1 Ne mpindiewu biakalua ne kunyima kua Alama mubambila mêyi â wakasomba panshi, ne Amuleke wakajuka ne wakabanga kubalongesha, wamba ne:

2 Bana betu, ndi ngela meji ne kakuena mushindu wa nuenu kuikala bapanga bintu bivua biamba bitangila dilua dia Kilisto, utudi balongesha ne udi Muana wa Nzambi; eyowa, ndi mumanya ne bintu ebi bivua binulongesha bia bungi kumpala kua ditapuluka dienu kutudi.

3 Ne bu munuajingi ne muanetu wa baluma munanga anumanyisha tshinudi ne bua kuenza, bua ntatu yenu; ne wanuambidi kakesa bua kulongolola meji enu; eyowa, ne wanukankamiji bua kuikala ne ditabuja ne ditukija—

4 Eyowa, nansha bua nuikala ne ditabuja dia bungi nansha mena bua kukuna dîyi mu mitshima yenu, bua nutêta didikija dia buimpa buadi.

5 Ne tudi bamona ne lukonku lunena ludi mu meji enu ludi lua ne, bikala dîyi didi munda mua Muana wa Nzambi, anyi bikala kakuakuikala Kilisto to.

6 Ne nudi bamona kabidi ne muanetu wa baluma udi munushîkija, misangu ya bungi, ne dîyi didi munda mua Kilisto bua lupandu.

7 Muanetu mmutêla mêyi a Zenose, ne disungila didi dilua kupitshila ku Muana wa Nzambi, ne mmutela kabidi Zenoke; ne mmuleja kabidi mêyi a Mose, bua kushîkija ne bintu ebi bidi bilelela.

8 Ne mpindiewu, monayi, nennujadikila nkayanyi ne bintu ebi bidi bilelela. Monayi, ndi nnuambila, ne ndi mumanya ne Kilisto nealua munkatshi mua bana ba bantu, bua kuangataye mapanga a bantu benda pa mutu penda, ne neapikula bua mibi ya ba pa buloba; bualu Mukalenga Nzambi mmuamba nanku.

9 Bualu bidi bikengedibua ne bupikudi buenzejibua; bualu bilondeshila ku bulongolodi bunena bua Nzambi wa Tshiendelela, bupikudi budi ne tshia kuenjibua, anyi bukua bantu bonsu budi ne tshia kufua kakuyi diepuka to; eyowa, bonsu mbapapishibua; eyowa bonsu mbapona ne badi bajimina, badi ne bua kufua pa kumbusha mu bupikudi budi bukengedibua bua kuenzejibua.

10 Bualu bidi bikengedibua ne kuikala mulambu munena ne wa ndekelu; eyowa, mulambu wa muntu to, anyi wa nyama to, anyi wa mishindu yonsu ya nyunyi to; bualu kawakuikala mulambu wa muntu to; kadi udi ne tshia kuikala mulambu udi kawuyi ndekelu ne wa tshiendelela.

11 Mpindiewu kakuena muntu udi mua kulambula mashi enda nkayenda apikula mibi ya mukuabu to. Mpindiewu, padi muntu mushibeya mukuabu, monayi mikenji yetu, idi milulama, neyangata moyo wa muanabu anyi? Ndi nnuambila ne, To.

12 Kadi mikenji idi ilomba moyo wa udi mushibeya mukuabu; bua nanku kakuakuikala tshintu tshishala bu mudi bupikudi budi kabuyi ndekelu tshiakumbana bua kupikula mibi ya ba pa buloba.

13 Bua nanku, bidi bikengedibua ne kuikala mulambu munena ne wa ndekelu, ne pashisha nekuikala, anyi bidi bikengedibua ne kuikala, ndekelu wa kumatshisha kua mashi panshi; pashisha mikenji ya Mose neikumbajibua; eyowa, neikumbajibua yonsu, kaleta ne katoba konsu, ne nansha kamua kakakujimina to.

