1. E teianei, te tata akaou nei au, ko Moronai, i taku akapapaanga. I na, no te au pupu muna a Akiti e tona au oa, i uritumuiaʼi te basileia o Omera e ratou.

2. Kua aroa maira te Atu ia Omera e tana au tamariki tamaroa e te au tamariki tamaine, ko tei kore i kimi i tona mateanga.

3. E kua akakite mai te Atu kia Omera na roto i te moemoea kia aere atu aia ki vao i taua enua ra, no reira kua aere atu a Omera e tona kopu tangata mei taua enua ra, e kua aere atura ratou i te au ra e manganui, e tae maira ki te tuaivi ra ko Simi, e aere atura ratou ki te ngai i mate ei te ngati Niphai ra, e mei te reira ngai i aere atura ki te pae itinga o te ra e tae atura ki te ngai i karangaia e, ko Abeloma, ki te pae taatai, e kua patia iora aia i tona puakapa ki reira, koia e tana au tamariki tamaroa e tana au tamariki tamaine, e tona ngutuare katoa, mari ra ko Iareta e tona iti tangata.

4. E kua akatinamouia iora a Iareta ei ariki ki runga i te iti tangata e te rima o te tangata kino e kua oronga atura aia i tana tamaine ei vaine na Akiti.

5. Kua titau akera a Akiti i te mateanga o tona metua ongai, e kua pati atura aia ia ratou tei taputou i te taputou a te aronga taito, e kua rauka mai ratou te upoko o tona metua ongai i tona noo anga ki runga i tona terono i te akaaere anga i tona iti tangata.

6. No te maata oki o te tupuanga o teia pupu kino e te muna, i kino ei te ngakau o te iti tangata katoatoa. no reira i tamateiaʼi a Iareta ki runga i tona ra terono, e kua tutara a Akiti ei mono iaia.

7. Kua vareae akera a Akiti i tana tamaiti, e kua titiri akera iaia ki roto i te are tapekaanga, e kua angaia rikiriki akera iaia e kua mate atu aia.

8. Kua riri akera te taeake o taua tangata ra tei mate. (Ko Nimara tona ingoa) ki tona metua tane ra, no te mea ta tona metua tane i rave ki tona ra taeake.

9. Kua akaputuputu akera a Nimara i tetai au tangata, oro ke atura ki vao i taua enua ra, e tae atura kia Omera ra, e kua noo ki reira.

10. Kua anau akera a Akiti i tetai au tamariki tamaroa, e kua peke ia ratou te ngakau o te iti tangata, no atu e, kua taputou ratou kiaia kia rave i te au tu kino katoa tana i inangaro ra.

11. Kua noinoi te iti tangata o Akiti i te puapinga mei ia Akiti i noinoi i te mana, no reira, kua taparu te au tamariki tamaroa a Akiti ia ratou i te moni, no reira i arataki keia atu e tetai pae maata o te tangata, e kua piri kia ratou.

12. Kua tamaki atura te au tamariki tamaroa a Akiti kia Akiti no tetai au mataiti e manganui, ae, kua tamaki ratou e kua pou te tangata katoatoa o te basileia ra, mari ra tetai au tangata e toru ngauru anake, e ko ratou tei oro ke atu ki te ngutuare o Omera ra.

13. No reira i oki akaou ei a Omera ki tona enua ipukarea.

14. Kua ruaine akera a Omera, e kua anau iora aia ia Emera i tona ruaine anga, e kua akatinamou aia ia Emera ei ariki ei mono nona.

15. E i muri ake i tona akatinamouanga ia Emera ei ariki, kua kite aia i te au i te enua ra e rua mataiti, e kua mate iora aia. Kua ope tona tuatau e kua ki tona au ra i te tumatetenga. Kua tutara akera a Emera ei mono iaia, aru rai aia i te aerenga o tona metua tane.

16. E kua akamata akaou te Atu i te apai ke atu i te taumaa ki runga i te enua, e kua puapinga akaou te ngutuare o Emera i tona tutaraanga, e e ono ngauru ma rua akera mataiti, kua tupu ratou ei iti tangata pakari e te apinga nui.

17. E maata to ratou au kai tuke ke, e ta ratou sitona, e te tirika, e te au tu kakau meitaki ra, e te auro, e te ario, e te au apinga memeitaki.

18. E te au tu puakatoro katoa ko te toa e te ua, e te mamoe, e te puaka, e te puakanio, e tetai au tu manu ke tei meitaki ei kai na te tangata.

19. E oroenua oki to ratou, e te atini, e te erepani, e te kureroma, e te kumoma, ei au manu puapinga no te tangata, e kua puapinga maata oki te erepani, e te kureroma, e te kumoma.

