1 Pea ko ʻeni naʻe hoko ʻo pehē ʻi he taʻu hono fāngofulu mā tolu ʻo e pule ʻa e kau fakamāú, naʻe ʻikai ha fekeʻikeʻi ʻi he kakai ʻo Nīfaí kae ngata pē ʻi ha kiʻi loto-hīkisia siʻi ʻa ia naʻe ʻi he siasí, ʻa ia naʻe fakatupu ai ha ngaahi fekeʻikeʻi iiki ʻi he kakaí, ʻa ia ko ha ngaahi meʻa naʻe fakaleleiʻi ʻi he ngataʻanga ʻo hono fāngofulu mā tolu ʻo e taʻú.

2 Pea naʻe ʻikai ha fekeʻikeʻi ʻi he kakaí ʻi hono fāngofulu mā fā ʻo e taʻú; pea naʻe ʻikai foki ke loko lahi ha fekeʻikeʻi ʻi he taʻu hono fāngofulu mā nimá.

3 Pea naʻe hoko ʻo pehē ʻi hono fāngofulu mā ono ʻo e taʻú, ʻio, naʻe lahi ʻa e fakakikihí mo e ngaahi tafokí; ʻa ia naʻe tupu ai ha hiki ha fuʻu tokolahi ʻaupito mei he fonua ko Seilahemalá, ʻo nau ō atu ki he fonua ʻi he fakatokelaú ke nofoʻi ʻa e fonuá.

4 Pea naʻa nau fononga ki ha feituʻu fuʻu mamaʻo ʻaupito, kae ʻoua kuo nau aʻu atu ki ha ngaahi fuʻu anovai lalahi mo e ngaahi vaitafe lahi.

5 ʻIo, pea naʻa nau mafola atu ki he ngaahi potu kotoa pē ʻo e fonuá, ki he ngaahi potu kotoa pē kuo ʻikai ke lala pea ʻikai ke ʻi ai ha ʻakau, koeʻuhi ko e fuʻu kakai tokolahi kuo nau tomuʻa nofoʻi ʻa e fonuá.

6 Pea ko ʻeni naʻe ʻikai ha potu ʻe taha ʻo e fonuá ʻe lala, ka ko e ʻakaú pē; ka koeʻuhi ko hono lahi ʻo e fakaʻauha ʻa e kakai kuo nau muʻaki nofoʻi ʻa e fonuá naʻe ui ai ia ko ʻauha.

7 Pea naʻe siʻisiʻi ʻa e ʻakau ʻi he funga ʻo e fonuá, neongo iá naʻe fakaʻau ʻo fuʻu poto ʻa e kakai ʻa ia naʻe ʻalu atú ʻi hono ngāue ʻaki ʻo e simá; ko ia naʻa nau langa ʻa e ngaahi fale ʻo e sima, ʻa ia naʻa nau nofo ai.

8 Pea naʻe hoko ʻo pehē naʻa nau fakatokolahi pea mafola atu ʻi he fonuá, pea naʻa nau ʻalu atu mei he fonua ʻi he fakatongá ki he fonua ʻi he fakatokelaú, pea naʻa nau mafola atu ʻo aʻu ki heʻenau ʻufiʻufi ʻa e funga kotoa ʻo e fonuá, ʻo fai mei he tahi tongá ki he tahi tokelaú, pea mei he tahi hihifó ki he tahi hahaké.

9 Pea ko e kakai naʻa nau ʻi he fonua ʻi he fakatokelaú naʻa nau nofo ʻi ha ngaahi fale fehikitaki, mo e ngaahi fale ʻo e sima, pea naʻa nau tuku ʻa e ʻakau kotoa pē ʻa ia naʻe tupu ʻi he funga ʻo e fonuá ke tupu hake, koeʻuhi ke faifai pea ʻi ai ha taimi te nau lava ʻo maʻu ha ʻakau ke langa ʻaki honau ngaahi falé, ʻio, ʻa honau ngaahi koló, mo honau ngaahi temipalé, mo honau ngaahi fale lotu lahí, mo honau ngaahi potu topu tapú, pea mo honau ngaahi faʻahinga fale kotoa pē.