14 Ne monayi, etshi ki diumvuija dijima dia mikenji, katupa konsu kaleja ku mulambu munena ne wa ndekelu awu; ne mulambu munena ne wa ndekelu awu newikala Muana wa Nzambi, eyowa, wa tshiendelela ne udi kawuyi ndekelu to.

15 Ne nanku neatuala lupandu kudi bonsu bitabuja mu dîna dienda; etshi tshikala kipatshila ka mulambu wa ndekelu ewu, bua kutuala munda mua lusa, ludi lutamba bululama bukola, ne lupesha bantu mushindu wa bobu kuikala ne ditabuja didi difila dikudimuna dia mutshima.

16 Ne nanku lusa ludi mua kukumbaja milombu ya bululama, ne kubanyungulula ne maboku a bulami, kadi muntu udi kayi uleja ditabuja didi difila dikudimuna dia mutshima to udi udifila ku mukenji mujima wa milombu ya bululama; bua nanku bulongolodi bunena ne bua tshiendelela bua disungila budi bufidibua amu kudi muntu udi ne ditabuja didi difila dikudimuna dia mutshima.

17 Bua nanku Nzambi anuanyishila, bana betu, ne nubanga kuenzela ditabuja dienu didi difila dikudimuna dia mutshima, ne nubanga kubikila dîna dienda dia tshijila, bua ikala ne lusa kunudi;

18 Eyowa, bilayi kudiye bua lusa; bualu udi ne bukitu bua kupandisha.

19 Eyowa, dipuekeshayi, ne tungunukayi mu disambila kudiye.

20 Bilayi kudiye panudi mu madimi enu, eyowa, bua bisumbu bia bimuna bienu.

21 Bilayi kudiye mu nzubu yenu, eyowa, bua ba mu nzubu yenu, mu dinda, munda munya, ne mu dilolo.

22 Eyowa, bilayi kudiye bua kuimanyina bukola bua bena lukuna benu.

23 Eyowa, bilayi kudiye bua kuimanyina diabulu, udi muena lukuna wa buakana bonsu.

24 Bilayi kudiye bua bikunyibua bia mu madimi enu, bua nulubuluka buabi.

25 Bilayi kudiye bua bisumbu bia bimuna bia mu madimi enu, bua bivula.

26 Kadi ebi kabiena bionsu to; nudi ne tshia kulomba ne anyima yenu mijima mu tuzubu tuenu tua tshisokomenu, ne mu miaba misokoka yenu, ne mu tshipela tshienu.

27 Eyowa, ne panudi kanuyi nubila kudi Mukalenga to, mitshima yenu ikala miwula, midifila kudiye mu disambila misangu yonsu bua diakalengela dienu, ne bua diakalengela dia bonsu badi pabuipi nuenu kabidi.

28 Ne mpindiewu monayi, bana betu bananga, ndi nnuambila ne, kanutshinki ne ebi ki bionsu to; bualu kunyima kua nuenu benza bintu bionsu ebi, nuenu babenga kuambuluisha bakengi, ne badi butaka, ne kanuyi nukumbula babêdi ne batatshishibua, ne kanuyi nuabanyinangana bintu bienu ne badi ne dikenga, panudi bikala nabi—ndi nnuambila ne, nuenu kanuyi nuenza tshintu nansha tshimua tshia ku bintu ebi to, monayi, kusambila kuenu kudi tshianana, ne kakuena ne mushinga to, ne nudi bu bantu ba mpala ibidi badi bavila ditabuja.

29 Bua nanku, nuenu kayi nuvuluka bua kuikala ne lusa to, nudi bu mudi bisota, bidi bapeluji ba biamua bimansha (bikala kabiyi ne mushinga to) ne bidi bantu babidiata mu makasa.

30 Ne mpindiewu, bana betu, ndi musua ne, kunyima kua nuenu bapeta majadiki a bungi nanku, bikala bamona ne mifundu ya tshijila idi ijadika bua bintu ebi, nulua ne nukuama bimuma bua dikudimuna dia mutshima.

