1 Xchi’uc ja’ jech tana, jnich’on vu’un, ta chca’ay ti oyto c’usi ep tsnop ti ajole, ja’ ta sventa ti c’usi muto xa va’ybe lec smelolale, ta sventa ti c’u x-elan meltsanel yu’un Riox ta sventa vocolil yu’un jmulavil, yu’un cha nop me muyuc lec ti jmulavil ta xich’ aq’uel batel ta bu’oy vocolile.

2 Ja’ jech, jnich’on vu’un, ta xcalbot lec smelolal ti li’e, ja’ jech ta ts’acal ti Cajvaltic Rioxe la snuts loq’uel ti ba’yuc jtotic jme’tic ta nichimaltic Edene, ja’ c’uxi xabtelanic ti banamil bu la jyich’ic liquesele, jech, la sloq’ues ti vinique, xchi’uc la jyac’ ta stuq’uil sloq’uem c’ac’al nichimaltic Eden, abatetic xchi’uc jun machita tsanal ti xbalc’uj sutbij no’ox tajmec, ti c’uxi ta snac’ ti te’ sventa cuxlejale.

3 Chquiltic chi ti vinic jech c’ot jech chac c’u cha’al Riox ti xotquin c’usi lec xchi’uc c’usi chopole; xchi’uc ti muyuc bu ta xbech sc’ob xchi’uc ti stsac ti te’ sventa cuxlejal ti jech tslo’ xchi’uc ti jech chcuxi ta sbatel osile, Cajvaltic Riox la jyac’ abatetic xchi’uc machita tsanal, ti c’uxi vinic mu xu’ tslo’be sat ti te’e.

4 Xchi’uc jech chquiltic ti jech la jyich’ ac’bel jayibuc c’ac’al ti vinic c’uxi xu’ sutes yo’ntone, jech, jayib c’ac’al ta xich’ pasel ta poroval, jayib c’ac’al xu’ ta sutes yo’nton, xchi’uc tal abtejuc ta sventa Riox.

5 Yu’un ja’ jech, ti lajuc o no’ox xbech sc’ob Adán ta anile, xchi’uc ti la slo’uc ti sat te sventa cuxlejale, ich’i ta scotol c’alal ti jechuque, jech chac c’ucha’al ya’yej jtotic Riox, jech muyuc oyuc jayibuc c’ac’al xu’ sutes yo’nton, jech xchi’uc jeche’ ech’ ya’yej Riox ti jechuque, xchi’uc muyuc stu jechuc ti c’usi la jyal ta sventa coltaele.

6 Jech ti li’e, la jyich’ albel vinic ti jech ta xchame–ja’ jech, jech chac c’u cha’al la jyich’ic ch’aquel te ta te’ sventa cuxlejale, ja’ jech ta xich’ic ox ch’aquel ta sba banamil. Ti vinique la jyil ti ch’ay o ta sbatel osile; jech, liquic ta bajemal viniquetic.

7 Tana un, chavil ti jech smelolal ti jech la jyich’ic ch’aquel ta stojolal Cajvaltic ti ba’yuc jtotic jme’tique, jech chac c’u cha’al li’ ta ora xchi’uc jech chac c’u cha’al ta ch’ulelal, xchi’uc ja’ jech chquiltic ti viniquetic ja’ la spasic ti c’usi tsc’an yo’nton stuquique.

8 Ja’ jech, muyuc o no’ox lec ti yu’nuc yich’ coltael ti vinic ta chamel jayib no’ox c’ac’ale, yu’un ti va’aye ja’ ta soques ti c’usi albil sventa cuxetel o’ntonale.

9 Ja’ jech, ti ch’ulelale mu sna’ xcham ta sbatel osil, yu’un ti c’uxi yal ta mulil Adane, ja’ te tal ti lajel ta ch’ulelale, jech chac c’u cha’al jayib no’ox c’ac’al li’ ta sba scotol viniquetic, ja’ xcaltic, ti la jyich’ic loq’uesel ta stojolal Cajvaltique, yu’un ja’ lec c’ot ti viniquetic jech ta xich’ic coltael li’ ta sventa lajel ta ch’ulelale.

