1 Ut kik’ulman naq chirix naq laj Koriantumr ki’usa rik’in xtoch’olal, ki’ok chi jultiko’k re li ^aaatin kixye chaq laj Eter re.

2 Kiril naq ak ke’kamsiik chaq xb’aan yok’leb’ ch’iich’ ka’ch’in chik ma wiib’ mil chi mil xkomon lix tenamit, ut ki’ok chi raho’k sa’ xch’ool; relik chi yaal, ke’kamsiik chaq wiib’ mil chi mil li winq kaweb’ xmetz’ew, ut jo’kaneb’ ajwi’ li rixaqil ut eb’ lix kok’al.

3 A’an ki’ok chixjalb’al xk’a’uxl chirix li maa’usilal kixb’aanu chaq, ut ki’ok chi jultiko’k re li aatin li yeeb’il chaq xb’aan xtz’uumaleb’ re chixjunil li profeet, ut kiril, naq toj aran kitz’aqlok ru li junjunq raqal; ut kiyaab’ak li raam, ut ink’a’ kiru chi k’ojob’aak xch’ool.

4 Ut kik’ulman naq kixtz’iib’a jun li hu rik’in laj Xiz, ut kixtz’aama chiru naq tixkol xyu’ameb’ li tenamit, ut a’an tixq’axtesi li awa’b’ejihom, choq’ re lix yu’ameb’ li tenamit.

5 Ut kik’ulman naq chirix naq laj Xiz kixk’ul lix hu, kixtz’iib’a jun li hu rik’in laj Koriantumr, naq wi a’an tixq’axtesi rib’, re taaruuq tixkamsi rik’in tz’aqal lix yok’leb’ ch’iich’, tixkol xyu’ameb’ li tenamit.

6 Ut kik’ulman naq eb’ li tenamit moko ke’xjal ta xk’a’uxl chirix lix maa’usilaleb’; ut eb’ lix tenamit laj Koriantumr ke’eek’asiik sa’ josq’il rik’in lix tenamit laj Xiz, ut lix tenamit laj Xiz ke’eek’asiik sa’ josq’il rik’in lix tenamit laj Koriantumr, jo’kan naq lix tenamit laj Xiz ke’xpleeti lix tenamit laj Koriantumr.

7 Ut naq kiril laj Koriantumr naq ok re chi t’ane’k, ki’eelelik wi’chik chiru lix tenamit laj Xiz.

8 Ut kik’ulman naq kiwulak sa’ li ha’ Ripliankum, ut chi k’utb’il xyaalalil li aatin, a’an nim ru, malaj li naq’axok ru chixjunil; jo’kan ut, naq ke’wulak sa’ li ha’ a’an ke’xyiib’eb’ lix muheb’aal t’ikr; ut laj Xiz kixyiib’eb’ ajwi’ lix muheb’aal t’ikr chi nach’ rik’in; ut chi jo’kan wulajaq chik ke’wulak chi pleetik.

9 Ut kik’ulman naq ke’xpleeti jun pleet numtajenaq xrahil, sa’ li kitoch’e’ wi’chik laj Koriantumr, ut kilukta xb’aan xlajik xkik’el.

10 Ut kik’ulman naq li teep aj pleet re laj Koriantumr ke’xtiikisi rib’ sa’ xb’een li teep aj pleet re laj Xiz, jo’kan naq ke’xq’axeb’ ru, jo’kan naq ke’xmineb’ ru chi eelelik chiruheb’; ut ke’eelelik sa’ xjayal lix tz’e li saq’e, ut ke’xyiib’eb’ lix muheb’aal t’ikr sa’ jun na’ajej Ogat yeeb’il re.

11 Ut kik’ulman naq li teep aj pleet re laj Koriantumr ke’xyiib’eb’ lix muheb’aal t’ikr chixk’atq li tzuul Ramah; ut a’an ajwi’ li tzuul a’an b’ar wi’ lin yuwa’ aj Mormon ^akixmuq chaq li tz’iib’anb’il esil choq’ re li Qaawa’, li wankeb’ xloq’al.

