1 Ne biakalua ne bakaya, ne bakabanga kuyisha dîyi dia Nzambi kudi bantu, babuela mu nsunagoga yabu, ne mu nzubu yabu; eyowa, ne bakayisha mena dîyi mu misêsu yabu.

2 Ne biakalua ne kunyima kua kuenza mudimu mukola munkatshi muabu, bakabanga kupeta diakalengela munkatshi mua bapela ba mu bantu; bualu monayi, bavua bipatshibua mu nsunagoga yabu bua disunsuka dia bilamba biabu—

3 Bua nanku kabavua banyishibua bua kubuela mu nsunagoga yabu bua kutendelela Nzambi to, bualu bana babu bavua babamona bu bukoya; bua nanku bavua bapela; eyowa, bana babu bavua babamona ne bisota; bua nanku bavua bapela ku bintu bia pa buloba; ne bavua bapela mu mitshima yabu.

4 Mpindiewu, bumuvua Alama ulongesha ne wakula kudi bantu pa mukuna wa Onida, musumba munena wa bantu wakalua kudiye, bavua bobu batuvua tuakula bualu buabu, bavua bapela mu mutshima, bua bupela buabu ku bintu bia pa buloba.

5 Ne bakalua kudi Alama; ne umua uvua wa kumpala munkatshi muabu wakamuambila: Mona, bana betu aba nebenza tshinyi, bualu bantu bonsu badi babapetula bua bupela buabu, eyowa, ne nangananga bakuidi betu; bualu mbatuipata mu nsunagoga yetu ituvua benzela bikola bua kuyibaka ne bianza bietu; ne mbatuipata bua bupela buetu butamba bungi; ne katuena ne muaba wa kutendelela Nzambi to; ne mona, netuenza tshinyi?

6 Ne mpindiewu pakumvua Alama nanku, wakakudimuka kudibu, mpala wenda mumutangila, ne wakatangila ne disanka dia bungi; bualu wakamona ne ntatu yabu ivua mibapuekesha bulelela ne bavua balongolodibua bua kumvua dîyi.

7 Bua nanku kakakula kabidi kudi musumba mukuabu awu to; kadi wakôlola tshianza tshienda, ne wakabila kudi aba bakamonaye, bavua bakudimuna mutshima bulelela, ne wakabambila:

8 Ndi mumona ne nudi ne didipuekesha mu mutshima; ne pikalabi nanku, nudi babeneshibua.

9 Monayi muanenu wambi ne: Netuenza tshinyi?—bualu tudi bipatshibua mu nsunagoga yetu, ne katuena mua kutendelela Nzambi wetu to.

10 Monayi ndi nnuambila ne, nudi nuela meji ne kanuena mua kutendelela Nzambi amu pikalabi mu nsunagoga yenu anyi?

11 Ne menamena kabidi, ndi nuebeja ne, nudi nuela meji ne kanuena ne tshia kutendelela Nzambi to amu musangu umua ku lumingu anyi?

12 Ndi nnuambila ne, bidi bimpa ne nudi bipatshibua mu nsunagoga yenu, bua nudipuekesha, ne bua nulonga lungenyi; bualu bidi bikengela ne nulonga lungenyi; nanku bidi ne, bualu nudi bipatshibua ne bapetudibua kudi bana benu bua bualu bua bupela buenu butamba bungi, ki bua tshinyi nudi benzejibua bua kudipuekesha mu mutshima; bualu biakakengela nuenzejibua bua kudipuekesha.

13 Ne mpindiewu, bualu nudi benzejibua bua kudipuekesha nudi babeneshibua; bualu muntu misangu mikuabu, padiye muenzejibua bua kudipuekesha, udi ukeba dikudimuna dia mutshima; ne mpindiewu bushuwa, ewu yonsu udi ukudimuna mutshima neapeta lusa; ne ewu udi upeta lusa ne unanukila tô ne ku ndekelu yeya neapandishibua.

14 Ne mpindiewu, bu mumvua munuambila, ne bualu nuvua benzejibua bua kudipuekesha nudi babeneshibua, kanuena nuela meji ne badi badipuekesha nkayabu bua dîyi badi babeneshibua kupita anyi?

15 Eyowa, ewu udi udipuekesha nkayenda bulelela, ne ukudimuna mutshima bua mibi yenda, ne unanukila tô ne ku ndekelu, yeya neabeneshibua—eyowa, neabeneshibua bia bungi kupita aba badi benzeja bua kudipuekesha bua bupela buabu butamba bungi.

