Pi Chep nib Thothup
Ether 14


Guruy Ni 14

Pi denen ko gidiiʼ e yib nag e wol ni kireb nga dakean fare nam—Coriantumr e ki og nag e mael ngakʼ Gilead, nge migid Lib, nge migid Shiz—Rachaʼ nge ldoew e suguy dakean fare nam.

1 Ere chiney yibi tabab ba wol ni kireb nga dakean gaʼangin yang fare nam ni bachan e denen ko fapi gidiiʼ, niʼir e, faʼanra theyʼ beeʼ talin e muruwel rokʼ ara sayden rokʼ nga doew e rungrung, ara gin ni ma chaʼar riy, ma musap gaed, ra yaeni rebo rran riy, ma dabki pirʼeg, ere wol ni kireb e rib noemow ni ke ʼaw nga dakean fare nam.

2 Ere gubin e gidiiʼ me chichiʼiy paʼ ko tirokʼ banʼen, ma dabi maen ara piiʼ banʼen ku beeʼ; ma gubin e gidiiʼ make tay koelingin e sayden rokʼ u baʼani matʼaw i paʼ, nibe matangiy e chugum rokʼ nge yafos rokʼ nge leʼengin nge bitir rokʼ.

3 Ere chiney, e tomuren lʼagruw e duw, nge tomuren e yamʼ ni ke tay Shared, musap gaed, me yib beeʼ nib moʼon ni walagen Shared nge yibi og nag e mael ngakʼ Coriantumr, niʼir e gel Coriantumr riy ngakʼ me tuluf nga wuruʼ e binaw nu Akish.

4 Me yibi buch ni fare moʼon ni walagen Shared e ki og nag e mael ngakʼ u lan wuruʼ e binaw nu Akish; ere mael ntay e rib ubchiyaʼ, ma bukun e biyuʼ e piʼin ra mʼaed ko sayden.

5 Me yibi buch ni Coriantumr e longbiy farengi wuruʼ e binaw; ma fare moʼon ni walagen Shared e yaen nge chuw u lan wuruʼ fare binaw ni ke nepʼ, nge liiʼ boech ko fapi salthaw ku Coriantumr, u napʼan ni yaed ba chingnag.

6 Me yib iyib ko fare binaw nu Moron, nge yibi tay ir ko fare gilʼelung ku Coriantumr.

7 Me yibi buch ni Coriantumr e paer ko salthaw rokʼ u lan wuruʼ e binaw u lan lʼagruw e duw, ma ri yoʼor e salthaw rokʼ.

8 Chiney e fare moʼon ni walagen Shared, ni fithingan e Gilead, e ki yoʼor e salthaw rokʼ, ni bachan fapi ulung nib miith.

9 Me yibi buch ni pi tolang ko priest rokʼ e ra thanged e fan rokʼ u napʼan nib paer nga butʼ u gilʼelungunʼ.

10 Me yibi buch ni beeʼ u reb fapi ulung nib miith e thang e fan rokʼ u bangi banʼen nib miith, me mang ire paer ko fare gilʼelung; ma fithingan e Lib; ma Lib e beeʼ nib moʼon nib famsow, u fithikʼ gubin fapi gidiiʼ.

11 Me yibi buch nu lan e bin taʼareb e duw ko lung rokʼ Lib, me yib Coriantumr ko fare binaw nu Moron, nge og nag e mael ngakʼ Lib.

12 Me yibi buch ni ra cham gow Lib, ni arame toey Lib paʼ nge madʼad ngay; machane, fare ulung i salthaw ku Coriantumr e ra piiʼed iyaen nga mʼon ngakʼ Lib, ni arame miil nge yaen ko mathil u dappʼelʼay.

13 Me yibi buch ni Coriantumr e leak iyaen; me og nag Lib e mael ngakʼ u dappʼelʼay.

14 Me yibi buch ni Lib e gel ko fapi salthaw rokʼ Coriantumr, ni arame ra miil gaed bayay ko fare wuruʼ e binaw nu Akish.

15 Me yibi buch ni Lib e leak iyaen nge madaʼ ko ngiyalʼ ni ke taw ko raed nu Agosh. Ma Coriantumr e ke fek gubin e gidiiʼ ngar uned ngakʼ u napʼan ni ke miil rokʼ Lib iyaen nga lan e ginem e nam niʼir e ke miil ngay.

16 Ma napʼan ni ke taw ko raed nu Agosh me og nag e mael ngakʼ Lib, me liiʼ nge madaʼ ko ngiyalʼ ni ke yimʼ; machane, bay beeʼ nib moʼon ni walagen Lib ni yib ngakʼ Coriantumr ni ke yinʼ luwan, ere mael ntay e rib ubchiyaʼ, ni arame miil Coriantumr bayay ko salthaw rokʼ fare moʼon ni walagen Lib.

