Guruy Ni 11
Pi mael, pi wagagaey, nge ngongol ni kireb e gagyeg nag e yafos ko fapi Jaredites—Pi profet e roeged nga mʼon e mogothgoth ni poloʼ ni bayi aw ko fapi Jaredites ma kemus ni faʼan yaedra kalngaenʼ—Fapi gidiiʼ e rafeked yathin e thin ko fapi profet.
1 Ma arame kiyib bukun e profet u lan e pi rran rokʼ Com, ngar prophesy niged e mogothgoth nra yibi aw ko fapi gidiiʼ ma kemus ni faʼan yaedra kalngaenʼ, mar chel gaed ngakʼ Somoel, mar paged e mathang pogofan nge pi ngongol ni kireb.
2 Me yibi buch ni fapi gidiiʼ e rafeked yathin fapi profet, mar miil gaed ngakʼ Com ni nge ayuwegraed, ya fapi gidiiʼ e ra gayed rogon ni ngar liiʼed raed.
3 Mar prophesy niged boʼor banʼen ngakʼ Com; min tawaʼath nag u lan gubin e tin ni ke magaey ko pi rran rokʼ.
4 Me paer nge mos fini pilibthir, me yibi diyen ni Shiblom; ere Shiblom e yinʼ luwan ko lung. Ma bay beeʼ nib moʼon ni walagen Shiblom ni togopluw ngakʼ, ma arame tabab ba mael nib gaaʼ u gaʼangin yang fare nam.
5 Me yibi buch ni fare moʼon ni walagen Shiblom e yoeg ni gubin fapi profet ni kar prophesy niged e mogothgoth ko fapi gidiiʼ e thingar nliiʼraed ngar mʼaed;
6 Ma arame awe gafgow nga dakean gaʼangin yang fare nam, ya kar micheged ni bay yib ba wol ni kireb nga dakean fare nam, ma kura aw nga dakean fapi gidiiʼ, ma bayi aw ba mogothgoth nib gaaʼ nga fithikʼraed, ni dariy reb ni ke buch bingyalʼ ni aram rogon u dakean e fayleng, ma pi yil roraed e ra suguy dakean fare nam, ma dabi buch ni faʼan yaedra kalngaenʼ ko pi denen roraed.
7 Ma dar motoyil gaed ko thin rokʼ Somoel, ni bachan e pi ulung roraed ni kireb nib miith; ere yibi tabab e mael nge togopluw u lan gaʼangin yang fare nam, ma ku aram rogon ni yoʼor e uyngol nge mʼar ni ubchiyaʼ, ni arame aw ba gafgow nib gaaʼ, ni dariy reb bingyalʼ ni yimnang morngaʼagen ni aram rogon u dakean e fayleng; Ma gubin e pinnʼey e yib u lan gubin e pi rran rokʼ Shiblom.
8 Ere fapi gidiiʼ e ra tabab gaed ko kalngaenʼ ko pi denen roraed; ma nʼumngin i napʼan ni ra kalgaed ngaenʼraed me wurengaenʼ Somoel ngoraed.
9 Me yibi buch ni Shiblom e nliiʼ nge yimʼ, ere ni fek Seth nga kalbus, me paer nib kalbus u lan gubin e pi rran rokʼ.
10 Me yibi buch ni Ahah, nib pagael ni fak, e paer ko lung; me gagyeg ko lung nga dakean fapi gidiiʼ u gubin e pi rran rokʼ. Me rinʼ gubin mite denen u lan e pi rran rokʼ, niʼir e tabolngin nag e puʼoeg rachaʼ nib yoʼor; ma rib lich e pi rran rokʼ.
11 Ma Ethem, ni gidiiʼ rokʼ Ahah, e paer ko fare gilʼelung; nge kuʼir e ki rinʼ e tin nib kireb u lan e pi rran rokʼ.
12 Me yibi buch nu lan e pi rran rokʼ Ethem me yib bogi profet nib yoʼor, ngar prophesy gaed bayay ngakʼ fapi gidiiʼ; arragon, ra prophesy gaed ni fare Somoel e ra gatheayraed ni poloʼ ngar chuw gaed u dakean e fayleng, ma kemus ni faʼan yaedra kalngaenʼ ko pi denen roraed.
13 Me yibi buch ni fapi gidiiʼ e ra ʼelʼel niged gumʼirchaʼraed, ma dar motoyil gaed ko thin roraed; ere fapi profet e kirbaenʼ raed mar chuw gaed ko fapi gidiiʼ.
14 Me yibi buch ni Ethem e gagyeg nag e pufthin u fithikʼ e kireb u lan gubin e pi rran rokʼ; me yibi diyen ni Moron. Me yibi buch ni Moron e yinʼ luwan ko lung; nge Moron e rinʼ e tin nib kireb u mit Somoel.
15 Me yibi buch ni sum e wagaey nga fithikʼ fapi gidiiʼ, ni bachan e fare ulung nib miith nni sunmiy ni nge gel lungun me felʼ rogon; me yibi mʼug beeʼ nib moʼon u fithikʼraed nib almarin ko kireb, me yib nag e mael ngakʼ Moron, niʼir e gel riy nge fek barbaʼ fare lung; me paer rokʼ e baʼanem e lung ni bukun e duw.
16 Me yibi buch ni gel Moron ngakʼ, me sulweg fare lung bayay.
17 Me yibi buch niki yibi mʼug beeʼ nib moʼon nib yargael, ma beeʼ ni gidiiʼ rokʼ fare moʼon ni walagen Jared.
18 Me yibi buch ni gel ngakʼ Moron me fek fare gilʼelung; ere, Moron e paer nga kalbus ko gubin e tin ni ke magaey ko pi rran rokʼ; me yibi diyen ni Coriantor.
19 Me yibi buch ni Coriantor e paer nib kalbus u gubin e pi rran rokʼ.
20 Ma lan e pi rran rokʼ Coriantor e ki yib e profet riy nib yoʼor, ngar prophesy niged bogi banʼen nib felʼ mab poloʼ falʼngin, ma roeged ko fapi gidiiʼ ni ngar kalgaed ngaenʼraed, ma faʼanra dabra kalgaed ngaenʼraed ma fare Somoel ni Got e ra gagyeg nag e gechig nib togopluw ngoraed nra gatheayraed ni poloʼ;
21 Ma kur yiʼiy niged ni fare Somoel ni Got e ra piiʼ nge yib ara rafek iyib boech e gidiiʼ ni ngar pired ko re nam nem, u gelingin, ni boed rogon ni fek e pi chitamangraed iyib.
22 Ere ra feked yathin gubin e thin ko fapi profet, ni bachan fare ulung roraed nib miith nge pi ngongol roraed nib kireb.
23 Me yibi buch ni Coriantor e diyen ni Ether, me yibi yimʼ, ni ke paer nib kalbus u lan gubin e pi rran rokʼ.