10 Pea naʻe hoko ʻo pehē ko e meʻa ʻi he fuʻu siʻi ʻaupito ʻa e ʻakau ʻi he fonua ʻi he fakatokelaú, naʻa nau fetuku lahi atu ia ʻi he ngaahi vaka.

11 Pea naʻe pehē ʻenau tokoniʻi ʻa e kakai ʻi he fonua ʻi he fakatokelaú ke nau lava ʻo langa ʻa e ngaahi kolo lahi, ʻaki ʻa e ʻakau mo e sima fakatouʻosi.

12 Pea naʻe hoko ʻo pehē naʻe ʻi ai ʻa e tokolahi ʻo e kakai ʻo ʻĀmoní, ʻa ia naʻe fanauʻi mai ko e kau Leimana, naʻa nau ʻalu atu foki ki he fonua ko iá.

13 Pea ko ʻeni ʻoku ʻi ai ha ngaahi lekooti lahi naʻe tauhi ʻo e ngaahi ngāue ʻa e kakaí ni, ʻe he tokolahi ʻo e kakaí ni, ʻa ia ʻoku fakamatala ai ʻo kakato pea lalahi, ʻo kau kiate kinautolu.

14 Kae vakai, ko hano vahe teau ʻe taha ʻo e ngaahi meʻa kuo fai ʻe he kakai ní, ʻio, ʻa e fakamatala ʻo e kau Leimaná mo e kau Nīfaí, mo ʻenau ngaahi taú, mo e ngaahi fakakikihí, mo e ngaahi angatuʻú, mo ʻenau malangá, mo ʻenau ngaahi kikité, mo ʻenau fefolauʻakí mo ʻenau foʻu ʻo e ngaahi vaká, mo ʻenau langa ʻo e ngaahi temipalé, mo e ngaahi fale lotu lahí, mo honau ngaahi potu toputapú, mo ʻenau ngaahi māʻoniʻoní, mo ʻenau fai angahalá, mo ʻenau ngaahi fakapoó, mo ʻenau ngaahi kaihaʻá, mo ʻenau vete koloá, mo e ngaahi faʻahinga meʻa fakalielia kotoa pē, mo e ngaahi feʻauakí, ʻoku ʻikai faʻa hao ia ʻi he tohí ni.

15 Kae vakai, ʻoku ʻi ai ʻa e ngaahi tohi lahi mo e ngaahi lekooti lahi ʻo e faʻahinga kotoa pē, pea kuo meimei tauhi ia kotoa ʻe he kau Nīfaí.

16 Pea kuo tauhi tukufakaholo mai ia mei he toʻu tangata ʻe taha ki he toʻu tangata ʻe taha ʻe he kau Nīfaí, ʻo aʻu ki heʻenau hinga ki he fai angahalá pea kuo fakapoongi, mo vetea, mo kumi, mo kapusi, mo tāmateʻi, mo fakamovetevete ʻa kinautolu ʻi he funga ʻo e fonuá, pea fetuiaki mo e kau Leimaná, ʻo aʻu ki he ʻikai ke toe ui ʻa kinautolu ko e kau Nīfai, ʻo nau hoko ʻo fai angahala, mo kaivao, mo loto-fītaʻa, ʻio, ʻo hoko foki ko e kau Leimana.

17 Pea ko ʻeni ʻoku ou toe foki ki heʻeku fakamatalá; ko ia, kuo ʻosi hoko ʻa e ngaahi meʻa kuó u lau ki aí ʻi he hili ʻa e hoko ʻa e ngaahi fuʻu fakakikihi, mo e ngaahi moveuveu, mo e ngaahi tau, mo e ngaahi angatuʻu ʻi he kakai ʻo Nīfaí.

18 Naʻe ʻosi ʻa hono fāngofulu mā ono ʻo e taʻu ʻo e pule ʻa e kau fakamāú;

19 Pea naʻe hoko ʻo pehē naʻe kei ʻi ai ʻa e fuʻu fekeʻikeʻi lahi ʻi he fonuá, ʻio, ʻi hono fāngofulu mā fitu ʻo e taʻú, pea ʻi hono fāngofulu mā valu foki ʻo e taʻú.

