1 Mpindiewu kunyima kua Alama muakula mêyi â, bakatuma dîyi kudiye bajinga kumanya ne badi ne tshia kuitabuja Nzambi umuepela, bua bapeta tshimuma tshivuaye muamba, anyi munyi mudibu ne bua kukuna dimînu, anyi dîyi divuaye muamba, divuaye muamba ne didi ne tshia kukunyibua mu mitshima yabu; anyi mushindu kayi udibu ne bua kubanga kuenzela ditabuja diabu.

2 Ne Alama wakabambila ne: Monayi, nuvua bamba ne kanuena mua kutendelela Nzambi wenu bualu nudi bipatshibua mu nsunagoga yenu. Kadi monayi, ndi nnuambila ne, binuikala nuela meji ne kanuena mua kutendelela Nzambi, nudi nupambuka bikola, ne nudi ne tshia kukebulula mifundu; binuikala nuela meji ne ivua minulongesha nanku, kanuena nuyumvua to.

3 Nudi nuvuluka babala bivua Zenose, muprofete wa kala, muamba bitangila disambila anyi ditendelela anyi?

4 Bualu wakamba ne: Udi ne lusa, Ô Nzambi, bualu wakumvua disambila dianyi, nansha pamvua mu tshipela; eyowa, uvua ne lusa pangakasambila bitangila bobu bavua bena lukuna banyi, ne wakashintulula meji abu kundi.

5 Eyowa, Ô Nzambi, ne uvua ne lusa pangakabila kûdi mu budimi buanyi; pangakabila kûdi mu disambila dianyi, ne wakangumvua.

6 Ne kabidi, Ô Nzambi, pangakaya ku nzubu muanyi wakangumvua mu disambila dianyi.

7 Ne pangakata ku kazubu kanyi ka tshisokomenu, Ô Mukalenga, ne pangakakusambila, wakangumvua.

8 Eyowa, udi ne lusa kudi bana beba padibu babila kûdi, bua bumvuibua kûdi, ne kabiyi kudi bantu to, ne neubumvua.

9 Eyowa, Ô Nzambi, uvua ne lusa kundi, ne wakumvua mbila yanyi munkatshi mua masangisha a bantu beba.

10 Eyowa, ne uvua mungumvua kabidi pamvua muipatshibua ne pavua bena lukuna banyi bampetula; eyowa, wakumvua mbila yanyi, ne wakafîkila bena lukuna banyi tshiji, ne wakabakumbula mu tshiji tshieba ne dinyanguka dia lukasa.

11 Ne wakangumvua bua ntatu yanyi ne bulelela buanyi; ne mbua Muaneba ki pawuvua ne lusa nanku kundi, bua nanku nembila kûdi mu ntatu yanyi yonsu, bualu disanka dianyi didi kûdi; bualu udi mumbusha bitungu bieba kula nanyi, bua bualu bua Muaneba.

12 Ne mpindiewu Alama wakabambila ne: Nudi nuitabuja mifundu ayi idi mifunda kudi bantu ba kala anyi?

13 Monayi, nuena bitabuja, nudi ne tshia kuitabuja biakamba Zenose; bualu, monayi, wakamba ne: Udi mumbusha bitungu bieba kula nanyi bua bualu bua Muaneba.

14 Mpindiewu monayi, bana betu, ndi nuebeja ne nudi babala mifundu anyi? Nuenu babala, munyi munudi mua kubenga kuitabuja Muana wa Nzambi?

15 Bualu kabiena bifunda ne Zenose nkayenda wakamba bintu ebi to, kadi Zenoke kabidi wakamba bintu ebi—

16 Bualu monayi, wakamba ne: Udi mufîkila bantu aba tshiji, Ô Mukalenga, bualu badi babenga kumvua midimu ya lusa lueba iwudi mubapesha bua bualu bua Muaneba.

17 Ne mpindiewu, bana betu, nudi numona ne muprofete muibîdi wa kala mmujadika bua Muana wa Nzambi, ne bualu bantu bakabenga kumvua mêyi enda, bakamuasa mabua tô ne ku lufu.

18 Kadi monayi, kabiena bionsu to; aba kabena nkayabu bavua bakula bitangila Muana wa Nzambi to.

19 Monayi, Mose wakakula buenda; eyowa, ne monayi tshifuanyikiji tshiakimanyishibua mu tshipela, bua ewu yonsu watshitangila ikala ne moyo. Ne ba bungi bakatangila ne bakikala ne moyo.

20 Kadi bantu bakesa bakumvua diumvuija dia malu â, ne etshi bua bualu bua dipapa dia mitshima yabu. Kadi kuvua ba bungi bavua bapapishibua bikola mua ne bakabenga kutangila, bua nanku bakafua. Mpindiewu kipatshila kavuabu babengela kutangila, kadi bualu kabakitabuja ne kuvua kubôndopa to.

21 Ô bana betu, bu nuenu mua kôndopibua amu mu dikupa dia mesu enu bua nôndopibua, kanuakutangila lukasa anyi, anyi nudi nunanga kupapisha mitshima yenu mu dipanga dia ditabuja, ne bikala bafuba, mu mushindu wa ne kanuakukupa mesu enu to, mu mushindu wa ne nufua anyi?

22 Biobi nanku, diakabi nedilua kunudi; kadi biobi kabiyi nanku to, apu kupayi mesu enu ne bangayi kuitabuja Muana wa Nzambi, bua ne nealua bua kusungila bantu benda, ne neakenga ne neafua bua kupikula mibi yabu; ne neajuka kabidi ku bafua, tshiavuija dibîka ku lufu, bua ne bantu bonsu nebimana kumpala kuenda, bua kulumbuluishibua mu dituku dia ku nshikidilu ne dituku dia tshilumbuluilu, bilondeshila bienzedi biabu.

23 Ne mpindiewu, bana betu, ndi njinga ne nenukuna dîyi edi mu mitshima yenu, ne bu mudidi dibanga kudiunda mena nanku nudidîsha ku ditabuja dienu. Ne monayi, nedilua mutshi, ukola munda muenu tô ne ku moyo wa kashidi. Ne pashisha Nzambi anuanyishila ne majitu enu ikala mapepela, kupitshila ku disanka dia Muanenda. Ne nudi mua kuenza bionsu ebi binuasa. Amena.