Scriptures
Etera 3


Pene 3

Te mangamanga rima o te Atu, Kua akaari mai tikai a Iesu Mesia iaia uaorai ki te taeake o Iareta i te vaerua. Te toka turama. Te uri reo. E papaanga tetai ka tae mai.

1. Ko te maata o taua au pai i maaniia ra, e varu ïa. Aere atura te taeake o Iareta ki te maunga i tuatuaia e, ko Silema, no tona teitei, e kua maani iora aia i te au toka meangiti e tai ngauru ma ono. E au toka ma e te teatea mei te io rai te tu. Kua apai akera aia ki roto i tona rima, ki runga i te maunga ra, e kua kapiki akaou atura ki te Atu, na ko atura,

2. E te Atu, kua tuatua mai koe e, ka takapiniia matou e te vai puke ra. I teianei, e te Atu, i na, auraka koe e riri i to tavini nei no tona tu paruparu i mua ia koe na; kua kite oki matou e, kua tapu oki koe e te noo nei koe ki te rangi, e kua tau kore oki matou i mua ia koe, e no te ingaanga kua kino to matou tu. Ina ra, e te Atu, kua oronga mai koe kia matou i te akaueanga kia kapiki matou kia koe kia rauka ia matou i ta matou i inangaro.

3. I na, e te Atu, kua akautunga mai koe ia matou no ta matou au tuatua kino, e kua tono atu koe ia matou, e kua noo matou i roto i te metepara i teia au mataiti e manganui, tera ra, kua aroa mai koe ia matou nei. E te Atu, akara mai koe iaku nei ma te aroa kia ariu ke toou riri i teia nei iti tangata noou, e auraka koe e akatika kia aere atu ratou na runga i te moana i te poiri, ina ra, akara mai na i teia nei au mea taku i maani no roto mai i te toka ra.

4. E kua kite au, e te Atu, tei ia koe i te mana katoatoa, e ka rauka ia koe i te rave i te au mea taau i inangaro i te rave no te meitaki o te tangata nei, no reira, e te Atu e, e akatukia mai toou rima i teia nei au toka, kia marama, e kia turama mai ia matou i roto i te au pai i ta matou i maani, kia noo matou ma te marama kia aere ei matou ki raro i te moana.

5. I na, e te Atu, ka rauka ia koe kia rave i teia. Kua kite matou e, ka rauka ia koe kia akakite mai i te mana maata ra, e mea iti ïa i te manako o te tangata nei.

6. E oti akera te taeake o Iareta i te tuatua atu i teia nei au tuatua, i na, kua tuku maira te Atu i tona rima, e kua akatukia tataki tai iora i te au toka i tona rima, e kua raveia iora te arai mei runga mai i te mata o te taeake o Iareta, kite atura i te mangamanga rima o te Atu, e mei te rima o te tangata nei tona tu, mei te kopapa kiko e te toto, inga iora te taeake o Iareta ki mua i te Atu, i rokoia oki aia i te mataku.

7. E kite akera te Atu i te taeake o Iareta tei inga ki raro ki runga i te one ra, e kua na ko maira te Atu kiaia, e tu, eaa koe i ingaʼi?

8. Kua na ko atura aia ki te Atu, kua kite au i te rima o te Atu, mataku iora au ko te papaia aea au, kare oki au i kite e, e kopapa kiko e te toto to te Atu ra.

9. E kua na ko maira te Atu kiaia, no toou akarongo i kite ei koe e, ka rave au i te kopapa kiko e te toto noku, e kare oki e tangata i aere mai ki mua iaku ma te akarongo maata e aite ki toou. Naringa kare, kare oki koe i kite i toku rima nei. E mea ke atu ainei taau i kite?

10. Kua na ko atura aia, kare, e te Atu, e akakite mai koe ia koe uaorai kiaku nei.

11. E kua na ko maira te Atu kiaia, e irinaki ainei koe i taku ka tuatua atu?

12. Na ko atura aia, ae, e te Atu, kua kite oki au e, e tuatua mou anake taau au tuatua, e Atua tuatua mou oki koe, e kare e rauka ia koe i te pikikaa.

13. E oti akera aia i te tuatua atu i taua au tuatua ra, i na, kua akakite maira te Atu iaia uaorai kiaia, e kua na ko maira aia, no te mea kua kite koe i teia nei au mea, kua ora koe mei te ingaanga, no reira ka akaoki akaouia koe ki mua i toku aroaro, no reira e akakite atu iaku uaorai kia koe na.