20 Ka neongo iá naʻe fua ʻe Hilamani ʻa e lakanga ʻo e fakamāú ʻi he faitotonu mo e taʻe-filifilimānako; ʻio, naʻá ne tokanga ke tauhi ʻa e ngaahi lao, mo e ngaahi tuʻutuʻuni, mo e ngaahi fekau ʻa e ʻOtuá; pea naʻá ne fai ʻa e meʻa ʻoku totonu ʻi he ʻao ʻo e ʻOtuá maʻu ai pē; pea naʻá ne ʻaʻeva ʻi he ngaahi hala ʻo ʻene tamaí, ʻo aʻu ki heʻene tuʻumālie ai ʻi he fonuá.

21 Pea naʻe hoko ʻo pehē naʻá ne maʻu ha foha ʻe toko ua. Naʻá ne foaki kiate ia naʻe lahi ʻa e hingoa ko Nīfai, pea kiate ia naʻe siʻi ʻa e hingoa ko Līhai. Pea naʻá na kamata ke tupu hake ki he ʻEikí.

22 Pea naʻe hoko ʻo pehē naʻe fakaʻau ke siʻisiʻi ange ʻa e ngaahi taú mo e ngaahi fekeʻikeʻí, ʻi he kakai ʻo e kau Nīfaí, ʻi he konga fakaʻosi ʻo e taʻu hono fāngofulu mā valu ʻo e pule ʻa e kau fakamāú ki he kakai ʻo Nīfaí.

23 Pea naʻe hoko ʻo pehē ʻi hono fāngofulu mā hiva ʻo e taʻu ʻo e pule ʻa e kau fakamāú, naʻe fokotuʻu maʻu ʻa e melino ʻi he fonuá kotoa, tuku kehe pē ʻa e ngaahi kautaha fufū kuo fokotuʻu ʻe Katianetoni ko e tangata kaihaʻá ʻi he ngaahi potu kakaiʻia ange ʻo e fonuá, ʻa ia naʻe ʻikai ʻilo ki ai ʻe kinautolu ʻa ia naʻe tauhi ʻa e puleʻangá ʻi he taimi ko iá, ko ia naʻe ʻikai ke fakaʻauha ʻa kinautolu mei he fonuá.

24 Pea naʻe hoko ʻo pehē ʻi he taʻu pē ko iá naʻe ʻi ai ʻa e fuʻu tuʻumālie lahi ʻi he siasí, ʻo aʻu ki he ului ʻa e ngaahi toko lau afe ki he siasí ʻo nau papitaiso ki he fakatomalá.

25 Pea naʻe pehē fau hono lahi ʻo e tuʻumālie ʻa e siasí, mo e ngaahi tāpuaki lahi ʻa ia naʻe lilingi hifo ki he kakaí, pea naʻe fuʻu ofo ai ʻa e kau taulaʻeiki lahí mo e kau akonakí ʻo fuʻu lahi ʻaupito.

26 Pea naʻe hoko ʻo pehē naʻe tupulaki ʻa e ngāue ʻa e ʻEikí ʻo aʻu ki hono papitaiso mo ului ki he siasi ʻo e ʻOtuá, ʻa e kakai tokolahi, ʻio, ʻa e ngaahi toko mano.

27 Ko ia ʻoku tau lava ʻo ʻiloʻi ai ʻoku ʻaloʻofa ʻa e ʻEikí kiate kinautolu kotoa pē te nau ui ki hono huafa toputapú, ʻi he moʻoni ʻo honau lotó.

28 ʻIo, ko ia ʻoku tau vakai ki hono fakaava mai ʻo e matapā ʻo e langí ki he kakai fulipē, ʻio kiate kinautolu ʻe tui ki he huafa ʻo Sīsū Kalaisi, ʻa ia ko e ʻAlo ʻo e ʻOtuá.

29 ʻIo, ʻoku tau vakai ko ia ia ʻe loto ki aí te ne puke ʻa e folofola ʻa e ʻOtuá, ʻa ia ʻoku moʻui mo mālohí, ʻa ia ʻe taʻofi ʻa e kākā olopoto kotoá mo e ngaahi tauhelé mo e fakakaukau kākā kotoa pē ʻa e tēvoló, ʻo tataki atu ʻa e tangata ʻa Kalaisí ʻi he hala ʻoku fāsiʻi mo lausiʻí ki he ngutungutu ʻe taha ʻo e vanu taʻengata ʻo e mamahí ʻa ia kuo teuteu ke folo hifo ʻa e kau angahalá—

30 Pea aʻutaki atu honau laumālié, ʻio, ʻa honau laumālie taʻe-faʻa-maté, ki he toʻukupu toʻomataʻu ʻo e ʻOtuá ʻi he puleʻanga ʻo e langí, ke nofo hifo mo ʻĒpalahame, mo ʻAisake, mo Sēkope, pea mo ʻetau ngaahi tamai māʻoniʻoni kotoa pē, ʻo ʻikai toe hū ki tuʻa.

