1 Ne mpindiewu, muananyi wa baluma, ndi ne mêyi makesa makuabu akukuambila adi mashilangana ne amvua muambila muanenu wa baluma; bualu mona, kuena mumona disuminyina dia muanenu wa baluma, lulamatu luenda, ne dinanukila dienda mu dilama dia mikenji ya Nzambi anyi? Mona, kakakuleja tshilejilu tshimpa anyi?

2 Bualu kuena muteya ntema ya bungi ku mêyi anyi bu mudi muanenu wa baluma to, munkatshi mua Bena Zolama. Mpindiewu ebu mbualu bundi nabu kûdi; wakatungunuka tô ne mu diditambisha bua bukola bueba ne lungenyi lueba.

3 Ne ebi kabiena bionsu to, muananyi. Wakenza tshivua tshibi bikola kundi; bualu wakalekela disadila, ne wakaya ku bulaba bua Silona ku mikalu ya Bena Lamana, ulonda Izabela ndumba.

4 Eyowa, uvua mupambula mitshima ya bantu ba bungi; kadi etshi katshivua tshikubingisha to, muananyi. Uvua ne bua kudifila ku disadila diwuvua mupeshibua.

5 Muananyi, kuena mumanya ne malu â adi bualu bupita bubi ku mesu kua Mukalenga; eyowa, bualu bupita bubi kumpala kua mibi yonsu, pa kumbusha dimatshisha dia mashi a muntu udi kayi ne bualu anyi divila dia Nyuma wa Tshijila anyi?

6 Bualu mona, biwavila Nyuma wa Tshijila pakadiye mumana kupeta kaba munda mueba, ne udi mumanya ne udi uvila, mona, etshi tshidi bubi budi kabuyi bubuikidibua to; eyowa, ne ewu yonsu udi ushibeya muntu, mu kushilangana ne muinda ne dimanya dia Nzambi, kabiena biteketa bua yeya kupeta dibuikidila to; eyowa, muananyi wa baluma, ndi nkuambila ne kabiena biteketa bua yeya kupeta dibuikidila to.

7 Ne mpindiewu, muananyi wa baluma, ndi njinga kudi Nzambi bua ne kuikadi mupîla bu bubi bunena ebu to. Ntshivua bua kusombela mibi yeba to, bua kupandisha anyima weba, bu kabiyi bua diakalenga dieba.

8 Kadi mona, kuena mua kusokoka mibi yeba kudi Nzambi to; ne pa kumbusha wewa mukudimuna mutshima nebikala bu tshijadikilu tshiakutuisha ku dituku dia ku ndekelu.

9 Mpindiewu muananyi, ndi musua ne ukudimuna mutshima ne ulekela mibi yeba, ne kulondi kabidi lukuka lua mesu eba to, kadi dipidia mu bintu ebi; bualu pa kumbusha wewa muenza nanku kuena mua kupiana bukalenga bua Nzambi to nansha bishi. Ô, vuluka, ne diambuila bujitu ebu, ne dipidia mu bintu ebi.

10 Ne ndi nkuelela mukenji bua udiambuila bujitu bua kuebeja bakulu beba ba baluma bitangila midimu yeba; bualu mona, udi mu bunsonga bueba, ne udi ne dijinga dia kudîshibua kudi bana benu ba baluma. Ne teya ntema ku mubelu wabu.

11 Kudilekedi bua kupambuishibua kudi tshintu tshia tshianana ne tshisenji nansha tshimua to; kulekedi ne diabulu apambula mutshima weba kabidi mu dilonda dia bandumba babi abu to. Mona, Ô muananyi, bu mudibu bunena bualu bubi buwakatuala pa Bena Zolama; bualu pakamonabu bienzedi bieba bakabenga kuitabuja mêyi anyi.

12 Ne mpindiewu Nyuma wa Mukalenga udi ungambila ne: Elela bana beba mukenji bua benza malu mimpa, bua kabapambuishi mitshima ya bantu ba bungi ku dinyanguka; bua nanku ndi nkuelela mukenji, muananyi, mu ditshina dia Nzambi, bua kubenga malu mabi eba;

13 Ne ukudimuka kudi Mukalenga ne meji, bukitu, ne makanda eba onsu; bua kupambuishi kabidi mitshima ya bantu bua kuenza bubi to; kadi upingana kudibu, ne witabuja mapanga eba ne bubi abu buwuvua muenza.

14 Kukebi mabanji anyi bintu bia tshianana bia pa buloba ebu to; bualu mona, kuena mua kuya nabi to.

15 Ne mpindiewu, muananyi, ndi musua kukuambila kakesa bitangila dilua dia Kilisto. Mona, ndi nkuambila ne, yeya ki walua bushuwa ne nealua bua kumbusha mibi ya ba pa buloba; eyowa, udi ulua kumanyisha bantu benda mukenji mulenga wa lupandu.

16 Ne mpindiewu, muananyi wa baluma, etshi tshivua disadila diwuvua mubikidila, bua kumanyisha bantu aba mukenji mulenga, bua kulongolola meji abu; anyi bua lupandu lulua kudibu, bua balongolola meji a bana babu bua kumvua dîyi diba dialuaye.

17 Ne mpindiewu nempepeja meji eba kakesa pa bualu ebu. Mona, udi ukema bua tshinyi bintu ebi bidi bimanyishibua musangu mula kumpala kua kuenzekabi. Mona, ndi nkuambila ne, anyima kawena ne mushinga kudi Nzambi diba edi bu muikalawu mu diba dia dilua dienda anyi?

18 Kabiena bikengela ne bulongolodi bua disungila bumanyishibua kudi bantu aba momumua ne kudi bana babu anyi?

19 Kabiena biteketa mu diba edi bua Mukalenga kutumaye muanjelu wenda bua kutumanyisha mukenji mulenga ewu bu kudi bana betu, anyi momumua ne kunyima kua diba dia dilua dienda anyi?