1 Ut anajwan ki’ok chi wank jun nimla ^amajewank sa’ xb’een chixjunil li ch’och’ xb’aan lix maa’usilal li tenamit, ut xb’aan a’an, wi junaq winq kixk’ojob’ lix k’anjeleb’aal malaj lix yok’leb’ ch’iich’ sa’ xb’een lix k’uuleb’aal che’, malaj sa’ li na’ajej b’ar tixk’uula wi’, k’ehomaq reetal, wulajaq chik ink’a’ naru chixtawb’al, xb’aan naq k’a’jo’ xnimal li majewank wan sa’ xb’een li ch’och’.

2 Jo’kan naq li junjunq chi winq naxchap rib’ chiru li k’a’ru re, rik’in li ruq’, ut ink’a’ nato’nin, chi moko nak’ehok chi to’ninb’il; ut li junjunq chi winq chapcho roq lix yok’leb’ ch’iich’ sa’ xnim uq’, re xkolb’al rix li k’a’ru re, ut lix yu’am, jo’ ajwi’ xyu’ameb’ li rixaqil ut lix kok’al.

3 Anajwan ut, chirix xnumik wiib’ chihab’, ut chirix xkamik laj Xared, k’ehomaq reetal, kiwakli li riitz’in laj Xared ut a’an kixpleeti laj Koriantumr, ut sa’ a’an laj Koriantumr kixq’ax ru ut kixtaaqe toj sa’ li yamyookil ch’och’ re Akix.

4 Ut kik’ulman naq li riitz’in laj Xared kixpleeti sa’ li yamyookil ch’och’ re Akix, ut kiniman xrahil li pleet chi numtajenaq, ut k’iila mil ke’t’ane’ xb’aan li yok’leb’ ch’iich’.

5 Ut kik’ulman naq laj Koriantumr kixram xsutam li yamyookil ch’och’, ut li riitz’in laj Xared kib’eek chaq sa’ li yamyookil ch’och’ chi q’eq, ut kixkamsi jun raqal lix teep aj pleet laj Koriantumr, naq kalajenaqeb’.

6 Ut xko’o sa’ li ch’och’ Moron, ut kixk’ojob’ rib’ sa’ lix k’ojarib’aal laj Koriantumr.

7 Ut kik’ulman naq laj Koriantumr kiwan rochb’een lix teep aj pleet sa’ li yamyookil ch’och’ chiru xnumik wiib’ chihab’, ut chiru a’ chihab’ a’an kixk’ul xnimal li metz’ew choq’ re lix teep aj pleet.

8 Anajwan li riitz’in laj Xared, a’an laj Gilead xk’ab’a’, kixk’ul ajwi’ xnimal li metz’ew choq’ re lix teep aj pleet, sa’ xk’ab’a’eb’ li muqmuukil molam.

9 Ut kik’ulman naq li taqenaqil aj tij chiru kixkamsi a’an naq k’ojk’o sa’ xb’een lix k’ojarib’aal.

10 Ut kik’ulman naq jun xkomoneb’ li muqmuukil molam kixkamsi a’an sa’ jun muqmuukil b’e, ut kixtaw choq’ re xjunes li awa’b’ejihom, ut a’an aj Lib xk’ab’a’; ut laj Lib a’an jun winq nim xxaqam, numenaq chiru yalaq ani chik chi winq sa’ xyanq chixjunil li tenamit.

11 Ut kik’ulman naq sa’ li xb’een xchihab’ laj Lib, kitaqe’ laj Koriantumr sa’ li ch’och’ Moron, ut kixpleeti laj Lib.

12 Ut kik’ulman naq kixyal ru rik’in laj Lib, ut sa’ a’an laj Lib kixsak’ chiru lix tel jo’kan naq toch’enaq kikana; a’b’anan li teep aj pleet re laj Koriantumr kixtiikisi rib’ sa’ xb’een laj Lib, jo’kan naq ki’eelelik sa’eb’ li nub’aal chire palaw.

13 Ut kik’ulman naq laj Koriantumr kixtaaqe; ut laj Lib kixpleeti chire li palaw.

14 Ut kik’ulman naq laj Lib kixsak’ li teep aj pleet re laj Koriantumr, jo’kan naq ke’eelelik wi’chik sa’ li yamyookil ch’och’ re Akix.

15 Ut kik’ulman naq laj Lib kixtaaqe toj reetal naq kiwulak sa’ li helhookil ch’och’ Agox. Ut laj Koriantumr kixk’am chixjunil li tenamit chirix naq ki’eelelik chiru laj Lib sa’ li jun raqal chi ch’och’ b’ar ki’eelelik wi’.

16 Ut naq kiwulak sa’ li helhookil ch’och’ Agox kixpleeti laj Lib, ut kisak’ok chiru toj reetal naq kikam; a’b’anan li riitz’in laj Lib kichal sa’ xb’een laj Koriantumr ruuchil a’an, ut kiniman xrahil li pleet chi numtajenaq, sa’ li ki’eelelik wi’ laj Koriantumr wi’chik chiru li teep aj pleet re li riitz’in laj Lib.