17 Chiney e fithingan fare moʼon ni walagen Lib e Shiz. Me yibi buch ni Shiz e leak Coriantumr, me gel nga bukun e binaw, me liiʼ e ppin nge bitir, me urufiy e pi binaw nem.

18 Me yaen madguwan Shiz u gaʼangin yang fare nam; arragon, me wer thiin Shiz u gaʼangin yang fare nam—Miniʼ e rayog ni nge togopluw ko salthaw rokʼ Shiz? Musap gaed, be thirif e gidiiʼ u butʼ!

19 Me yibi buch ni fapi gidiiʼ e ra tabab gaed ko moʼolung nga taʼabang ni yu ulung i salthaw, u dakean gaʼangin yang fare nam.

20 Mar kiiʼ gaed u butʼ; nge miil boech iyaed nge mang ko fapi salthaw rokʼ Shiz, me miil boech iyaed nge mang ko salthaw rokʼ Coriantumr.

21 Ma rib gel mab nʼuw napʼan e mael ntay, ere rib nʼuw napʼan e puʼoeg e rachaʼ nge wup ldoew, ni arame fare nam ni poloʼ e tharey ldoewen e gidiiʼ ni ke yimʼ.

22 Ere fare mael e rib papay mab gur ni arame dakuriy beeʼ ni magaey ni nge kʼeyag e pi ldoew, ya yaed be yaen u reb e mael nga reb, ni yaed be pag ldoewen e pumoʼon, nge ppin, nge bitir nib garar u dakean fare nam, ni nge longuy e faklʼud.

23 Me madaʼ boen e meal riy u dakean fare nam, ni gaʼangin yang fare nam; ere fapi gidiiʼ e ra magawon gaed ni rran nge nepʼ, ni bachan boen e mel.

24 Machane, Shiz e de tal i lʼoelʼoeg Coriantumr; ya ke michmicheg rokʼ ni nge fulweg ngakʼ Coriantumr falbiyen i rachaʼen walagen, ni kan liiʼ ngemʼ, nge fare thin rokʼ Somoel ni yib ngakʼ Ether ni Coriantumr e dabi yimʼ ko sayden.

25 Ere aray rogon ni kad guyed ni fare Somoel e gechig nagraed u fithikʼ e damomuw rokʼ ni poloʼ, ma pi ngongol roraed ni kireb nge pi denen roraed e ke yarmiy rogon ba kanawoʼ ni fan ko gafgow roraed ni dabimus biʼid.

26 Me yibi buch ni Shiz e lʼoelʼoeg Coriantumr iyaen nib sor ko ngek, iyaen nge madaʼ ko mathil u dappʼelʼay, mu roem e og nag e mael riy ngakʼ Shiz u lan dalip e rran.

27 Ere rib gel e gafgow ni aw nga fithikʼ fapi salthaw rokʼ Shiz ni arame tabab fapi gidiiʼ ko murus, ma arame ra tabab gaed ko miil rokʼ fapi salthaw rokʼ Coriantumr; mar miil gaed iyaen ko fare binaw nu Corihor, mar liiʼed e gidiiʼ riy, gubin e piʼin ni dabra manged ngoraed.

28 Mar nʼufed e pi tent roraed u lan fare loway nu Corihor; ma Coriantumr e nʼuf e pi tent rokʼ u lan fare loway nu Shurr. Chiney e fare loway nu Shurr e ba chugur ko farengi falang ni Comnor; ere, Coriantumr e kunuy e salthaw rokʼ nga taʼabang nga dakean farengi falang nu Comnor, me thoey ba rappa nga dakean fapi salthaw rokʼ Shiz nibe piningraed ni ngar baed ngan mael.

29 Me yibi buch ni arame rabaed, machane kun suruy raed bayay; ma kur baed ko yan lʼagruw yay, ma kun suruy raed ko yan lʼagruw yay. Me yibi buch ni kur baed bayay ko yan dalip yay, min mael ni rib ubchiyaʼ.

30 Me yibi buch ni Shiz e madʼad ngakʼ Coriantumr nib toʼaer e yungin ni ke thʼaeb u doew; ere Coriantumr, e thig nga butʼ ni bachan e rachaʼ u doew ni ke yaen, ere ni chibiy ngan fek iyaen ni gowa ke yimʼ.

31 Chiney e pumoʼon, nge ppin, nge bitir ni ke yimʼ ko ruw rabaʼ i gidiiʼ e rib yoʼor ni arame Shiz e chiyliy ngakʼ e gidiiʼ rokʼ ni dab kur lʼoelʼoeged fapi salthaw rokʼ Coriantumr; ere, ra suloed ko tamagif roraed.