Guruy Ni 4
Moroni e ni chiyliy ngakʼ ni nge chaʼariy fapi yol rokʼ fare moʼon ni walagen Jared—Dab ni dag nge yaeni madaʼ ko ngiyalʼ ni bay e mich ko gidiiʼ ni boed fare moʼon ni walagen Jared—Kristus e chiyliy ko gidiiʼ ni nge michaenʼraed ko pi thin Rokʼ nge thin Rokʼ pi gachalpen—Gidiiʼ e ni chiyliy ngoraed ni ngar kalgaed ngaenʼraed, ma nge michaenʼraed ko fare gospel, me yog ni ngar thap gaed.
1 Ere fare Somoel e chiyliy ngakʼ fare moʼon ni walagen Jared ni nge sul nga butʼ ko fare burey nge chuw ko gin bay Somoel riy, me yoloey e pinʼen ni ke guy; mab mathngeluwol ni nge thap nga paʼ e gidiiʼ nge madaʼ nga tomuren e ngiyalʼ ni kan tining ngalang u kuruth; ere arayfan ni chaʼariy fare pilung i Mosiah e pinnʼem, ni nga dabi thap ko gidiiʼ u fayleng nge madaʼ nga tomuren ni ke mʼug Kristus ngakʼ e gidiiʼ rokʼ.
2 Ma tomuren ni ke mʼug Kristus ngakʼ e pi gidiiʼ rokʼ me chiyliy ni ngan dag e pinnʼem.
3 Ere chiney, tomuren e ngiyalʼ nem, ma yaed gubin nra malog gaed ko mich; ma dariy beeʼ ni magaey ma kemus ni fapi Lamanites, ma kar feked yathin fare gospel rokʼ Kristus; ere kan chiyliy ngog ni nggu mithaeg e pinnʼem bayay nga fithikʼ e butʼ.
4 Musap gaed, kug yoloey nga dakean e pi yungi plate ney e pinʼen ni guy fare moʼon ni walagen Jared; ma dariy bingyalʼ innʼen ni kan dag boech banʼen ni aram fini felʼ ni boed boech e tin ni kan dag ngakʼ fare moʼon ni walagen Jared.
5 Ere fare Somoel e ke chiyliy ngog ni nggu yoloey e pinnʼem; ere kug yoloey. Ma ke chiyliy ngog ni nggu mithaeg e pinnʼem; ma ki chiyliy ngog ni ngkug mithaeg mamaʼen e piliyeg thin ni bay riy, ni boed rogon e motochiyel rokʼ Somoel.
6 Ya fare Somoel e gaʼar ngog: Pinnʼem e dabi thap ngakʼ fapi Gentiles nge madaʼ ko re rran ni kar kalgaed ngaenʼraed ko denen roraed, ma kar beʼech gaed u pʼoewchen Somoel.
7 Ma lan e re rran nem e ngar muruwel gaed ko mich roraed ngog, ni yoeg fare Somoel, ni boed ni rinʼ fare moʼon ni walagen Jared, ni nge yog ni ngar beʼech gaed rog, ma arame bay gudag ngoraed e pinʼen ni guy fare moʼon ni walagen Jared, ni boed ni kug radag ngoraed gubin e pi yiʼiy rog, ni yoeg Yesus Kristus, ni fachaʼ ni Fak Got, ni fare Chitamangin e tharmiy nge fayleng, nge gubin banʼen ni bay riy.
8 Ma enra togopluw ko fare thin rokʼ Somoel, e yira gechig nag; ma enra fek yathin e pinnʼey, e yira gechig nag; ya ireram e piʼin ni dab gudag ngoraed e tin nib felʼ banʼen, ni yoeg Yesus Kristus; ya gag ir ni gube non.
9 Ma dakean e thin rog ni gura yoeg me mab e tharmiy maki maen; ma dakean e thin rog me rurrur e fayleng; ma dakean e thin rog ni gura yoeg me yimʼ e gidiiʼ riy, ni aram rogon ko nifiy.
