1 Ne biakalua ne bonsu bavua babenga kumvuila mêyi a Helamana ne bana babu, bakadisangisha bua kuluisha bana babu.

2 Ne mpindiewu monayi, bakafîka tshiji menamena, mua ne bavua bangata dipangadika dia kubashipa.

3 Mpindiewu mulombodi wa bavua bafîkila bana babu tshiji uvua muntu munena ne wa makanda; ne dîna dienda divua Amalikia.

4 Ne Amalikia uvua ujinga bua kuikala mfumu; ne bantu abu bavua bafîka tshiji bavua bajinga kabidi ne ikala mfumu wabu; ne tshitupa tshinena tshiabu tshivua tshia balumbuluishi bashadila ba bulaba, ne bavua bakeba bukalenga.

5 Ne Amalikia wakalobesha ku lubombu luenda, ne bu bobu bua kumukuatshisha ne kumushikika bua kuikala mfumu wabu neabateka bakôkeshi pa bantu.

6 Nanku bakapambuishibua kudi Amalikia ku matapuluka, nansha muvuaku diyisha dia Helamana ne bana babu bayisha, eyowa, nansha bua bukubi bunena menamena buabu kudi ekelezia, bualu bavua bakuidi banena ku mutu kua ekelezia.

7 Ne kuvua ba bungi mu ekelezia bavua bitabuja miaku ya lubombu ya Amalikia, bua nanku bakatapuluka ku ekelezia; ne nanku malu a bantu ba Nefi ka’avua mashindama to ne avua ne njiwu, nansha bua ditshimuna diabu dinena divuabu bapeta pa mutu pa Bena Lamana, ne masanka abu manena avuabu bapeta bua dipatuishibua diabu kudi tshianza tshia Mukalenga.

8 Nanku tudi tumona bu mudilu lunena lukasa ludi bana ba bantu bua kupua moyo Mukalenga Nzambi wabu, eyowa, bu mudilu lunena lukasa lua kuenza malu mabi, ne kupambuishibua kudi muena bubi.

9 Eyowa, ne tudi tumona kabidi bubi bunena budi muntu mubi menamena umua mua kufikisha munkatshi mua bana ba bantu.

10 Eyowa, tudi tumona ne Amalikia, bualu uvua muntu wa budimu ne muntu wa mêyi a bungi a lubombu, wakapambuisha mitshima ya bantu ba bungi bua kuenza bubi; eyowa, ne bua kukeba bua kunyangakaja ekelezia wa Nzambi, ne bua kunyangakaja tshishimikidi tshia budishikaminyi buvua Nzambi mubapesha, anyi dibenesha dina divua Nzambi mutuma pa mpala wa bulaba bua bimpa bia bakana.

11 Ne mpindiewu biakalua ne pakumvua Moloni, uvua muikala komanda munena wa misumba ya basalayi ya Bena Nefi, matapuluka â, wakafîkila Amalikia tshiji.

12 Ne biakalua ne wakapanda tshilamba tshienda; ne wakangata tshipesa tshiatshi, ne wakafundapu ne—Bua divuluka dia Nzambi wetu, ntendelelu wetu, ne budishikaminyi buetu, ne ditalala dietu, bakaji betu, ne bana betu—ne wakatshisuika ku lusongu lua mutshi.

13 Ne wakasuika tshifulu tshienda tshia mvita, ne tshibuikilu tshienda tshia pa tshiadi, ne ngabu yenda, ne wakadisuika biluilu bienda ku tshimonu tshienda; ne wakangata mutshi uvua ne tshilamba tshienda tshipanda ku lusongu luawu, (ne wakawinyika ne mukanda wa budishikaminyi) ne wakinama panshi pa buloba, ne wakasambila Nzambi wenda ne bukitu bua mabenesha a budishikaminyi atudila pa mutu pa bana babu, diba dionsu dikala tshisumbu tshia Bena Kilisto tshishala bua kuasa mu bulaba—

14 Bualu nanku ki muvua bitabuji balelela ba Kilisto, bavua ba mu ekelezia wa Nzambi, babikidibua kudi bavua kabayi ba mu ekelezia to.

15 Ne bavua mu ekelezia bavua ne lulamatu; eyowa, bonsu bavua bikala bitabuji balelela ba mu Kilisto bakadiangatshila, ne disanka, dîna dia Kilisto, anyi Bena Kilisto bu muvuabu bababikila, bua ditabuja diabu kudi Kilisto walua.

16 Ne bua nanku, diba adi, Moloni wakasambila ne tshiena bualu tshia Bena Kilisto, ne budishikaminyi bua mu bulaba bikala binangibua.

