Scriptures
Alma 41


Kapitulu 41

King Pamanyubling Mie ding tau mibangun la king kabiliang alang kapupusan a ligaya o alang kapupusan a kasakitan — Ing karokan kapilanman eya kaligayan — Ding makayatung tau ala lang Dios king yatu — Ing balang tau tanggapan nang pasibayu ing pamibalik ning panugali at katangian a ikua na king bie mortal.

1 At ngeni, anak ku, anggiyang makananu mu atin kung asabi tungkul king pamibalik a mesabi na; uling lawan, ding aliwa beluktut do ring banal a amanu, a mengalili lang marayu uling ning bage iti. At daramdaman ku ing kekayung kaisipan migaganaka ya tungkul king bage iti. Dapot lawan, iisplika ku keka.

2 Sasabian ku keka, anak ku, a ing planu ning pamibalik kailangan ya king justicia ning Dios; uling kailangan ing eganaganang bage mibalik king dapat a kabilian. Lawan, kailangan ya at makajusticia agpang king upaya at pamanyubling mie nang Cristo, a ing kaladua na ning tau dapat yang mibalik king keang katawan, at ing balang parti ning katawan mibalik ya kea.

3 At kailangan ya iti king justicia na ning Dios, a ding tau dapat lang miyatulan agpang king karelang gawa, at nung ding gawa ra mayap king bie iti, at ding kapagnasan ning karelang pusu mayap, ila naman king, tauling aldo, mibalik la king kayapan.

4 At nung ing gawa da marok ing mibalik karela marok. King paralan a ini, ing eganaganang bage mibalik king natural dang balangkas — ing makikamatayan mibangun king alang kamatayan, ing kasiran king alang kasiran — mibangun king alang kapupusan a ligaya para manan ing kayarian ning Dios, o king alang kapupusan a kasakitan para manan ing kayarian ning demonyu, ing metung king metung a gamat, ing aliwa king sumangid —

5 Ing metung a mibangun king ligaya agpang king kapagnasan na king ligaya, o mayap agpang king kapagnasan na king mayap; at ing aliwa king marok agpang king kapagnasan na king marok; uling nung pegnasan na ing gawang marok kilub ning metung a aldo, tanggapan na ing kayablasan a marok potang datang na ing kabengian.

6 At iti makanian mu naman king kasumangid gamat. Nung sinisi ya kareng kasalanan na, at pignasan na ing kayapan angga king katataulian ning keang aldo, makanian mu naman miablasan yang kayapan.

7 Ila pin deni ding meyatbus king Guinu; wa, ila pin deni ding mipalual, a miligtas king alang kapupusan a bengi ning dalumdum; at kanita talakad la o manabu; uling tutu, ila ding sarili dang ukum, nung gawa lang mayap o gawang marok.

8 Ngeni, ding batas ning Dios ela ayalilan; anya pin, ing dalan misadia ya a nung ninuman ing bisang lumakad ketang dalan a ita at miligtas.

9 At ngeni makiramdam ka anak ku, emu pakipagsapalaran ing metung pang kasalanan, laban king kekang Dios karetang puntu ning kapaniwalan, a ika kanita at angga ngeni pakipagsapalaran mu king pamangawang kasalanan.

10 Emu ipagpalage, uling mesabi iti tungkul king pamibalik, a mibalik ka manibatan king kasalanan papunta king kaligayan. Lawan, sasabian ku kekayu, ing karokan kapilanman eya kaligayan.

11 At ngeni, anak ku, ding eganaganang tau atiu king natural a kabilian, o asabi ku, king kabilian a makayatu, atiu la king kasukdulan ning kapaitan at king gapus ning mabayat a pamikasala; ila ala lang Dios king yatu, at ibat nalang linaban king kalikasan ning Dios; at ila atiu la king kabilian a sasabat king kalikasan ning ligaya.

12 At ngeni, kutnan da kayu, ing buri nang sabian ning amanung pamibalik ya ing para kumang metung a bage manibatan king natural a kabilian at ibili ya iti king e natural a kabilian, o para ibili ya iti king kabilian a baligtad king keang natural?

13 O, anak ku, aliwa iti ing pisasabian; dapot ing buri nang sabian ning amanung pamibalik yapin ing ibalik yang pasibayu ing marok king marok, o ing makayatu king makayatu, o makademonyu king makademonyu — mayap para ketang sanung mayap; matulid para ketang sanung matulid; katarungan para ketang sanung makatarungan; mapamakalulu para karetang sanung mapamakalulu.

14 Uli na niti, anak ku, lawan mu nung mapamakalulu ka kareng kekang kapatad; makiyabe kang makatarungan, matul kang mayap, at gawa kang mayap a alang patad; at nung gawan mu ngan deng bage a reni kanita tanggapan mu ing kekang kayablasan; wa, ing lunus mibalik yang pasibayu keka; ing justicia mibalik yang pasibayu keka, at ing mayap a pamanatul mibalik yang pasibayu keka, at ing mayap a kayablasan mibalik yang pasibayu keka.

15 Uling nung nanu ing kekang pepadala yang misubli kekang pasibayu, at mibalik; anya pin, ing amanung pamibalik sisisian ne ing makasalanan, at ene didinan nanumang matulid.