Ko e Tohi ʻa Hilamaní

1 Pea ko ʻeni vakai, naʻe hoko ʻo pehē ʻi he kamataʻanga ʻo e taʻu hono fāngofulu ʻo e pule ʻa e kau fakamāú ki he kakai ʻo Nīfaí, naʻe kamata ke tupu ha fuʻu faingataʻa lahi ʻi he kakai ʻo e kau Nīfaí.

2 He vakai, kuo pekia ʻa ^aPeiholani, ʻo fononga ʻi he hala ʻo e māmani kotoa pē; ko ia naʻe kamata ha fuʻu fakakikihi lahi pe ko hai ʻe hoko ki he nofoʻanga ʻo e fakamāú ʻi he ngaahi tokouá, ʻa ia ko e ngaahi foha ʻo Peiholaní.

3 Ko ʻeni ko e ngaahi hingoa ʻeni ʻo kinautolu ʻa ia naʻe fakakikihi ke maʻu ʻa e nofoʻanga fakamāú, ʻa ia naʻe langaki foki ai ʻa e kakaí ke fakakikihi: Ko Peiholani, mo Peianikai, mo Peikumenai.

4 Ko ʻeni ʻoku ʻikai ko hono kotoa ʻeni ʻo e ngaahi foha ʻo Peiholaní, (he naʻá ne maʻu ʻa e tokolahi), ka ko kinautolu pē ʻeni ʻa ia naʻe fakakikihi ke maʻu ʻa e nofoʻanga fakamāú; ko ia, naʻa nau fakatupu ha fakafaʻahi tolu ʻa e kakaí.

5 Ka neongo iá, naʻe hoko ʻo pehē naʻe fakanofo ʻa Peiholani ʻi he ^aleʻo ʻo e kakaí ke ne fakamaau lahi mo ha pule ki he kakai ʻo Nīfaí.

6 Pea naʻe hoko ʻo pehē ʻi he vakai ʻe Peikumenai, ʻe ʻikai te ne lava ʻo maʻu ʻa e nofoʻanga fakamāú, naʻá ne loto leva ke tali ʻa e loto ʻo e kakaí.

7 Kae vakai, ko Peianikai mo e faʻahi ʻo e kakaí ʻa ia naʻa nau loto ke ne hoko ko honau pulé, naʻa nau fuʻu ʻita ʻaupito; ko ia, naʻá ne hanga ke fakahekehekeʻi ʻa e kakaí ke nau angatuʻu ki honau kāingá.

8 Pea naʻe hoko ʻo pehē ʻi heʻene teu ke fai ʻení, vakai, naʻe puke ia, pea naʻe fakamāuʻi ia ʻo fakatatau ki he leʻo ʻo e kakaí, pea naʻe tuʻutuʻuni ke tāmateʻi ia; he kuó ne tuʻu ʻi he angatuʻu mo feinga ke ne fakaʻauha ʻa e ^atauʻatāina ʻa e kakaí.

9 Ko ʻeni ʻi he vakai ʻa e kakai ʻa ia naʻa nau loto ke ne hoko ko honau pulé kuo tuʻutuʻuni ke tāmateʻi iá, ko ia naʻa nau ʻita, pea vakai, naʻa nau fekau ke ʻalu atu ʻa e tokotaha, ko Kisikumeni, ʻio ki he nofoʻanga fakamaau ʻo Peiholaní, ʻo ne fakapoongi ʻa Peiholani ʻi he lolotonga ʻene nofo ʻi he nofoʻanga fakamāú.

10 Pea naʻe tuli ia ʻe he kau tamaioʻeiki ʻa Peiholaní; kae vakai, naʻe pehē fau hono vave ʻo e hola ʻa Kisikumení naʻe ʻikai lava ke maʻu ia ʻe ha tangata ʻe taha.

11 Pea naʻá ne ʻalu atu kiate kinautolu ʻa ia naʻe fekauʻi iá, pea naʻa nau fai kotoa pē ha fuakava, ʻio, ʻo nau fuakava ki honau Tupuʻanga taʻengatá, ʻe ʻikai te nau fakahā ki ha tangata ʻe taha kuo fakapoongi ʻe Kisikumeni ʻa Peiholani.

12 Ko ia, naʻe ʻikai ke ʻilo ʻa Kisikumeni ʻi he lotolotonga ʻo e kakai Nīfaí, he naʻá ne teunga fakapulipuli ʻi he taimi naʻá ne fakapoongi ai ʻa Peiholaní. Pea ko Kisikumeni mo ʻene kautahá, ʻa ia kuo nau fefuakavaʻaki mo iá, naʻa nau fetuiaki mo e kakaí ʻi ha founga naʻe ʻikai ke faʻa ʻiloʻi ai ʻa kinautolu; ka ko kinautolu kotoa pē naʻe ʻiloʻí naʻe ^afakamaaumatea.