17 Ne biakalua ne pakitshikijaye anyima wenda kudi Nzambi, wakinyika bulaba bonsu buvua ku sude kua bulaba ne Kabutu, eyowa, ne mu tshikosu, bulaba bonsu, bonsu ku node ne ku sude—Bulaba busungula, ne bulaba bua budishikaminyi.

18 Ne wakamba ne: Bushuwa Nzambi kakulekela ne tuetu, badi bapetula bualu tudi tuangata dîna dia Kilisto pa mitu yetu, tudiatshîbua ne tubutuka, tô ne patuatshituala pa mitu yetu ne disambuka dia mikenji dietu nkayetu.

19 Ne pakamba Moloni mêyi â, wakaya munkatshi mua bantu, upepa tshipesa tshia tshilamba tshienda tshivua tshipanda mûlu, bua bantu bonsu bamona mifundu ivuaye mufunda pa tshipesa tshivua tshipanda, ne ubila ne dîyi dikola, wamba ne:

20 Monayi, bantu bonsu badi basua kukuba mukanda ewu mu bulaba, lekela balua ku bukola bua Mukalenga ne babuela mu tshipungidi ne nebakuba manema abu, ne ntendelelu wabu, bua Mukalenga Nzambi ababenesha.

21 Ne biakalua ne pakamanyisha Moloni mêyi â, monayi, bantu bakalua lubilu pamua ne biluilu biabu bisuikibua ku bimonu biabu, bikala bapanda bilamba biabu bu mudi tshilejilu, anyi bu tshipungidi, ne kabakulekela Mukalenga Nzambi wabu to; anyi, mu mêyi makuabu, biasambukabu mikenji ya Nzambi, anyi biaponabu mu disambuka mikenji, ne bikalabu ne bundu bua kuangatabu dîna dia Kilisto, Mukalenga neabapanda bu muvuabu bapanda bilamba biabu.

22 Mpindiewu etshi tshidi tshipungidi tshidibu benza, ne bakimansha bilamba biabu ku makasa a Moloni, bamba ne: Tudi tuenza tshipungidi ne Nzambi wetu, ne netubutuka, mena bu muvua bana betu mu bulaba bua ku node, bituapona mu disambuka mikenji; eyowa, neatuimansha ku makasa a bena lukuna betu, bu mutudi bimansha bilamba bietu ku makasa eba bua bidiatakajibua ku makasa, bituapona mu disambuka mikenji.

23 Moloni wakabambila ne: Monayi, tudi tshishadila tshia ndelanganyi ya Yakoba; eyowa, tudi tshishadila tshia ndelanganyi ya Yosefe, muena tshilamba tshiakapandabu kudi bana babu mu bipesa bia bungi; eyowa, ne monayi mpindiewu, tuvulukayi bua kulama mikenji ya Nzambi, anyi bilamba bietu nebipandibua kudi bana betu, ne tuetu bedibua mu buloko, anyi bapanyishibua, anyi bashipibua.

24 Eyowa, tukubayi budishikaminyi buetu bu mutudi bikala tshishadila tshia Yosefe; eyowa, tuvulukayi miaku ya Yakoba, kumpala kua lufu luenda, pakamonaye tshishadila tshia tshilamba tshia Yosefe tshivua tshikuba ne tshivua katshiyi tshibola to. Ne wakamba ne—Bu muvua mena tshishadila etshi tshia tshilamba tshia muananyi wa baluma tshikala tshikuba, momumua tshianza tshia Nzambi netshikuba tshishadila tshia ndelanganyi ya muananyi wa baluma, ne neatshiangata kudiye nkayenda, pikala tshishadila tshia ndelanganyi ya Yosefe ifua, mena bu mudi tshishadila tshia tshilamba etshi.

25 Mpindiewu monayi, bidi binyingalaja anyima wanyi; nansha nanku, anyima wanyi udi ne disanka bua muananyi wa baluma, bua bualu bua tshitupa tshia ndelanganyi yenda atshi tshiângatshibua kudi Nzambi.

26 Mpindiewu monayi, etshi tshivua ngakuilu wa Yakoba.

27 Ne mpindiewu nganyi udi mumanya ne tshishadila tshia ndelanganyi ya Yosefe, tshiafua bu mudi tshilamba tshienda, kabena abu bavua batapuluka kutudi to? Eyowa, ne nebikala nansha tuetu, bu tuetu kutuyi tukankamana mu ditabuja dia Kilisto.

