Helaman

1 Ja’ o jech c’ot ta pasel ti ta sjabilal vaquib yo’vinic (86) jabil ti jech te to tspasic c’usi chopol ti nefitaetique, jech, muc’ta bolilil, ti c’alal Lamanitaetic ta xa xaq’uic tsots persa spasel ti smantaltac Riox, jech chac c’u cha’al smantal Moisese.

2 Ja’ o jech ti ta sjabilale jun vinic ja’ sbi Samuel, ja’ jlamanita vinic, te c’ot ta steclumal Zarahemla xchi’uc te sjapo xcholbel c’op ti jteclume, Jech c’ot ta pasel, epal c’ac’al la xchol c’op ta sventa sutesub o’ntonal ta jteclum, jech la snutsic loq’uel, xchi’uc te xa tsc’an tsut batel ta steclumal stuc.

3 Ja’ o jech, tal ta stojolal ya’yej Cajvaltic ti ac’o sutuc batel yanveltae xchi’uc ti ac’o xcholbe c’op ti jteclum ta scotol c’usitic ta xtal ta yo’ntone.

4 Ja’ o jech muyuc xaq’uic ochuc ti ta muc’ta jteclume; ja’ jech, bat xchi’uc muy ta sba scoral tonil jteclum, la xbech sc’ob xchi’uc tsots avan, xchi’uc la xcholbe jteclum scotol ti c’usitic la jyich’ albel yu’un Cajvaltic ta yo’ntone.

5 Jech la jyalbeic: Jech tana, vu’un Samuelun, jun jlamanita vinicun, ta xcal ti ya’yejtac Cajvaltic ti ja’ ta xac’bun ta co’ntone, ja’ jech, ja’ la jyac’bun ta co’nton ti ac’o xcal li ta jteclum ti machitail sventa lequilale ta xnichin ta stojolalic, xchi’uc muyuc xa chjelo chanib ciento (400) jabil ti jech ta xyal ta stojolalic ti machitail sventa lequilale.

6 Jech, jun muc’ta tsatsal vuq’uesel ta smalaic ti boch’otic li’ ta jteclume, jech ta bats’imelel ta xtal, xchi’uc muyuc boch’o xu’ ta xcol li’ ta jteclum ti me mu ja’uc ta sventa sutesub o’ntonal xchi’uc ta xch’unolajel o’ntonal ta sventa Cajvaltic Jesucristoe, ti ta bats’imelel ta xtal ta banamile, xchi’uc ti ta xil ep svocole xchi’uc ti ta xcham ta sventa steclumale.

7 Ja’ jech jun yabat Cajvaltic yalojbun ca’ay, xchi’uc ja’ la jyac’bun ach’ cuxetel o’ntonal ta jch’ulel. Xchi’uc ja’ jech, la jquich’ taqueltal ta atojolalic ti c’uxi tal calboxuc ec xtoque, ti c’uxi xu’ xa vich’ic ti lequil ach’etique; ja’ jech tana un, mu xa c’an xa ch’amicun.

8 Ja’ jech, ja’ jech ta xal ti Cajvaltique: Jech chac c’u cha’al tsots yo’ntonic ti steclumal nefitaetique, ti me muyuc ta sutes yo’ntonique, ta jloq’uesbeic ti ca’yejtaque, xchi’uc ta jloq’uesbeic ti J-espiritue, xchi’uc muyuc ta jts’icbeic epal c’ac’al, xchi’uc ta jsutesbe yo’ntonic yermanotaquic ta scontra stuquic.

9 Xchi’uc muyuc chjelo chanib ciento (400) jabil ti muyuc chcac’ xich’ic tuch’esele, jech, ta to jvu’lanic xchi’uc machita, xchi’uc ta xilic vi’nal, xchi’uc c’usi to jtu.

10 Jech ta jvu’lanic ta stsatsal sc’ac’al co’nton, xchi’uc oyic tovan ti boch’otic ta xchan cojalic, ti avaj contraic ti ta to xch’iic ti jech ta xac’boxuc ti c’u x-elan cha vich’ic vuq’uesele; ti c’usi va’aye ta bats’imelel ta xc’ot ta pasel, ja’ xa no’ox me cha sutes a vo’ntonique, xi ti Cajvaltique; xchi’uc ti boch’otic ta xchan cojalique ja’ ta svuq’uesoxuc.