17 Anajwan lix k’ab’a’ li riitz’in laj Lib aj Xiz nayeeman re. Ut kik’ulman naq laj Xiz kixtaaqe laj Koriantumr, ut kinumta sa’ xb’een k’iila tenamit, ut kixkamsi li ixq jo’ ajwi’ li kok’al, ut kixk’ateb’ li tenamit.

18 Ut kiwulak jun xiw chirix laj Xiz chiru chixjunil li ch’och’; relik chi yaal, ki’ab’iman jun xyaab’ kuxej chiru li ch’och’—Ani naru chi xaqliik chiru li teep aj pleet re laj Xiz? K’ehomaq reetal, naxmesu li ch’och’ chiru!

19 Ut kik’ulman naq eb’ li tenamit ke’ok chixmolk’ankil rib’ sa’ teep aj pleet, chiru chixjunil lix b’een li ch’och’.

20 Ut ke’wan chi jachjookeb’ ru; ut jun raqal reheb’ ke’eelelik rik’in li teep aj pleet re laj Xiz, ut jun raqal ke’eelelik rik’in li teep aj pleet re laj Koriantumr.

21 Ut k’a’jo’ xnimal ut xb’ayik li pleet, ut k’a’jo’ xk’ihal li kutan kik’utun wi’ li hoyok kik’ ut li kamsink-ib’, jo’kan naq chixjunil lix b’een li ch’och’ nujenaq rik’in ^axtib’eleb’ li kamenaq.

22 Ut k’a’jo’ xseeb’al ut xjunpaatil li pleet, jo’kan naq maajun kikana chixmuqb’aleb’ li kamenaq; koxe’b’eeq b’an sa’ li junjunq chi hoyok kik’, ut ke’xkanab’ lix tib’eleb’ li winq, li ixq, ut li kok’al chi hirho chiru lix b’een li ch’och’, re te’tiwe’q xb’aan ^axmotz’o’il li tib’elej.

23 Ut lix chuhil kipukan chiru lix b’een li ch’och’, sa’ chixjunil ajwi’ lix b’een li ch’och’; jo’kan naq eb’ li tenamit ke’ch’i’ch’i’iik chi kutan ut chi q’eq, xb’aan xchuhil.

24 A’b’anan laj Xiz ink’a’ kixkanab’ xtaaqenkil laj Koriantumr, xb’aan naq kixxaqab’ chaq aatin naq taareeqaju sa’ xb’een laj Koriantumr lix kik’el li ras, li kikamsiik chaq, ut reeqaj li raatin li Qaawa’ li kichal rik’in laj Eter naq ink’a’ taat’ane’q laj Koriantumr xb’aan li yok’leb’ ch’iich’.

25 Ut chi jo’kan naqil naq li Qaawa’ kirula’aniheb’ sa’ xtz’aqalil lix josq’il, ut lix maa’usilaleb’ ut lix tz’eqb’eetalileb’ kixkawresi li b’e choq’ re lix sachlijikeb’ chi junajwa.

26 Ut kik’ulman naq laj Xiz kixtaaqe laj Koriantumr sa’ xjayal li releb’aal saq’e, toj sa’eb’ li nub’aal chire li palaw, ut aran kixpleeti laj Xiz chiru xnumik oxib’ kutan.

27 Ut q’axal xuwajel li sache’k sa’ xyanqeb’ li teep aj pleet re laj Xiz, jo’kan naq ke’ok wi’chik chi xuwak li tenamit, ut ke’ok chi eelelik chaq chiru li teep aj pleet re laj Koriantumr; ut ke’eelelik toj sa’ li ch’och’ Korihor, ut ke’xmesu chaq chiruheb’ li ani wankeb’ aran, chixjunileb’ li ink’a’ te’xjunaji rib’ rik’ineb’.

28 Ut ke’xyiib’ lix muheb’aal t’ikr sa’ li ru taq’a Korihor; ut laj Koriantumr kixyiib’eb’ lix muheb’aal t’ikr sa’ li ru taq’a Xurr. Anajwan li ru taq’a Xurr nach’ wan rik’in li tzuul Komnor; jo’kan naq laj Koriantumr kixch’utub’eb’ lix teep aj pleet sa’ xb’een li tzuul Komnor, ut kixyaab’asi li trompeet chiru li teep aj pleet re laj Xiz re xb’oqb’aleb’ sa’ li pleet.

29 Ut kik’ulman naq ke’k’ulun, a’b’an ke’alinasiik wi’chik; ut ke’chal wi’chik xkab’ sut, ut ke’alinasiik wi’chik xkab’ sut. Ut kik’ulman naq ke’chal wi’chik rox sut, ut kiniman xrahil li pleet chi numtajenaq.

30 Ut kik’ulman naq laj Xiz kisak’ok chiru laj Koriantumr jo’kan naq kixk’e k’iila chamal toch’olal re; ut laj Koriantumr, xb’aan xlajik lix kik’el, kilukta, ut kik’ame’ chaq aran chanchan naq kamenaq.

31 Anajwan k’a’jo’ xnimal lix sachikeb’ li winq, li ixq ut kok’al chi ka’pak’al, jo’kan naq laj Xiz kixtaqla lix tenamit naq ink’a’ te’xtaaqe li teep aj pleet re laj Koriantumr; jo’kan naq ke’sutq’i sa’ li na’ajej k’ojk’ookeb’ wi’.