1. Kua akaue maira te Atu i te taeake o Iareta kia eke aia ki raro mei runga mai i te maunga, mei mua mai i te aroaro o te Atu ra, e kia tata i te au mea tana i kite ra, e kua tapiriia te reira kia kore e tae ki te tamariki a te tangata mari ra kia tae ki te tuatau e akateiteiiaʼi aia ki runga i te satauro, e no reira, kua akonoia te reira e te ariki ko Mosaia, kia kore te reira e tae ki to te ao nei, kia tae ki muri ake i te tuatau ka akakite mai te Mesia iaia uaorai ki tona au tangata.

2. E i muri ake te Mesia i akakite mai ei iaia uaorai ki tona au tangata, kua akaue mai aia kia akakiteia te reira.

3. E teianei, kua riro ratou katoa ei iti tangata akarongo kore, e kare oki e tangata mari ra ko te ngati Lamana e kua akaruke ratou i te evangelia a te Mesia, no reira, kua akaueia mai au kia uuna akaou i te reira ki raro i te one ra.

4. I na, kua tata au ki runga i teia au papa, i te au mea ta te taeake o Iareta i kite, kare e mea i akakiteia mai mei muatangana maira i tei maata ake i te au mea tei akakiteia mai ki te taeake o Iareta ra.

5. No reira, kua akaue mai te Atu kia tata au i te reira, e kua tataia te reira e au. E kua akaue mai aia kia tapiri au i te reira, e kua akaue katoa mai aia kia tapiri i te urianga o te reira. No reira kua topiri au i te uri reo, mei ta te Atu i akaue mai.

6. Kua tuatua mai oki te Atu kiaku ra, kare rai te reira e tae ki te Etene ra, mari ra kia tae roa atu ki te ra e tataraara ratou i ta ratou au tuatua kino, e ka riro ratou ei iti tangata ma ki mua i te Atu ra.

7. E te na ko maira te Atu, ei te ra e akarongo ei ratou iaku, mei te taeake o Iareta i akarongo iaku ra, kia riro ratou ei iti tangata ma i roto iaku, ei reira e akakite atu ei au i te au mea ta te taeake o Iareta i kite ra, e tae roa atu ki te akakite anga o taku au eeuanga. Te na ko maira oki a Iesu Mesia, te tamaiti a te Atua, te Metua o te rangi e te enua nei e te au mea katoa i roto ra.

8. E ko tei patoi atu i te tuatua a te Atu, kia taumaaia aia, e ko tei kore e akatika i teia nei au mea ra, kia taumaaia aia. E kare oki au i akakite atu i te mea maata ia ratou te na ko maira a Iesu Mesia, no te mea ko au rai tei tuatua.

9. E te akaue ra au, e kua veveteia te rangi e kua piri katoa, e te tuatua ra au, e ka ruru te enua, e te akaue ra au, e ka pou to te enua ra mei te mea ra e i roto i te ai.

10. E ko te ka kore e akarongo ki taku au tuatua kare katoa ratou e akarongo ki taku au pipi, e kia kore au e tuatua atu, na kotou e akava. Kia tae ra oki ki te ra openga ka kite kotou e, ko au ïa te tuatua nei.

11. Ko tei akarongo ra ki te au mea taku i tuatua atura, ka atoro au iaia i te au akakiteanga a toku vaerua, e ka kite aia e ka akakite atu oki aia i te reira. No toku Vaerua oki e kite ei aia e, e tuatua tika teia nei au mea, e ka aratakiia oki te tangata kia rave i te angaanga meitaki.

12. E ko te mea tei arataki i te tangata kia rave i te angaanga meitaki no roto atu ïa iaku; kare oki te mea meitaki i no roto atu i te au mea, mari ra noku anake. Ko au nei ko tei arataki i te tangata ki te au mea meitaki katoa ra, ko te ka kore e akarongo ki taku au tuatua, e kare katoa aia e irinaki iaku e, te vai nei au, e ko te ka kore e irinaki iaku, kare katoa ratou e irinaki ki te Metua tei tono mai iaku nei. I na oki, ko au te Metua, ko au te marama, ko au te ora, e ko au te tuatua mou o te ao nei.

13. E aere mai kiaku, e te au Etene e, e ka akakite atu au kia kotou i tetai au mea maata ake i teia nei au mea, no te akarongo kore i uunaiaʼi te kite i te reira.

14. E aere mai kiaku, e to Iseraela e, e ka akakiteia kia kotou i te au mea maata ta te Metua i akono mei te akatumuangaia mai o te ao nei, no kotou. E no te akarongo kore i kore ei i tae kia kotou na.

15. I na, kia vevete kotou i te arai o te akarongo kore i vai ei kotou i roto i ta kotou tuatua kino, e to kotou ngakau ketaketa, e to kotou manako poiri, ei reira e kite ei kotou i te au mea mamaata e te umere tei uunaia kia kore ïa e tae kia kotou mei te akatumuanga mai o teianei ao. Kia pure kotou ki te Metua i toku nei ingoa ma te ngakau maru e te vaerua akaaka, ei reira e kite ei kotou e, kua maara te Metua i te koreromoutu tana i papau ki to kotou ai tupuna ra, e te ngutuare o Iseraela.

16. Ei reira e akamataʼi teia nei au tuatua i eeuia ra taku i akaue i taku tavini ra ko Ioane kia tata i te akakiteia ki mua i te mata o te au tangata katoa ra. E maara, kia kite kotou i teia nei au mea, e kite ei kotou e, kua vaitata te tuatau e akakiteia i te reira.

17. No reira, kia tae teia nei papaanga tuatua kia kotou, ka kite kotou e, kua akamata te Metua i tana ra angaanga ki runga i te au enua pouroa.

18. No reira, e tataraara, e to te au enua katoa, e e aere mai kiaku nei, e e akarongo ki taku evangelia, e kia bapetizoia i toku ingoa, e ko tei akarongo e kua bapetizoia, ka ora ïa, ko tei kore ra e akarongo, ka akaapaia. E ka aru te au akairo ia ratou tei akarongo ki toku nei ingoa.

19. E ao to tei akarongo meitaki i toku ingoa i taua ra openga ra. E ka akateiteiia oki aia kia noo ki roto i te basileia i akapapaia nona mei te akatumuana mai o teianei ao. E i na, ko au ïa tei tuatua i te reira. Amene.