1 Oh met ngehi, Moronai, ntingihdier mahsen kan me poahngokieng ie, nin duwen ei tamataman; oh I ndahiong kumwail soahng kan me I katengepenehr; eri kumwail dehr medewe doahke pwe kumwail en kawehwehda; pwe e sohte mweimwei ong kumwail, ihte ahnsou me e pahn sang ni eripit en Koht.

2 Oh kilang, e pahn wia kapai ong kowe ni omw pahn kasalehiong pileit kan ong irail me pahn sewese doadoahk wet en pweida;

3 Oh e pahn kasansalohng meh silimen sang ni manaman en Koht; eri irail pahn ese ni mehlel me mepwukat mehlel.

4 Oh sang nan ewen sounkadehde silimen mepwukat pahn kohwei; oh kadehdehn meh silimeno, oh doadoahk wet, me pahn kasalehda manaman en Koht oh pil sapwellime mahsen, me Sahmo oh Sapwellimeo, oh Ngehn Sarawi kin kadehdehki—oh mehkan koaros pahn wia ehu kadehde me pahn uhwong sampah ni imwin rahno.

5 Oh ma irail pahn koluhla oh kohdo rehn Sahmo ni mwaren Sises, irail pahn alahlda nan wehin Koht.

6 Oh met, kumwail tenekih ma I sohte ahneki mweimwei ong mepwukat; pwe kumwail udahn pahn ese me I ahneki mweimwei ahnsou me kumwail pahn kilang ie, oh kitail pahn uh mwohn Koht ni imwin rahno. Ahmen.