1 Ne biakalua ne Bena Amaleki ne Bena Amulona ne Bena Lamana bavua mu bulaba bua Amulona, ne kabidi mu bulaba bua Helama, ne bavua mu bulaba bua Yelushalema, ne mu tshikosu, mu bulaba bonsu bua ku mpenga yonsu, bavua kabayi bakudimuna moyo to ne bavua kabayi bangata dîna dia Anti-Nefi-Lehi to, Bena Amaleki ne Bena Amulona bakabasonsola ku tshiji kudi bana babu.

2 Ne lukinu luabu buabu luakalua lukola menamena, mena mua ne bakabanga kutombokela mfumu, mu mushindu wa ne bakabenga ne ikala mfumu wabu; bua nanku, bakambula biluilu bua kuluisha bantu ba Anti-Nefi-Lehi.

3 Mpindiewu mfumu wakambikila muanenda wa baluma bukalenga, ne wakamuinyika ne Anti-Nefi-Lehi.

4 Ne mfumu wakafua tshidimu tshia momumua atshi tshiakabanga Bena Lamana kuenza bulongolodi bua mvita bua kuluisha bantu ba Nzambi.

5 Mpindiewu pakamona Amona ne bana babu ne bonsu bavua babanda nenda bulongolodi bua Bena Lamana bua kubutula bana babu, bakatungunuka ku bulaba bua Midiyana ne aku Amona wakasambakena ne bana babu bonsu; ne kumbukila aku bakaya ku bulaba bua Yishemaela bua kubuelabu mu tshipangu ne Lamoni ne kabidi ne muanabu wa baluma Anti-Nefi-Lehi, bua kumanyabu tshivuabu ne bua kuenza bua kudisungila kudi Bena Lamana.

6 Mpindiewu kakuvua muntu nansha umua munkatshi mua bantu bonsu bavua bakudimuna moyo kudi Mukalenga wakasua kuambula biluilu bua kuluisha bana babu to; to, bakabenga mena bua kuenza bulongolodi nansha bumua bua mvita; eyowa, ne kabidi mfumu wabu wakabela mukenji ne kabenji to.

7 Mpindiewu, â adi mêyi akambilaye bantu bitangila bualu ebu: Ndi nsakidila Nzambi wanyi, bantu banyi bananga, ne Nzambi wetu munena, mu buimpa buenda, udi mutuma Bena Nefi badi bikala bana betu, kutudi bua kutuyisha, ne kutuitabujija bitangila ngenzelu ya batatuetu babi.

8 Ne monayi, ndi nsakidila Nzambi wanyi munena bualu udi mutupesha ndambu wa Nyuma wenda bua kutekesha mitshima yetu, bualu tuakabuela mu malanda ne bana betu aba, Bena Nefi.

9 Ne monayi, ndi nsakidila kabidi Nzambi wanyi, bua ne ku dibuela mu malanda edi, tudi bitabujijibua bitangila mibi yetu ne dishibeya dia bantu dia bungi ditudi benza.

10 Ne ndi nsakidila kabidi Nzambi wanyi, eyowa, Nzambi wanyi munena, bualu uvua mutuanyishila ne tukudimuna mutshima bua bintu ebi, ne uvua kabidi mutubuikidila mibi yetu ne dishibeya dia bantu dietu dia bungi bituvua benza, ne uvua mumbusha dipîla ku mitshima yetu, kupitshila ku makumbanyinyi a Muanenda.

11 Ne mpindiewu monayi, bana betu, bualu bivua bionsu bituvua mua kuenza (bu mutuvua bajimina kupita bukua bantu bonsu) bua kukudimuna mutshima bua mibi yetu ne ku dishibeya dia bantu dia bungi bituvua benza, ne bua Nzambi abiumbusha ku mitshima yetu, bualu ki bionsu bituvua mua kuenza bua kukudimuna mutshima bikumbana kumpala kua Nzambi bua umbusha dipîla dietu—

12 Mpindiewu, bana betu bananga kupita, bualu Nzambi udi mumbusha dipîla dietu, ne miela yetu ya mvita idi milua ikenka, nanku katukuatshishi kabidi miela yetu ya mvita matoba ne mashi a bana betu to.

13 Monayi, ndi nnuambila ne, To, tulamayi miela yetu ya mvita bua kayikuatshi kabidi matoba ne mashi a bana betu to; bualu pamuapa, bituakuatshisha miela yetu matoba kabidi, kayena mua kusukudibua bua kukenkayi kabidi kupitshila ku mashi a Muana wa Nzambi wetu munena to, âmatshishibua bua bupikudi bua mibi yetu.

14 Ne Nzambi munena uvua muikala ne lusa kutudi, ne wakatumanyisha bintu ebi bua katufu to; eyowa, ne wakadianjila kutumanyisha bintu ebi, bualu udi munanga anyima yetu bu mudiye munanga bana betu; bua nanku, bua lusa luenda udi utukumbula kupitshila ku banjelu benda, bua bulongolodi bua lupandu bumanyika kutudi mudi kudi nkongu ya bantu idi ilua.

15 Ô, bu mudi Nzambi wetu ne lusa! Ne mpindiewu monayi, bualu ki bionsu bituvua mua kuenza bua kumbusha matoba etu kutudi, ne kukenkesha miela yetu ya mvita, tuyisokokayi bua ishala ikenka, bu mudi bujadiki kudi Nzambi wetu ku dituku dia ndekelu, anyi mu dituku dituimanyishibua kumpala kuenda bua kulumbuluishibua, ne katuena bakuatshisha miela yetu ya mvita matoba ne mashi a bana betu to katshia watupesha dîyi dienda ne watulengeja nâdi.