31 Pea ʻi he taʻu ko iá, naʻe ʻi ai maʻu ai pē ʻa e fiefia ʻi he fonua ko Seilahemalá, pea ʻi he ngaahi potu fonua ofi ki aí, ʻio, ʻi he fonua hono kotoa naʻe maʻu ʻe he kau Nīfaí.

32 Pea naʻe hoko ʻo pehē naʻe ʻi ai ʻa e melino mo e fuʻu fiefia lahi ʻaupito ʻi hono toe ʻo hono fāngofulu mā hiva ʻo e taʻú; ʻio, pea naʻe hokohoko ai pē foki ʻa e melinó mo e fuʻu fiefia lahi ʻaupito ʻi hono nimangofulu taʻu ʻo e pule ʻa e kau fakamāú.

33 Pea ʻi hono nimangofulu mā taha taʻu ʻo e pule ʻa e kau fakamāú naʻe ʻi ai foki ʻa e melinó, tuku kehe pē ʻa e loto-hīkisia ʻa ia naʻe kamata ke hū mai ki he siasí—kae ʻikai ki he siasi ʻo e ʻOtuá, ka ki he loto ʻo e kakai ʻa ia naʻa nau pehē ʻoku nau kau ki he siasi ʻo e ʻOtuá—

34 Pea naʻa nau fielahi ʻi he hīkisia, ʻo aʻu ki hono fakatangaʻi ʻo e tokolahi ʻo honau kāingá. Ko ʻeni ko ha fuʻu kovi lahi ʻeni, ʻa ia naʻe fakatupu ai ʻa e faingataʻaʻia ʻa e kakai loto-fakatōkilalo angé ʻi he ngaahi fakatanga lahi, ʻo kātakiʻi ʻa e ngaahi fuʻu faingataʻa lahi.

35 Ka neongo iá naʻa nau faʻa ʻaukai mo lotu, pea nau fakaʻau ʻo mālohi ange ai pē ʻi honau loto-fakatōkilaló, mo tuʻu mālohi ai pē ʻi he tui kia Kalaisí, ʻo aʻu ki hono fakafonu honau laumālié ʻaki ʻa e fiefia mo e fiemālie, ʻio, ʻo aʻu ki hono fakahaohaoaʻi mo fakamāʻoniʻoniʻi honau lotó, ʻa ia ko ha fakamāʻoniʻoniʻi ʻoku hoko tupu mei heʻenau fakavaivaiʻi ʻa honau lotó ki he ʻOtuá.

36 Pea naʻe hoko ʻo pehē naʻe ʻosi foki hono nimangofulu mā ua ʻo e taʻú ʻi he melino, tuku kehe pē ʻa e fuʻu hīkisia lahi ʻaupito ʻa ia kuo hū ki he loto ʻo e kakaí; pea naʻe tupu ia mei heʻenau ngaahi fuʻu koloa lahi ʻaupitó mo ʻenau tuʻumālie ʻi he fonuá; pea naʻe tupu ia ʻiate kinautolu mei he ʻaho ki he ʻaho.

37 Pea naʻe hoko ʻo pehē ʻi hono nimangofulu mā tolu taʻu ʻo e pule ʻa e kau fakamāú, naʻe pekia ʻa Hilamani, pea naʻe kamata ʻa hono foha lahi ko Nīfaí ke pule ko hono fetongi. Pea naʻe hoko ʻo pehē naʻá ne pule ʻi he lakanga ʻo e fakamāú ʻi he faitotonu mo e taʻe-filifilimānako; ʻio, naʻá ne tauhi ʻa e ngaahi fekau ʻa e ʻOtuá, peá ne ʻaʻeva ʻi he ngaahi hala ʻo ʻene tamaí.