16 Bua nanku, babeneshibua badi aba badi badipuekesha kabayi benzeja bua kudipuekesha; anyi nanku, mu mêyi makuabu, mubeneshibua ngudi witabuja dîyi dia Nzambi, ne utambula kayi ne dipapisha dia mutshima to, eyowa, kayi utuadibua bua kumanya dîyi to, anyi mena wenzejibua bua kumanya, kumpala kua bobu kuitabuja.

17 Eyowa, kudi ba bungi badi bamba ne: Biwatuleja tshimanyinu tshia mu diûlu, apu netumanya bushuwa; pashisha netuitabuja.

18 Mpindiewu ndi ngebeja, etshi nditabuja anyi? Monayi, ndi nnuambila ne, To; bualu muntu yeya mumanya tshintu, kena bualu ne kuitabuja to, bualu udi mutshimanya.

19 Ne mpindiewu, bu mudiye mutshipibua ewu udi mumanya disua dia Nzambi, ne kayi udienza to, mupita ewu udi amu witabuja, anyi udi bualu amu ne kuitabuja, ne udi upona mu disambuka dia mikenji anyi?

20 Mpindiewu jingululayi bualu ebu. Monayi, ndi nnuambila ne, bidi ku luseka lumua bu mudibi ku luseka lukuabu; ne nebikala kudi muntu yonsu bilondeshila mudimu wenda.

21 Ne mpindiewu bu mungambi bitangila ditabuja—ditabuja kadiena kuikala ne dimanya dijima dia malu to; bua nanku binuikala ne ditabuja, nudi nutekemena ku malu adi kâyi mamona to, kadi mikala malelela.

22 Ne mpindiewu, monayi, ndi nnuambila ne, ndi musua ne nuvuluka, ne Nzambi udi ne lusa kudi bonsu badi bitabuja mu dîna dienda; bua nanku udi ujinga, diambedi, ne nuitabuja, eyowa, mena mu dîyi dienda.

23 Ne mpindiewu, udi upesha bantu dîyi dienda kupitshila ku banjelu, eyowa, ba baluma nkayabu to kadi ne bakaji kabidi. Mpindiewu ebi nki bionsu to; bana bateketa badi bapeshibua mêyi misangu ya bungi, adi apuwisha bena lungenyi ne bantu balonga.

24 Ne mpindiewu, bana betu bananga, bu munudi nujinga bua kumanya kundi tshinyi tshinuenza bualu nudi batatshishibua ne bipatshibua—mpindiewu ntshiena njinga bua nutshinka ne ndi musua kunulumbuluisha to, pa kumbusha bilondeshila ku tshidi bulelela—

25 Bualu ntshiena musua kuamba ne bonsu buenu nuvua benzejibua bua kudipuekesha to; bualu ndi ngitabuja bulelela ne kudi bamua munkatshi muenu bavua mua kudipuekesha nkayabu, nansha malu abu mikala mushindu kayi.

26 Mpindiewu, bu mungambi bitangila ditabuja—ne kadivua dimanya dijima to—mena nanku bidi bua mêyi anyi. Kanuena mua kumanya bua bushuwa buawu musangu umua, ku bujima, momumua kabidi ne ditabuja kadiena dimanya dijima to.

27 Kadi monayi, binuabîka ne kujula makôkeshi enu, mena ne ku didikija dia mêyi anyi, ne kuenzela kanungu ka ditabuja, eyowa, mena nansha nuenu amu mua kujinga kuitabuja, lekelayi dijinga edi dienza mudimu munda muenu, mena tô ne panuitabuja mu mushindu unudi mua kushiya muaba bua tshitupa tshia mêyi anyi.

28 Mpindiewu, netufuanyikija dîyi ku dimînu. Mpindiewu, binuashiya muaba, bua ne dimînu dimona mua kukunyibua mu mutshima wenu, monayi, bikaladi dimînu dilelela, anyi dimînu dimpa, binuikala kanuyi badimansha to bua dipanga ditabuja dienu, mu mushindu wa ne nenukolela Nyuma wa Mukalenga, monayi, nedibanga kudiunda mu tshiadi tshienu; ne panumvua manyunganyi a didiunda â, nenubanga kuamba munda muenu ne—Dimînu edi didi ne tshia kuikala dimpa, anyi ne muaku udi muimpa, bualu diabangi kunenesha anyima wanyi; eyowa, diabangi kutokesha ngumvuilu wanyi, eyowa, diabangi kuikala dilenga kundi.

29 Mpindiewu monayi, etshi katshiakudiundisha ditabuja dienu anyi? Ndi nnuambila ne, Eyowa; nansha nanku kadiena dikola dilua dimanya dijima to.