10 Ja’ jech, ti jech pasic xa ta bec’talile, ta spasic ti c’usi tsc’an yo’ntonique xchi’uc ti spucujilic c’u x-elan nopen xa’yique, ti c’u x-elan li’ ta xich’ic q’uelbel stalelique la jya’ay stuquic ti yu’un ja’ li’ ta ora xu’ c’uxi xchanic leque; ja’ jech c’ot ta sventa c’uxi chchanic o lec.

11 Te me a na’ojuc o lec, jnich’on vu’un, ti manchuc c’usi la jyich’ alel ta sventa coltaele, (jcomtsantic ta jot o) ti xch’ulelique ta xich’ic vocolil ti c’alal me chamique, ja’ ta sventa ti yu’un ch’acalic ta stojolal Cajvaltique.

12 Xchi’uc mu xa c’uxi stac’ coltael viniquetic ti c’alal jech bajemique, yu’un stuc la spas ta sventa mu la xch’un c’usi la jyich’ albel.

13 Ja’ jech, jech chac c’u cha’al ti meltsanel, ti c’u x-elan albil sventa coltaele mu stac’ xc’ot ta pasel ti me mu ja’uc co’ol sba xchi’uc sutesub o’ntonal c’alal li’ to ta xq’uelat talelile, jech, ti c’u x-elan li’ ta smeltsan sbaique; ti me mu ja’uc jech ti c’u x-elan va’aye, ti lequilale mu xu’ xac’ ep stsal, ja’ xa no’ox me tsoquesbe yabtel ti meltsanele. Ti yabtel meltsanele mu stac’ o no’ox xich’ soquesel; me jeche, Ti Rioxe mu xa ja’uc o Rioxe un bi.

14 Ja’ jech chquiltic ti scotol quirisianoetic bajemique, xchi’uc ti oyic ta sc’ob meltsanele, jech, ti meltsanel yu’un Riox, ti jech ta xjipatic loq’uel ta sbatel osil ti jech bevelic o ta stojolale.

15 Jech tana, ti li’e mu stac’ xich’ pasel ti c’usi albil ta sventa lequilal ti me muyuc xc’ot ta pasel ti ta xich’ tojel jmultique, ja’ jech, Riox stuc ta stoj ti smul sbejel banamile, ti c’uxi xu’ xc’ot ta pasel ti c’usi albil ta sventa lequilale, ti c’uxi xc’ot ta lequil Riox ti Rioxe, tuc’ yo’nton xchi’uc lec yutsilal xtoc.

16 Ti sutesub o’ntonale, mu stac’ xc’ot ta viniquetic ti me muyuc ta xich’ aq’uel vocolile, ti jech muyuc slajeb sbatel osil jech chac c’u cha’al-cuxlejal ta sventa ch’ulelale, ti ja’ mu co’oluc sba xchi’uc cuxlejal albil ta sventa xcuxetel o’ntonal, ti jech muyuc slajeb jech chac c’u cha’al cuxlejal ta ch’ulelale.

17 Xchi’uc ¿C’uxi xu’ jun vinic ta sutes yo’nton ti me muyuc ta spas smule? ¿c’uxi xu’ ta spas smul, ti muyucuc mantale? xchi’uc ¿c’uxi xu’ oy mantal ti me muyucuc vocolile?.

18 Jech la jyac’ vocolil, xchi’uc la jyac’ jun mantal lec q’uelbil smelolal, ti c’uxi la jyich’ic tal xi’el ta yo’ntonic li’ vinique.

19 Jech tana, ti muyucuc yich’oj aq’uel mantal ta sventa vinic boch’o chmilvan ti stac’ ta xchame. ¿me ta van xi’ jechuc me chcham ti jech ta xmilvane?

20 Xchi’uc xtoc, ti muyucuc mantaletic ta scontra li’ mulile, ti viniquetique muyuc ta xi’ic jechuc ta spasel ti smulique.

21 Ti muyucuc o no’ox yich’oj aq’uel junuc mantale, ¿c’usi xu’ ta spas meltsanel ta viniquetic me spas smulique? ¿ o me lequilal? yu’un mu stac’ c’usi xu’ spasic ta stojolal li’ vinique.