12 Ut kik’ulman naq ke’xch’utub’ chixjunil li tenamit chiru chaq chixjunil lix b’een li ch’och’, li ink’a’ ke’kamsiik chaq, ka’ajwi’ laj Eter ink’a’.

13 Ut kik’ulman naq laj Eter kiril chixjunil lix b’aanuhomeb’ li tenamit; ut kiril naq eb’ li tenamit li neke’k’ulub’ank re laj Koriantumr ke’ch’utub’aak rik’in lix teepal aj pleet laj Koriantumr; ut eb’ li tenamit li neke’k’ulub’ank re laj Xiz ke’ch’utub’aak rik’in lix teepal aj pleet laj Xiz.

14 Jo’kan naq chiru xnumik kaahib’ chihab’ ke’wan chixch’utub’ankil li tenamit, re naq te’xk’ul chixjunileb’ li wankeb’ chiru lix b’een li ch’och’, ut re naq taaruuq te’xk’ul chixjunil li kawilal li kiru chiruheb’ xk’ulb’al.

15 Ut kik’ulman naq chirix naq ch’utub’anb’ileb’ chixjunil, li junjunq sa’ li teep aj pleet li b’arwan naraj, rochb’eeneb’ li rixaqileb’ ut lix kok’aleb’—li winq, jo’ ajwi’ li ixq ut kok’al chi kawresinb’il rik’in k’anjeleb’aal re pleet, chi wankeb’ xramleb’, ut ^axramb’al ru xch’ooleb’, ut xramb’al xjolomeb’, ut tiqtookeb’ jo’ na’ux choq’ re li pleet—koxe’b’eeq chixk’ulb’al rib’eb’ sa’ pleet, ut ke’pleetik chiru chixjunil li kutan a’an, ut ink’a’ ke’numta.

16 Ut naq ki’ok q’ojyin kik’ulman naq tawajenaqeb’, ut ke’sutq’i sa’eb’ li na’ajej k’ojk’o wi’ lix teepeb’; ut chirix naq ke’sutq’i sa’eb’ li na’ajej k’ojk’o wi’ lix teepeb’ ke’ok chixjapb’aleb’ re ut chi ayaynak xb’aan xsachikeb’ li ani kamsinb’il re lix tenamiteb’; ut k’a’jo’ xnimal lix yaab’eb’, lix q’ichb’aleb’ re ut li ayaynak reheb’, jo’kan naq ke’xchoqi li iq’ chi numtajenaq.

17 Ut kik’ulman naq wulajaq chik xkoheb’ wi’chik chi pleetik, ut nim ut xuwajel li kutan a’an; a’b’anan moko ke’numta ta, ut naq ki’ok q’ojyin ke’xchoqi wi’chik li iq’ rik’in xyaab’eb’, ut xjapb’aleb’ li re, ut li yaab’ak, xb’aan xsachikeb’ li ani kamsinb’il re lix tenamiteb’.

18 Ut kik’ulman naq laj Koriantumr kixtz’iib’a wi’chik jun li hu rik’in laj Xiz, kixtz’aama naq ink’a’ chik taachalq chi pleetik, naq tixk’ul b’an li awa’b’ejihom, ut tixkol xyu’ameb’ li tenamit.

19 A’b’anan k’ehomaq reetal, lix Musiq’ li Qaawa’ ak kixkanab’ xyalb’al xq’e rik’ineb’, ut laj ^aSatanas kiwan tz’aqal xwankil sa’ xb’een lix ch’ooleb’ li tenamit; xb’aan naq eb’ a’an ak xq’axtesihomeb’ rib’ chiru lix kawileb’ li raam, ut lix mutz’ileb’ lix k’a’uxl, re naq taaruuq te’sache’q; jo’kan naq xkoheb’ wi’chik chi pleetik.

20 Ut kik’ulman naq ke’pleetik chixjunil li kutan a’an, ut naq ki’ok q’ojyin ke’war sa’ xb’eeneb’ lix yok’leb’ ch’iich’.

21 Ut wulajaq chik ke’pleetik toj reetal ajwi’ naq ki’ok q’ojyin.

22 Ut naq ki’ok q’ojyin ke’wan chi ^akalajenaq rik’in josq’il, jo’ chanru ajwi’ junaq winq li kalajenaq rik’in viin, ut ke’war wi’chik sa’ xb’eeneb’ lix yok’leb’ ch’iich’.