13 Pea ko ʻeni vakai foki, naʻe fakanofo ʻa Peikumenai, ʻo fakatatau ki he leʻo ʻo e kakaí, ke ne hoko ko ha fakamaau lahi mo ha kōvana ki he kakaí, ke pule ʻo fetongi ʻa hono tokoua ko Peiholaní; pea naʻe totonu ke ne maʻu ia. Pea naʻe fai ʻeni kotoa pē ʻi hono fāngofulu ʻo e taʻu ʻo e pule ʻa e kau fakamāú; pea naʻe ʻosi ia.

14 Pea naʻe hoko ʻo pehē ʻi hono fāngofulu mā taha ʻo e taʻu ʻo e pule ʻa e kau fakamāú, kuo tānaki fakataha ʻe he kau Leimaná ha kau tau ʻo e kau tangata taʻefaʻalaua, pea fakamahafu ʻa kinautolu ʻaki ʻa e ngaahi heletā, mo e ngaahi hele piko, mo e ngaahi kaufana, mo e ngaahi ngahau, mo e ngaahi tatā tau, mo e ngaahi sifa-fatafata, pea mo e ngaahi faʻahinga pā ʻi he faʻahinga kotoa pē.

15 Pea naʻa nau toe ʻalu hifo ke nau kamata ke tau mo e kau Nīfaí. Pea naʻe taki ʻa kinautolu ʻe ha tangata ʻa ia ko hono hingoá ko Kolianitomuli; pea ko ha hako ia ʻo Seilahemala; pea ko e taha ia naʻe tafoki mei he kau Nīfaí; pea ko ha tangata kaukaua mo mālohi lahi ia.

16 Ko ia, ko e tuʻi ʻo e kau Leimaná, ʻa ia ko hono hingoá ko Tupalote, ʻa ia ko e foha ʻo ^aʻAmolone, ʻi heʻene mahalo ʻe lava ʻe Kolianitomuli, he ko ha tangata mālohi lahi ia, ʻo matuʻuaki ʻa e kau Nīfaí, ʻaki hono iví kae ʻumaʻā foki hono poto lahí, pea ʻi hono fekau atu iá te ne lava ʻo ikuna ʻa e kau Nīfaí—

17 Ko ia naʻá ne ueʻi hake ʻa kinautolu ke nau ʻita, pea naʻá ne tānaki fakataha ʻene ngaahi kau taú, ʻo ne fakanofo ʻa Kolianitomuli ke hoko ko honau taki, peá ne fekau ke nau laka hifo ki he fonua ko Seilahemalá ke tau mo e kau Nīfaí.

18 Pea naʻe hoko ʻo pehē koeʻuhi ko e hulu ʻo e fekeʻikeʻí mo e lahi ʻo e faingataʻa ʻi he puleʻangá, kuo ʻikai ai te nau tuku ha kau leʻo feʻunga ʻi he fonua ko Seilahemalá; he kuo nau mahalo ʻe ʻikai loto-lahi ʻa e kau Leimaná ke hū mai ki loto ʻi honau ngaahi fonuá ke ʻohofi ʻa e fuʻu kolo lahi ko Seilahemalá.

19 Ka naʻe hoko ʻo pehē naʻe laka atu ʻa Kolianitomuli ʻo taki ʻene kau tau tokolahi ʻaupitó, ʻo nau ʻohofi ʻa e kakai ʻo e koló, pea koeʻuhi ko hono fuʻu vave fau ʻo ʻenau laká naʻe ʻikai lava ʻo maʻu ʻe he kau Nīfaí ha taimi feʻunga ke tānaki fakataha ʻenau ngaahi kau taú.

20 Ko ia naʻe tāmateʻi ʻe Kolianitomuli ʻa e kau leʻo ʻi he hūʻanga ʻo e koló, ʻo ne laka atu mo ʻene kau taú kotoa ki he loto koló, pea naʻa nau tāmateʻi ʻa e kakai kotoa pē naʻe fakafepakiʻi ʻa kinautolú, ʻo nau maʻu ai ʻa e koló kotoa.

21 Pea naʻe hoko ʻo pehē naʻe hola ʻa Peikumenai, ʻa ia ko e fakamaau lahí, mei he ʻao ʻo Kolianitomulí, ʻo aʻu ki he ngaahi ʻā ʻo e koló. Pea naʻe hoko ʻo pehē naʻe taaʻi ia ʻe Kolianitomuli ki he ʻaá, pea iku ʻo ne mate ai. Pea naʻe ʻosi pehē ʻa e ngaahi ʻaho ʻo Peikumenaí.

22 Pea ko ʻeni ʻi he vakai ʻa Kolianitomuli kuó ne maʻu ʻa e kolo ko Seilahemalá, ʻo ne vakai kuo hola ʻa e kau Nīfaí meiate kinautolú, pea kuo tō, mo puke, mo lī ʻa kinautolu ki he fale fakapōpulá, pea kuó ne maʻu ʻa e kolotau mālohi taha ʻi he fonua kotoá, naʻe toʻa ange ai hono lotó ʻo ne teuteu ke ʻalu atu ʻo tauʻi ʻa e fonuá kotoa.