11 Ti me la sutes a vo’ntonic xchi’uc ti me la sutic ta stojolal Riox ti ja’ a Rioxique, vu’un ta jeltabe sbe batel ti sc’ac’al co’ntone, xi ti Cajvaltique jech, ja’ jech ta xal ti Cajvaltique: Ta xich’ic ts’uiltasel ti boch’otic ta sutes yo’ntonique xchi’uc ti ta sutic ta jtojolale; ¡jech ja’ abul sba ti boch’o muyuc ta sutes yo’ntone!

12 Jech, !abul sba ti li’ muc’ta jteclum Zarahemlae, yu’un ti li’e, ja’ ta sventaic boch’otic lequic ti jech coltoe! Jech abul sba ti li’ muc’ta jteclume, yu’un vu’un jc’anoj, xi ti Cajvaltique, ti oy epic, jech, ti ja’ epic ti li’ ta jteclum ti jech ta stsatsubtas yo’ntonic ta jtojolale; xi ti Cajvaltique.

13 Ja’ ts’uiltasbilic ti boch’otic ta sutes yo’ntonique, yu’un ta jcoltaic ti stuquique, ja’ jech ti manchuc xa ti yu’un oy boch’otic lequic ti li’ ta muc’ ta jteclume, ja’ jech, vu’un ta xcac’ yaluctal c’oc’ ta vinajel xchi’uc ac’o xvuq’uic.

14 Ja’ jech tana, ja’ xa no’ox ta sventa yu’un jc’anoj boch’otic lequic ti jech la jyich’ic pasbel pertonale. Ja’ jech, ta xtal sc’ac’alil xi ti Cajvaltique, ti c’alal me la nutsic loq’uel ta atojolalic ti boch’otic lequique, jech ta anil xa me cha vich’ic vuq’uesel, ¿jech abul sba ti li’ muc’ta jteclum ta sventa muc’ta vocolil xchi’uc ti chopolil c’usi tspasic tee!

15 Jech, ¿xchi’uc abul sba ti muc’ta jteclum Gedeon, ta sventa sbolilic xchi’uc ta sventa ti c’usi chopol c’usi tspasic tee!

16 Jech, ¿abul sbaic scotolic ti muc’tiquil jteclum ti jech oyic ta nopolic banamil, ti jech oyic jech chac c’u cha’al nefitaetic, ta sventa bolililetic xchi’uc ti ta chopol c’usi tspasic te ta stojolale!

17 Xchi’uc ja’ jech ta xtal jun utel ta sba banamil, xi ti Cajvaltic ta vinajele, ta sventa jteclum ti te oy ta ba banamile, jech, ta sventa sbolilic xchi’uc ti c’usi chopol ta spasique.

18 Xchi’uc ta xc’ot ta pasel, xi ti Cajvaltic ta vinajele, jech, ti ja’ jmuc’ta Rioxtic ta bats’imelele, ti boch’otic ta snaq’uic sc’ulejalic li’ ta banamile muyuc ta staic ep, ta sventa ti li’ c’u x-elan muyuc slequil banamile, ja’ xa no’ox ti me ja’ jun vinic lec xchi’uc tsnac’ ta sventa Cajvaltique.

19 Yu’un vu’un ta xcal, xi ti Cajvaltique, naq’uic a sc’ulejalic ta jventa vu’un; ja’ ta xich’ utel ti boch’otic muyuc ta snaq’uic ta jventa vu’une; yu’un muyuc boch’o ta snac’ sc’ulejalic ta jventa vu’un, ja’ no’ox ti boch’otic lequique, xchi’uc ti boch’otic muyuc ta snaq’uic sc’ulejal ta jventa vu’une, ta xich’ utel, xchi’uc sc’ulejal ec xtoc, xchi’uc muyuc boch’o xu’ tspoj ti c’u x-elan la jyich’ utel banamile.

20 Xchi’uc ta xc’ot sc’ac’alil ti cha naq’uic ac’ulejalique, yu’un ja’ avac’oj a vo’ntonic ta sventa c’ulejaletic, xchi’uc ja’ te a vac’ojic a vo’ntonic ta c’ulejaletic, xchi’uc cha nac’ a sc’ulejalic ti c’alal me la jatoic ta sventa a baj contraique; xchi’uc c’u yu’un muyuc xa naq’uic ta jventa vu’un, ti va’yique ta xich’ic utel xchi’uc sc’ulejalic, ti va’ay me sta sc’ac’alile ta xich’ic tuch’esel, xi Cajvaltic.