28 Ne mpindiewu biakalua ne pakamba Moloni mêyi â wakaya, ne wakatuma kabidi bantu mu bitupa bionsu bia bulaba muvua muikala matapuluka, ne bakasangisha pamua bantu bonsu bavua bajinga kukuba budishikaminyi buabu, bua kukandamenabu Amalikia ne bonsu bavua batapuluka kudibu abu, bavua babikidibua ne Bena Amalikia.

29 Ne biakalua ne pakamona Amalikia ne bantu ba Moloni bavua ba bungi bapita Bena Amalikia—ne wakamona kabidi ne bantu benda bavua ne mpata bitangila bululama bua bualu buvuabu bâsa—bua nanku, bualu uvua utshina ne kakukumbaja kipatshila kenda, wakangata ba ku bantu benda bavua basua ne wakaya ku bulaba bua Nefi.

30 Mpindiewu Moloni wakela meji ne kabivua bikengedibua bua Bena Lamana kupetabu bukola bukuabu to; bua nanku wakela meji bua kukosa bantu ba Amalikia njila, anyi kubakuata ne kubapingaja, ne kushipa Amalikia; eyowa, bualu uvua mumanya ne uvua bua kusonsola Bena Lamana ku tshiji kudibu, ne kubenzeja bua kulua kubaluisha mvita; ne uvua mumanya ne Amalikia uvua bua kuenza nanku bua kupetaye kipatshila kenda.

31 Bua nanku Moloni uvua wela meji ne bivua bikengedibua ne angata misumba yenda ya basalayi, ivua midisangisha pamua, ne ivua midipaya ne biluilu, ne ivua mibuela mu tshipungidi tshia kulama ditalala—ne biakalua ne wakangata musumba wenda wa basalayi ne wakaya ne ntenta yenda mu tshipela, bua kukosa njila wa Amalikia mu tshipela.

32 Ne biakalua ne wakenza bilondeshila ku majinga enda, ne wakaya mu tshipela, ne wakakosa misumba ya basalayi ya Amalikia njila.

33 Ne biakalua ne Amalikia wakanyema ne bungi bukesa bua bantu benda, ne bavua bashala bakadifila mu bianza bia Moloni ne wakapingana nabu ku bulaba bua Zalahemela.

34 Mpindiewu, Moloni bualu uvua muntu uvua balumbuluishi banena ne dîyi dia bantu basungula, bua nanku uvua ne dianyisha dia kuenza ne misumba ya basalayi ya Bena Nefi bilondeshila ku disua dienda, bua kushikika ne bua kuenzela bukôkeshi pa mutu pabu.

35 Ne biakalua ne bonsu ba ku Bena Amalikia bavua babenga kubuela mu tshipungidi tshia kukuatshisha bualu bua budishikaminyi, bua kulamabu bukalenga bua budishikaminyi, wakabashipesha; ne kuvua amu bakesa bakabenga tshipungidi tshia budishikaminyi.

36 Ne biakalua kabidi ne wakabandishisha mukanda wa budishikaminyi pa tshibumba tshionsu tshivua mu bulaba bonsu, buvua Bena Nefi basamu; ne nanku Moloni wakâsa dibendela dia budishikaminyi munkatshi mua Bena Nefi.

37 Ne bakabanga kupeta kabidi ditalala mu bulaba; ne nanku bakakuba ditalala mu bulaba tô ne ku ndekelu kua tshidimu tshia dikumi ne tshitema tshia dikôkesha dia balumbuluishi.

38 Ne Helamana ne bakuidi banena bakakuba kabidi bulongolodi mu ekelezia; eyowa, mena bua mutantshi wa bidimu binayi bavua ne ditalala dia bungi ne disanka mu ekelezia.

39 Ne biakalua ne kuvua ba bungi bakafua, bitabuja ne dikamakana ne Mukalenga Yezu Kilisto neasungila anyima yabu; nanku bakashiya buloba ne disanka.

40 Ne kuvua bamua bakafua ne mubidi wa luya, uvua mu bimua bikondu bia tshidimu muikala mupita bungi mu bulaba—kadi kabayi bafua bapita bungi menamena ne mubidi wa luya to, bua bimanyishilu bimpa bia mitshi ne miji ya bungi ivua Nzambi mulongolola bua kumbusha tshivua tshifila mabêdi, avua bantu mua kusâmina bilondeshila ngikadilu wa muvu—

41 Kadi kuvua ba bungi bakafua bua bukulakaja; ne bavua bafua bikala ne ditabuja kudi Kilisto badi basangala kudiye, bu mutudi ne tshia kutshinka.