1 Muananyi, teka matshi ku mêyi anyi; bualu ndi nditshipa kûdi, ne monsu muwalama mikenji ya Nzambi neulubuluka mu bulaba.

2 Ndi musua ne wenza mumvua muenza, mu kuvuluka bupika bua batatuetu; bualu bavua mu bupika, ne muntu nansha umua kavua mua kubapatuisha to pa kumbusha kabiyi Nzambi wa Abalahama, ne Nzambi wa Isaka, ne Nzambi wa Yakoba; ne bushuwa wakabapatuisha mu ntatu yabu.

3 Ne mpindiewu, Ô muananyi Helamana, mona, udi mu bunsonga bueba, ne bua nanku, ndi nkusengelela ne uteleja mêyi anyi ne ulonga kundi; bualu ndi mumanya ne yonsu weyemena kudi Nzambi, neambuluishibua mu matêta enda, ne mu ntatu yenda, ne mu mpaji yenda, ne neabandishibua ku dituku dia ndekelu.

4 Ne ntshiena musua ne wela meji ne ndi mudimanyina malu â nkayanyi—kabiyi kupitshila ku malu a pa buloba to, kadi ku malu a mu nyuma; kabiyi kupitshila ku meji a mu mubidi to, kadi kudi Nzambi.

5 Mpindiewu, mona, ndi nkuambila, bu mema ntshiyi muledibua kudi Nzambi to, ntshivua mmanya bintu ebi to; kadi Nzambi wakammanyisha bintu ebi ku mukana mua muanjelu wenda munsantu, kabiyi bua bukumbana nansha bumua buanyi nkayanyi to;

6 Bualu mvua ngendakana ne bana ba Mosiya, tukeba bua kubutula ekelezia wa Nzambi; kadi mona, Nzambi wakatuma muanjelu wenda munsantu bua kutuimanyika mu njila.

7 Ne monayi, wakakula kutudi, bu mudi dîyi dia dikubakuba, ne buloba bujima buakazakala muinshi mua makasa etu; ne tuakapona bonsu panshi, bualu ditshina dia Mukalenga diakalua kutudi.

8 Kadi mona, dîyi diakangambila ne: Juka. Ne ngakajuka ne ngakimana kûlu, ne ngakamona muanjelu.

9 Ne wakangambila ne: Biwasua nkayeba bua kubutuka, kukebi kabidi bua kubutula ekelezia wa Nzambi to.

10 Ne biakalua ne ngakapona panshi; ne tshivua bua kunzulula mukana muanyi, anyi kuenzela bidimba bianyi bua mutantshi wa matuku asatu, munya ne butuku to.

11 Ne muanjelu wakangambila bintu bikuabu, biakumvua bana betu ba baluma, kadi ntshiakabiumvua to; bualu pangakumvua mêyi—Bu wewa musua nkayeba bua kufua, kukebi kabidi bua kubutula ekelezia wa Nzambi to—ngakakuatshibua ne bôwa ne dikatshila bikola ne ntshilu pamuapa kubutuka, ki pangakapona panshi ne tshiakumvua kabidi nansha.

12 Kadi ngakakengeshibua ne mpaji ya tshiendelela, bualu anyima wanyi uvua mupandika ku tshipimu tshitamba bunena ne mukengeshibua ne mibi yanyi yonsu.

13 Eyowa, ngakavuluka mibi yanyi yonsu ne malu mabi anyi onsu, angakamuena mpaji ne makenga a ngena; eyowa, ngakamona ne mvua mutombokela Nzambi, ne ntshivua mulama mikenji yenda ya tshijila to.

14 Eyowa, ne mvua mushibeya bana benda ba bungi, anyi mena mubasaka ku dinyanguka; eyowa, ne mu tshikosu malu mabi anyi avua mapita makola, bua ne meji mena a kulua kumpala kua Nzambi avua asumpakaja anyima wanyi ne ditshina didi kadiyi kuamba to.

15 Ô, ngakela meji ne, mvua mua kuipatshibua ne kubutudibua mu nyuma ne mu mubidi, bua tshilu kuimana kumpala kua Nzambi bua kulumbuluishibua to.

16 Ne mpindiewu, mvua mukengeshibua, mena ne makenga a anyima mupîshibua, mu matuku asatu, munya ne butuku.

17 Ne biakalua ne pamvua mukengeshibua nanku ne mpaji, pamvua mupandika moyo ku mvulukilu wa mibi yanyi, mona, ngakavuluka kabidi ne mvua mumvua tatuanyi wamba mêyi a buprofete kudi bantu bitangila dilua dia Yezu Kilisto kapanda, umua Muana wa Nzambi, bua kupikula bua mibi ya ba pa buloba.