21 Ja’ jech, vo’xuc, ti yajvaloxuc li’ muc’ta jteclume, a’ybicun ti ca’yejtaque, jech, a’yic ti ya’yej Cajvaltic ta xc’opoje, yu’un ti li’e, ja’ stuc ta xal ti yu’un utbiloxuc ta sventa ac’ulejalique, xchi’uc ti ac’ulejalique jech utbil ec xtoc, yu’un ja’ a vac’oj a vo’ntonic ta stojolal, xchi’uc muyuc xa va’yic ti ya’yejtac ti boch’o ja’ la jyac’boxuque.

22 Muyuc bu cha taic ta na’el ti Cajvaltic ti ja’ a Rioxic ta sventa ti c’u x-elan sts’uiltasojoxuc, ja’ no’ox a na’ojic ti a sc’ulejalique, ja’ muyuc cha tojbeic ta vocol Cajvaltic ti ja’ a Rioxic ta aventaique, jech, ti a vo’ntonique muyuc ta xac’ sbaic ta sventa Cajvaltic, ja’ no’ox mu bisbiluc ti atoyubbailic ta a xchi’iilique, xchi’uc ti ta ep c’usi muyuc stue, it’ix o’ntonale, Pas c’ope, c’usitic mu xtune, milvaneje, xchi’uc scotol ta chop bolililetique.

23 Ja’ jech smelolal ti Cajvaltic Riox la jyac’tal utel ta stojolal li’ banamile, xchi’uc ta stojolal ac’ulejalic xtoque, ti va’aye ja’ ta sventa a bolilic.

24 Jech, ¿abul sba ti li’ jteclum, ta sventa ti c’ot sc’ac’alil ti jech cha nutsic loq’uel lequil viniquetic, xchi’uc ti cha na’leique, xchi’uc ti cha vac’beic tonetique, xchi’uc ti cha milique, xchi’uc ti cha vac’beic epal ta chop bolililetic, jech chac c’u cha’al la spasic ta vo’neje.

25 Ja’ jech tana, ti c’alal cha c’opojique, cha valic: Ti yu’nuc li jchi’uc o no’ox ti c’alal ich’iic jtotic ta vo’neje, muyuc bu la jmiltic lequil viniquetic ti jechuque, xchi’uc muyuc bu la jcac’betic ton xchi’uc muyuc la jnutstic loq’uel ti jechuque.

26 Ja’ jech vo’xuc to tu j-ech’en chopoloxuc jech chac c’u cha’al stuquic, yu’un cuxul ti Cajvaltique, ti me chtal jun lequil vinic ta atojolalic xchi’uc me chal ya’yej Cajvaltic, ti ja’ ta xal ta jamal ta sventa amulic xchi’uc abolilique, jech cha ilinic ta stojolal, xchi’uc cha nutsic loq’uel xchi’uc cha t’unic c’usi scotol ta chopucal xu’ cha milic o, chavalic ti ja’ jun lequil vinic muyuc stue, ti ja’ jun jmulavil xchi’uc ti ja’ ta sventa pucuje, ja’ sventa ti yu’un ta xal ta jamal ta sventa a chopol abtelique.

27 Ja’ jech, me jun vinic c’ot ta atojolalic xchi’uc me jech c’ot yal: pasic ti li’e, muyuc c’usi chopol, xchi’uc pasic ti le’e, mu xa xa chamic o, jech van ta xal: Pasic ti c’u x-elan tsc’an tstoy sba avo’ntonic atuq’uique, jech, pasic ti c’u x-elan tsc’an tstoy sba asatique, xchi’uc pasic ti c’usi tsc’an tspas avo’ntonique—xchi’uc ti me jun vinic chtal ta atojolalic jech chtal yal va’aye cha ch’unic xchi’uc cha valic ti ja’ jun lequil vinique.

28 Jech cha pasic ta muc’ xchi’uc cha vac’beic c’usitic oy avu’nic; cha vac’beic ti a c’anal taq’uinique xchi’uc ti a saquil taq’uinique, xchi’uc ti cha vac’beic lequic ac’uique, yu’un cha valic ti c’opoj ta lequil lo’ile xchi’uc la jyal ti scotol tu jleque, yu’un muyuc c’usi la tabeic chopol ta stojolal.

29 Abul abaic viniquetic ti tu jchopoloxuque xchi’uc ti chopol c’usi chavaq’ue; jteclum ti toj tsots a vo’ntonic xchi’uc ti tu a toyoj avaique; ¡c’uyepal c’ac’al cha sts’icboxuc chavalic ti Cajvaltique? jech, ¡baq’uinto cha comtsan a vaic ta sts’aclinel batel ti boch’otic mu xtunic xchi’uc ti ma’satetique? ¡baq’uintovan cha c’anic ti ic’al ac’ubal xchi’uc saquil osile?

