1. E teianei, ka akaoti au ko Moronai i taku papaanga tuatua no runga i te akakoreanga o te iti tangata taku i tata ra.

2. I na oki, kua akaruke ratou i te au tuatua a Etera, kua akakite mai oki aia i te au mea katoatoa tei tupu mei muatangana o te tangata maira, kua akakite katoa oki e, kia ngaro atura te vai mei runga i teia nei enua, kua riro teianei enua ei enua tei tau roa atu i te au enua katoatoa i te meitaki, ei enua i ikiia e te Atua, no reira kua inangaro te Atua i te au tangata tei noo ki reira kia akamori iaia e kia angaanga nana ra.

3. Kua akakite katoa aia e, ko te ngai teia no te Ierusalema ou te ka tae mai mei te rangi maira, e ko te ngai tapu o te Atu.

4. I na, kua kite a Etera i te au ra o te Mesia, e kua tuatua aia no runga i tetai Ierusalema ou ki runga i teia enua nei.

5. Kua tuatua katoa aia no runga i te ngutuare o Iseraela, e te Ierusalema mei reira mai a Lihai, e ka akakoreia te reira e ka akatuakaouia ïa ei oire tapu no te Atu, no reira, kare ïa e Ierusalema ou, i te mea, i vai ana oki ïa i te tuatau taito ra, ka akatu akaouia ra, e ka riro ïa ei oire tapu no te Atu, e ka akatuia ïa no te ngutuare o Iseraela.

6. E ka akatuia tetai Ierusalema ou ki runga i teia nei enua, no te toenga o te uanga o Iosepha, e taipe oki te reira au mea ra.

7. Mei ta Iosepha oki i apai i tona metua ki te enua ra ki Aiphiti e kua mate iora aia ki reira, kua apai katoa maira te Atu i tetai toenga o te uanga o Iosepha mei te enua maira, mei Ierusalema, kia aroa tikai mai aia i te uanga o Iosepha kia kore ratou e mate, mei iaia i aroa mai ki te Metua o Iosepha kia kore aia e mate ra.

8. No reira ka akatuia tetai toenga o te uanga o Iosepha ki runga i teia nei enua, e ka riro ïa ei enua ipukarea no ratou, e ka akatu ratou i tetai oire tapu ki te Atu mei ia Ierusalema o te tuatau taito ra, e kare ratou e takinga kinoia, e kia tae mai te openga, ei reira e riro ke atu ei te enua.

9. E riro mai oki te rangi ou e tetai enua ou, e e aiteite te reira ki te mea taito, mari ra kua riro atu te mea taito e kua akaouia te au mea katoa.

10. Ei reira e tae mai ei te Ierusalema ou, e e ao to ratou tei noo ki roto ra, ko to ratou piriaro oki, kua teatea na roto mai i te toto o te Mamoe, ko ratou oki te ka tataia ki te toenga o te uanga o Iosepha, no te ngutuare ratou o Iseraela.

11. Ei reira ka tae mai ei oki te Ierusalema taito, e te au tangata o reira, e ao to ratou, kua oreiia oki ratou ki te toto o te Mamoe ra. Ko ratou oki tei akapueurikirikiia e tei akaputuputuia maira mei nga ope e a o te enua, e mei te enua i apatokerau maira, e tuanga oki ratou i te akatupuanga i te koreromotu ta te Atua i taputou ki to ratou metua ko Aberahama.

12. E kia tupu teia nei au mea, ka tupu te irava i tataia tei na ko maira e, te vai rai ratou no mua te ka riro ki muri e to muri te ka riro ki mua.

13. E kua vaitata au i te tata kia maata atu, tera ra, kare i akatikaia, e mea maata e te umere oki te au totouanga e Etera, kare ra ratou i akarongo e kua tuaru ratou iaia ki vao, e kua pipini iora aia i te va o te toka i te ao, e i te po aia i aere ei i te akara matariki i te au mea tei tupu ki te iti tangata ra.

14. E te noo ra aia i taua va toka ra, kua tata aia i te toenga o teia nei papaanga tuatua, i te akaraanga i te po i te au tumatetenga te ka tae mai ki runga i taua iti tangata ra.