20. E kua na reira te Atu i te oronga anga i tona au akameitakianga ki runga i teia nei enua, ko te enua ïa tei tau roa atu i te au enua katoa i te meitaki, kua akaue mai oki aia e, ko te ka noo ki runga, ka noo ratou ki runga i te reira i te Atu, me kore ra, ka takoreia ratou kia tae mai te tuatau e tau ei ratou i te mate no ta ratou tuatua kino. Te na ko maira oki te Atu, ka riringi atu au i te ki o toku riri ki runga i te reira tu tangata.

21. Rave akera a Omera i te angaanga tau ma te tuatua tika kia ope roa i tona ra au ra. Anau iora tana tamariki tamaroa e te tamariki tamaine, e anau aia ia Korianetuma, akatinamou akera aia ia Korianetuma ei ariki ei mono iaia.

22. E i muri ake i tona akatinamouanga ia Korianetuma ei ariki ei mono iaia ra, kua noo akera aia e a mataiti, e kua kite aia i te au i te enua, ae, kua kite aia i te Tamaiti a te Tuatua Tika, e kua rekareka aia i tona au ra, e kua mate atura aia ma te au.

23. Kua aere atura a Korianetuma i te aerenga o tona metua, e patu akera aia i te au oire maata e manganui, e kua rave i te au mea meitaki no tona iti tangata e i tona au ra katoa. E kare ana tamariki e tae roa atu ki tona ruaine anga.

24. Kua mate roa akera tana vaine, e tai anere ma rua ona mataiti. Kua akaipoipo akera a Korianetuma i tetai vaine mapu i tona ruaineanga ra, e anau iora aia i te au tamariki tamaroa e te au tamariki tamaine, e kua ora oki aia e tae ua atu tona mataiti ki te anere e a ngauru ma rua.

25. Kua anau iora aia ia Koma, e kua tutara akera a Koma ei mono iaia, kua tutara akera aia e a ngauru ma iva mataiti. Anau iora aia ia Eta, e kua anau iora aia i tetai au tamariki tamaroa e te tamariki tamaine.

26. Tupu atura te iti tangata ki runga te au pae o te enua, e tupu akaou iora te tuatua kino i te enua ki te maata, e kua kimi akera a Eta i te au ravenga muna a te aronga taito kia mate i tona metua.

27. Kua rave akera aia i te terono o tona metua no te mea, kua tamate atura aia iaia ki tana uaorai koke, e kua tutara akera aia ei mono iaia.

28. Kua tae akaou maira te au peroveta ki te enua i te ako anga atu i te tataraara kia ratou, kia akateateamamao te mataara o te Atu e tikai, me kore ra, ka tae mai te taumaa ki runga i te enua, ae, ka rokoia ratou e te onge maata e ka mate ratou me kare ratou e tataraara.

29. Kare rai te iti tangata i akarongo ki te tuatua a te au peroveta, kua tuaru ratou ia ratou ki vao, e kua tuku ia ratou ki roto i te au vaarua, e kua akarukeia ratou kia mate ratou. E no te akaueanga a te Ariki ra a Eta i rave ei te iti tangata i teia au mea.

30. Kua tupu akera tetai onge ki runga i te enua, e te matemate ra te au tangata no taua onge ra, kare oki e ua ki runga i te enua.

31. E kua tae maira oki te ovi poitini ki runga i te enua, poitini akera te au tangata e manganui. E te oro ra to ratou au anana manu ki mua i taua au ovi nei te enua i te pae tonga, tei karangaia e te ngati Niphai ko Zarahemela.

32. Kua mate iora ratou e manganui i te aereanga, ina ra, kua tae atura tetai au anana manu ki te enua i te pae tonga.

33. Kua tāpū te Atu i te au ovi kia kore ratou e arumaki akaou ia ratou, kia arai ra i te mataara kia kore te tangata e aere atu, e ko te ka tamata kia aere atu e ka mate ratou i te ovi poitini.

34. Kua aru atura te au tangata i te mataara o te au manu ra. E kai iora ratou i te kopapa o te au manu tei mate i te pae mataara kia pou atura. Kia kite akera taua iti tangata ra, kua vaitata ratou i te mate, kua tataraara atura ratou i ta ratou au ara, ma te kapiki atura ki te Atu.

35. E kia akaaka akera to ratou ngakau ki mua i te Atu, e kua akatopa aia i te ua ki runga i te enua, e te meitaki akaou atura te iti tangata, e te tupu akaou akera te kai i te enua ki apatokerau e i te au pae ke o taua enua ra. Kua akakite maira te Atu i tona mana kia ratou i te akaoraanga ia ratou mei taua onge ra.