Fare Babyor ku Ether

1 Ere chiney e gag, Moroni, e nggu tabab i piiʼ bbabyor ni morngaʼagen fapi gidiiʼ ni kakrom nra gechig gaed nga paʼ Somoel u dakean e baʼani leluʼoch e re nam ney.

2 Ma gufek e birog e chep ko fare riliwʼ nge aningeg yang i plates niʼir e pirʼeg fapi gidiiʼ ku Limhi, ni kanoeg ni fare ke Babyor ku Ether.

3 Ere bachan e gube lemnag ni tin mʼon ko re chep ney, ni be weliy morngaʼagen rogon nni sunmiy e fayleng, nge ku rogon nni sunmiy Adam, nge ba chep ni bay riy ni morngaʼagen e tin ni buch ko re ngiyalʼ innʼem iyib nga madaʼ nga napʼan fare wulyang ni gaaʼ, nge gubin e pinʼen ni buch u fithikʼ e gidiiʼ nge yibi madaʼ ko ngiyalʼ innʼem, e ke thap nga fithikʼ fapi Jews—

4 Ere dab guyoloey e tin baʼaram banʼen ni buch ko pi rran rokʼ Adam nge yaeni madaʼ ko ngiyalʼ nem; ya kan yoloey nga dakean fapi yungi plate; ma enra pirʼeg e pinnʼem, e ireram e enra yib gelingin ni nge yog ni nge fek fare chep ni poloʼ.

5 Machane musap gaed, dab gu piiʼ fare chep ni poloʼ, ya kemus ni bang riy e nggu piiʼ, ni aram ko ngiyalʼ ntoey fare wulyang nge yibi madaʼ ko ngiyalʼ ni kan gatheayraed.

6 Ere baʼaray rogon ni nggu piiʼ fare chep. Chaʼ ni yoloey e re chep ney e Ether, ni gidiiʼen Coriantor.

7 Coriantor e ba pagael ni fak Moron.

8 Me Moron e ba pagael ni fak Ethem.

9 Me Ethem e ba pagael ni fak Ahah.

10 Me Ahah e ba pagael ni fak Seth.

11 Me Seth e ba pagael ni fak Shiblon.

12 Me Shiblon e ba pagael ni fak Com.

13 Me Com e ba pagael ni fak Coriantum.

14 Me Coriantum e ba pagael ni fak Amnigaddah.

15 Me Amnigaddah e ba pagael ni fak Aaron.

16 Me Aaron e gidiiʼen Heth, ni beeʼ nib pagael ni fak Hearthom.

17 Me Hearthom e ba pagael ni fak Lib.

18 Me Lib e ba pagael ni fak Kish.

19 Me Kish e ba pagael ni fak Corom.

20 Me Corom e ba pagael ni fak Levi.

21 Me Levi e ba pagael ni fak Kim.

22 Me Kim e ba pagael ni fak Morianton.

23 Me Morianton e gidiiʼen i Riplakish.

24 Me Riplakish e ba pagael ni fak Shez.

25 Me Shez e ba pagael ni fak Heth.

26 Me Heth e ba pagael ni fak Com.

27 Me Com e ba pagael ni fak Coriantum.

28 Me Coriantum e ba pagael ni fak Emer.

29 Me Emer e ba pagael ni fak Omer.

30 Me Omer e ba pagael ni fak Shule.

31 Me Shule e ba pagael ni fak Kib.

32 Me Kib e ba pagael ni fak Orihah, ni beeʼ nib pagael ni fak Jared;

33 Ni fare Jared ni yib ngaray ni yow beeʼ nib moʼon ni walagen nge pi chon e tabinaew rorow, nge ku boech e gidiiʼ nge pi chon e tabinaew roraed, ko fare wulyang ni gaaʼ, ko fare ngiyalʼ innʼem ni athkuy Somoel e thin ko fapi gidiiʼ, me micheg u fithikʼ e damomuw rokʼ ni yaedra garar u dakean gaʼangin yang e fayleng; me garar e gidiiʼ ni boed rogon e thin ni yoeg Somoel.

34 Ma fare moʼon ni walagen Jared e bachan e beeʼ nib moʼon nib gaaʼ mab yargael, ma beeʼ nib moʼon nib tʼuf rokʼ Somoel, e Jared ni walagen, e gaʼar ngakʼ: Mu meybil ngakʼ Somoel, ni nge siyi athkuy laniyaenʼdaed ni nga dab dannged fan e thin rodaed.

35 Me yibi buch ni walagen Jared e meybil ngakʼ Somoel, me runguy Somoel Jared; ere de athkuy e thin rokʼ Jared; ere Jared nge walagen e de athkuy laniyaenʼ row.

36 Ma arame gaʼar Jared ngakʼ walagen: Mu meybil bayay ngakʼ Somoel, ni gomanga yog ni nge chefeg e damomuw rokʼ nga orel rokʼ e piʼin fager rodaed, ni nge siyi athkuy e thin roraed.

37 Me yibi buch ni walagen Jared e meybil ngakʼ Somoel, me runguy Somoel e pi fager roraed nge pi chon e tabinaew roraed, ma de athkuy laniyaenʼraed.

38 Me yibi buch ni Jared e non bayay ngakʼ walagen, ni gaʼar: Mman ngam fith Somoel ko ra chuweg daed u dakean e giney nam fa dangay, ma faʼanra chuweg daed u dakean e giney e nam, ma ngam fith ngakʼ ko uw e ngad sor gaed ngay. Ma miniiʼ e manang ya sana Somoel e ra fek daed iyaen nga lan rebo nam nib melʼeg u fithikʼ gubin e pi nam u fayleng? Ma faʼanra rinʼ ni aram rogon, ma ngad yulʼyulʼ gaed ngakʼ Somoel, ni nge yog ni yog ngodaed ngad tafnayed.

39 Me yibi buch ni walagen Jared e meybil ngakʼ Somoel ni rogon e pinʼen ni ke weliy Jared.

40 Me yibi buch ni fare Somoel e motoyil ngakʼ walagen Jared, me runguy, me gaʼar ngakʼ:

41 Mman ngam kunuy nga taʼabang e pi gamanman rom, nib ppin nge pumoʼon, ni gubin mit; nge awoch ko waʼamngin nu fayleng ni gubin mit; nge pi chon e tabinaew rom; nge ku aram rogon ngakʼ Jared ni walagem nge tabinaew rokʼ; nge ku aram rogon ngakʼ e pi tafagear rom nge pi chon e tabinaew roraed, nge pi tafagear rokʼ Jared nge pi chon e tabinaew roraed.

42 Ma napʼan ni kam rinʼ e tiney me gur e ngam powiʼiyraed iyaen nga lan fare loway ni bay nga leluʼoch. Mu roem e bay gu madaʼ nigem riy, ma bay gu powiʼiyem nga lan ba nam niʼir e ba nam nib melʼeg u fithikʼ gubin e pi nam u fayleng.

43 Mu roem e gin ni bay gu tawaʼath nigem nge pifakam riy, ma bay gu sunmiy rokʼ pifakam, nge pifak walagem, nge piʼin ni bay ra uned ngom, ba nam nib gaaʼ. Ma dariy beeʼ nib gaaʼ ko fare nam ni gu ra sunmiy rokʼ pifakam ni fan ngog, u dakean gaʼangin yang e fayleng. Ere aray rogon ni bay gurinʼ ngom ni bachan e ke aray nʼumngin i napʼan ni kam yoer ngog.