30 Jech, ja’ jech ti sc’ac’al yo’nton Cajvaltique tsanal xa ta a contraic vo’xuc; ja’ jech, ja’ yutoj ti banamil ta sventa a bolilic vo’xuque.

31 Xchi’uc ja’ jech, ta xa xnopajtal sc’ac’alil ti ta xut ac’ulejalic ti c’uxi xc’ataj ta chopol, ti c’uxi mu xa xu’ xa naq’uic oe, ti sc’ac’alil ame’onalique, mu xa xu’ c’u xa vutic.

32 Xchi’uc ti ta sc’ac’alil ame’onalique, ta xa valbe Cajvaltic, xchi’uc jech xa no’ox cha c’opanic, yu’un ti abolilique te xa oy ta atojolalic, xchi’uc ti c’u x-elan cha vich’ic vuq’uesele yu’un jbel xa sc’oplal o; ja’ to te cha oq’uic, xchi’uc cha vilic vocolil ti me sta sc’ac’alile, xi ti Cajvaltic ta vinajele, xchi’uc ja’ to te cha oq’uic xchi’uc cha valic:

33 ¿Jsutesuc o no’ox ti co’ntone, xchi’uc muyucuc o no’ox jmil ti lequil viniquetique xchi’uc ti manchuc o no’ox la jcac’be tone xchi’uc ti la jnuts loq’uele! jech, ti me sta sc’ac’alile cha val: ¿Jech, ti lajuc o no’ox jna’tic ti Cajvaltic Riox ti ja’ Jrioxtic ti ta sc’ac’alil c’alal la jyac’butic jc’ulejaltique, xchi’uc muyuc bu spas ta chopol c’uxi ich’ay cu’untic ti jechuque, yu’un ti li’e ti jc’ulejaltique jato xa ta jtojolaltic!

34 ¿Ja’ jech ti c’alal ta jcomtsantic li’ junuc abtejebale, ti ta yoc’omale muyuc xa teoy; xchi’uc ja’ jech, ta sac ch’ay cu’untic ti jmachitatic ta sc’ac’alil c’alal ta jt’untic sventa pasc’ope!

35 Jech lajxa jnac’tic ti c’ulejaltique, jech xchi’uc mal cu’untic ta sventa xchopolil banamil.

36 Jech, la jsutesticuc o no’ox co’ntontic ti ta sc’ac’alil c’alal tal ta jtojolaltic ya’yej Cajvaltique! yu’un ti li’e, ti banamile, tu jchopol xa xchi’uc scotol ti c’usitic oye pasic xa ta muyuc lec, xchi’uc mu xa xu’ c’uxi xcutic o.

37 Ja’ jech, ta sjoyibtautic pucujetic; jech xchi’uc joybilutic ta yabattac ti boch’otic la sc’an la svuq’ues jch’uleltique, ja’ jech muc’tic no’ox x-elan ti bolililetique. ¿vo’ot Cajval! ¡me mu stac’ xa loq’ues ti sc’ac’al a vo’nton ta jtojolalcutique? ja’ jech x-elan sba ti ava’yejic ti baq’uine.

38 Xchi’uc ja’ jech, ti ac’ac’alilic c’u x-elan cha vich’ic q’uelele jelo xa, jeloven xa ti sc’ac’alil c’u x-elan cha colic ta sventa sbatel osile, xchi’uc ti c’u x-elan cha vich’ic vuq’uesele yu’un persa xa o; jech, yu’un ti ta sc’ac’alil c’u x-elan la ch’iique ja’ la c’anic ti c’usi mu xu’ xa vich’ique, xchi’uc ja’ la t’unic ti c’usitic stac’ xa pasic o bolililetic ti ja’ mu co’oluc sba xchi’uc c’u cha’al liquemtal o no’ox sventa lequilal ti ja’ te o no’ox oy ta smuc’ul xchi’uc ta sventa sbatel osil jpas mantale.

39 ¿Vo’oxuc jnaclejetic li’ ta muc’ta jteclum, ja’ lec ti me cha va’ybicuc ti jc’optaque! xchi’uc ta jc’an ti ac’o xloc’ ta atojolalic ti sc’ac’al yo’nton Cajvaltique, xchi’uc sutesic me ti a vo’ntonic c’uxi xu’ xa colique.