14. I na, ko au tei teateamamaoia mei te akatumuangaia mai o teianei ao kia akaora i toku ra au tangata. I na, ko au ko Iesu Mesia. Ko au te Metua e te Tamaiti. Tei roto iaku nei te marama no te au tangata katoa ra e tuatau ua atu. E ko ratou tei irinaki i toku nei ingoa, ka riro ratou ei tamariki tamaroa e ei tamariki tamaine naku.

15. kare au i akakite atu iaku uaorai ki te tangata taku i anga, no te mea kare e tangata i irinaki ana iaku kia aite mei ia koe na. Te kite ainei koe e, kua angaia koe i toku nei tu? Ae, i muatangana ra i angaia te au tangata katoatoa i toku uaorai tu.

16. I na, ko teia nei kopapa taau e akara nei, ko te kopapa ïa o toku vaerua, e kua anga oki au i te tangata i te tu o te kopapa o toku nei vaerua, e i te tu taau e kite mai nei iaku i te vaerua nei, koia katoa toku akaraanga kia tae atu au ki toku au tangata i te kopapa.

17. E teianei, mei taku i tuatua ana, kare e rauka iaku, ia Moronai, kia tata i te au tuatua katoa i tataia ra, no reira kua rava noku kia karanga e, kua akakite mai Iesu iaia uaorai ki teia nei tangata i te vaerua mei te tu ïa o te kopapa tana i akakite mai ki te ngati Niphai.

18. E kua matuapuru mai aia iaia mei tana i matuapuru mai i te ngati Niphai ra, e kua na reira aia kia kite i teia nei tangata e, ko te Atua aia, no te au angaanga maata e manganui ta te Atu i akakite maira kiaia ra.

19. E no te kite o teia nei tangata, kare e rauka kia tāpūia aia kia kore aia i tae ki roto i te arai e akara atu rai, e kua kite aia i te mangamanga rima o Iesu, e kia akara ra, kua inga iora aia ki raro ma te mataku, no te mea, kua kite aia e, no te Atu rai taua mangamanga rima ra. E kare akera tona e akarongo, no te mea e kite tona, e kare ona ekoko.

20. No reira, no te kite apakore i te Atua tei vai ki roto iaia, kare e rauka kia tapu iaia ki vao mai i te arai. No reira, kua kite aia ia Iesu, e kua akamatuapuru mai aia kiaia.

21. E kua tuatua maira te Atu ki te taeake o Iareta, na ko maira, i na, auraka koe e akatika kia tae teia au mea taau i kite e taau i akarongo ra ki to te ao nei, kia tae roa mai i te tuatau e akakakaʼi au i toku nei ingoa i te kiko ra, no reira e tāpū marie koe i teia au mea, auraka ra koe e akakite atu ki te tangata nei.

22. E i na, kia tae mai koe ki mua iaku, ka tata koe i te reira, e e tapiri koe i te reira kia kore e tangata e uri i te tuatua, ka tata koe i te reira i te reo tei kore e rauka ia ratou i te tatau.

23. E i na, ka oronga atu au i teia nga toka kia koe, e ka tapiri koe i te reira ma te au mea katoa taau i tata ra.

24. I na oki, ko te reo taau ka tata ra, kua akatukeia ïa e au, no reira i toku uaorai tuatau ka riro teia nei nga toka ei akamarama i taua au mea, taau i tata, ki te mata o te tangata.

25. E oti akera te Atu i te tuatua i teia nei au tuatua, kua akakite maira aia ki te taeake o Iareta i te tangata katoatoa o te ao nei, ko tei vai ana, e te vai nei a muri atu, kare aia i tapu iaia kia kore aia e kite i to te ao nei e tae roa atu ki te openga o te ao nei.

26. I tuatua ana oki aia kiaia i te au tuatau i mua ana e, kia irinaki aia iaia e, ka rauka iaia akakite mai i te au mea katoatoa, ka akakiteia kiaia. No reira, kare e rauka te Atu kia arai iaia kia kore aia e kite atu, kua kite oki aia e, ka rauka te Atu i te akakite mai i te au mea katoatoa kiaia.

27. Kua na ko maira te Atu kiaia, e tata i teia nei au mea, e e tapiri i te reira, e i toku uaorai tuatau e akakite atu ei au i te reira ki te tamariki a te tangata nei.

28. E kua akaue maira te Atu kia tapiri katoa aia i nga toka tei rauka iaia, e auraka e akakite atu, kia tae mai te tuatau e akakite atu ei te Atu i te reira ki te tamariki a te tangata nei.