10 Ma chaʼ ni dar mich u waenʼ e pi thin rog e dabi mich u waenʼ ngakʼ pi gachalpeg; ma thingar mu guyed ko gag e gube non fa dangay; ya gimed ranang ni gag e gube non ko bin tomur e rran.
11 Machane enra michaenʼ ko pinnʼey ni kugog, e ireram e chaʼ ni gura mʼug ngakʼ u dakean e pi thogthog ko Kan ni Thothup rog, me nang me chaʼariy babyoren. Ya bachan fare Kan ni Thothup rog me nang riy ni pinnʼey e ba riyulʼ; ya ra pingegaenʼ e gidiiʼ ngar rinʼed e tin nib felʼ.
12 Ma renʼen nra pingegaenʼ e gidiiʼ ngar rinʼed e tin nib felʼ e yib rog; ya tin nib felʼ e dariy beeʼ ni ma yib rokʼ ma kemus ni gag. Gag faʼanem ni ma wawliy e gidiiʼ ko gubin e tin nib felʼ; enra dabi michaenʼ ko pi thin rog e dabi michaenʼ ngog—ni gag; ma enra dabi michaenʼ ngog e dabi michaenʼ ngakʼ e en Chitamangiy niʼir e piiʼeg nggub. Ya musap gaed, I gag fare Chitamangiy, I gag fare tamilang, nge fare yafos nge riyulʼ ko fayleng.
13 Mired ngog, O gimed e pi Gentiles, mug dag ngomed e tin nib felʼ banʼen, fare llowaenʼ ni kan mithaeg ni bachan e mich ni dariy.
14 Mired ngog, O gimed e pi gidiiʼ ku Israel, ma bay ni dag ngomed rogon e pinʼen ni rib felʼ ni ke falʼeg e en Chitamangiy ni fan ngomed, aram u napʼan nni sunmiy e fayleng; ma dawor ni dag ngomed ni bachan e mich ni dariy.
15 Musap gaed, napʼan ni gimed ra chuweg farengi lumor nibe inge lem romed niʼir e be taymed u fithikʼ e dodow romed ko kireb, ma be ʼelʼel nag gumʼirchaʼmed, ma be maʼew nag laniyaenʼmed, ma arame pinʼen nib felʼ mab poloʼ falʼngin ni kan mithaeg romed aram u napʼan nni sunmiy e fayleng—arragon, napʼan ni bay mu pininged e en Chitamangiy u fithingag, u fithikʼ e mʼingaenʼ nge kalngaenʼ, ma arame bay mu nanged ni fachaʼ ni Chitamangiy e kumnang fare mʼag ni tay ngakʼ e pi chitamangmed, O gimed e pi gidiiʼ ku Israel.
16 Ma arame pi yiʼiy rog niʼir e gguy rogon ni nge yoloey fare tapigpig rog i John e bayi mab nga awchen gubin e gidiiʼ. Mu tayed u wunʼmed, u napʼan ni gimed ra guy e pinnʼey, ma gimed nang ni fare ngiyalʼ innʼem e ke yib ni bayi mʼug e pi yiʼiy nem u dakean e ngongol.
17 Ere, napʼan ni bayi thap e re chep ney ngomed ma ngam nanged ni fare muruwel rokʼ e en Chitamangiy e ke tabab u dakean gaʼangin yang e fayleng.
18 Ere, mu kalgaed ngaenʼmed ni gimed gubin e gidiiʼ ni gimed bay ko tin tomur e rran u fayleng, mi gimed yib ngog, ma nge michaenʼmed ko gospel rog, min tawfe nagmed u fithingag; ya enra michaenʼ min tawfe nag e ra thap; machane enra dabi michaenʼ e ra gafgow; ma fapi pow e ra leak e piʼin nib michaenʼraed nga fithingag.
19 Ma rib felʼ waʼathan e chaʼ ni yira pirʼeg nib yulʼyulʼ nga fithingag ko bin tomur e rran, ya yira chibiy ngalang ni nge paer u lan fare gilʼilungun nni falʼeg ni fan ngakʼ aram u napʼan nni sunmiy e fayleng. Ma musap gaed igag e chaʼ ni kug weliy e pinnʼey. Amen.