22 Jech yich’oj aq’uel jun mantal, xchi’uc yich’oj aq’uel jun vocolil, xchi’uc yich’oj aq’uel jun sutesub o’ntonal, ti ja’ yutsilal ta sujvane, yan ti meltsanele ja’ ta spas ta mantal viniquetic ti ac’o spasic ti mantale, ti mantale ja’ ta xac’ ti vocolile, ti me mu jechuque, ti yabteltac meltsanele ta xich’ soquesel, xchi’uc ti Rioxe mu xa ja’uc Riox o.

23 Pero ti Rioxe muyuc slajeb ti jech Riox oe, xchi’uc ti slequilale ta xalbe ti boch’o ta sutes yo’ntone, xchi’uc ti slequilale te ta xtal ta sventa tstojbutic jmultic; ti tstojbutic jmultique ja’ te ta xtal ti c’u x-elan ta xcha’ cuxiic animaetique; ti ta xcha’ cuxiic animaetique ja’ ta xic’ sutel viniquetic ta stojolal Riox, ja’ jech ta xich’ic pasel ta ach’ ta stojolal, ti c’uxi xu’ ta xich’ic q’uelbel stalelic jech chac c’u cha’al smantaltac meltsanele.

24 Yu’un ti li’e, ti meltsanele ta spas scotol ti c’usi xu’ spase, xchi’uc ti lequilale ta xal scotol ti bu c’alal ja’ yu’une; ja’ jech, muyuc boch’o xu’ ta xcol ti me mu ja’icuc boch’otic ta sutes yo’ntonic ta bats’imelele.

25 ¡C’usi! ¿Me yu’un chaval vo’ot ti me xu’ ta xelc’an meltsanel ti lequilale? ta xcalbot ti mo’oje, me jlec’uc, ti me yu’un jeche, ti Rioxe mu xa ja’uc Riox un bi.

26 Ti c’u x-elan va’aye ja’ jech x-elan ta spas Riox ti muc’tic ta sbatel osil c’usi tsc’ane, ti jech yich’ o no’ox pasel c’alal la pas banamile, xchi’uc ja’ jech chc’ot ta pasel ti coltael xchi’uc ti loq’uesel ta viniquetique, xchi’uc xtoc ti soquesel xchi’uc vocolile.

27 Ja’ jech, jnich’on vu’un, ti boch’o tsc’an chtale, stac’ xtal yuch’ ti lequil vo’etic sventa cuxlejale; xchi’uc ti boch’o mu sc’an xtale, muyuc ta xich’ sujel ac’o xtal, ja’ no’ox ti ta slajeb c’ac’ale ta xich’ ac’bel ta ach’ ti c’u x-elan yabtele.

28 Me ja’ la sc’an la spas ti chopole, xchi’uc ti me muyuc sutes yo’nton c’u yepal sc’ac’alile, ja’ jech chopol ta xich’ ac’bel ta yan velta, jech chac c’u cha’al ta xac’ ta ach’ Riox,

29 Tana un, jnich’on vu’un, ta jc’an ti ac’o mu epuc xa soquesic ti c’usitic li’e, xchi’uc ja’ no’ox xa nop, xa bat a vo’nton yu’un ti a multaque, ti c’u x-elan va’aye ja’ no’ox ta xic’ot ta sutesub o’ntonal.

30 ¡Jnich’on vu’un, ta jc’an ti ac’o mu epuc xa jalan ti meltsanel yu’un Rioxe! mu xa me xa nop jlec’uc ti amultaque, ti jech cha jalan ti meltsanel yu’un Rioxe, ja’ te xa va’ay ti c’u x-elan tsmeltsanban Rioxe, xchi’uc ti slequilale xchi’uc ti smuc’ule ja’uc tsots spas ti ta avo’ntone; xchi’uc ac’o xa vac’ ti ja’uc sbic’tajes sba c’alal to ta spucucale.

31 Ja’ jech lec tana, jnich’on vu’un, ic’bilot yu’un Riox ti c’uxi cha cholbe sc’op li’ ta jteclume, batan jnich’on vu’un, alo ta bats’imelel xchi’uc ta lequilal ti lo’iletique, ti c’uxi xu’ xa vic’el ch’ulelaletic ta sventa sutesub o’ntonal, ti c’uxi oyuc yabil ta stojolalic ti yutsilal c’usi yaloj ono’oxe xchi’uc ja’uc Riox ta sq’uelot jech cha c’u cha’al ca’yejtaque. Jechuc.