1 Ne mpindiewu, biakalua ne kuvua ba bungi bakumvua mêyi a Samuele, Muena Lamana, akambaye pa tshimanu tshia tshimenga. Ne bonsu bakitabuja mêyi enda bakaya ne bakakeba Nefi; ne pakaluabu ne pakamupetabu bakamutondela mibi yabu ne kabakavila to, ne bakajinga ne batambuishibua bua Mukalenga.

2 Kadi bonsu bavuaku bavua kabayi bitabuja mêyi a Samuele to bakamufîkila tshiji; ne bakamuasa mabua pa tshimanu, ne ba bungi bakamuasa kabidi miketa pavuaye muimana pa tshimanu; kadi Nyuma wa Mukalenga uvua nenda, mua ne mabua abu anyi miketa kabivua mua kumutûta to.

3 Mpindiewu pakamonabu ne kabivua mua kumutûta to, kuvua ba bungi bakitabuja mêyi enda, mua ne bakaya kudi Nefi bua kutambuishibua.

4 Bualu monayi, Nefi uvua utambuisha, ne wamba mêyi a buprofete, ne uyisha, ubila kudi bantu bua bakudimuna mutshima, uleja bimanyinu bidi malu a dikema, wenza bishima munkatshi mua bantu, bua bamanya ne Kilisto udi ulua katataka—

5 Ubambila bintu bivua ne tshia kulua katataka, bua bamanya ne bavuluka diba dia dilua diabi ne bakavua badianjila kubamanyishabi, bua dijinga dia ne bitabuja; bua nanku bonsu bakitabuja mêyi a Samuele bakaya kudiye bua kutambuishibua, bualu bakalua bakudimuna mutshima ne batonda mibi yabu.

6 Kadi tshitupa tshiabu tshinena katshiakitabuja mêyi a Samuele to; bua nanku pakamonabu ne kabavua mua kumutûta ne mabua abu ne miketa yabu to, bakabila kudi tupita tuabu, bamba ne: Kuatayi muntu ewu ne musuikayi, bualu monayi udi ne nyuma wa diabulu; ne bua bukola bua nyuma wa diabulu udi munda muenda katuena mua kumutûta ne mabua etu ne miketa yetu to; bua nanku mukuatayi ne musuikayi, ne ndayi nenda.

7 Ne bu muvuabu baya bua kumutua bianza, monayi, wakadiela panshi pa tshimanu, ne wakanyema kupatukaye mu malaba abu, eyowa, ne wakaya mena ku ditunga dienda, ne wakabanga kuyisha ne kuamba mêyi a buprofete munkatshi mua bantu benda.

8 Ne monayi, kabakumvua kabidi bualu buenda munkatshi mua Bena Nefi to; ne ki muvua malu a bantu nanku.

9 Ne ki muakajika tshidimu tshia makumi muanda mukulu ne tshisambombo tshia dikôkesha dia balumbuluishi pa mutu pa bantu ba Nefi nanku.

10 Ne ki muakajika kabidi tshidimu tshia makumi muanda mukulu ne tshia muanda muteketa tshia dikôkesha dia balumbuluishi nanku, tshitupa tshinena tshia bantu tshikala tshishala ne diditambisha ne bubi buabu, ne tshitupa tshikesa tshikala tshienda ne kudilama kumpala kua Nzambi.

11 Ne ebi bionsu bivua muvua malu kabidi, mu tshidimu tshia makumi muanda mukulu ne tshia muanda mukulu tshia dikôkesha dia balumbuluishi.

12 Ne kuvua amu dikudimuka dikesa mu malu a bantu, amu pa kumbusha ne bantu bakabanga kupapishibua bikola mu malu mabi, ne kuenza malu mapita ne mapita avua mashilangana ne mikenji ya Nzambi, mu tshidimu tshia makumi muanda mukulu ne tshitema tshia dikôkesha dia balumbuluishi.

13 Kadi biakalua ne mu tshidimu tshia makumi tshitema tshia dikôkesha dia balumbuluishi, kuvua bimanyinu binena biakapesha Nzambi bantu, ne malu a dikema; ne mêyi a baprofete akabanga kukumbajibua.

14 Ne banjelu bakamuenekela bantu, bantu ba lungenyi, ne bakabamanyisha mukenji mulenga wa disanka dinena; nanku mu tshidimu etshi mifundu ya Nzambi yakabanga kukumbajibua.

15 Nansha nanku, bantu bakabanga kupapisha mitshima yabu, bonsu amu pa kumbusha tshitupa tshiabu tshivua tshitabuja bikola ku Bena Nefi kadi kabidi ku Bena Lamana, ne bakabanga kueyemena ku bukola buabu nkayabu ne ku lungenyi luabu nkayabu, bamba ne:

16 bimua bintu bia ku bivuabu batshinka bidi bilelela; kadi monayi, tudi bamanya ne midimu yonsu minena ne ya dikema ivuabu bamba eyi kayena mua kuenzeka to.

17 Ne bakabanga kunana meji ne kukokangana munkatshi muabu, bamba ne:

18 Kabiena ne bua nsongu to bua ne muntu bu mudi Kilisto alua; pikalabi nanku, ne bu yeya muikala Muana wa Nzambi, Tatu wa diûlu ne wa buloba, bu muvuabi biamba, bua tshinyi kena udileja kutudi mushindu umua ne bikala ku Yelushalema?

19 Eyowa, bua tshinyi kena udileja mu bulaba ebu to bu mudiyi udileja mu bulaba bua Yelushalema?

20 Kadi monayi, tudi bamanya ne etshi tshidi ngumvuilu mubi, uvua mutushila kudi batatuetu, bua kutuenzeja ne tuitabuja bumua bualu bunena ne bua dikema bualua, kadi kabuyi munkatshi muetu to, kadi mu bulaba budi kula, bulaba butudi katuyi bamanya to; bua nanku badi mua kutushiya mu dipanga, bualu katuena mua kudimuena ne mesu etu nkayetu ne bidi bilelela to.

21 Ne nebenza, ku midimu ya budimu ne ya malu masokoka ya muena bubi, amua bualu busokoka bunena butudi katuyi mua kumvua to, tshintu tshia tulama panshi bua kuikala benji mudimu ba mêyi abu, ne kabidi benji mudimu babu, bualu tudi beyemena kudibu bua kutulongeshabu dîyi; ne kabidi basadidi babu, bualu bua tudi babalamata bua kutulongesha dîyi; ne nanku nebatushiya mu dipanga patuadifila kudibu, matuku onsu a moyo wetu.

22 Ne bantu bakela meji mu mitshima yabu bua bia bungi bipita, bivua bikala bia bupota ne bia tshianana; ne bavua basaluka bikola, bualu bua Satana wakabasonsola ku dienza dia malu mabi misangu yonsu; eyowa, uvua wendakana mu kutangalaja ngumu ya mafi ne makokangana pa mpala yonsu wa bulaba, bua ne apapisha mitshima ya bantu ku bualu buimpa ne ku bualu bualua.

23 Ne nansha bu muvua bimanyinu ne malu a dikema bienzejibua munkatshi mua bantu ba Mukalenga, ne bishima bia bungi biakenzabu, Satana wakakuata mitshima ya bantu bikola pa mpala yonsu wa bulaba.

24 Ne ki muakajika tshidimu tshia makumi tshitema tshia dikôkesha dia balumbuluishi pa mutu pa bantu ba Nefi nanku.

25 Ne ki muakajika mukanda wa Helamana nanku, bilondeshila ku miandiku ya Helamana ne bana benda ba baluma.