1 Mpindiewu muananyi wa baluma, mona kakesa kakuabu kandi musua kukuambila; bualu ndi mumona ne meji eba adi aditatshisha bitangila dibîka dia ku lufu.

2 Mona, ndi nkuambila ne, kakuena dibîka dia ku lufu to—anyi, mu mêyi makuabu, nengamba ne mubidi wa tshifuaka ewu kena uvuala mubidi udi kawuyi ufua to, mubidi wa dibola ewu kena uvuala mubidi udi kawuyi ubola to—tô ne kunyima kua dilua dia Kilisto.

3 Mona, udi utuala dibîka dia ku lufu dia bafua. Kadi mona, muananyi wa baluma, dibîka dia ku lufu kadiena dianji kufika to. Mpindiewu, ndi nkujinguluila bualu busokoka; nansha nanku, kudi malu masokoka a bungi adi malama, adi muntu kayi mumanya to amu Nzambi nkayenda. Kadi ndi nkuleja tshintu tshimua tshindi muebeja ne dinanukila kudi Nzambi bua mmanya—ne mbitangila dibîka dia ku lufu.

4 Mona, kudi diba dipangidikibua diajuka bonsu ku bafua. Mpindiewu muntu kena mumanya padi diba edi dilua to; kadi Nzambi udi mumanya diba didi dipangidikibua.

5 Mpindiewu, ne biakuikala musangu umua, anyi musangu muibîdi, anyi musangu muisâtu, wajuka bantu ku bafua, kabiena ne bualu to; bualu Nzambi mumanya bintu bionsu; ne mbikumbana bua mema mema kumanya ne bienzeka nanku—ne kudi diba dipangidikibua diajuka bonsu ku bafua.

6 Mpindiewu kudi ne tshia kukuila mutantshi pankatshi pa diba dia lufu ne diba dia dibîka dia ku lufu.

7 Ne mpindiewu ndi ngebeja ne tshinyi tshiafikila anyima ya bantu kumbuka ku diba dia lufu tô ne ku diba didi dipangidikibua bua dibîka dia ku lufu?

8 Mpindiewu nansha kuikala misangu mipita umua mipangidikibua bua bantu kujuka kabiena ne bualu to; bualu bonsu kabena bafua musangu umua to, ne etshi katshiena ne bualu to; bionsu bidi bu dituku dimua kudi Nzambi, ne diba didi dibadibua amu kudi bantu.

9 Bua nanku, kudi diba dipangidikibua bua bantu ne nebajuka ku bafua; ne kudi mutantshi pankatshi pa diba dia lufu ne dibîka dia ku lufu. Ne mpindiewu, bitangila mutantshi wa diba ewu, tshiafikila anyima ya bantu ki tshintu tshimvua muebeja ne dinanukila kudi Mukalenga bua kumanya; ne etshi ki tshintu tshindi mumanya.

10 Ne palua diba diajuka bonsu, pashisha nebamanya ne Nzambi udi mumanya meba onsu adi mapangidikibua bua bukua bantu.

11 Mpindiewu, bitangila ne ngikadilu wa anyima pankatshi pa lufu ne dibîka dia ku lufu—Monayi, bivua bimmanyisha kudi muanjelu ne, nyuma ya bantu bonsu, katataka padiyi ipatuka mu mubidi wa tshifuaka ewu, eyowa, nyuma ya bantu bonsu, nansha ya bantu bimpa anyi babi, idi yalujibua kuabu, kudi Nzambi awu wakayipesha moyo.

12 Ne pashisha nebifika ne, nyuma ya badi bakana idi yakididibua mu ngikadilu wa disanka, udi ubikidibua ne mpaladiso, ngikadilu wa dîkisha, ngikadilu wa ditalala, muaba wikishilabu ku ntatu yabu yonsu ne ku diditatshisha ne dibungama dionsu.

13 Ne pashisha nebifika ne, nyuma ya babi bapita, eyowa, badi bibi—bualu mona, kabena ne kapesa anyi tshitupa tshia Nyuma wa Mukalenga to; bualu mona, bavua basungula bienzedi bibi pa mutu pa bimpa; bua nanku nyuma wa diabulu uvua mubuela munda muabu, ne uvua muakangata nzubu yabu—ne aba nebimanshibua mu mîdima ya pambelu; nekuikala muadi, ne kudilakana, ne disumakana dia menu, ne ebi bua malu mabi abu nkayabu, bikala balombolodibua bakuatshibu ku disua dia diabulu.