31 Eyowa, ndi musua ne nulua ne kanutshipapishi mitshima yenu kabidi to; bualu monayi, mpindiewu ki diba ne dituku dia lupandu luenu; ne bua nanku, binuakudimuna mutshima ne kanuyi nupapisha mitshima yenu to, katataka bulongolodi bunena bua disungila nebukumbajibua kunudi.

32 Bualu monayi, moyo ewu udi tshikondu tshia bantu kudilongolola bua kumonangana ne Nzambi; eyowa, monayi dituku dia moyo edi didi dituku dia bantu kuenza midimu yabu.

33 Ne mpindiewu, bu mumvua munuambila kumpala, bu munuvua bapeta bijadikilu bia bungi nanku, bua nanku, ndi nusengelela ne kanupumbishi dituku dia dikudimuna dia mutshima dienu tô ne ku ndekelu to; bualu kunyima kua dituku dia moyo edi, didi dipeshibua kutudi bua kudilongolola bua tshiendelela, monayi, bituapanga kulengeja tshikondu tshietu patutshidi mu moyo ewu, pashisha butuku bua mîdima budi bulua, butudi katuyi mua kuenza mudimu nansha.

34 Kuena mua kuamba, pawatuadibua mu diba ditamba bubi adi ne, ndi nkudimuna mutshima, ne ndi mpingana kudi Nzambi wanyi. To, kuena mua kuamba nanku to; bualu nyuma wa momumua udi mukuata mibidi yenu tshikondu tshinudi nushiya moyo ewu, nyuma wa momumua awu neikala ne bukola bua kukuata mubidi weba mu buloba bua tshiendelela.

35 Bualu monayi, binuikala bapumbisha dituku dia dikudimuna mutshima mena tô ne ku lufu, monayi, nudi balua babatshikibua ku nyuma wa diabulu, ne udi unusuika nulua benda; bua nanku, Nyuma wa Mukalenga umbuki kunudi, ne kena ne muaba munda muenu to, ne diabulu udi ne bukola bonsu pa mutu penu; ne etshi tshidi ngikadilu wa nshikidilu wa bena bubi.

36 Ne ndi mumanya etshi, bualu Mukalenga mmuamba ne, kena usomba mu ntempelo idi kayiyi ya tshijila to, kadi udi usomba mu mitshima ya bantu bakana; eyowa, ne mmuamba kabidi ne, bantu bakana nebasomba mu bukalenga buenda, kabayi bapatuka kabidi to; kadi bilamba biabu nebitokeshibua kupitshila ku mashi a Muana wa Mukoku.

37 Ne mpindiewu, bana betu bananga, ndi njinga ne nuvuluka bintu ebi, ne nudienzeja bua kukumbajija lupandu luenu ne ditshina kumpala kua Nzambi, ne kanuvidi kabidi dilua dia Kilisto to;

38 ne kanukokanganyi kabidi ne Nyuma wa Tshijila to, kadi numuitaba, ne nuangata dîna dia Kilisto pa mutu penu; ne nudipuekesha tô ne ku lupuishi, ne nutendelela Nzambi, muaba yonsu unuikala, mu nyuma ne mu bulelela; ne nuikala ne dianyisha dituku dionsu, bua midimu ya lusa ya bungi ne mabenesha a bungi bidiye unupesha.

39 Eyowa, ndi nnukankamija kabidi, bana betu, ne nuikala badimuka mu disambila diba dionsu, bua kanupambuishibu kudi matêtshibua a diabulu to, bua yeya kanutambi bukola to, bua kanuikadi bakôkedi benda ku dituku dia ndekelu to; bualu monayi, kena unufuta difutu dimpa to.

40 Ne mpindiewu bana betu bananga, ndi nukankamija bua nuikala ne ditukija, ne nuambula mishindu yonsu ya ntatu; ne kanupendi badi banuipata bua bupela buenu butamba bungi to, bua kanulu benji ba mibi bu mudibu;

41 Kadi nuikala ne ditukija, ne ambulayi ntatu ayi, ne ditekemena dikamakana ne dituku dimua nenuikisha ku ntatu yenu yonsu.