1 Ne mpindiewu, muananyi wa baluma, ndi ne kakesa ka kuamba bitangila dipingaja didi diakudibua; bualu mona, bamua bantu mbakonyangalaja mifundu ya Nzambi, ne mbapambuka kula bua bualu ebu. Ne ndi mumona ne meji eba adi aditatshisha kabidi bitangila bualu ebu. Kadi mona, nenkûmvuijabu.

2 Muananyi wa baluma, ndi nkuambila ne bulongolodi bua dipingaja budi bukengedibua ne bululama bua Nzambi; bualu bidi bikengela ne bintu bionsu bipingajibua mu bulongama buabi buakana. Mona, bidi bikengela ne bidi biakana, bilondeshila ku bukola ne dibîka dia ku lufu dia Kilisto, ne anyima wa muntu apingajibua ku mubidi wenda, ne tshitupa tshionsu tshia mubidi tshipingajibua kudiwu.

3 Ne bidi bikengela bilondeshila ku bululama bua Nzambi ne bantu balumbuluishibua bilondeshila ku bienzedi biabu; ne pikala bienzedi biabu bikala bimpa mu matuku a moyo â, ne majinga a mitshima yabu mikala mimpa, ne bapingajibua kabidi kudi tshidi tshimpa, ku dituku dia ndekelu.

4 Ne bikala bienzedi biabu bibi, nebipingajibua kudibu bua bubi. Bua nanku, bintu bionsu nebipingajibua mu bulongama buabi bulelela, tshintu tshionsu mu mushindu watshi wa ku tshifukilu—mubidi wa tshifuaka ujudishibua mu mubidi udi kawuyi ufua, mubidi wa dibola mu mubidi udi kawuyi ubola—ujuka bua disanka dia kadiyi ndekelu bua kupiana bukalenga bua Nzambi, anyi bua dikenga dia kadiyi ndekelu bua kupiana bukalenga bua diabulu, etshi ku tshianza etshi, ne tshikuabu ku tshianza tshikuabu—

5 Tshimua tshijula ku disanka bilondeshila ku majinga enda bua disanka, anyi buimpa bilondeshila ku majinga enda bua buimpa; ne tshikuabu ku bubi bilondeshila ku majinga enda bua bubi; bualu udi mujinga bua kuenza bubi dituku dijima dionsu, momumua neapeta difutu dienda dia bubi palua butuku.

6 Ne bidi nanku ku tshianza tshikuabu. Pikalaye mukudimuna mutshima bua mibi yenda, ne mujinga buakana tô ne ku nshikidilu wa matuku enda, nanku mena neamufutshibua buakana.

7 Aba ki badi basungidibua kudi Mukalenga; eyowa, aba ki badi bapatudibua, ne bapatuishibua ku butuku bua mîdima abu budi kabuyi ndekelu; ne nanku badi bimana anyi badi bapona; bualu mona, badi balumbuluishi babu nkayabu, pikalabi bua kuenza buimpa anyi bua kuenza bubi.

8 Mpindiewu, mikenji ya Nzambi kayena mua kukudimuka to; bua nanku, njila udi mulongolola bua ewu yonsu udi musua enda mômu ne apandishibua.

9 Ne mpindiewu mona, muananyi wa baluma, kuidikiji kuenza tshilema tshikuabu kabidi kudi Nzambi weba bitangila malu a dilongesha awu, awuvua muidikija tô ne mpindiewu bua kuenza mibi to.

10 Kuedi meji ne, bualu bivua biakudibua bitangila dipingaja, ne neupingajibua kumbuka ku mibi bua kupeta disanka. Mona, ndi nkuambila ne, bubi kabutu buikala disanka nansha.

11 Ne mpindiewu, muananyi wa baluma, bantu bonsu badi mu ngikadilu wa mfukilu, anyi ndi musua kuamba, mu ngikadilu wa mu mubidi, badi mu kanyonga ka bululu ne mu mionji ya malu mabi; kabena ne Nzambi pa buloba to, ne mbenda bashilangana ne buikadi bua Nzambi; bua nanku, badi mu buikadi bushilangana ne ngikadilu wa disanka.

12 Ne mpindiewu mona, diumvuija dia muaku “dipingaja” didi kuangata tshintu mu ngikadilu wa mfukilu ne kutshiteka mu ngikadilu udi kayi wa mfukilu, anyi kutshiteka mu ngikadilu udi mushilangana ne buikadi buatshi anyi?

13 Ô, muananyi wa baluma, kabiena nanku to; kadi diumvuija dia muaku “dipingaja” didi kutuala kabidi bubi bua bubi, anyi tshia mu mubidi bua tshia mu mubidi, anyi tshiena diabulu bua tshiena diabulu—tshimpa bua tshidi tshimpa; tshiakana bua tshidi tshiakana; tshilulama bua tshidi tshilulama; tshia lusa bua tshidi tshia lusa.

14 Bua nanku, muananyi wa baluma, tangila ne wikala ne lusa kudi bana benu; ubenzela malu malulama, ulumbuluisha ne buakana, ne wenza buimpa diba dionsu; ne pawikala muenza bintu bionsu ebi pashisha neupeta difutu dieba; eyowa, lusa nelupingajibua kûdi kabidi; bululama nebupingajibua kûdi kabidi; tshilumbuluilu tshiakana netshipingajibua kûdi kabidi; ne buimpa nebufutshibua kûdi kabidi.

15 Bualu tshiwudi upatula netshikupinganyina kabidi, ne netshipingajibua; bua nanku, muaku “dipingaja” udi upîsha muenji wa mibi bikola bipita kabidi, ne kawena umubingisha nansha mushindu kayi.