16 Ne mpindiewu, bana betu, pikala bana betu bakeba bua kutubutula, monayi, netusokoka miela yetu ya mvita, eyowa, mena netuyijîka muinshi mula mu buloba, bua ishala ikenka, bu mudi bujadiki ku dituku dia ndekelu ne katuvua bayenzela nansha to; ne pikala bana betu batubutula, monayi, netuya kudi Nzambi wetu ne netupandishibua.

17 Ne mpindiewu biakalua ne pakajikija mfumu mêyi â, ne pakasangila bantu bonsu pamua, bakangata miela yabu ya mvita, ne biluilu bia mvita bionsu bivua bienzela bua dimatshisha dia mashi a bantu, ne bakabijîka muinshi mula mu buloba.

18 Ne bakenza nanku, bualu tshivua ku mesu abu bujadiki kudi Nzambi, ne kabidi kudi bantu, ne kabakuenzela kabidi biluilu bua kumatshisha mashi a bantu to; ne bakenza nanku, bajadika ne benza tshipungidi ne Nzambi pa mutu pa kumatshisha mashi a bana babu nebafila mioyo yabu nkayabu; ne pa mutu pa kunyenga kudi muanabu nebabapesha; ne pa mutu pa kupitshisha matuku abu mu bufuba nebakuata mudimu bikola ne bianza biabu.

19 Ne nanku tudi tumona ne, pakatuadibua Bena Lamana aba ku ditabuja ne dimanya bulelela, bavua bakamakana, ne bavua bua kukenga mena tô ne ku lufu pa mutu pa kuenza mibi; ne nanku tudi tumona ne bakajîka biluilu biabu bia ditalala, anyi bakajîka biluilu bia mvita, bua ditalala.

20 Ne biakalua ne bana babu, Bena Lamana, bakenza bulongolodi bua mvita, ne bakabanda ku bulaba bua Nefi bua kipatshila ka kushipa mfumu, bua kutekabu mukuabu pa muaba wenda, ne kabidi bua kubutula bantu ba Anti-Nefi-Lehi mu bulaba.

21 Mpindiewu pakamona bantu ne bavua balua kubabunda bakaya kusambakena nabu, ne bakinama panshi kumpala kuabu, ne bakabanga kubila dîna dia Mukalenga; ne nanku bavua mu ngikadilu ewu pakabanga Bena Lamana kudiela kudibu, ne pakabangabu kubashipa ne muela wa mvita.

22 Ne nanku bu muvuabu kabayi basambakena ne dimanyina, bakashipa tshinunu tshimua ne batanu, ne tudi bamanya ne badi babeneshibua, bualu badi baya kusomba ne Nzambi wabu.

23 Mpindiewu pakamona Bena Lamana ne bana babu kabavua banyema muela wa mvita to, anyi kabavua bakudimuka ku dia baluma anyi ku dia bakaji to, kadi bavua balala panshi ne bafua, ne bavua basamuna Nzambi pavuabu mena mu difua dia ku muela wa mvita—

24 Mpindiewu pakamona Bena Lamana nanku bakalekela kubashipa; ne kuvua ba bungi bavua mitshima yabu miwula munda muabu ne kanyinganyinga bua ba ku bana babu bavua bapona ku muela wa mvita, bualu bavua bakudimuna mutshima bua bintu bivuabu benza.

25 Ne biakalua ne bakimansha biluilu biabu bia mvita panshi, ne bakabenga kubiangata kabidi, bualu bavua banyingalala bua bualu bua dishibeya dia bantu diakenzabu; ne bakatua binu panshi bu muvua bana babu, batekemena lusa lua aba bavua bambula biluilu bua kubashipa.

26 Ne biakalua ne bantu ba bungi kupita bavuabu bashipa bakadisangisha kudi bantu ba Nzambi; ne bavuabu bashipa bavua bantu bakana, bua nanku katuena bua kuela mpata ne bavua bapandishibua to.

27 Ne kakuvua muntu mubi wakashipabu munkatshi muabu to; kadi kuvua bapita tshinunu tshimua bakatuadibua ku dimanya dia bulelela; nanku tudi tumona ne Mukalenga udi wenza mishindu ya bungi bua lupandu lua bantu benda.

28 Mpindiewu Bena Lamana ba bungi bakashipa bana babu ba bungi bavua Bena Amaleki ne Bena Amulona, ba bungi kupita bavua bikala bilondeshila ku mulongu wa Bena Neholo.

29 Mpindiewu, munkatshi mua bakadisangisha kudi bantu ba Mukalenga, kakuvua nansha bamua bavua bikala Bena Amaleki anyi Bena Amulona, anyi bavua ba mulongu wa Neholo to, kadi bavua tunkanunuina tulelela tua Lamana ne Lemuele.

30 Ne nanku tudi mua kujingulula patoka ne, kunyima kua bantu bengejibua kudi Nyuma wa Nzambi, ne bapeta dimanya dia bungi dia bintu bidi bitangila buakana, ne pashisha bapambuka bua kuya mu mibi ne disambuka dia mikenji, badi balua bapapishibua kupita, ne nanku ngikadilu wabu udi ulua mubi kupita bu ne kabavua bamanya bintu ebi nansha.