15. E i taua mataiti ra i tuaruia aia ki vao no rotopu i te iti tangata, kua tupu tetai tamaki maata i rotopu i taua iti tangata ra, i tupu oki tetai au tangata ririnui e manganui, e te anoano ra ratou i te tamate ia Korianetuma na roto i ta ratou ravenga muna e te kino ra, ko tei tuatuaia i mua ana.

16. Kua apii a Korianetuma i te au tu angaanga no te tamaki e te au tu angaanga karape o to teianei ao, no reira kua tamaki atu aia ki tei anoano i te tamate iaia ra.

17. Kare rai aia i tataraara, kare katoa tana ra au tamariki tamaroa manea e te tamariki tamaine manea i tataraara. Kare katoa te au tamariki tamaroa manea e te au tamariki tamaine manea a Kohora, kare katoa te au tamariki tamaroa manea e te au tamariki tamaine a Korihora, e kare oki te au tamariki tamaroa manea e te au tamariki tamaine manea okotai i tataraara i ta ratou ra au ara.

18. No reira, e manganui tei mate i taua mataiti mua ra ka noo ei a Etera ki roto i te va toka ra, kua tamateia ratou e te koke a to reira au pupu muna tei tamaki kia Korianetuma kia rauka mai kia ratou te basileia ra.

19. Kua tamaki akera te au tamariki tamaroa a Korianetuma, e kua maringi to ratou toto.

20. I te rua o te mataiti, kua tae maira te tuatua a te Atu kia Etera, kia aere oki aia e kia totou atu kia Korianetuma, me tataraara aia e tona ngutuare katoa ka oronga akaou ia kiaia uaorai tona basileia e ka akaora ia te iti tangata.

21. Me kare ratou e akapera, ka akakoreia ratou e tona ngutuare katoa, mari ra koia anake, e ka ora anake aia kia kite atu i te tupuanga o te au totou i tuatuaia, no runga i tetai iti tangata ke te ka rave i taua enua ei ipukarea no ratou e na ratou e tanu iaia e ka tama-teia te au tangata katoatoa, mari ra ko Korianetnma anake.

22. Kare ra a Korianetuma i tataraara, kare katoa tona ra ngutuare, kare katoa te iti tangata. Kare oki te au tamaki i akamutu, e te tamata ra ratou i te ta ia Etera, kua oro ra aia mei rotopu ia ratou, e kua pipini akaou iora aia ki roto i te va o te toka.

23. Kua tae maira a Sareta, e kua tamaki maira kia Korianetuma, e kua autu rai aia, e i te toru o te mataiti i akatuikaaiaʼi aia ra.

24. E i te a o te mataiti kua pou a Sareta e te tamariki tamaroa a Korianetuma, e peke akaou iora te basileia ki to ratou metua ra.

25. Tupu akera te tamaki i te enua katoatoa, te tamaki ra te au tangata katoatoa e tona pupu vaeau, kia rauka mai iaia tana i inangaro ra.

26. E te vai ra tetai au tangata keia, e te au tu angaanga kino katoa ki runga i te enua.

27. Riri akera a Korianetuma kia Sareta, tamaki atura kiaia ma tona au nuku, e kua aravei akera raua ma te riri maata, kua aravei raua i te ō ko Kirikara, maata atura te tamaki anga.

28. Kua tamaki maira a Sareta kiaia i nga ra e toru, e autu akera a Korianetuma e arumaki atura iaia kia tae ki te enua atea ko Hetirani ra.

29. Tamaki akaou maira a Sareta kiaia ki runga i te enua atea ra, e i na, kua autu aia ia Korianetuma e kua tuaru aia ia Korianetuma ki taua ō ra ko Kirikara.

30. Tamaki akaou akera a Korianetuma kia Sareta i te ō ra ko Kirikara e kua mate akera a Sareta.

31. E kua puta akera to Korianetuma uā ia Sareta, e no reira kare aia i tamaki akaou e rua mataiti. Ei taua tuatau ra, te akamaringi toto ra te iti tangata katoa ki runga i te enua e kare oki e tangata kia arai ia ratou.