyowa, tshitupa tshinena tshiabu bavua bumbuka ku njila wa buakana, ne bavua badiatakaja mikenji ya Nzambi muinshi mua makasa abu, ne bavua bakudimuka ku njila yabu nkayabu, ne bakukuila ngolo yabu ne mpalata yabu bu mpingu.

32 Ne biakalua ne malu mabi onsu â akalua kudibu mu mutantshi wa bidimu bikesa, bua ne tshitupa tshinena tshiawu tshivua tshilua kudibu mu tshidimu tshia makumi asambombo ne tshia muanda muteketa tshia dikôkesha dia balumbuluishi pa mutu pa bantu ba Nefi.

33 Ne bakakola mu malu mabi mu tshidimu tshia makumi asambombo ne tshia muanda mukulu kabidi, biakapesha bantu bakana kanyinganyinga ne muadi.

34 Ne nanku tudi tumona ne Bena Nefi bakabanga kushinguluka mu dipanga dia ditabuja, ne kokola mu bubi ne malu mapita bubi, pavua Bena Lamana bavua babanga kokola menamena mu dimanya dia Nzambi wabu; eyowa, bakabanga kulama mikandu ne mikenji yenda, ne kuenda mu bulelela ne bululama kumpala kuenda.

35 Ne nanku tudi tumona ne Nyuma wa Mukalenga wakabanga kumbuka kudi Bena Nefi, bua bubi ne dipapa dia mitshima yabu.

36 Ne nanku tudi tumona ne Mukalenga wakabanga kupumunyina Bena Lamana Nyuma wenda, bua buteketa buabu ne ditaba diabu bua kuitabuja miaku yenda.

37 Ne biakalua ne Bena Lamana bakipatakaja tshisumbu tshia banyengi ba Gadiantona; ne bakayisha dîyi dia Nzambi munkatshi mua tshitupa tshipita bubi tshiabu, bua ne tshisumbu tshia banyengi etshi tshiakabutuka tshionsu munkatshi mua Bena Lamana.

38 Ne biakalua ne ku luseka lukuabu, ne Bena Nefi bakabakuatshisha ne kubambuluisha, kubanga ku tshitupa tshipita bubi tshiabu, tô ne pakatangalakabu mu bulaba bua Bena Nefi bonsu, ne pakapambuishabu tshitupa tshinena tshia bakana tô ne pakaluabu kuitabuja midimu yabu ne kudia bintu biabu binyenga, ne kudisangisha nabu mu dishibeya diabu dia bantu ne bipungidi biabu bia musokoku.

39 Ne nanku bakapeta bulombodi bua bukalenga bonsu, mua ne bakadiata bapela ne bapola, ne badipuekeshi balondi ba Nzambi mu makasa abu ne bakabatûta ne kubapanda ne kubela nyima yabu.

40 Ne nanku tudi tumona ne bavua mu ngikadilu mutamba bubi, ne bavua baboba bua dibutuka dia kashidi.

41 Ne biakalua ne ki muakajika tshidimu tshia makumi asambombo ne tshia muanda mukulu tshia dikôkesha dia balumbuluishi pa mutu pa bantu ba Nefi nanku.