30 Kadi monayi, bu mudi dimînu didiunda, ne ditoloka, ne dibanga kusasa, pashisha nudi ne tshia kuamba ne dimînu didi dimpa; bualu monayi didi didiunda, ne didi ditoloka, ne didi dibanga kusasa. Ne mpindiewu, monayi, etshi katshiakukolesha ditabuja dienu anyi? Eyowa, netshikolesha ditabuja dienu: bualu nenuamba ne ndi mumanya ne didi dimînu dimpa; bualu monayi didi ditoloka ne dibanga kusasa.

31 Ne mpindiewu, monayi, nudi bamanya bushuwa ne edi didi dimînu dimpa anyi? Ndi nnuambila ne, Eyowa; bualu dimînu dionsu didi dikuama bimuma bia momumua nâdi.

32 Bua nanku, dimînu diodi disasa didi dimpa, kadi diodi kadiyi disasa to, monayi kadiena dimpa to, bua nanku didi dimanshibua.

33 Ne mpindiewu, monayi, bualu nuvua batêta didikija, ne nuvua bakuna dimînu, ne diadiundi, ne diatoloki, ne diabangi kusasa, nudi ne tshia kumanya ne dimînu didi dimpa.

34 Ne mpindiewu, monayi, dimanya dienu didi dijima anyi? Eyowa, dimanya dienu didi dijima ku bualu abu, ne ditabuja dienu didi dilala; ne didi nanku bualu nudi bamanya, bualu nudi bamanya ne dîyi ndidiundisha anyima yenu, ne nudi bamanya kabidi ne nditoloka, ne ngumvuilu wenu udi ubanga kutokeshibua, ne meji enu adi abanga kutanta.

35 Ô nanku, etshi mbushuwa anyi? Ndi nnuambila ne, Eyowa, bualu etshi tshidi muinda; ne tshionsu tshidi muinda, tshidi tshimpa, bualu tshidi tshijunguludibua, bua nanku nudi ne tshia kumanya ne tshidi tshimpa; ne mpindiewu monayi, kunyima kua nuenu balabula muinda ewu dimanya dienu didi dijima anyi?

36 Monayi ndi nnuambila ne, To; anyi kanuena ne tshia kuteka ditabuja dienu ku mpenga to, bualu nudi amu benzela ditabuja dienu mu dikuna dia dimînu bua nuenu kutêta didikija bua kumanya pikala dimînu ne didi dimpa.

37 Ne monayi, padi mutshi ubanga kusasa, nenuamba ne: Tuwudîshayi ne ntema mikola, bua ulepesha miji, bua usasa, ne utukuamina bimuma. Ne mpindiewu monayi, panuawudîsha ne ntema ya bungi neulepesha miji, ne neusasa, ne neukuama bimuma.

38 Kadi nuenu balengulula mutshi, ne kanuyi nuela meji bua kuwudîsha to, monayi kawakulepesha muji nansha umua to; ne palua kapia ka diba ne kawôsha, neufubidila bualu kawena ne miji to, ne nenuwujula ne nenuwimansha.

39 Mpindiewu, ebi kabiena ne bualu dimînu kadivua dimpa to, anyi mbualu bimuma biadi kabivua bijingibua to; kadi mbualu buloba buenu budi bua munanga, ne kanuena nubenga kudîsha mutshi, bua nanku kanuena mua kupeta bimuma biawu to.

40 Ne nanku, panudi nubenga kudîsha dîyi, nutekemena bimuma biadi ne disu dia ditabuja, kanuena mua kupôla bimuma bia mutshi wa moyo nansha.

41 Kadi panuadîsha dîyi, eyowa, nudîsha mutshi padiwu usasa, ku ditabuja dienu ne dinanukila dinena, ne ditukija, nutekemena bimuma biawu, newela miji; ne monayi newikala mutshi udi ukola tô ne mu moyo wa kashidi.

42 Ne bualu bua dinanukila dienu ne ditabuja dienu ne ditukija dienu mu didîsha dia dîyi, bua wela miji munda muenu, monayi, ku kakesa ku kakesa nenupôla bimuma biadi, tshidi mushinga mupita, tshidi tshilenga kupita bionsu bidi bilenga, ne tshidi tshitoka kupita bionsu bidi bitoka, eyowa, ne tshikezuka kupita bionsu bidi bikezuka; ne nenudia bimuma ebi bia bungi tô ne panûkuta, bua kanumvu nzala to, anyi kanumvu nyota to.

43 Pashisha, bana betu, nenupôla mafutu a ditabuja dienu, ne dinanukila dienu, ne ditukija dienu, ne bulekelelu buenu, bikala bindila bua mutshi unukuamina bimuma.