14 Mpindiewu ewu udi ngikadilu wa anyima ya bantu babi, eyowa, mu mîdima, ne mu ngikadilu wa dindila dibi ditamba ne bôwa, dia difîka munda didi bu kapia dia tshiji tshia Nzambi kudibu; nanku badi bashala mu ngikadilu ewu, bu mudi bantu bakana bashala mu mpaladiso, tô ne diba dia dibîka dia ku lufu.

15 Mpindiewu, kudi bamua bantu bavua bumvua ne buikadi bua disanka ebu ne buikadi bua dikenga ebu bua anyima, kumpala kua dibîka dia ku lufu, uvua dibîka dia ku lufu dia diambedi. Eyowa, ndi ngitaba ne udi mua kubikidibua ne dibîka dia ku lufu, dijuka dia nyuma anyi anyima ne difidibua diabu ku disanka anyi ku dikenga, bilondeshila ku mêyi adi mâkudibua.

16 Ne mona, bivua biakudibua kabidi, ne kudi dibîka dia ku lufu dia diambedi, dibîka dia ku lufu dia bonsu bavuaku, anyi badiku, anyi bikalaku, kupueka tô ne ku dibîka dia ku lufu dia Kilisto.

17 Mpindiewu, katuena tutshinka ne dibîka dia ku lufu dia diambedi edi, didi diakudibua mu mushindu ewu, didi mua kuikala dibîka dia ku lufu dia anyima ne difidibua diayi ku disanka anyi ku dikenga. Kuena mua kutshinka ne bidi biumvuija nanku to.

18 Mona, ndi nkuambila ne, To; kadi bidi biumvuija ne disangisha pamua dia anyima ne mubidi, dia bavuaku katshia ku matuku a Adama kupueka tô ne ku dibîka dia ku lufu dia Kilisto.

19 Mpindiewu, nansha biasangishibua musangu umua, anyima ne mibidi yonsu ya aba badi bâkudibua, bantu babi ne kabidi bantu bakana, ntshiena ngamba nanku to; bikumbana ne ngamba ne bonsu nebajuka; anyi mu mêyi makuabu, dibîka dia ku lufu diabu nedienzeka kumpala kua dibîka dia ku lufu dia aba bâfua kunyima kua dibîka dia ku lufu dia Kilisto.

20 Mpindiewu, muananyi wa baluma, ntshiena ngamba ne dibîka dia ku lufu diabu didi dilua diba dia dibîka dia ku lufu dia Kilisto; kadi mona, ndi ngamba nanku bilondeshila dimona dianyi, ne anyima ne mibidi bidi bisangishibua kabidi, bia bantu bakana, diba dia dibîka dia ku lufu dia Kilisto, ne dibanda dienda mu diûlu.

21 Kadi ne diba dia dibîka dia ku lufu anyi kunyima, ntshiena ngamba to; kadi mbindi ngamba bungi ebu, ne kudi mutantshi pankatshi pa lufu ne dibîka dia ku lufu dia mubidi, ne ngikadilu wa anyima mu disanka anyi mu dikenga tô ne diba didi Nzambi mupangadika diajuka bafua, ne diasangishibuabu kabidi, anyima ne mubidi, ne dîmanyikibuabu kumpala kua Nzambi, ne dialumbuluishibuabu bilondeshila ku bienzedi biabu.

22 Eyowa, etshi tshidi tshienzeja dipingaja dia bintu didi diakudibua kupitshila ku mikana ya baprofete.

23 Anyima neapingajibua ku mubidi, ne mubidi ku anyima; eyowa, ne tshidimba tshionsu ne dinungu dionsu nebipingajibua ku mubidi wabi; nansha lusuki lua ku mutu lumua kaluakujimina to; kadi bintu bionsu nebipingajibua mu mushindu wabi muakana ne mujima.

24 Ne mpindiewu, muananyi wa baluma, etshi ki dipingaja didi diakudibua kupitshila ku mikana ya baprofete—

25 Ne pashisha bantu bakana nebakenka mu bukalenga bua Nzambi.

26 Kadi mona, lufu lutamba bubi ludi luluila bantu babi; bualu badi bafua bitangila bintu bia buakana; bualu kabena bakana to, ne tshintu tshidi katshiyi tshiakana to katshiena mua kupiana bukalenga bua Nzambi to; kadi nebipatshibua, ne bafidibua bua kudia bimuma bia midimu yabu anyi bienzedi biabu, ivua mikala mibi; ne badi banua binyindanyinda bia dikopu dia bululu.