23 Pea ko ʻeni naʻe ʻikai te ne nofo ʻi he fonua ko Seilahemalá, ka naʻá ne laka atu mo ha fuʻu kau tau tokolahi ki he kolo ko Mahú; he naʻá ne fakapapau ke ne ʻalu atu ʻo fakaʻataʻatā hono halá ʻaki ʻa e heletā, koeʻuhi ke ne lava ʻo maʻu ʻa e ngaahi potu tokelau ʻo e fonuá.

24 Pea, ʻi heʻene mahalo ko honau feituʻu mālohi tahá ko e loto fonuá, ko ia naʻá ne laka atu, ʻo ʻikai te ne tuku kiate kinautolu ha taimi ke fakatahatahaʻi ʻa kinautolu ʻi ha ngaahi falukunga kakai tokosiʻi; pea ʻi he founga ko iá naʻa nau ʻohofi ʻa kinautolu ʻo tā hifo ʻa kinautolu ki he kelekelé.

25 Kae vakai, naʻe hanga ʻe he laka ko ʻeni ʻa Kolianitomuli ki he loto fonuá ʻo tuku kia Molonaihā ha fuʻu faingamālie lahi kiate kinautolu, neongo ʻa e fuʻu tokolahi ʻo e kau Nīfai kuo tāmateʻí.

26 He vakai, naʻe mahalo ʻa Molonaihā ʻoku ʻikai loto-lahi ʻa e kau Leimaná ke hū ki he loto fonuá, ka te nau ʻohofi pē ʻa e ngaahi kolo takatakai ʻi he ngaahi ngataʻanga ʻo e fonuá ʻo hangē kuo nau fai ki muʻá; ko ia naʻe fekau ʻe Molonaihā ke leʻohi ʻe heʻenau ngaahi kau tau mālohí ʻa e ngaahi potu takatakai ʻi he ngaahi ngataʻanga fonuá.

27 Kae vakai, naʻe ʻikai ke ilifia ʻa e kau Leimaná ʻo hangē ko hono lotó, ka kuo nau hū mai ki he loto fonuá, pea kuo nau kapa ʻa e kolomuʻá ʻa ia ko e kolo ko Seilahemalá, pea naʻa nau lolotonga laka atu ʻi he ngaahi potu mahuʻinga taha ʻo e fonuá, ʻo tāmateʻi ʻa e kakaí ʻi ha fuʻu fakaʻauha lahi, ʻa e kakai tangata, mo e kakai fefine fakatouʻosi, mo e fānau, ʻo nau puke ʻa e ngaahi kolo lahi mo e ngaahi kolotau lahi.

28 Ka ʻi he ʻiloʻi ʻeni ʻe Molonaihaá, naʻá ne fekauʻi leva ke ʻalu atu ʻa Līhai mo ha kau tau ke ʻalu takai ʻo fakafetaulaki kiate kinautolu ʻi he teʻeki ai ke nau aʻu ki he fonua ko Mahú.

29 Pea naʻá ne fai pehē; pea naʻá ne fakafetaulaki kiate kinautolu ʻi he teʻeki ai ke nau aʻu ki he fonua ko Mahú, ʻo ne tauʻi ʻa kinautolu ʻo aʻu ki heʻenau kamata ke holomui ki he fonua ko Seilahemalá.

30 Pea naʻe hoko ʻo pehē naʻe fakafetaulaki mai ʻa Molonaihā ʻi heʻenau holomuí, ʻo ne tauʻi ʻa kinautolu, pea naʻe hoko ai ha tau naʻe fuʻu hulu ai ʻa e lilingi totó; ʻio, naʻe tō ʻa e fuʻu tokolahi, pea naʻe ʻiloʻi ʻi he kakai kuo toó ʻa ^aKolianitomuli.

31 Pea ko ʻeni, vakai, naʻe ʻikai lava ʻa e kau Leimaná ke holomui ki ha feituʻu ʻe taha, pe ki he tokelaú, pe ki he tongá, pe ki he hahaké, pe ki he hihifó, he naʻe ʻākilotoa ʻa kinautolu ʻe he kau Nīfaí ʻi he tafaʻaki kotoa pē.

32 Pea kuo pehē hono ʻave fakavavevave ʻe Kolianitomuli ʻa e kau Leimaná ki he lotolotonga ʻo e kau Nīfaí, ʻo nau moʻulaloa ai ki he mālohi ʻo e kau Nīfaí, pea naʻá ne tō ai mo ia, pea naʻe tukulolo ʻa e kau Leimaná ki he nima ʻo e kau Nīfaí.

33 Pea naʻe hoko ʻo pehē naʻe toe maʻu ʻe Molonaihā ʻa e kolo ko Seilahemalá, pea naʻá ne fekau ki he kau Leimana ʻa ia kuó ne puke pōpulá ke nau ʻalu atu mei he fonuá ʻi he melino.

34 Pea naʻe ʻosi pehē ʻa hono fāngofulu mā taha ʻo e taʻu ʻo e pule ʻa e kau fakamāú.