18 Mpindiewu, pakakuata meji anyi pa bualu ebu, ngakabila munda mua mu mutshima wanyi ne: Ô Yezu, wewa Muana wa Nzambi, ikala ne lusa kundi mema udi mu kanyonga ka bululu, ne udi munyungulula kudi nkanu ya kashidi ya lufu.

19 Ne mpindiewu, mona, pangakela meji nanku, ntshia kavuluka kabidi makenga anyi to; eyowa, divuluka dia mibi yanyi kadiakampanda moyo kabidi to.

20 Ne ô, disanka kayi, ne bukenka bua dikema kayi bungakamona! eyowa, anyima wanyi uvua muwujibua ne disanka didi ditamba bunena bu muvua dikenga dianyi!

21 Eyowa, ndi nkuambila, muananyi, ne kakuvua mua kuikala tshintu nansha tshimua tshidi tshikola ne tshia bululu bu muvua makenga anyi to. Eyowa, ne ndi nkuambila kabidi, muananyi wa baluma, ne luseka lukuabu, kakuena mua kuikala tshintu nansha tshimua tshidi tshikola ne tshishemakana bu mudi disanka dianyi to.

22 Eyowa, ngakela meji kumona, mena bu muakamona tatuetu Lehi, Nzambi musomba pa nkuasa wenda wa butumbi, munyunguludibua kudi bisumbu bia banjelu bia bungi kabiyi kubala, mu ngikadilu wa kuimba ne kusamuna Nzambi wabu; eyowa, ne anyima wanyi wakajinga kuikala aku.

23 Kadi mona, bidimba bianyi biakapeta bukola buabi kabidi, ne ngakimana pa makasa anyi, ne ngakaleja bantu ne mvua muledibua kudi Nzambi.

24 Eyowa, ne katshia ku diba adi tô ne mpindiewu, ndi muenza mudimu kakuyi dilekela to, bua nduisha anyima ku dikudimuna dia mitshima; bua mbatuala ku dilabula dia disanka ditamba bunena dingakalabula; bua ne baledibua pabu kudi Nzambi, ne buwujibua ne Nyuma wa Tshijila.

25 Eyowa, ne mpindiewu mona, Ô muananyi, Mukalenga udi umpesha disanka dinena menamena bua bualu bua mamuma a midimu yanyi;

26 Bualu bua dîyi didiye mumpesha, mona, ba bungi bakaledibua kudi Nzambi, ne bakalabula bu mungakalabula, ne bakadimuena ne mesu bu mungakadimuena; bua nanku mbamanya bintu bingakakula, bu mundi mubimanya; ne dimanya dindi nâdi didi difumina kudi Nzambi.

27 Ne ngakakuatshishibua mu matêta ne mu ntatu ya mishindu yonsu, eyowa, ne mu mishindu yonsu ya mpaji; eyowa, Nzambi wakampatuisha mu buloko, ne mu mionji, ne mu lufu; eyowa, ne ndi mueyemena kudiye, ne neampatuisha kabidi.

28 Ne ndi mumanya ne neanjula ku dituku dia ndekelu, bua kusomba nenda mu butumbi; eyowa, ne nemmutumbisha bua kashidi, bualu wakapatula batatuetu mu Ejipitu, ne wakadînyisha Bena Ejipitu mu Mbuwa Mukunza; ne wakabalombola ku bukola buenda mu bulaba bulaya; eyowa, ne wakabapatuisha mu bupika ne mu bukuatshibu ku tshikondu ne tshikondu.

29 Eyowa, ne wakapatula kabidi batatuetu mu bulaba bua Yelushalema; ne wakabapatuisha kabidi mu bupika ne mu bukuatshibu, ku bukola buenda bua kashidi, ku tshikondu ne tshikondu mena tô ne lelu ewu; ne ngakashala diba dionsu mu tshivulukilu tshia bukuatshibu buabu; eyowa, ne udi peba ne tshia kushala mu tshivulukilu tshia bukuatshibu buabu, bu mungakenza.

30 Kadi mona, muananyi; ebi nki mbionsu to; bualu udi ne tshia kumanya bu mundi mumanya, bua ne monsu muwalama mikenji ya Nzambi neulubuluka mu bulaba; ne udi ne tshia kumanya kabidi ne, monsu muwapanga kulama mikenji ya Nzambi, neukoshibua ku mpala kuenda. Mpindiewu etshi tshidi bilondeshila ku dîyi dienda.