23 Ut wulajaq chik ke’pleetik wi’chik; ut naq ki’ok q’ojyin ak t’anenaqeb’ chixjunil xb’aan li yok’leb’ ch’iich’, ka’ajwi’ kab’laju roxk’aal reheb’ lix tenamit laj Koriantumr, ut b’eleeb’ xkaak’al reheb’ lix tenamit laj Xiz ink’a’.

24 Ut kik’ulman naq ke’war sa’ xb’eeneb’ lix yok’leb’ ch’iich’ sa’ li q’ojyin a’an, ut wulajaq chik ke’pleetik wi’chik, ut ke’xyal ru rik’in xnimaleb’ xmetz’ew, rik’in lix yok’leb’ ch’iich’ ut lix ramleb’, chixjunil li kutan a’an.

25 Ut naq ki’ok q’ojyin ke’wan kab’laju xka’k’aal re lix tenamit laj Xiz, ut wuqub’ xka’k’aal reheb’ lix tenamit laj Koriantumr.

26 Ut kik’ulman naq ke’wa’ak ut ke’war, ut ke’xkawresi rib’ choq’ re li kamk sa’ li kutan jun chik. Ut a’aneb’ ninqi winq ut kaweb’ xmetz’ew jo’ chanru xmetz’eweb’ li winq.

27 Ut kik’ulman naq ke’pleetik chiru xnumik oxib’ hoonal, ut ke’lukta xb’aan xlajik xkik’eleb’.

28 Ut kik’ulman naq chirix naq eb’ lix winq laj Koriantumr ke’chal tz’aqal xmetz’eweb’ re ke’ru chi b’eek, okeb’ raj re chi eelelik re xkolb’al xyu’ameb’; a’b’an k’ehomaq reetal, kiwakli laj Xiz, ut jo’kaneb’ ajwi’ lix winqilal, ut kixxaqab’ aatin sa’ xjosq’il naq tixkamsi laj Koriantumr, malaj ut taa’oso’q xb’aan li yok’leb’ ch’iich’.

29 Jo’kan naq kixtaaqeheb’, ut wulajaq chik kixtaweb’; ut ke’pleetik wi’chik rik’in li yok’leb’ ch’iich’. Ut kik’ulman naq chirix naq ^ake’t’ane’ chixjunileb’ xb’aan li yok’leb’ ch’iich’, ka’ajwi’ laj Koriantumr ut laj Xiz ink’a’, k’ehomaq reetal naq luktajenaq laj Xiz xb’aan xlajik xkik’el.

30 Ut kik’ulman naq chirix naq laj Koriantumr kiranab’ rib’ chiru lix yok’leb’ ch’iich’, re kihilan b’ayaq, kixch’ot chaq xjolom laj Xiz.

31 Ut kik’ulman naq chirix naq kixch’ot chaq xjolom laj Xiz, naq laj Xiz kixwaklesi rib’ rik’in ruq’ ut kit’ane’; ut chirix naq kijiq’an xmusiq’, kikam.

32 Ut kik’ulman naq laj ^aKoriantumr kit’ane’ chi ch’och’, ut ki’ok chi chanchan naq maak’a’ xyu’am.

33 Ut li Qaawa’ kiraatina laj Eter, ut kixye re: Ayu. Ut xko’o, ut kiril naq li raatin li Qaawa’ kitz’aqlok chaq ru chixjunil; ut kixchoy li ^aesil kixtz’iib’a (ut moko kintz’iib’a ta yal ta jun miin raqal) ut kixmuq re naq kitawe’ xb’aan lix tenamit laj Limhi.

34 Anajwan li aatin tz’iib’anb’il sa’ roso’jik xb’aan laj ^aEter a’an a’in: Wi taaraj li Qaawa’ naq taajaltesiiq lin junxaqalil, malaj wi tinnumsi sa’ li tz’ejwalej li k’a’ru naraj li Qaawa’, maak’a’ na’ajman wi’, wi na’ux naq kolb’ilin sa’ li rawa’b’ejihom li Dios. Amen.